ᐊᑕᓃᑦ ᓯᕗᓪᓖᑦ 17
17
ᐃᓔᑦᔭᐅᑉ ᐅᖃᐅᓯᖃᕐᓂᖓ ᓯᓚᓗᓛᖏᓐᓂᖓᓂᒃ
1 #
ᔧᒥᓯ 5:17. ᐃᓔᑦᔭ ᑎᓯᐰᑎᒥᐅᑕᖅ, ᒋᓕᐊᑏᑦ ᓄᓇᖓᓂᑦ, ᐅᖃᕐᐳᖅ ᐂᕼᐊᑉᒧᑦ, “ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓ ᐃᓅᖕᒪᑦ, ᑖᑦᓱᒪ ᓵᖓᓂ ᓇᖏᕐᐳᖓ, ᐂᔪᖓᓇᕐᑐᖃᕐᓂᐊᓐᖏᓚᖅ ᓯᓚᓗᖃᕐᓂᐊᕈᓐᓃᕐᓗᓂᓗ ᐊᕐᕌᒍᓂ ᑖᒃᑯᓇᓂ, ᐱᖁᔨᓕᕐᓗᖓ ᐅᖃᓚᐅᖏᓐᓂᓐᓂ.”
2ᐊᑕᓂᐅᓪᓗ ᐅᖃᐅᓯᖓ ᑎᑭᑉᐳᖅ ᑖᑦᓱᒧᖓ, ᐅᖃᕐᓗᓂ, 3“ᑕᒫᓐᖓᑦ ᐊᐅᓪᓚᓕᕆᑦ ᓯᕿᓐᓂᓕᕐᕕᐅᑉ ᓇᓛᓄᑦ, ᐃᔨᕐᓗᑎᓪᓗ ᑰᖕᒧᑦ ᓯᐊᕆᔅᒧᑦ, ᔪᐊᕐᑕᓂᒧᑦ ᑰᒃᑐᒧᑦ. 4ᑕᕝᕙᓐᖓᓪᓗ ᑰᒐᓛᖕᒥᑦ ᐃᒥᖃᑦᑕᕈᒫᕐᐳᑎᑦ, ᑐᓗᒊᓪᓗ ᑎᓕᔪᒫᕐᐸᒃᑲ ᐃᓕᖕᓂᒃ ᓂᕆᑎᑦᓯᖁᓪᓗᒋᑦ.”
5ᑕᕝᕙ ᑕᕝᕙᓐᖓᑦ ᐊᐅᓪᓚᕐᐳᖅ ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ; ᐂᓪᓗᓂᓗ ᑰᖕᒧᑦ ᓯᐊᕆᔅᒧᑦ, ᔪᐊᕐᑕᓂᒧᑦ ᑰᒃᑐᒧᑦ. 6ᑐᓗᒊᑦ ᐂᑦᑐᐃᖃᑦᑕᓚᐅᕐᐳᑦ ᓂᐊᖂᔭᒥᑦ ᓂᕿᒥᒡᓗ ᐅᓪᓛᒃᑯᑦ, ᐅᓐᓄᒃᑯᓪᓗ ᑍᒫᑦᓮᓐᓇᖅ, ᑰᒐᓛᖕᒥᓪᓗ ᐃᒥᖃᑦᑕᓚᐅᕐᐳᖅ. 7ᐊᑯᓂᐅᖏᑦᑐᕐᓗ ᑰᒃ ᐸᓂᕐᐳᖅ, ᓯᓚᓗᓚᐅᖏᒻᒪᑦ ᓄᓇᒥ.
ᐃᓔᑦᔭᓗ ᐅᐃᒡᒐᕐᓂᕐᓗ ᔨᕆᐸᑕᒥ
8ᐊᑕᓂᐅᑉ ᐅᖃᐅᓯᖓᓄᑦ ᑎᑭᑕᐅᕗᖅ, ᐅᖃᕐᓗᓂ, 9#ᓘᑲᓯ 4:25,26.“ᒪᑭᓕᕆᑦ, ᐂᓗᑎᓪᓗ ᔨᕆᐸᑕᒧᑦ, ᓮᑐᓂᒦᑦᑐᒧᑦ, ᑍᑲᓃᓕᕐᓗᑎᓪᓗ. ᑕᑯᒋ, ᐅᐃᒡᒐᕐᓂᕐᒥᒃ ᑎᓕᓯᕗᖓ ᐃᓕᖕᓂᒃ ᓂᕆᑎᑦᓯᖃᑦᑕᖁᓪᓗᒍ.” 10ᑕᕝᕙ ᒪᑭᑉᐳᖅ ᐊᐅᓪᓚᕐᓗᓂᓗ ᔨᕆᐸᑕᒧᑦ; ᐃᒡᓗᒐᓮᓪᓗ ᐃᑎᕐᑕᕐᕕᖓᓄᑦ ᑎᑭᓐᓇᒥ, ᐅᐃᒡᒐᕐᓂᕐᑕᖃᓚᐅᕐᐳᖅ ᑲᑎᕐᓱᐃᔪᒥᒃ ᕿᔪᖕᓂᒃ ᐃᑯᐊᓪᓚᖅᑯᑎᒃᓴᓂᒃ; ᑕᕝᕙ ᕾᖁᕚ ᐅᖃᐅᑎᓪᓗᒍᓗ, “ᐃᒥᕐᒥᒃ ᒥᑭᔪᒥᒃ ᕾᑦᓯᓚᐅᕆᑦ ᐃᒥᐅᑎᒧᑦ, ᐃᒥᕐᓂᐊᕋᒪ.” 11ᐂᒃᓯᓕᕐᑎᓪᓗᒍ, ᕾᖁᕚ ᐅᖃᐅᑎᓪᓗᒍᓗ, “ᓂᐊᑰᔭᒥᒡᓗ ᒥᑭᔪᒥᒃ ᐱᓯᒪᔭᕐᓂᒃ ᕾᑦᓯᓗᑎᑦ.”
12ᑖᓐᓇᓗ ᑭᐅᕗᖅ, “ᐊᑕᓃᖅ ᒎᑏᑦ ᐃᓅᖕᒪᑦ, ᓂᐅᖂᔭᒥᒃ ᐆᑕᒃᓴᖃᓐᖏᓚᖓ, ᐃᑎᒪᓐᓄᑦ ᑭᓯᐊᓂ ᓈᒻᒪᒃᑐᒥᒃ ᓂᐊᖂᔭᒃᓴᖃᕐᐳᖓ ᐴᒍᑕᕐᒦᑦᑐᒥᒃ, ᐅᕐᓱᒥᒡᓗ ᒥᑭᔪᒥᒃ; ᒫᓐᓇᓗ, ᕿᔪᖕᓂᒃ ᐃᑯᐊᓪᓚᖅᑯᑎᒃᓴᓂᒃ ᑲᑎᕐᓱᐃᕗᖓ ᓂᐊᖂᔭᓕᐅᕈᒪᓪᓗᖓ ᐃᕐᓂᕋᓗ ᓂᕆᐊᕐᔪᒍᓐᓇᖁᓪᓗᓄᒃ, ᑭᖑᓂᐊᒍᓪᓗ ᑐᖁᓗᓄᒃ.”
13ᑕᕝᕙ ᐃᓔᑦᔭᐅᑉ ᐅᖃᐅᑎᕚ, “ᑲᑉᐱᐊᓱᒃᑍᓕᒋᑦ; ᐂᓕᕆᑦ ᐅᖃᐅᓯᕆᔭᑎᑦ ᑲᔪᓯᑎᓕᒃᑭᑦ; ᑭᓯᐊᓂᓕ ᒥᑭᔪᒥᒃ ᓂᐊᖂᔭᓕᐅᖅᑳᕐᑐᒃᓴᐅᕗᑎᑦ ᐅᕙᓐᓄᑦ ᕾᓪᓗᒍᓗ, ᑭᖑᓂᐊᒍᑦ ᐃᓕᖕᓄᑦ ᐃᕐᓂᕐᓄᓪᓗ ᓂᐊᖂᔭᓕᐅᕐᑐᒃᓴᐅᕗᑎᑦ. 14ᐊᑕᓂᖅ, ᐃᓴᕆᐊᓕᒥᐅᑦ ᒎᑎᖓ ᐃᒫᒃ ᐅᖃᕐᐳᖅ, ‘ᓂᐊᖂᔭᒃᓴᖅ ᐴᒍᑕᕐᒦᑦᑐᖅ ᓄᖑᓐᓂᐊᓐᖏᓚᖅ, ᐅᕐᓱᕐᓗ ᐴᒍᑕᕐᒦᑦᑐᖅ ᓴᓗᐊᕐᓂᐊᓐᖏᓚᖅ, ᐊᑕᓂᖅ ᓯᓚᓗᒃᑎᑦᓯᓚᐅᖅᑳᕐᑎᓐᓇᒍ ᓄᓇᒥ.’”
15ᑕᕝᕙ ᐊᕐᓇᖅ ᑍᒫᒃ ᐱᓇᓱᐊᓚᐅᕐᐳᖅ ᐃᓔᑦᔭᐅᑉ ᐅᖃᐅᓯᕆᔭᖏᑦ ᒪᓕᒡᓗᒋᑦ; ᑖᓐᓇᓗ, ᐊᕐᓇᐅᓪᓗ ᐃᒡᓗᒥᐅᖃᑎᖏᑦ ᓂᕆᖃᑦᑕᓚᐅᕐᐳᑦ ᐅᓪᓗᓂᒃ ᐅᓄᕐᑐᓂᒃ. 16ᓂᐊᖂᔭᒃᓴᖅ ᐴᒍᑕᕐᒦᑦᑐᖅ ᓄᖑᓚᐅᓐᖏᓚᖅ, ᐅᕐᓱᕐᓗ ᓴᓗᐊᓚᐅᓐᖏᓚᖅ, ᐊᑕᓂᐅᑉ ᐅᖃᐅᓯᖏᑦ ᐃᓔᑦᔭᒃᑯᑦ ᐅᖃᐅᓯᕆᓚᐅᕐᑕᖏᑦ ᒪᓕᒡᓗᒋᑦ.
17ᑕᒪᑐᒪ ᑭᖑᕐᖓᒍᑦ ᐊᕐᓇᐅᑉ ᐃᒡᓗᒥᒃ ᓇᖕᒥᓂᓕᐅᑉ ᐃᕐᓂᖓ ᖃᓂᒻᒪᒃᐳᖅ; ᖃᓂᒪᓂᕐᒥᓄᑦ ᐱᐅᔪᓐᓃᕐᐸᓪᓕᐊᒐᒥ ᐊᓂᕐᓂᖃᕈᓐᓃᕐᐳᖅ. 18ᑕᕝᕙ ᐊᕐᓇᖅ ᐃᓔᑦᔭᒧᑦ ᐅᖃᕐᐳᖅ, “ᒎᑎᐅᑉ ᐃᓄᖁᑎᖓ, ᓱᓇᒥᒃ ᐅᕙᓐᓄᑦ ᓈᒻᒪᒃᓴᖏᑦᔪᑎᖃᕐᐱᑦ? ᐊᔪᕐᑐᓕᓂᓐᓃᒃ ᐃᖅᑬᑎᑦᓯᔭᕐᑐᕐᐲᑦ, ᐃᕐᓂᕋᓗ ᑐᖁᑎᓪᓗᒍ?”
19ᐃᓔᑦᔭᐅᑉ ᐅᖃᐅᑎᕚ, “ᐃᕐᓃᑦ ᕾᓚᐅᕈᒃ.” ᑎᒍᕚᓗ ᑖᑦᓱᒪᓐᖓᑦ, ᐊᒡᔭᕐᓗᒍᓗ ᖁᓛᓄᑦ, ᐃᒡᓗᕈᓯᕐᒥᓄᑦ ᓇᔪᕐᑕᒥᓄᑦ, ᐃᒡᓕᕐᒥᓄᓪᓗ ᓇᓪᓚᕐᑎᑉᐹ. 20ᓂᐱᖅᑯᕐᑐᓪᓗᓂᓗ ᐊᑕᓂᕐᒧᑦ ᑐᒃᓯᐊᕐᐳᖅ, “ᐊᑕᓃᖅ ᒎᑏᒃ, ᕿᒃᓵᖕᓇᕐᑐᖃᕐᑎᑦᓯᕖᑦ ᐊᕐᓇᒧᑦ ᐅᐃᒐᕐᓂᕐᒧᑦ ᑐᔪᕐᒥᕕᒋᔭᓐᓄᑦ, ᐃᕐᓂᖓ ᑐᖁᑎᓪᓗᒍ?” 21#ᐊᑕᓃᑦ ᐂᑉᐸᖏᑦ 4:34,35.ᐃᒻᒥᓂᒡᓗ ᖄᖓᓄᐊᖃᑦᑕᕐᐳᖅ ᐱᖓᓱᐊᕐᑎᕐᓗᓂ, ᐊᑕᓂᕐᒧᓪᓗ ᑐᒃᓯᐊᕐᐳᖅ, “ᐊᑕᓃᖅ ᒎᑎᒐ, ᑐᒃᓯᐊᕐᐳᖓ, ᓱᕈᓯᐅᑉ ᑕᕐᓂᖓ ᐅᑎᕐᑎᓚᐅᕈᒃ ᑕᕝᕗᖓ.” 22ᐊᑕᓂᐅᓪᓗ ᐃᓔᑦᔭᐅᑉ ᓂᐱᖓ ᑐᓴᕐᐹ; ᓱᕈᓯᐅᓪᓗ ᑕᕐᓂᖓ ᐅᑎᕐᑎᑉᐹ ᑖᑦᓱᒧᖓ, ᐃᓅᓕᕐᐳᕐᓗ.
23ᐃᓔᑦᔭᐅᓪᓗ ᓱᕈᓯᖅ ᖁᓛᓂᑦ ᑕᐅᓄᓐᖓᐅᑎᕚ ᐊᑖᓄᑦ ᐃᒡᓗᒧᑦ, ᐊᓈᓇᖓᓄᓪᓗ ᑐᓂᕚ; ᐃᓔᑦᔭᓗ ᐅᖃᕐᐳᖅ, “ᑕᑯᒋᑦ, ᐃᕐᓃᑦ ᐃᓅᕗᖅ!”
24ᐊᕐᓇᕐᓗ ᐃᓔᑦᔭᒧᑦ ᐅᖃᕐᐳᖅ, “ᒫᓐᓇ ᖃᐅᔨᕗᖓ ᒎᑎᐅᑉ ᐃᓄᖁᑎᒋᖕᒪᑎᑦ, ᐊᑕᓂᐅᓪᓗ ᐅᖃᐅᓯᖓ ᖃᓂᒃᑰᕐᑐᖅ ᓱᓕᖕᒪᑦ.”
Currently Selected:
ᐊᑕᓃᑦ ᓯᕗᓪᓖᑦ 17: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
