ᐊᑕᓃᑦ ᓯᕗᓪᓖᑦ 16
16
1ᐊᑕᓂᐅᑉ ᐅᖃᐅᓯᖓ ᔨᕼᐆᒧᑦ ᑎᑭᑉᐳᖅ ᕼᐊᓇᓁᑉ ᐃᕐᓂᖓᓄᑦ, ᐹᓴᒥᒃ ᐊᑭᕋᕐᑐᕐᓗᓂ ᐃᒫᒃ ᐅᖃᕐᐳᖅ, 2“ᐊᖏᔪᕈᕐᑎᓚᐅᕋᒃᑭᑦ ᓴᓂᕐᑎᑐᑦ ᑍᒤᑎᓪᓗᑎᑦ ᓯᕗᓕᕐᑎᓐᖑᕐᑎᓚᐅᕐᐸᒋᑦ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ, ᐊᔪᕐᑐᓕᕗᑎᑦ ᔨᕈᐳᐊᑎᑐᑦ, ᐃᓄᖁᑎᒃᑲᓗ ᐃᓴᕆᐊᓕᒥᐅᑦ ᐊᔪᕐᑐᓕᑎᑉᐸᑎᑦ, ᓂᓐᖓᒃᓮᕗᑎᓪᓗ ᐅᕙᓐᓂᒃ ᐊᔪᕐᑐᓕᓂᖏᑦ ᐱᓪᓗᒋᑦ. 3ᑕᑯᒋᑦ, ᐹᓴᐅᑉ ᐃᓚᖏᑦ ᓄᖑᑎᑦᓱᒫᕐᐸᒃᑲ, ᐃᒡᓗᒥᐅᖃᑎᖏᓪᓗ, ᔨᕈᐳᐊᒻ ᐃᓚᖏᑎᑐᑦ ᓂᐹᑉ ᐃᕐᓂᖓᑐᑦ. 4ᓇᓪᓕᐊᑦ ᐹᓴᒥᒃ ᐃᓚᖃᕐᑐᑦ ᑐᖁᒃᐸᑕ ᐃᒡᓗᒐᓴᖕᓂ ᕿᒻᒥᓂᑦ ᓂᕆᔭᐅᔪᒫᕐᐳᑦ; ᓇᓪᓕᐊᓪᓗ ᐃᓚᒋᔭᖓ ᓄᓇᑐᐃᓐᓇᕐᒥ ᑐᖁᔪᑦ ᑎᖕᒥᐊᓂᑦ ᓂᕆᔭᐅᔪᒫᕐᐳᖅ.”
5ᐹᓴᐅᑉ ᐱᓂᐊᕐᓂᕕᓂᖏᑕ ᐃᓚᖏᑦ, ᐱᓇᓱᐊᕐᓂᕕᓂᖓᓗ, ᐱᔪᓐᓇᕐᓂᖓᓗ, ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ. 6ᐹᓴ ᑐᖁᖕᒪᑦ ᐃᓗᕕᕐᑕᐅᕗᖅ ᓯᕗᓕᖏᑕ ᐃᓗᕕᖃᕐᕕᖏᓐᓂ ᑎᕐᔭᒥ; ᑖᑦᓱᒪᓗ ᐃᕐᓂᖓ ᐄᓚ ᐊᖓᔪᖅᑳᕐᔪᐊᕈᕐᐳᖅ ᐃᓂᖓᓂ.
7ᓱᓕ ᑕᕝᕙ ᐊᑕᓂᐅᑉ ᐅᖃᐅᓯᖏᑦ ᑎᑭᑉᐳᑦ ᐅᖃᕐᑎᒥᒍᑦ ᔨᕼᐆᒃᑯᑦ ᕼᐊᓇᓁᐊᐅᑉ ᐃᕐᓂᖓᒍᑦ ᐹᓴᒧᑦ ᐃᒡᓗᒥᐅᖃᑎᖏᓐᓄᓪᓗ, ᐊᔪᕐᑐᓕᓂᖓ ᐱᓪᓗᒍ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᓂᓐᖎᓚᐅᕐᒪᑦ ᐱᓂᐊᕐᓂᖏᑕ ᓴᖅᑭᑎᑕᖏᓐᓄᑦ, ᔨᕈᐳᐊᒻ ᐊᔪᕐᑐᓕᓂᕆᓚᐅᕐᑕᖓᑐᑦ ᐃᓚᖏᓐᓂᒡᓗ ᑐᖁᕅᓚᐅᕐᓂᖓᓄᑦ.
ᐃᓛᑉ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥ
8ᐋᓴ ᔫᑕᒥ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᓂᒃ 26ᓂᒃ, ᐄᓚ ᐹᓴᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᐳᖅ ᐃᓴᕆᐊᓕᒥᐅᓄᑦ, ᐊᖓᔪᖅᑳᖑᓚᐅᕐᐳᕐᓗ ᐊᕐᕌᒍᖕᓂᒃ ᒪᕐᕉᖕᓂᒃ ᑎᕐᔭᒥ. 9ᑖᑦᓱᒪᓕ ᐱᔨᖓ ᔨᒻᕆ, ᐊᖓᔪᖅᑳᖑᔪᖅ ᕿᒧᒃᓯᐅᑏᑦ ᐊᒃᓴᓗᐊᓕᖁᑎᖏᑕ ᐊᕝᕙᖏᓐᓄᑦ, ᐊᑭᕋᕐᑐᓕᕐᐳᖅ ᑖᑦᓱᒥᖓ. ᑎᕐᔭᒦᓪᓗᓂ, ᐃᒥᕋᒥ ᐋᖓᔮᓕᕐᐳᖅ, ᐊᖓᔪᖅᑳᕐᔪᐊᑉ ᐃᒡᓗᖓᓂ ᑲᒪᔨᐅᔪᑦ ᐊᖓᔪᖅᑳᖓᑦᑕ ᐋᕐᓴᐅᑉ ᐃᒡᓗᖓᓂ. 10ᔨᒻᕆ ᐃᑎᕋᒥ ᐊᖓᔪᖅᑳᕐᔪᐊᖅ ᑲᐱᓪᓗᒍ ᑐᖁᑉᐹ, ᐋᓴ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᓂᒃ 27ᓂᒃ ᔫᑕᒥ, ᐃᒻᒥᓂᒡᓗ ᐊᖓᔪᖅᑳᕐᔪᐊᕈᕐᑎᑉᐳᖅ ᑖᑦᓱᒧᖓ ᑭᖑᕝᕕᐅᑎᓪᓗᓂ.
11ᑕᒪᑐᒪ ᑭᖑᕐᖓᒍᑦ, ᐊᖓᔪᖅᑳᕐᔪᐊᖑᓕᕋᒥ, ᐹᓴᐅᑉ ᐃᓚᓕᒫᖏᑦ ᑐᖁᑉᐰᑦ, ᐊᑕᐅᓯᕐᒥᒡᓘᓐᓃᑦ ᐊᖑᑏᑦ ᐊᒥᐊᒃᑯᓐᖏᓔᑦ ᐃᓚᓕᒫᖏᑦ ᐃᓚᓐᓇᕆᔭᓕᒫᖏᓪᓗ. 12ᑍᒫᒃ ᑕᕝᕙ ᔨᒻᕆ ᐊᓯᕈᐃᓚᐅᕐᐳᖅ ᐹᓴᐅᑉ ᐃᓚᓕᒫᖏᓐᓂᒃ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ, ᐅᖃᐅᓯᖃᓚᐅᕐᒪᑦ ᐹᓴ ᐊᑭᕋᕐᑐᕐᓗᒍ ᔨᕼᐆᒃᑯᑦ ᐅᖃᕐᑎᒥᒍᑦ. 13ᐹᓴᐅᑉ ᐊᔪᕐᑐᓕᓂᕆᓚᐅᕐᑕᖏᑦ ᐃᕐᓂᖓᑕᓗ ᐄᓚᑉ ᐱᑦᔪᑎᒋᓪᓗᒋᑦ, ᐃᓴᕆᐊᓕᒥᐅᓂᒃ ᐊᔪᕐᑐᓕᑎᑦᓯᓚᐅᕐᒪᑕ, ᒎᑎᓐᖑᐊᖃᕐᓂᕐᒥᖕᓄᑦ ᓂᓐᖓᒃᓮᓪᓗᑎᒃ ᐊᑕᓂᕐᒥᒃ ᐃᓴᕆᐊᓕᒥᐅᑦ ᒎᑎᖓᓂᒃ. 14ᐄᓚᐅᑉ ᐱᓂᐊᕐᓂᕆᓚᐅᕐᑕᖏᑕ ᐃᓚᖏᑦ, ᐱᓇᓱᐊᕐᓂᕆᓚᐅᕐᑕᖏᓪᓗ, ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ.
ᔨᒻᕆᐅᑉ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥᐅᓄᑦ
15ᐋᓴ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᓂᒃ 27ᓂᒃ ᔫᑕᒥ, ᔨᒻᕆ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐅᓪᓗᓂᒃ 7ᓂᒃ ᑎᕐᔭᒥ. ᐅᓇᑕᕐᑐᒃᓮᑦ ᐃᓴᕆᐊᓕᒥᐅᑉ ᑕᖕᒫᕐᓯᒪᓚᐅᕐᐳᑦ ᐅᓇᑕᕆᐊᕐᓯᒪᓪᓗᑎᒃ ᒋᐱᑖᓐᒧᑦ, ᑕᕝᕙᓂ ᐱᓕᔅᑍᓂᒥᐅᑦ ᓄᓇᖁᑎᖓᓃᑦᑐᒥ. 16ᐅᓇᑕᕐᑐᒃᓮᓪᓗ ᑕᖕᒫᕐᓯᒪᔪᑦ ᑕᒪᑐᒥᖓ ᑐᓴᕋᒥᒃ ᐅᖃᕐᐳᑦ, “ᔨᒻᕆ ᐊᑭᕋᕐᑐᓕᕋᒥ ᐊᖓᔪᖅᑳᕐᔪᐊᕐᒥᒃ ᑐᖁᑦᓯᕗᖅ.” ᑍᒤᒻᒪᑦ ᐃᓴᕆᐊᓕᒥᐅᑉ ᐅᒻᕆᒥᒃ, ᐅᓇᑕᕐᑐᒃᓮᑦ ᐊᖓᔪᖅᑳᖓᓐᓂᒃ, ᐊᖓᔪᖅᑳᕐᔪᐊᕈᕐᑎᑦᓯᕗᑦ ᐃᓴᕆᐊᓕᒥᐅᓄᑦ ᑕᖕᒫᕐᓯᒪᕕᖕᒥᖕᓂ. 17ᐅᒻᕆ ᒋᐱᑖᓐᒥᑦ ᐊᐅᓪᓚᕐᐳᑦ ᐃᓴᕆᐊᓕᒥᐅᓕᒫᓪᓗ, ᐅᓇᑕᕆᐊᕐᓗᑎᒃ ᑎᕐᔭᒧᑦ ᐊᕙᑕᖏᕐᐹᓪᓗ. 18ᔨᒻᕆ ᖃᐅᔨᒐᒥ ᐃᒡᓗᒐᓮᑦ ᓵᓚᐅᓂᖓᓂᒃ, ᐊᖓᔪᖅᑳᕐᔪᐊᑉ ᐃᒡᓗᖓᓄᐊᕐᐳᖅ ᐊᖓᔪᖅᑳᕐᔪᐊᒃᑯᕕᖕᒧᑦ, ᐊᖓᔪᖅᑳᕐᔪᐊᓪᓗ ᐃᒡᓗᖓ ᐃᑯᐊᓪᓚᒃᐹ ᐃᓗᐊᓃᓪᓗᓂ, ᑐᖁᓪᓗᓂᓗ. 19ᐊᔪᕐᑐᓕᓂᕐᒥᓄᑦ ᐱᓂᐊᕐᓂᕆᓚᐅᕐᑕᒥᓄᓪᓗ, ᐱᐅᖏᑦᑐᒥᒃ ᐃᓅᓚᐅᕋᒥ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᔨᕈᐳᐊᒻ ᐱᓂᐊᕐᓂᕆᓚᐅᕐᑕᖏᓐᓂᒃ ᐊᑐᓚᐅᕐᒪᑦ, ᐊᔪᕐᑐᓕᓂᕆᓚᐅᕐᑕᒥᓄᓪᓗ ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕐᐰᑦ. 20ᔨᒻᕆᐅᑉ ᐱᓂᐊᕐᓂᕆᓚᐅᕐᑕᖏᑕ ᐃᓚᖏᑦ, ᐊᑭᕋᕐᑐᓕᕐᓂᖓᓗ ᐊᖓᔪᖅᑳᒥᓂᒃ, ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ.
ᐅᒻᕆᐅᑉ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥᐅᓄᑦ
21ᐃᓴᕆᐊᓕᒥᐅᑦ ᐃᓄᖏᑦ ᒪᕐᕈᐃᓕᕗᑦ, ᐊᕝᕙᖏᑦ ᒪᓕᒃᐳᑦ ᑎᑉᓂᒥᒃ ᒋᓇᑎᐅᑉ ᐃᕐᓂᖓᓂᒃ, ᐊᖓᔪᖅᑳᕐᔪᐊᓐᖑᕐᑎᑦᓱᒪᓪᓗᒍ, ᐊᕝᕙᖏᓪᓗ ᒪᓕᒃᐳᑦ ᐅᒻᕆᒥᒃ. 22ᐃᓄᐃᑦ ᐅᒻᕆᒥᒃ ᒪᓕᒃᑐᑦ ᓵᓚᖃᕐᐳᑦ ᑎᑉᓂᒥᒃ ᒪᓕᒃᑐᓂᒃ ᒋᓇᑎᐅᑉ ᐃᕐᓂᖓᓂᒃ; ᑍᒤᒻᒪᑦ ᑎᑉᓂ ᑐᖁᕗᖅ, ᐅᒻᕆᓗ ᐊᖓᔪᖅᑳᕐᔪᐊᖑᓕᕐᐳᖅ. 23ᐋᓴ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᔫᑕᒥ ᐊᕐᕌᒍᓂᒃ 31ᓂᒃ, ᐅᒻᕆ ᐊᖓᔪᖅᑳᕐᔪᐊᕈᕐᐳᖅ ᐃᓴᕆᐊᓕᒥᐅᓄᑦ, ᐊᐅᓚᑦᓯᓚᐅᕐᐳᕐᓗ ᐊᕐᕌᒍᓂᒃ 12ᓂᒃ; ᐊᕐᕌᒍᓂᒃ ᐱᖓᓲᔪᕐᑐᓂᒃ ᐊᐅᓚᑦᓯᓚᐅᕐᐳᖅ ᑎᕐᔭᒥ. 24ᓴᒥᐊᕆᐊᒥᐅᑦ ᖃᖅᑲᖓᓂᒃ ᓂᐅᕕᕐᐳᖅ ᓯᒥᕆᒥᑦ ᓯᐅᓪᕕᕆᓄᑦ ᑖᓚᓐᑏᖕᓄᑦ ᒪᕐᕉᖕᓄᑦ, ᖃᖅᑲᐅᓪᓗ ᖄᖓ ᓴᐴᓗᑕᓕᐅᕐᐹ, ᐃᒡᓗᒐᓮᓪᓗ ᑍᕔᑦ ᓴᓇᔭᓂ, ᓴᒥᐊᕆᐊᒥᒃ, ᑍᒫᒃ ᐊᑎᖃᕐᑎᑉᐹ ᓯᒧᕐ ᐱᓪᓗᒍ, ᓇᖕᒥᓂᖃᓚᐅᕐᒪᑦ ᖃᖅᑲᒥᒃ. 25ᐅᒻᕆ ᐊᔪᕐᑐᓕᕗᖅ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᐱᐅᖏᓐᓂᕐᓴᐅᓚᐅᕐᐳᕐᓗ ᓯᕗᓕᕐᒥᓂᑦ. 26ᔨᕈᐳᐊᒻ ᓂᐹᑦ ᐃᕐᓂᖓᑕ ᐱᓂᐊᕐᓂᓕᒫᖏᓐᓂᒃ ᒪᓕᓚᐅᕐᒪᑦ, ᐊᔪᕐᑐᓕᓂᕐᒥᓄᑦ ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕐᐰᑦ, ᐊᑕᓂᕐᒥᒃ ᐃᓴᕆᐊᓕᒥᐅᑦ ᒎᑎᖓᓂᒃ ᓂᓐᖓᒃᓮᓚᐅᕐᐳᖅ ᒎᑎᓐᖑᐊᖃᕐᓂᕐᒥᓄᑦ. 27ᐅᒻᕆᐅᓪᓕ ᐱᓂᐊᕐᓂᕕᓂᖏᑦ ᐱᔪᓐᓇᕐᓂᖓᑕᓗ ᑕᑯᒃᓴᐅᓂᖓ, ᑎᑎᕋᕐᑕᐅᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ. 28ᐅᒻᕆ ᑐᖁᕗᖅ ᐃᓗᕕᕐᑕᐅᕗᕐᓗ ᓯᕗᓕᖏᑕ ᐃᓗᕕᖃᕐᕕᖏᓐᓂ ᓴᒥᐊᕆᐊᒥ. ᐂᕼᐊᑉ ᑖᑦᓱᒪ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᐳᖅ ᐃᓂᖓᓂ.
ᐂᕼᐊᐱᐅᑉ ᐊᖓᔪᖅᑳᕐᔪᐊᖑᓂᖓ ᐃᓴᕆᐊᓕᒥᐅᓄᑦ
29ᐋᓴ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᓂᒃ 38ᓂᒃ, ᐂᕼᐊᑉ ᐅᒻᕆᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᐳᖅ ᐃᓴᕆᐊᓕᒥᐅᓄᑦ, ᐂᕼᐊᑉ ᐅᒻᕆᐅᑉ ᐃᕐᓂᖓ ᐊᖓᔪᖅᑳᕐᔪᐊᖑᓚᐅᕐᐳᖅ ᐃᓴᕆᐊᓕᒥᐅᓄᑦ ᓴᒥᐊᕆᐊᒥ ᐊᕐᕌᒍᓂᒃ 22ᓂᒃ. 30ᐂᕼᐊᑉ ᐅᒻᕆᐅᑉ ᐃᕐᓂᖓ ᐊᔪᕐᑐᓕᕗᖅ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᐊᔪᕐᑐᓕᓂᕐᓴᐅᕗᕐᓗ ᓯᕗᓕᕐᒥᓂᑦ ᑕᒤᓐᓂᑦ. 31ᖃᓄᐃᖏᓐᓂᕐᓴᐅᔮᓚᐅᕐᐳᖅ ᐃᓅᓚᐅᕈᓂ, ᔨᕈᐳᐊᒻ ᓂᐹᑦ ᐃᕐᓂᖓᑕ ᐊᔪᕐᑐᓕᓂᕆᓚᐅᕐᑕᖓᑐᑦ, ᓄᓕᐊᓂᓚᐅᕐᒪᑦ ᔨᔨᐱᐅᓪᒥᒃ ᐊᖓᔪᖅᑳᕐᔪᐊᑉ ᐃᔅᐱᐊᓚᐅᑉ ᓮᑐᓂᒥᐅᑕᐅᑉ ᐸᓂᖓᓂᒃ, ᐰᓕᒥᒡᓗ ᒎᑎᓐᖑᐊᖃᓚᐅᕐᐳᖅ ᐱᓇᓱᐊᓚᐅᕐᒪᑦ ᐅᐱᒍᓱᖕᓂᕐᒧᓪᓗ ᑐᒃᓯᐊᕐᕕᒋᓪᓗᒍ. 32ᑐᓂᕐᕈᓯᕐᕕᓕᐅᕐᐳᕐᓗ ᐰᓕᒧᑦ ᐰᓕᐅᑉ ᐃᒡᓗᖓᓂ, ᓴᒥᐊᕆᐊᒥ. 33ᐂᕼᐊᑉᓗ ᕿᔪᖕᒥᒃ ᐊᓯᕆᒥᒃ ᐊᑎᓕᖕᒥᒃ ᒎᑎᓐᖑᐊᓕᐅᕐᐳᖅ. ᐂᕼᐊᑉ ᓂᓐᖓᒃᓮᓂᕐᓴᐅᓚᐅᕐᐳᖅ ᐊᑕᓂᕐᒥᒃ, ᐃᓴᕆᐊᓕᒥᐅᑉ ᒎᑎᖓᓂᒃ, ᐊᖓᔪᖅᑳᕐᔪᐊᖑᓚᐅᕐᑐᓂᑦ ᐃᓴᕆᐊᓕᒥᐅᓄᑦ ᓯᕗᓕᕐᒥᓂᑦ. 34#ᔮᓱᐊ 6:26.ᐃᓅᑎᓪᓗᒍ ᕼᐂᐅᓕ ᐱᑎᓕᒥᐅᑕᖅ ᔨᕆᑯᒥᒃ ᓴᓇᕗᖅ; ᑐᓐᖓᕕᓕᐅᕐᓗᒍ ᐃᕐᓂᓂ ᐊᖓᔪᒃᓕᕐᐹᖅ ᐊᐱᕌᒻ ᐃᑲᔪᕐᑎᒋᓪᓗᒍ, ᓄᑲᕐᓕᕐᐹᖁᑎᓂᓗ ᓯᒎᑉ ᓴᓇᖃᑎᒋᕚ ᐃᑎᕐᑕᕐᕕᖏᓐᓂᒃ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ ᐅᖃᐅᓯᕆᓚᐅᕐᑕᖏᑦ ᔮᓱᐊᒃᑯᑦ ᓈᓂᐅᑉ ᐃᕐᓂᖓᒍᑦ.
Currently Selected:
ᐊᑕᓃᑦ ᓯᕗᓪᓖᑦ 16: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
