ᐊᑕᓃᑦ ᓯᕗᓪᓖᑦ 15
15
ᐊᐰᔭᐅᑉ ᐊᖓᔪᖅᑳᕐᔪᐊᓐᖑᕐᓂᖓ ᔫᑕᒥ
ᑯᕉᓂᑲ ᐂᑉᐸᖏᑦ 13:1—14:1
1ᐊᖓᔪᖅᑳᕐᔪᐊᖅ ᔨᕈᐳᐊᒻ ᓂᐹᑦ ᐃᕐᓂᖓ ᐊᐅᓚᑦᓯᓕᕐᑎᓪᓗᒍ ᐊᕐᕌᒍᓂᒃ 18ᓂᒃ, ᐊᐰᔭᒻ ᐊᖓᔪᖅᑳᕐᔪᐊᕈᕐᐳᖅ ᔫᑕᒥ. 2ᐊᕐᕌᒍᓂᒡᓗ ᐱᖓᓱᓂᒃ ᐊᐅᓚᑦᓯᓚᐅᕐᐳᖅ ᔨᕉᓴᓕᒥ. ᐊᓈᓇᖓ ᐊᑎᖃᕐᐳᖅ ᒫᑲᒥᒃ ᐋᐱᓴᓗᒥᐅᑉ ᐸᓂᖓ. 3ᐊᐰᔭ ᐊᑖᑕᖓᑕ ᐊᔪᕐᑐᓕᓂᕆᓚᐅᕐᑕᖓᓂᒃ ᒪᓕᓚᐅᕆᕗᖅ, ᐊᑕᓂᕐᒧᑦ ᒎᑎᒥᓄᑦ ᒪᓕᑦᓯᐊᕋᓂ, ᓯᕗᓪᓕᕐᒥᒃ ᐊᑖᑕᑦᓯᐊᓕᖅᑭᐅᑎᖓᑕ#15:3 ᐊᑖᑕᑦᓯᐊᓕᖅᑭᐅᑎᖓᑕ ᐅᕝᕙᓗ ᐊᒪᐅᖓᑕ ᑍᕕᑎᐅᑉ ᒪᓕᑦᓯᐊᓚᐅᕐᓂᖓᑐᑦ. 4#ᐊᑕᓃᑦ ᓯᕗᓪᓖᑦ 11:36.ᑍᒤᒃᑲᓗᐊᕐᑎᓪᓗᒍ ᐊᑕᓂᐅᑉ ᒎᑎᐅᑉ ᑭᖑᕚᕐᑖᕐᑎᓚᐅᕐᐹ ᐃᕐᓂᕐᑖᕐᑎᓪᓗᒍᓗ ᑍᕕᑎ ᐱᑦᔪᑎᒋᓪᓗᒍ, ᐃᕐᓂᖓᓗ ᐃᓇᖐᑎᓚᐅᕐᐹ ᑖᑦᓱᒪ ᑭᖑᓂᖓᓂ, ᔨᕉᓴᓕᒻ ᐊᖓᔪᖅᑳᕐᔪᐊᖃᕐᕕᐅᖁᓪᓗᒍ. 5#ᓴᒧᐃᓕ ᐂᑉᐸᖏᑦ 11:1-27.ᑍᕕᑎ ᐊᑕᓂᐅᑉ ᓈᒻᒪᒋᔭᖓᓂᒃ ᐃᓅᓚᐅᕐᓂᖓᓄᑦ, ᕿᒤᓚᐅᕋᓂᓗ ᐊᑕᓂᐅᑉ ᐱᖁᔭᖏᓐᓂᒃ ᑕᒤᓐᓂᒃ ᐃᓅᓯᓕᒫᒥᓂ, ᑭᓯᐊᓂ ᐃᓱᐊᖏᑦᔪᑎᑐᐊᖃᓚᐅᕐᐳᖅ ᔪᕅᐊᒥᒃ ᕼᐃᑍᑎᒥᐅᑕᕐᒥᒃ. 6#ᑯᕉᓂᑲ ᐂᑉᐸᖏᑦ 13:3-21.ᕆᕼᐅᐳᐊᒻᑯᒡᓕ ᔨᕈᐳᐊᒃᑯᒃ ᐅᓇᑕᖃᑦᑕᓚᐅᕐᐴᒃ ᐊᐰᔭᐅᑉ ᐃᓅᓯᓕᒫᖓᓂ. 7ᐊᐰᔭᐅᑉ ᐱᓇᓱᐊᕐᑕᕕᓂᖏᑦ ᐱᓂᐊᕐᓂᕆᓚᐅᕐᑕᖏᓪᓗ, ᑎᑎᕋᕐᑕᐅᓯᒪᕗᑦ ᔫᑕᐅᑉ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ, ᐊᐰᔭᒻ ᐅᓇᑕᖃᑎᖃᖃᑦᑕᓚᐅᕐᒪᑦ ᔨᕈᐳᐊᒻᒥᒃ.
8ᐊᐰᔭᒻ ᑐᖁᖕᒪᑦ ᐃᓗᕕᕐᑕᐅᓚᐅᕐᐳᖅ ᑍᕕᑎᐅᑉ ᐃᒡᓗᒐᓴᖏᓐᓂ. ᐋᓴᓗ ᐊᐰᔭᐅᑉ ᐃᕐᓂᖓ ᐃᓇᖏᐅᑎᕗᖅ ᐊᖓᔪᖅᑳᕐᔪᐊᖑᓕᕐᓗᓂ.
ᐂᓴᐅᑉ ᐊᖓᔪᖅᑳᕐᔪᐊᖑᓂᖓ ᔫᑕᒥ
ᑯᕉᓂᑲ ᐂᑉᐸᖏᑦ 15:16—16:6
9ᔨᕈᐳᐊᒻ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐃᓴᕆᐊᓕᒥᐅᓄᑦ ᐊᕐᕌᒍᓂᒃ 20ᓂᒃ, ᐋᓴ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᔫᑕᒧᑦ. 10ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 41ᓂᒃ ᔨᕉᓴᓕᒥ. ᐊᓈᓇᖃᓚᐅᕐᐳᖅ ᒫᑲᒥᒃ ᐋᐱᓴᓗᒥᐅᑉ ᐸᓂᖓᓂᒃ. 11ᐋᓴ ᐃᓱᐊᕐᑐᒥᒃ ᐃᓅᓚᐅᕐᐳᖅ ᐊᑕᓂᐅᑉ ᓵᖓᓂ, ᓯᕗᓕᕐᒥᑐᑦ ᑍᕕᑎᑐᑦ. 12#ᑯᕉᓂᑲ ᐂᑉᐸᖏᑦ 15:8-15.ᐊᖑᑎᓪᓗ ᐊᑐᕐᑐᐊᒊᑦ ᓄᓇᒥᓂ ᑐᒃᓯᐊᕐᕕᐅᕙᒃᑐᓂ ᓄᖅᑲᕐᑎᓚᐅᕐᐰᑦ, ᒎᑎᓐᖑᐊᓪᓗ ᐲᔭᕐᓗᒋᑦ ᓯᕗᓕᖏᑕ ᓴᓇᓚᐅᕐᑕᖏᑦ. 13ᒫᑲᓗ ᐊᓈᓇᓂ ᓄᖅᑲᕐᑎᓚᐅᕐᐹ ᑯᐃᓐᖑᓂᖓᓂᑦ, ᓇᕐᕈᓇᕐᑐᒥᒃ ᐃᓄᓐᖑᐊᓕᐅᕐᓯᒪᓂᖓᓄᑦ ᐋᓯᕆᒥᒃ ᒎᑎᓐᖑᐊᒥᒃ; ᐂᓴᐅᓪᓗ ᓯᖁᒥᓚᐅᕐᐹ ᐃᓄᓐᖑᐊᖁᑎᖓ ᐃᑯᐊᓪᓚᒡᓗᒍᓗ ᑰᑉ ᑭᑐᕌᓂᐅᑉ ᓇᕐᓴᖓᓂ. 14ᑭᓯᐊᓂᓕ ᒎᑎᓐᖑᐊᓄᑦ ᑐᒃᓯᐊᕐᕖᑦ ᑐᒃᓯᐊᕐᕕᐅᖃᑦᑕᕐᓂᕐᐹᑦ ᐲᔭᓚᐅᓐᖏᓔᑦ. ᑍᒤᒃᑲᓗᐊᕐᑎᓪᓗᒍᓕ ᐋᓴ ᐊᑕᓂᕐᒧᑦ ᑲᔪᓯᑦᓯᐊᕐᑐᒥᒃ ᐃᓅᓯᖃᓚᐅᕐᐳᖅ ᐃᓅᓯᓕᒫᒥᓂ. 15ᐊᑕᓂᐅᑉ ᑐᒃᓯᐊᕐᕕᖓᓄᐊᕐᓯᓚᐅᕐᐳᖅ ᓯᕗᓕᖏᑕ#15:15 ᐊᑖᑕᖓᑕ ᐃᓚᖏᓐᓂ ᑍᒤᓕᖓᔪᖅ ᒎᑎᒧᑦ ᑐᓂᕐᕈᑎᒋᓚᐅᕐᑕᖏᓐᓂᒃ, ᐃᒻᒥᓂᒡᓗ ᒎᑎᒧᑦ ᑐᓂᕐᕈᑎᒋᓯᒪᔭᒥᓂᒃ ᓯᐅᓪᕕᕆᓂᒃ ᒎᓗᓂᒡᓗ ᐴᒍᑕᕐᓂᒡᓗ.
16ᐋᓴ ᔫᑕᐅᑉ ᐊᖓᔪᖅᑳᕐᔪᐊᖓ ᐹᓴᓗ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᐅᓇᑍᓐᓇᓚᐅᕐᐴᒃ ᐃᒻᒥᖕᓄᑦ ᐃᓅᓯᓕᒫᒥᖕᓂᒃ. 17ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓ ᐹᓴ ᐅᓇᑕᕆᐊᕐᐳᖅ ᔫᑕᒧᑦ, ᕌᒪᒥᓗ ᓴᐴᓗᑕᓕᐅᕐᓗᓂ ᔫᑕᐅᑉ ᐊᖅᑯᑎᒃᓴᓕᒫᖏᑦ ᐃᑎᕋᓱᒃᑐᓄᑦ ᐊᓂᓇᓱᒃᑐᓄᓪᓗ ᓄᖅᑲᕐᑎᑦᓱᒪᓪᓗᒋᑦ ᔫᑕᐅᑉ ᐊᖓᔪᖅᑳᕐᔪᐊᖓᓄᐊᕋᓱᒃᑐᑦ ᐋᓴᒧᑦ. 18ᐋᓴᐅᑉ ᓯᐅᓪᕕᕇᑦ ᒎᓗᐃᓪᓗ ᑎᒍᓪᓗᒋᑦ ᐊᑕᓂᐅᑉ ᐃᒡᓗᖓᓂᑦ ᐊᖓᔪᖅᑳᕐᔪᐊᓪᓗ ᐃᒡᓗᖓᓃᑦᑐᑦ, ᐱᔨᒥᓄᑦ ᑐᓂᕔᑦ; ᐊᖓᔪᖅᑳᕐᔪᐊᓪᓗ ᐂᓴᐅᑉ ᐊᐅᓪᓚᕐᑎᑉᐰᑦ ᓯᕆᐊᑉ ᐊᖓᔪᖅᑳᕐᔪᐊᖓᓄᑦ ᐱᓐ-ᕼᐊᑖᑦᒧᑦ ᑕᐳᕆᒫᓐ ᐃᕐᓂᖓᓄᑦ, ᕼᐃᔨᐊᓐ ᐃᕐᖑᑕᖓᓄᑦ, ᑕᒫᓯᑰᓯᒥ ᓄᓇᖃᕐᑐᒧᑦ, ᐅᖃᐅᑎᓪᓗᒍᓗ, 19“ᐊᖏᖃᑎᒌᓚᐅᕐᓗᒃ, ᐊᑖᑕᕗᒃ ᐊᖏᖃᑎᒌᒃᓯᒪᓚᐅᕐᒪᑎᒃ: ᑕᑯᒋᑦ, ᑐᓂᕙᒋᑦ ᓯᐅᓪᕕᕆᓂᒃ ᒎᓗᓂᒡᓗ; ᑕᑉᐱᕐᓱᐃᓃᑦ ᐹᓴᒥᒃ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓᓂᒃ ᓄᖅᑲᕐᑎᓕᕈᒃ, ᐅᓇᑕᕐᑐᒃᓴᖁᑎᖏᑦ ᓄᓇᓐᓂᒃ ᑲᒪᔪᓐᓃᖁᓪᓗᒋᑦ.”
20ᐊᖓᔪᖅᑳᕐᔪᐊᖅ ᐱᓐ-ᕼᐊᑖᑦ ᐊᖏᕐᐳᖅ ᐋᓴᐅᑉ ᐱᔪᒪᔭᖓᓂᒃ, ᐅᓇᑕᕐᑐᒃᓴᖁᑎᓂᓗ ᑎᓕᕔᑦ ᐅᓇᑕᕆᐊᖁᓪᓗᒋᑦ ᐃᓴᕆᐊᓕᒥᐅᑦ ᐃᒡᓗᒐᓴᖏᓐᓄᑦ, ᓵᓚᒋᕔᓪᓗ ᐃᔮᓐ, ᑖᓐ, ᐊᐱᐅᓪ-ᐱᑦ-ᒫᑲ, ᓯᓂᕆᑎᐅᓪᓗ ᑕᓯᖓᑕ ᖃᓂᒋᔭᖓᓃᑦᑐᑦ, ᓈᑉᑕᓕᐅᓪᓗ ᓄᓇᓕᒫᖓ. 21ᐹᓴᓗ ᑕᒪᑐᒥᖓ ᑐᓴᕋᒥ ᕌᒪᒥᒃ ᓴᐴᓗᑕᓕᐅᕐᓂᕐᒥᓂᒃ ᓄᖅᑲᕐᐳᖅ, ᑎᕐᔭᒧᐊᕐᓗᓂᓗ. 22ᐊᖓᔪᖅᑳᕐᔪᐊᕐᓗ ᐋᓴ ᑎᑎᕋᕐᓯᒪᔪᓂᒃ ᔫᑕᒥᐅᓕᒫᓄᑦ ᐊᐅᓪᓚᕐᑎᑦᓯᓚᐅᕐᐳᖅ, ᑭᓇᒃᑯᓕᒫᓄᑦ ᑐᕌᖓᔪᓂᒃ, ᐃᑲᔪᕆᐊᖁᓪᓗᒋᑦ ᕌᒪᒧᑦ ᐅᔭᕅᑦ ᐹᓴᒧᑦ ᓴᓇᔭᐅᔪᕕᓃᑦ ᓴᐴᓗᑕᓕᐅᕐᑕᐅᓇᓱᒃᓗᑎᒃ ᐲᔭᕐᑕᐅᖁᓪᓗᒋᑦ, ᑕᒪᒃᑯᓄᖓᓗ ᐅᔭᕋᖕᓄᑦ ᐊᖓᔪᖅᑳᕐᔪᐊᖅ ᐂᓴ ᓴᐴᓗᑕᓕᐅᓚᐅᕐᐳᖅ ᒋᐸᒥᒃ ᒥᔅᐸᒥᒡᓗ, ᐃᒡᓗᒐᓴᖕᓂᒃ ᐱᓐᔭᒥᓂᐅᑉ ᑭᖑᕚᖏᑕ ᓄᓇᖓᓃᑦᑑᖕᓂᒃ.
23ᐋᓴᐅᓪᓕ ᐱᓂᐊᕐᓂᕆᓚᐅᕐᑕᖏᑕ ᐊᓯᖏᑦ, ᓯᕘᕋᓇᓂᓗ ᐱᔪᓐᓇᕐᓂᖓ, ᐱᓇᓱᐊᕐᓂᕕᓂᖏᓪᓗ, ᐃᒡᓗᒐᓮᓪᓗ ᐊᕙᓗᓕᐅᕐᑕᕕᓂᖏᑦ ᑎᑎᕋᕐᑕᐅᓯᒪᕗᑦ ᔫᑕᐅᑉ ᐊᖓᔪᖅᑳᕐᔪᐊᖏᑕ ᐅᓂᒃᑳᕐᑕᐅᓂᖏᓐᓂ, ᑭᓯᐊᓂ ᐃᓄᑐᖃᐅᓕᕐᓗᓂ ᐃᑎᒐᖏᑦ ᐋᓐᓂᐊᖃᓕᓚᐅᕐᐳᑦ. 24ᐋᓴᓗ ᑐᖁᖕᒪᑦ ᐃᓗᕕᕐᑕᐅᕗᖅ ᐊᖓᔪᖅᑳᕐᔪᐊᑦ ᐃᓗᕕᕐᑕᐅᕕᖓᓐᓄᑦ ᓯᕗᓕᖓᑕ ᑍᕕᑎᐅᑉ ᐃᒡᓗᒐᓴᖏᓐᓂ; ᐃᕐᓂᖓᓗ ᔨᕼᐆᓴᐸᑦ ᐊᖓᔪᖅᑳᕐᔪᐊᓐᖑᕐᐳᖅ ᑖᑦᓱᒧᖓ ᑭᖑᕝᕕᐅᑎᓪᓗᓂ.
ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ ᓁᑖᑉ
25ᓁᑖᑉ ᔨᕈᐳᐊᒻ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᐳᖅ ᐃᓴᕆᐊᓕᒥᐅᓄᑦ, ᐋᓴ ᔫᑕᒧᑦ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᐊᕐᕌᒍᑉ ᐂᑉᐸᖓᓂ; ᓁᑖᑉᓗ ᐊᖓᔪᖅᑳᖑᓚᐅᕐᐳᖅ ᐊᕐᕌᒎᖕᓂᒃ ᒪᕐᕉᖕᓂᒃ. 26ᐊᔪᕐᑐᓕᓚᐅᕐᐳᖅ ᐊᑕᓂᐅᑉ ᓵᖓᓂ, ᐃᓅᓯᖃᕐᓗᓂᓗ ᐊᑖᑕᖓᑕ ᐃᓅᓚᐅᕐᓂᖓᑐᑦ, ᐊᔪᕐᑐᓕᓂᕐᒥᓄᓪᓗ ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕐᐰᑦ.
27ᐹᓴ ᐊᕼᐂᔭᐅᑉ ᐃᕐᓂᖓ ᐃᓴᑳᕆᐅᑉ ᑭᖑᕚᖓ, ᐊᑭᕋᕐᑐᓕᕐᐳᖅ ᓁᑖᑉᒥᒃ; ᐹᓴᐅᓪᓗ ᑖᓐᓇ ᑐᖁᑉᐹ ᒋᐱᑖᓐᒥ, ᐱᓕᔅᑍᓂᒥᐅᑦ ᓄᓇᖓᓂ; ᓁᑖᑉᑯᑦ ᐃᓴᕆᐊᓕᒥᐅᓕᒫᓪᓗ ᐅᓇᑕᕆᐊᕐᓯᒪᑎᓪᓗᒋᑦ ᒋᐱᑖᓐᒧᑦ. 28ᐹᓴᐅᓪᓗ ᑐᖁᓚᐅᕐᐹ ᐋᓴ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᔫᑕᒥ ᐊᕐᕌᒍᓂᒃ ᐱᖓᓱᓂᒃ, ᐊᖓᔪᖅᑳᕐᔪᐊᓐᖑᓚᐅᕐᐳᕐᓗ ᓁᑖᑉᒥᒃ ᐃᓇᖐᓪᓗᓂ. 29#ᐊᑕᓃᑦ ᓯᕗᓪᓖᑦ 14:10.ᐊᖓᔪᖅᑳᕐᔪᐊᓐᖑᕋᒥᓗ ᑐᖁᕅᓚᐅᕐᐳᖅ ᔨᕈᐳᐊᒻ ᐃᓚᓕᒫᖏᓐᓂᒃ; ᓄᖅᑲᓚᐅᓐᖏᓚᖅ ᑐᖁᕅᓪᓗᓂ ᔨᕈᐳᐊᒻ ᐃᓚᓕᒫᖏᓐᓂᒃ ᐊᓂᕐᑎᕆᔪᓕᒫᑦ ᓄᖑᓚᐅᖏᓐᓂᖏᓐᓂ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ ᐅᖃᐅᓯᕆᓚᐅᕐᑕᖏᑦ ᐅᖃᕐᑎᒥᒍᑦ ᐊᕼᐂᔭᒃᑯᑦ ᓮᓗᓁᑎᒥᐅᑕᒃᑯᑦ. 30ᔨᕈᐳᐊᒻ ᐊᔪᕐᑐᓕᓂᕐᒥᓄᑦ ᐊᔪᕐᑐᓕᑎᑦᓯᓚᐅᕐᐳᖅ ᐃᓴᕆᐊᓕᒥᐅᓂᒃ, ᓂᖓᒃᓮᓂᕐᒥᓄᑦ ᓂᓐᖓᒃᑎᑦᓯᓚᐅᕐᐳᖅ ᐊᑕᓂᕐᒥᒃ ᐃᓴᕆᐊᓕᒥᐅᑦ ᒎᑎᖓᓐᓂᒃ.
31ᓁᑖᑉᓕ ᐱᓂᐊᕐᓂᕆᓚᐅᕐᑕᖏᑕ ᐃᓚᖏᑦ, ᐱᓇᓱᐊᕐᓂᕆᓚᐅᕐᑕᖏᓪᓗ, ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑳᕐᑕᐅᓂᖏᓐᓂ. 32ᐋᓴ ᔫᑕᐅᑉ ᐊᖓᔪᖅᑳᕐᔪᐊᖓ ᐃᓴᕆᐊᓕᒥᐅᓪᓗ ᐊᖓᔪᖅᑳᕐᔪᐊᖓ ᐹᓴ ᐃᒻᒥᖕᓄᑦ ᐅᓇᑕᖃᑦᑕᐅᑏᓐᓇᓚᐅᕐᐴᒃ ᐃᓅᓯᓕᒫᒥᖕᓂ.
ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᐹᓴ
33ᐋᓴ ᐊᕐᕌᒍᑦ ᐱᖓᔪᐊᓐᓂ ᐊᖓᔪᖅᑳᕐᔪᐊᖑᓕᕐᑎᓪᓗᒍ ᔫᑕᒥᐅᓄᑦ, ᐹᓴ ᐊᕼᐂᔭᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐃᓴᕆᐊᓕᒥᐅᓕᒫᓄᑦ ᑎᕐᔭᒥ, ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 24ᓂᒃ. 34ᐊᔪᕐᑐᓕᓚᐅᕐᐳᕐᑕᐅᖅ ᐊᑕᓂᐅᑉ ᓵᖓᓂ, ᐊᑖᑕᒥᑐᑦ ᔨᕈᐳᐊᒻᑐᑦ ᐃᓅᓯᖃᓚᐅᕐᐳᖅ, ᐊᔪᕐᑐᓕᓂᕐᒥᓄᓪᓗ ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕐᐰᑦ.
Currently Selected:
ᐊᑕᓃᑦ ᓯᕗᓪᓖᑦ 15: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
