ᐊᑕᓃᑦ ᓯᕗᓪᓖᑦ 14
14
ᔨᕈᐳᐊᒻ ᐃᕐᓂᖓᑕ ᑐᖁᓂᖓ
1ᑍᑦᓱᒪᓂᐅᑎᓪᓗᒍ ᐊᐰᔭ ᔨᕈᐳᐊᒻ ᐃᕐᓂᖓ ᖃᓂᒻᒪᒃᐳᖅ. 2ᔨᕈᐳᐊᒻᓗ ᓄᓕᐊᓂ ᐅᖃᐅᑎᕚ, “ᒪᑭᓕᕆᑦ, ᐃᒻᒥᓂᒃ ᐃᓕᑕᕐᓇᕈᓐᓃᕐᑎᓪᓗᑎᑦ, ᐃᓕᑕᕆᔭᐅᖁᓇᒃ ᔨᕈᐳᐊᒻᒧᑦ ᓄᓕᐊᕆᔭᐅᖕᒪᖔᕐᐱᑦ, ᐂᓗᑎᓪᓗ ᓮᓗᐊᒧᑦ; ᐊᕼᐂᔭ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᑍᑲᓃᒻᒪᑦ, ᐅᕙᓐᓂᒃ ᐅᖃᐅᑦᔨᓚᐅᕐᑐᖅ ᐊᖓᔪᖅᑳᕐᔪᐊᓐᖑᕐᓂᐊᕐᓂᕅᓪᓗᓂ ᐃᓄᖕᓄᑦ ᑖᒃᑯᓄᖓ. 3ᓂᐊᖂᔭᓂᒃ ᖁᓕᓂᒃ ᓇᒃᓴᕐᓗᑎᑦ, ᐸᐅᕐᖓᐅᔭᓕᒥᒃ ᓂᐊᖂᔭᒥᒃ, ᔭᕐᕋᕐᒥᒡᓗ ᕼᐊᓂᒥᒃ, ᑖᑦᓱᒧᓐᖓᐅᓗᑎᑦ, ᑖᑦᓱᒪ ᐅᖃᐅᑎᓛᕐᐹᑎᑦ ᓱᕈᓯᐅᑉ ᖃᓄᐃᑦᑐᒫᕐᓂᖓᓂᒃ.”
4ᑕᕝᕙ ᔨᕈᐳᐊᒻ ᓄᓕᐊᖓ ᑍᒤᓕᐅᓚᐅᕐᐳᖅ; ᒪᑭᓐᓇᒥᓗ ᓮᓗᐊᒧᐊᕐᐳᖅ, ᐊᕼᐂᔭᐅᓪᓗ ᐃᒡᓗᖓᓄᐊᕐᐳᖅ. ᐊᕼᐂᔭ ᑕᑯᓐᓇᓚᐅᓐᖏᓚᖅ, ᑕᐅᑐᑦᓯᐊᕈᓐᓃᓚᐅᕋᒥ ᐃᑦᑐᓂᕐᒧᑦ. 5ᐊᑕᓂᐅᓪᓗ ᐊᕼᐂᔭ ᐅᖃᐅᑎᕚ, “ᔨᕈᐳᐊᒻ ᓄᓕᐊᖓ ᕾᓕᕐᐳᖅ ᐃᕐᓂᕐᒥᓂᒃ ᐃᓕᖕᓄᑦ ᐊᐱᕐᓲᑎᖃᕆᐊᕐᑐᕐᓗᓂ; ᑖᓐᓇ ᖃᓂᒪᖕᒪᑦ. ᐅᖃᐅᑎᓚᐅᕐᐹᓗ ᐅᖃᐅᓯᕆᔭᒃᓴᖏᓐᓂᒃ ᑖᑦᓱᒧᖓ.”
ᑕᕝᕗᖓ ᑎᑭᓐᓇᒥ, ᐃᑎᓚᐅᕐᐳᖅ ᐃᓕᕐᑕᕐᓇᕐᑍᓕᒪᓪᓗᓂ. 6ᐊᕼᐂᔭᐅᓪᓗ ᑐᓴᕋᒥᐅᒃ ᐊᕐᓇᐅᑉ ᐱᓱᒡᕙᓗᐊ ᐃᑎᓕᕐᑎᓪᓗᒍ, ᐅᖃᐅᑎᕚ, “ᐃᑎᕆᑦ, ᔨᕈᐳᐊᒻ ᓄᓕᐊᖓ; ᓱᖕᒪᑦ ᐃᓕᑕᕐᓇᕐᑍᓕᒪᕖᑦ? ᑎᓕᔭᐅᒐᒪ ᐅᖃᖁᓪᓗᖓ ᐃᓕᖕᓄᑦ ᑐᓴᕈᒥᓇᖏᑦᑐᒥᒃ. 7ᐂᓕᕆᑦ ᔨᕈᐳᐊᒻ ᐅᖃᐅᑎᓗᒍ, ‘ᐃᒫᒃ ᐊᑕᓂᖅ ᐃᓴᕆᐊᓕᒥᐅᑉ ᒎᑎᖓ ᐅᖃᕐᐳᖅ: ᒪᑭᑎᓚᐅᕋᒃᑭᑦ ᐃᓄᖁᑎᓐᓂᑦ, ᐊᐅᓚᑦᓯᔨᓐᖑᕐᑎᓪᓗᑎᑦ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ, 8ᑍᕕᑎᐅᑉ ᐊᑕᓂᐅᕕᖓ ᑭᖑᕚᖏᓐᓂᑦ ᐊᕕᒃᑎᓚᐅᕐᐸᕋ ᑐᓂᓪᓗᒍᓗ ᐃᓕᖕᓄᑦ; ᑭᓯᐊᓂᓕ ᑍᕕᑎᑑᓚᐅᓐᖏᓚᑎᑦ, ᑖᓐᓇ ᐱᖁᔭᓐᓂᒃ ᐅᕙᓐᓂᒡᓗ ᒪᓕᑦᓯᐊᓚᐅᕐᒪᑦ ᐱᔪᓐᓇᕐᓂᓕᒫᒥᓄᑦ, ᐱᓇᓱᐊᖃᑦᑕᕐᓗᓂᓗ ᐱᓇᓱᐊᕐᑕᐅᖁᔭᓐᓂᒃ ᑭᓯᐊᓂ. 9ᐃᕝᕕᓪᓕ ᐱᐅᖏᓐᓂᕐᐹᓂᒃ ᓯᕗᓕᕆᓚᐅᕐᑕᓕᒫᕐᓂᑦ ᐱᓇᓱᐊᕐᐳᑎᑦ ᒎᑎᓐᖑᐊᓕᐅᓚᐅᕋᕕᑦ ᐃᓄᓐᖑᐊᓕᐅᕐᓗᑎᓪᓗ ᓂᓐᖓᒃᓮᓪᓗᑎᑦ ᐅᕙᓐᓂᒃ, ᕿᒤᓪᓗᑎᓪᓗ ᐅᕙᓐᓂᒃ. 10#ᐊᑕᓃᑦ ᓯᕗᓪᓖᑦ 15:29.ᑍᒤᒻᒪᑦ ᑕᑯᒋᑦ, ᐱᐅᖏᑦᑐᒥᒃ ᔨᕈᐳᐊᒻ ᑭᖑᕚᖏᑦ ᑎᑭᑕᐅᑎᓐᓂᐊᕐᐸᒃᑲ, ᐊᖑᑎᓕᒫᓪᓗ ᓄᖑᑕᐅᑎᓪᓗᒋᑦ ᑭᖑᕚᕐᓂᑦ, ᑎᒍᔭᐅᓯᒪᔪᓕᒫᑦ ᑎᒍᔭᐅᓯᒪᖏᑦᑐᓕᒫᓪᓗ ᐃᓴᕆᐊᓕᒥ, ᔨᕈᐳᐊᒻᓗ ᐃᓚᓕᒫᖏᑦ ᓄᖑᑎᓐᓂᐊᕐᐸᒃᑲ, ᐊᓇᕐᑎᑐᑦ ᐃᒋᑕᐅᓪᓗᑎᒃ ᐊᓯᐅᑎᑕᐅᔪᑎᑐᑦ. 11ᔨᕈᐳᐊᒻ ᐃᓚᖏᑦ ᐃᒡᓗᒐᓴᖕᓂ ᑐᖁᔪᑦ ᕿᒻᒥᓄᑦ ᓂᕆᔭᐅᔪᒫᕐᐳᑦ; ᓄᓇᓕᖕᓂᐅᖏᑦᑐᕐᓗ ᑐᖁᔪᑦ ᑎᖕᒥᐊᓂᑦ ᓂᕆᔭᐅᔪᒫᕐᐳᑦ, ᐊᑕᓂᖅ ᐅᖃᕐᐳᖅ.’ 12ᑍᒤᒻᒪᑦ ᒪᑭᓪᓗᑎᑦ ᐃᒡᓗᖕᓄᑦ ᐂᓕᕆᑦ. ᐃᑎᒐᑎᑦ ᐃᒡᓗᒐᓴᖕᓄᑦ ᑐᑎᑐᐊᕐᐸᑕ, ᓱᕈᓯᖅ ᑐᖁᓂᐊᕐᐳᖅ. 13ᐃᓴᕆᐊᓕᒥᐅᓕᒫᑦ ᕿᒃᓵᒍᑎᒋᔪᒫᕐᐹᑦ ᐃᓗᕕᕐᓗᒍᓗ; ᑖᓐᓇ ᔨᕈᐳᐊᒻ ᐃᓚᖏᓐᓂ ᐃᓗᕕᕐᑕᐅᔪᑑᔪᒫᕐᐳᖅ, ᑖᓐᓇ ᐊᑕᓂᕐᒧᑦ ᖁᕕᐊᓇᕐᑐᒥᒃ ᐱᑕᓕᑐᐊᖑᖕᒪᑦ ᐃᓴᕆᐊᓕᒥᐅᑦ ᒎᑎᖓᓄᑦ, ᔨᕈᐳᐊᒻ ᐃᓚᓕᒫᖏᓐᓂᑦ. 14ᓱᓕᓗ ᐊᑕᓂᖅ ᓇᖕᒥᓂᖅ ᐊᖓᔪᖅᑳᕐᔪᐊᒥᒃ ᒪᑭᑎᑦᓯᒃᑲᓐᓂᕐᓂᐊᕐᐳᖅ ᐃᓴᕆᐊᓕᒧᑦ ᐊᖓᔪᖅᑳᕐᔪᐊᖑᓂᐊᕐᑐᒥᒃ, ᑖᓐᓇᓗ ᔨᕈᐳᐊᒻ ᐃᓚᖏᓐᓂᒃ ᓄᖑᑦᓯᓂᐊᕐᐳᖅ ᐅᓪᓗᒥᒥᑦ ᐱᒋᐊᕐᓗᒍ. ᓯᕗᓂᕐᒧᓪᓗ ᑲᔪᓯᓗᓂ. 15ᐊᑕᓂᐅᑉ ᓱᒋᐊᕈᒫᕐᒪᒋᑦ ᐃᓴᕆᐊᓕᒥᐅᑦ, ᐃᕕᒃᑎᑐᑦ ᐃᒫᓂ ᐊᐅᓚᑎᑕᐅᔪᑎᑐᑦ, ᐃᓴᕆᐊᓕᒥᐅᑦ ᐊᒫᖏᑎᒍᑦ ᐊᒧᔪᒫᕐᐰᑦ ᓄᓇᒥᑦ ᐱᐅᔪᒥᑦ ᑐᓂᓚᐅᕐᑕᒥᓂᑦ ᓯᕗᓕᖏᓐᓄᑦ, ᓯᐊᒻᒪᕐᑎᑦᓱᒫᕐᐰᓪᓗ ᑰᑉ ᐃᕗᕅᑎᐅᑉ ᐅᖓᑖᓄᑦ, ᐃᓄᓐᖑᐊᓕᐅᕐᓗᑎᒃ ᒎᑎᓐᖑᐊᓕᐅᓚᐅᕐᒪᑕ ᐊᓯᕆᒻᒥᒃ, ᑕᒪᑐᒧᖓ ᐊᑕᓂᕐᒥᒃ ᓂᓐᖓᒃᓮᓚᐅᕐᒪᑕ. 16ᐊᑕᓂᐅᑉ ᐃᓴᕆᐊᓕᒥᐅᑉ ᕿᒪᒍᒫᕐᐰᑦ ᔨᕈᐳᐊᒻ ᐊᔪᕐᑐᓕᓚᐅᕐᓂᖓᓄᑦ, ᐃᓴᕆᐊᓕᒥᐅᓂᒡᓗ ᐊᔪᕐᑐᓕᑎᑦᓯᓚᐅᕐᓂᖓᓄᑦ.”
17ᑕᕝᕙ ᔨᕈᐳᐊᒻ ᓄᓕᐊᖓ ᒪᑭᑉᐳᖅ, ᐊᐅᓪᓚᕐᓗᓂᓗ, ᑎᑭᑉᐳᕐᓗ ᑎᕐᔭᒧᑦ. ᐃᒡᓗᖓᑕᓗ ᑐᖕᒥᕌᖏᓐᓄᑦ ᑐᓪᓕᑐᐊᕐᒪᑦ, ᓱᕈᓯᖅ ᑐᖁᕗᖅ. 18ᐃᓗᕕᕐᐹᓪᓗ, ᐃᓴᕆᐊᓕᒥᐅᓕᒫᓪᓗ ᕿᒃᓵᒍᑎᒋᕚᑦ, ᐊᑕᓂᐅᑉ ᐅᖃᐅᓯᕆᓚᐅᕐᑕᖏᑦ ᒪᓕᒡᓗᒋᑦ, ᐱᔨᒥᒍᑦ ᐊᕼᐂᔭᒃᑯᑦ ᐅᖃᕐᑎᒥᒍᑦ.
ᔨᕈᐳᐊᒻ ᑐᖁᓂᖓ
19ᔨᕈᐳᐊᒻ ᐱᓂᐊᕐᓂᕆᓚᐅᕐᑕᖏᑕ ᐃᓚᖏᑦ, ᐅᓇᑕᕐᓂᖏᑦ ᐊᐅᓚᑦᓯᓂᖏᓪᓗ, ᑎᑎᕋᕐᓯᒪᕗᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ. 20ᔨᕈᐳᐊᒻ ᐊᐅᓚᑦᓯᓚᐅᕐᐳᖅ ᐊᕐᕌᒍᓂᒃ 22ᓂᒃ; ᑐᖁᖕᒪᑦ ᐃᓗᕕᕐᑕᐅᕗᖅ, ᓁᑖᑉᓗ ᐃᕐᓂᖓ ᑭᒍᕝᕕᐅᑎᕗᖅ ᐃᓂᖓᓂ.
ᕆᕼᐅᐳᐊᒻ ᔫᑕᐅᑉ ᐊᖓᔪᖅᑳᕐᔪᐊᖓ
ᑯᕉᓂᑲ ᐂᑉᐸᖏᑦ 11:5—12:15
21ᕆᕼᐅᐳᐊᒻ ᓲᓗᒨᓂᐅᑉ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᐊᕐᕌᒍᖃᓕᕐᓗᓂ 41ᓂᒃ. ᐊᖓᔪᖅᑳᖑᓚᐅᕐᐳᖅ ᐊᕐᕌᒍᓂᒃ 17ᓂᒃ ᔨᕉᓴᓕᒥ, ᐃᒡᓗᒐᓴᖕᓂ ᐊᑕᓂᐅᑉ ᓂᕈᐊᓚᐅᕐᑕᖓᓂ ᐃᓴᕆᐊᓕᒥᐅᓂᑦ, ᑕᕝᕙᓂ ᑐᒃᓯᐊᕐᕕᐅᖃᑦᑕᕈᒪᓪᓗᓂ. ᕆᕼᐅᐳᐊᒻ ᐊᓈᓇᖓ ᐊᑎᖃᕐᐳᖅ ᓈᒪᒥᒃ ᐊᒧᓁᑎᒥᑦ ᐱᓯᒪᔪᖅ.
22ᔫᑕᒥᐅᑦ ᐊᔪᕐᑐᓕᓚᐅᕐᐳᑦ ᐊᑕᓂᐅᑉ ᓵᖓᓂ, ᓂᓐᖓᒃᓴᕐᐹᓪᓗ ᐊᔪᕐᑐᓕᓂᕐᒥᖕᓄᑦ, ᓯᕗᓕᕆᓚᐅᕐᑕᖏᓐᓂᒃ ᐱᐅᖏᓐᓂᕐᓴᓂᒃ ᐱᓂᐊᕐᓂᖃᓚᐅᕐᒪᑕ. 23#ᐊᑕᓃᑦ ᐂᑉᐸᖏᑦ 17:9,10.ᐃᒻᒥᓂᒃ ᓴᓐᓇᓚᐅᕆᕗᑦ ᑐᒃᓯᐊᕐᕕᒋᔭᒃᓴᒥᖕᓂᒃ ᒎᑎᓐᖑᐊᓂᒃ, ᐅᔭᕋᖕᓂᒃ ᓇᑉᐸᔪᓂᒃ, ᐃᓄᓐᖑᐊᓂᒡᓗ ᕿᔪᖕᓂᒃ ᐊᓯᕆᒻᓂᒃ ᖃᖅᑲᓕᒫᑦ ᖄᖏᓐᓂ ᑐᒃᓯᐊᕐᕕᒃᓴᒥᖕᓂᒃ ᓇᐹᕐᑐᕐᔪᐊᓪᓗ ᐊᖏᔪᑦ ᐊᑖᓐᓂ. 24#ᒨᓯᓯ ᑕᓪᓕᒪᖏᑦ 23:17.ᐊᖑᑎᓂᒡᓗ ᐊᕐᓇᓂᒡᓗ ᐊᑐᕐᑐᐊᒐᖁᑎᖃᐅᓚᐅᕐᐳᖅ ᑐᒃᓯᐊᕐᕕᖕᒥᖕᓂ. ᔫᑕᐅᑉ ᐃᓄᖏᑦ ᐱᐅᖏᑦᑐᓂᒃ ᐱᓇᓱᐊᓚᐅᕐᐳᑦ ᐊᑕᓂᐅᑉ ᓯᖏᑕᐅᑎᓚᐅᕐᑕᖏᑎᑐᑦ ᐃᓅᖃᑎᒌᒡᔪᐊᑎᑐᑦ ᓇᕐᕈᓇᕐᑐᒥᒃ ᐱᓇᓱᐊᖃᑦᑕᕐᓂᖏᓐᓄᑦ ᐃᓴᕆᐊᓕᒥᐅᑦ ᓄᓇᑖᕐᐸᓪᓕᐊᓕᕐᑎᓪᓗᒋᑦ.
25 #
ᑯᕉᓂᑲ ᐂᑉᐸᖏᑦ 12:2-8. ᐊᖓᔪᖅᑳᕐᔪᐊᖅ ᕆᕼᐅᐳᐊᒻ ᐊᐅᓚᑦᓯᓕᕐᑎᓪᓗᒍ ᐊᕐᕌᒍᓂᒃ ᑕᓪᓕᒪᓂᒃ, ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓ ᓰᓵᒃ ᐅᓇᑕᕆᐊᕐᐳᖅ ᔨᕉᓴᓕᒧᑦ. 26#ᐊᑕᓃᑦ ᓯᕗᓪᓖᑦ 10:16,17; ᑯᕉᓂᑲ ᐂᑉᐸᖏᑦ 9:15,16.ᐊᑕᓂᐅᓪᓗ ᐃᒡᓗᖓᓃᑦᑐᑦ ᐱᐅᔪᖁᑎᖏᑦ ᐊᖓᔪᖅᑳᕐᔪᐊᓪᓗ ᐱᐅᔪᖁᑎᖏᑦ ᐊᐅᓪᓚᐅᑎᕔᑦ; ᓲᓗᒨᓂᐅᓪᓗ ᓴᓇᔭᕕᓂᖏᑦ ᓴᐴᓗᑍᑦ ᒎᓗᐃᑦ ᐊᐅᓪᓚᐅᑎᓪᓗᒋᑦ. 27ᐊᖓᔪᖅᑳᕐᔪᐊᑉ ᕆᕼᐅᐳᐊᒻ ᓴᓇᔭᐅᑎᑦᓯᓪᓗᓂ ᑭᖑᕝᕕᓚᐅᕐᐰᑦ ᑲᓐᓄᔭᓂᒃ ᓴᐴᓗᑕᕐᓂᒃ, ᓴᐳᓐᓂᐊᕐᑏᓪᓗ ᐊᖓᔪᖅᑳᖏᓐᓄᑦ ᑐᓂᓪᓗᒋᑦ, ᐊᖓᔪᖅᑳᕐᔪᐊᑉ ᐃᒡᓗᖓᑕ ᐃᑎᕐᑕᕐᕕᖓᓂᒃ ᑲᒪᔨᐅᔪᓄᑦ. 28ᐊᖓᔪᖅᑳᕐᔪᐊᕐᓗ ᐊᑕᓂᐅᑉ ᐃᒡᓗᖓᓅᑐᐊᕌᖓᑦ, ᓴᐳᓐᓂᐊᕐᑏᑦ ᓇᒃᓴᖃᑦᑕᕐᐰᑦ ᐊᑐᕐᓗᒋᑦ, ᑭᖑᕐᖓᒍᓪᓗ ᐅᑎᕐᑎᖃᑦᑕᕐᓗᒋᑦ ᓴᐳᓐᓂᐊᕐᑏᑦ ᓴᐴᓗᑕᒃᑯᕕᖏᓐᓄᑦ.
29ᐊᖓᔪᖅᑳᕐᔪᐊᑉ ᕆᕼᐅᐳᐊᒻ ᐱᓂᐊᕐᓂᕕᓂᖏᑦ, ᐱᓇᓱᐊᕐᓂᕕᓂᓕᒫᖏᓪᓗ, ᑎᑎᕋᕐᑕᐅᓯᒪᕗᑦ ᔫᑕᐅᑉ ᐊᖓᔪᖅᑳᕐᔪᐊᖏᑕ ᐅᓂᒃᑲᐅᓯᐅᓂᖏᓐᓂ. 30ᐅᓇᑕᖃᑦᑕᐅᑏᓐᓇᓚᐅᕐᐴᒃ ᕆᕼᐅᐳᐊᒻ ᔨᕈᐳᐊᒻᓗ ᐃᒻᒥᖕᓄᑦ ᑍᒪᓐᖓᓕᒫᖅ. 31ᕆᕼᐅᐳᐊᒻᓗ ᑐᖁᖕᒪᑦ ᐃᓗᕕᕐᑕᐅᕗᖅ ᓯᕗᓕᖏᑕ ᐃᓗᕕᕐᕕᖏᓐᓄᑦ ᑍᕕᑎᐅᑉ ᐃᒡᓗᒐᓴᖏᓐᓂ. ᐊᓈᓇᖓ ᐊᑎᖃᕐᐳᖅ ᓈᒪᒥᒃ ᐊᒧᓁᑎᒥᐅᑕᐅᓪᓗᓂ. ᐊᐰᔭᒻᓗ ᕆᕼᐅᐳᐊᒻ ᐃᕐᓂᖓ ᑭᖑᕝᕕᐅᑎᕗᖅ ᐊᖓᔪᖅᑳᕐᔪᐊᖑᓕᕐᓗᓂ ᐃᓂᖓᓂ.
Currently Selected:
ᐊᑕᓃᑦ ᓯᕗᓪᓖᑦ 14: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
