ᐊᑕᓃᑦ ᓯᕗᓪᓖᑦ 13
13
1ᑕᑯᒋᓪᓗ, ᒎᑎᐅᑉ ᐃᓄᖁᑎᖓ ᑎᑭᓚᐅᕐᐳᖅ ᐱᑎᓕᒧᑦ ᔫᑕᒥᑦ ᐊᑕᓂᐅᑉ ᐅᖃᐅᓯᖓᓂᒃ ᐅᖃᕆᐊᕐᑐᕐᓗᓂ. ᔨᕈᐳᐊᒻ ᓇᖏᓕᕐᑎᓪᓗᒍ ᑐᓂᕐᕈᓯᕐᕕᐅᑉ ᓵᖓᓂ ᐃᑯᐊᓚᑎᑦᓯᓗᓂ ᐃᓯᕐᓗᐊᕐᓂᑎᑦᓯᓂᐊᓕᕐᑎᓪᓗᒍ. 2#ᐊᑕᓃᑦ ᐂᑉᐸᖏᑦ 23:15,16.ᐊᖑᑦ ᑖᓐᓇ ᐅᖃᐅᑦᔨᕗᖅ ᑐᓂᕐᕈᓯᕐᕕᖕᒥᒃ ᐊᑕᓂᐅᑉ ᐅᖃᐅᓯᐅᖁᔭᖓᓂᒃ ᐅᖃᕐᓗᓂ, “ᐆ ᑐᓂᕐᕈᓯᕐᕕᒃ, ᑐᓂᕐᕈᓯᕐᕕᒃ, ᐊᑕᓂᖅ ᐃᒫᒃ ᐅᖃᕐᐳᖅ: ᑕᑯᒋᑦ, ᐃᕐᓂᖅ ᐃᕐᓂᐊᖑᔪᒫᕐᐳᖅ ᑍᕕᑎᐅᑉ ᑭᖑᕚᖓ, ᔫᓮᐊᒥᒃ ᐊᑎᖃᕈᒫᕐᐳᖅ; ᑖᓐᓇ ᑐᓂᕐᕈᓯᕈᒫᕐᐳᖅ ᑕᕝᕙᓂ ᑐᓂᕐᕈᓯᕐᕕᖕᒥ ᑐᓂᕐᕈᓯᕐᑎᐅᔪᓂᒃ ᑕᕝᕙᓂ ᐃᓯᕐᓗᐊᕐᓂᑎᑦᓯᖃᑦᑕᕐᑐᓂᒃ, ᐃᓄᐃᓪᓗ ᓴᐅᓂᖏᓐᓂᒃ ᐃᑯᐊᓚᑦᓯᔪᒫᕐᐳᖅ ᑕᕝᕙᓂ.” 3ᓇᓗᓁᒃᑯᑕᕐᒥᒃ ᐊᑐᓛᕐᑐᒥᒃ ᐅᓪᓗᖅ ᓇᓪᓕᐊᑎᒃᐸᑦ ᐅᖃᕐᓗᓂ, “ᐅᓇ ᑕᕝᕙ ᓇᓗᓁᒃᑯᑕᐅᓛᕐᑐᖅ ᐊᑕᓂᐅᑉ ᐅᖃᕐᓂᖓᓄᑦ: ‘ᑕᑯᒋᑦ, ᑐᓂᕐᕈᓯᕐᕕᒃ ᓯᖁᒥᑕᐅᔪᒫᕐᐳᖅ, ᐊᕐᔭᓕᓃᓪᓗ ᐃᓗᐊᓃᑦᑐᑦ ᓈᕕᓪᓗᑎᒃ ᒪᓂᖅᑲᒧᑦ.’”
4ᐊᖓᔪᖅᑳᕐᔪᐊᑉ ᔨᕈᐳᐊᒻ ᑕᒪᓐᓇ ᑐᓴᕋᒥᐅᒃ ᒎᑎᐅᑉ ᐃᓄᖁᑎᖓᓂᑦ, ᑐᓂᕐᕈᓯᕐᕕᖕᒥᒃ ᐱᑎᓕᒥᒃ ᐊᑭᕋᕐᑐᕐᑎᓪᓗᒍ, ᑎᒃᑯᐊᕐᓗᓂᐅᒃ ᐅᖃᕐᐳᖅ, “ᐊᖑᑦ ᑖᓐᓇ ᑎᒍᔭᐅᓕ.” ᑕᕝᕔᓐᓇᖅ ᔨᕈᐳᐊᒻ ᑕᓕᖓ ᑎᒃᑯᐊᕐᑐᕐᓗᓂ ᓱᓕ ᐊᔪᓕᕐᐳᖅ, ᐅᑎᕐᑎᑦᑐᓐᓁᓪᓕᓪᓗᓂᐅᒃ. 5ᑐᓂᕐᕈᓯᕐᕕᒃᑕᐅᖅ ᓯᖁᒥᑉᐳᖅ, ᐊᕐᔭᓕᓂᖏᓪᓗ ᑲᑕᒃᐳᖅ ᓄᓇᒧᑦ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᓇᓗᓁᒃᑯᑕᐅᓂᐊᕐᓂᕋᕐᓯᒪᔭᖓ ᒪᓕᒡᓗᒍ ᐊᑕᓂᐅᑉ ᐅᖃᐅᓯᖓᓂᑦ. 6ᐊᖓᔪᖅᑳᕐᔪᐊᖅ ᔨᕈᐳᐊᒻ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᐅᖃᕐᐳᖅ, “ᑐᒃᓯᐊᓚᐅᕆᑦ ᐊᑕᓂᕐᒧᑦ ᒎᑎᖕᓄᑦ ᑕᓕᕋ ᐅᑎᕐᑎᑕᐅᖁᓗᒍ!”
ᑕᕝᕙ ᒎᑎᐅᑉ ᐅᖃᑎᖓ ᐊᑕᓂᕐᒧᑦ ᑐᒃᓯᐊᕐᐳᖅ, ᐊᖓᔪᖅᑳᕐᔪᐊᓪᓗ ᑕᓕᖓ ᐋᖅᑭᒃᑕᐅᕗᖅ. 7ᑕᕝᕙ ᐊᖓᔪᖅᑳᕐᔪᐊᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᐅᖃᕐᐳᖅ, “ᐊᖏᕐᕋᖃᑎᒋᓕᓐᖓ ᓂᕆᔭᕐᑐᕐᓗᑎᓪᓗ, ᑕᕝᕙ ᐊᑭᓕᕐᓂᐊᕐᐸᒋᑦ.”
8ᒎᑎᐅᓪᓗ ᐅᖃᕐᑎᖓ ᐊᖓᔪᖅᑳᕐᔪᐊᕐᒧᑦ ᐅᖃᕐᐳᖅ, “ᐊᖓᔪᖅᑳᕐᔪᐊᖃᕐᕕᒃᐱᑦ ᓇᑉᐸᖓᓂᒃ ᑐᓂᓂᐊᕋᓗᐊᕈᕕᖓ, ᐱᖃᑎᒋᓂᐊᓐᖏᓚᒋᑦ, ᑕᕝᕙᓂᓗ ᓂᕆᓂᐊᓐᖏᓚᖓ ᐃᒥᕐᓂᐊᕐᓇᖓᓘᓐᓃᑦ. 9ᐱᖁᔭᐅᓯᒪᒐᒪ ᐊᑕᓂᐅᑉ ᐅᖃᐅᓯᖓᒍᑦ, ᐅᖃᓚᐅᕐᒪᑦ, ‘ᓂᕆᓂᐊᓐᖏᓚᑎᑦ ᐃᒥᕐᓂᐊᕐᓇᒡᓘᓐᓃᑦ, ᑎᑭᕝᕕᒋᓚᐅᕐᑕᒃᑯᑦ ᐅᑎᕐᓂᐊᕐᓇᒡᓘᓐᓃᑦ.’” 10ᑍᒤᒻᒪᑦ ᐊᖅᑯᑎᒋᖅᑲᐅᔭᒥ ᐊᓯᐊᒎᓕᓚᐅᕐᐳᖅ, ᐅᑎᕋᓂᓗ ᑎᑭᕝᕕᒋᖅᑲᐅᔭᒥᒍᑦ ᐱᑎᓕᒧᑦ.
ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓ ᐱᑎᓕᒥᐅᑕᖅ
11ᑍᑦᓱᒪᓂᐅᑎᓪᓗᒍ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓᓂᒃ ᑕᕝᕙᓃᑦᑐᖃᓚᐅᕐᐳᖅ ᐱᑎᓕᒥ, ᐃᕐᓂᖏᑦ ᑖᑦᓱᒧᓐᖓᕐᐳᑦ ᐅᓂᒃᑳᕐᓗᑎᒃ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐱᐅᓯᕆᔭᖓᓂᒃ ᔫᑎᐊᒥᑦ ᐱᓯᒪᔫᑉ, ᐅᓪᓗᒥ ᑕᕝᕙᓂ ᐱᐅᓯᕆᔭᖓᓂᒃ ᐱᑎᓕᒥ ᐅᖃᕐᓂᖓᓂᒡᓗ ᐊᖓᔪᖅᑳᕐᔪᐊᕐᒧᑦ ᔨᕈᐳᐊᒻᒧᑦ. 12ᑖᓐᓇ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓ ᐊᐱᕆᕗᖅ, “ᓇᐅᒃᑰᕐᓗᓂ ᐊᐅᓪᓚᕐᒪᑦ?” ᐃᕐᓂᖏᒃᑕ ᑎᒃᑯᐊᕐᑑᑎᕚᑦ ᓇᐅᒃᑯᑦ ᐊᐅᓪᓚᕐᓂᕐᒪᖔᑦ ᐊᖅᑯᑎᒋᔭᖓᓂᒃ ᖃᐅᔨᑎᓪᓗᒍ. 13ᑎᓕᓯᕗᕐᓗ ᓯᐅᑎᖅᑯᕐᑐᔪᖁᑎᖓᑕ ᐃᑭᒪᕕᖓ ᐃᓕᔭᐅᖁᓪᓗᓂᐅᒃ, ᐱᔭᕇᕐᒪᑕ ᐃᑭᒐᒥ ᐊᐅᓪᓚᕐᐳᖅ. 14ᒪᓕᓕᕐᓗᓂ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓂᒃ ᔫᑕᒥᑦ ᐱᓯᒪᔪᒥᒃ, ᐊᖑᒐᒥᐅᒡᓗ ᓇᐹᕐᑑᑉ ᐆᒃ ᐊᑖᓃᑦᑐᖅ ᐊᐱᕆᕚ, “ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᒋᕚᑏᑦ ᔫᑕᒥᐅᑕᖅ?”
ᑖᑦᓱᒪ ᑭᐅᕚ, “ᑖᓐᓇᐅᕗᖓ.”
15ᑕᕝᕙ ᐅᖃᐅᑎᕚ, “ᐊᖏᕐᕋᐅᖃᑎᒋᓚᐅᓐᖓ ᓂᕆᖃᑎᒋᓂᐊᕋᒃᑭᑦ.”
16ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᔫᑕᒥᐅᑕᐅᑦ ᑭᐅᕚ, “ᐊᖏᕐᕋᐅᖃᑎᒋᔪᓐᓇᓐᖏᓚᒋᑦ, ᐊᒡᓛᑦ ᐱᖃᑎᒋᔪᓐᓇᕐᓇᒡᓘᓐᓃᑦ ᓂᕆᖁᔭᐅᖏᓐᓇᒪ ᐃᒥᖁᔭᐅᓇᖓᓘᓐᓃᑦ ᑕᒫᓂ. 17ᐊᑕᓂᐅᑉ ᐅᖃᐅᑎᓯᒪᖕᒪᖓ, ‘ᓂᕆᓂᐊᓐᖏᓚᑎᑦ ᐃᒥᕐᒥᒡᓘᓐᓃᑦ ᐃᒥᕐᓂᐊᕐᓇᒃ ᑕᒫᓂ, ᑎᑭᕝᕕᒋᔭᒃᑯᓪᓗ ᐅᑎᕐᓂᐊᕐᓇᒃ.’”
18ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓ ᐱᑦᑎᓕᒥᐅᑕᖅ ᐅᖃᓕᕐᐳᖅ ᑖᑦᓱᒧᖓ, “ᐅᕙᖓᑦᑕᐅᖅ ᒎᑎᒧᑦ ᐅᖃᕐᑎᒋᔭᐅᕗᖓ ᐃᕝᕕᑎᑐᑦ, ᐊᑕᓂᖅ ᑎᓕᓯᓯᒪᕗᖅ ᐂᖏᓕᒥᒃ ᐅᖃᐅᑎᔭᐅᖁᓪᓗᑎᑦ ᐊᖏᕐᕋᐅᖃᑎᒋᔭᕆᐊᖃᕋᒃᑭᑦ ᓂᕆᓗᑎᑦ ᐃᒥᕈᓐᓇᖁᓪᓗᑎᑦ.” ᑭᓯᐊᓂ ᑖᓐᓇ ᓴᒡᓗᓪᓗᓂ ᑍᒫᒃ ᐅᖃᕐᐳᖅ.
19ᑍᒤᒻᒪᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᔫᑕᒥᐅᑕᖅ ᑖᑦᓱᒪ ᐊᖏᕐᕋᖓᓄᑦ ᒪᓕᒃᐳᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖄᖓᓄᑦ, ᓂᕆᖃᑎᒋᓪᓗᒍᓗ. 20ᐃᒃᓯᕙᓕᕐᑎᓪᓗᒋᒃ ᓂᕆᕕᖕᒥ, ᐊᑕᓂᐅᑉ ᐅᖃᐅᓯᖓ ᑎᑭᑉᐳᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖄᖓᓄᑦ ᑕᕝᕗᓐᖓᐅᑦᔨᖅᑲᐅᔪᒧᑦ; 21ᓂᐱᖅᑯᕐᑐᓪᓗᓂ ᐅᖃᕐᐳᖅ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᔫᑕᒥᑦ ᐱᓯᒪᔪᒧᑦ, “ᐊᑕᓂᖅ ᐃᒫᒃ ᐅᖃᕐᐳᖅ, ‘ᓈᓚᖏᓐᓇᕕᐅᒃ ᐊᑕᓂᐅᑉ ᐅᖃᐅᓯᖓ, ᐱᖁᓯᒪᔭᖓᓗ ᒪᓕᖕᓇᒍ ᐊᑕᓂᐅᑉ ᒎᑎᕕᑦ ᐱᖁᔨᑦᔪᑎᒋᓚᐅᕐᑕᖓ ᐃᓕᖕᓄᑦ, 22ᑕᒪᐅᖓ ᐅᑎᕐᓯᒪᒐᕕᑦ, ᓂᕆᓪᓗᑎᓪᓗ ᐃᒥᕐᓯᒪᒐᕕᑦ ᐃᓂᕐᑎᕐᑕᐅᑦᔪᑎᒋᓚᐅᕐᑕᕐᓂᒃ, “ᓂᕆᑦᑍᓕᒋᑦ, ᐃᒥᕐᓂᐊᕐᓇᒡᓗ”; ᑕᒪᓐᓇ ᐱᓪᓗᒍ ᑐᖁᓂᐊᕐᐳᑎᑦ, ᑎᒦᓪᓗ ᐃᓕᔭᐅᓂᐊᓐᖏᓚᖅ ᐃᓚᒋᔭᕕᑦ ᐃᓗᕕᕐᕕᖏᓐᓄᑦ.’” 23ᓂᕆᔭᕇᕋᒥᒃ, ᑖᑦᓱᒪ ᐃᑑᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓᑕ ᓯᐅᑎᖅᑯᕐᑐᔫᑉ ᐃᑭᒪᕕᖓ ᐃᓕᔭᕇᕐᒪᒍ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᔫᑕᒥᐅᑕᐅᑉ ᐃᑭᕕᒋᕚ, 24ᑖᓐᓇᓗ ᐊᐅᓪᓚᕐᐳᖅ, ᐃᖏᕐᕋᓕᕐᑎᓪᓗᒍ ᐊᖅᑯᒻᒥ ᓛᔭᒧᑦ ᑎᑭᑕᐅᒐᒥ ᑐᖁᑕᐅᕗᖅ. ᑎᒥᖓᓗ ᐊᖅᑯᒻᒧᑦ ᑲᑕᒃᓗᓂ, ᓯᐅᑎᖅᑯᕐᑐᔪᖅ ᓛᔭᓗ ᑖᑦᓱᒪ ᑎᒥᐊᑕ ᓴᓂᐊᓃᑐᐃᓐᓇᓕᕐᐴᒃ. 25ᑕᑯᒋᓪᓗ, ᐊᖑᑎᓄᑦ ᐊᖅᑯᑎᒃᑰᕐᑐᓄᑦ ᑎᒥᐊ ᑕᑯᔭᐅᕗᖅ ᐊᖅᑯᒻᒦᑦᑐᖅ, ᓛᔭᓗ ᑕᑯᔭᐅᓪᓗᓂ ᑎᒥᖓᑕ ᖃᓂᒋᔮᓃᑦᑐᖅ, ᐱᑦᑎᓕᒧᑦ ᑎᑭᓐᓇᒥᒃ ᑕᒪᓐᓇ ᐅᓂᒃᑲᐅᑎᒋᕚᑦ ᑕᑯᔭᕕᓂᕐᑎᒃ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓᑕ ᓇᔪᕐᑕᖓᓄᑦ.
26ᑖᑦᓱᒪ ᐃᑑᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᑐᖃᖓᑕ ᑕᒪᓐᓇ ᑐᓴᕋᒥᐅᒃ, ᐅᖃᕐᐳᖅ, “ᑍᓐᓇᐅᕗᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᔫᑕᒥᑦ ᐱᓯᒪᔪᖅ, ᓈᓚᓚᐅᖏᑦᑐᖅ ᐊᑕᓂᐅᑉ ᐅᖃᐅᓯᕆᓚᐅᕐᑕᖓᓂᒃ; ᑍᒤᒻᒪᑦ ᐊᑕᓂᖅ ᑎᓕᓯᓚᐅᕐᐳᖅ ᓛᔭᒥᒃ ᐅᒋᐊᕐᑕᐅᖁᓪᓗᓂᐅᒃ, ᑕᒪᓐᓇ ᐊᑕᓂᐅᑉ ᐅᖃᐅᓯᕆᓚᐅᕐᑕᓂ ᑲᔪᓯᑎᑕᖓ.” 27ᐃᕐᓂᕐᒥᓄᑦ ᐅᖃᕐᐳᖅ, “ᓯᐅᑎᖅᑯᕐᑐᔪᖁᑎᒪ ᐃᑭᒪᕕᖓ ᐃᓕᓚᐅᕐᓯᐅᒃ.” ᑕᕝᕙ ᐊᑐᐃᓐᓇᕈᕐᐹᑦ, 28ᐊᐅᓪᓚᕋᒥᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᑎᒥᖓ ᓇᓂᕚ ᐊᖅᑯᒻᒦᑦᑐᖅ, ᓯᐅᑎᖅᑯᕐᑐᔪᕐᓗ ᓛᔭᓗ ᓱᓕ ᑎᒥᖓᑕ ᓴᓂᐊᓃᑦᑑᒃ. ᓛᔭᓕ ᑖᑦᓱᒪ ᑎᒥᖓᓂᒃ ᓂᕆᓚᐅᓐᖏᓚᖅ ᓯᐅᑎᖁᕐᑐᔪᒥᒡᓘᓐᓃᑦ ᐱᒋᐊᓚᐅᕋᓂ. 29ᑕᕝᕙ ᐃᑦᑑᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᒎᑎᐅᑉ ᐃᓄᖁᑎᖓᑕ ᑎᒥᖓ ᓯᐅᑎᖅᑯᕐᑐᔫᑉ ᖃᖓᓄᐊᕋᒥᐅᒃ, ᐅᑎᐅᑎᕚ ᐱᑦᑎᓕᒧᑦ ᐃᒡᓗᒐᓴᖕᓄᑦ, ᕿᐊᑦᔪᑎᒋᓪᓗᒍᓗ ᐃᓗᕕᕆᐊᕐᑐᕐᐹ. 30ᐃᓕᕚᓗ ᓇᖕᒥᓂᖅ ᐃᓚᖏᑕ ᐃᓗᕕᕐᕕᖏᓐᓄᑦ; ᐃᕐᓂᖏᑦᑕᐅᖅ ᕿᐊᑦᔪᑎᖃᕆᕗᑦ ᑖᑦᓱᒥᖓ, ᐅᖃᕐᓗᑎᒃ, “ᖃᑕᓐᖑᑏᒃ ᖃᑕᓐᖑᑏᒃ!” 31ᐃᓗᕕᕐᑕᐅᔭᕇᕐᓯᒪᓕᕐᑎᓪᓗᒍ, ᑖᓐᓇ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐃᕐᓂᕐᒥᓄᑦ ᐅᖃᕐᐳᖅ, “ᑐᖁᒍᒪ ᑕᕝᕗᖓ ᐃᓗᕕᕐᒧᑦ ᐃᓕᔭᐅᓛᕐᐳᖓ ᑎᒥᒐ ᒎᑎᐅᑉ ᐃᓄᖁᑎᖓᑕ ᓴᓂᐊᓄᐊᕐᓗᒍ; ᓴᐅᓂᒃᑲ ᓴᐅᓂᖓᑕ ᓴᓂᐊᓃᖁᓪᓗᒋᑦ. 32ᑖᑦᓱᒪ ᐅᖃᐅᓰᑦ ᐅᖃᐅᓯᕆᓚᐅᕐᑕᖏᑦ ᐊᑕᓂᐅᑉ ᓈᒻᒪᒃᓴᖏᓐᓂᖏᑦ ᐱᑎᓕᒥ ᑐᓂᕐᕈᓯᕐᕕᖕᒥᒃ, ᐊᓯᓕᒫᖏᓐᓂᒡᓗ ᑐᒃᓯᐊᕐᕕᐅᕙᒃᑐᓂᒃ ᓴᒥᕆᐊᑉ ᐃᒡᓗᒐᓴᖏᓐᓂ, ᑕᒪᒃᑯᐊ ᓱᓕᔪᒥᒃ ᓇᓚᐅᑦᓯᓪᓚᕆᖕᓂᐊᕐᐳᑦ.”
ᔨᕈᐳᐊᒻ ᐊᖏᔪᒥᒃ ᐊᔪᕐᑐᓕᓂᖓ
33ᑕᒪᑐᒪ ᑭᖑᕐᖓᒍᑦ ᔨᕈᐳᐊᒻ ᕿᒤᓚᐅᓐᖏᓚᖅ ᐊᔪᕐᑐᓕᓂᕐᒥᓂᒃ, ᓱᓕᓕ ᑐᓂᕐᕈᓯᕐᑎᑦᓯᔨᓐᖑᕐᑎᑦᓯᖃᑦᑕᓚᐅᕐᐳᖅ ᐃᓄᑐᐃᓐᓇᕐᓂᒃ ᑐᓂᕐᕈᓯᕐᕕᓕᐊᕆᓚᐅᕐᑕᒥᓄᑦ, ᐱᔪᒪᔪᑐᐃᓐᓇᒥᒃ ᑐᓂᕐᕈᓯᕐᑎᑦᓯᔨᓐᖑᕐᑎᑦᓯᖃᑦᑕᓚᐅᕐᐳᖅ ᑐᒃᓯᐊᕐᕕᓕᐊᕆᓯᒪᔭᒥᓄᑦ. 34ᑕᒪᓐᓇᓗ ᔨᕈᐳᐊᒻ ᐃᒡᓗᒥᐅᖃᑎᖏᓐᓄᑦ ᐊᔪᕐᑐᓕᓂᓐᖑᓚᐅᕐᐳᖅ, ᑐᖁᑕᐅᑦᔪᑎᒋᓚᐅᕐᐹᓗ ᐊᓯᕈᕐᑕᐅᑦᔪᑎᒋᓪᓗᒍᓗ ᑕᒫᓂ ᓄᓇᕐᔪᐊᕐᒥ.
Currently Selected:
ᐊᑕᓃᑦ ᓯᕗᓪᓖᑦ 13: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
