ᐊᑕᓃᑦ ᓯᕗᓪᓖᑦ 12
12
ᐅᓐᓄᐊᓪᓗᐊᑉ ᓇᓛᓃᑦᑐᑦ ᑭᖑᕚᕇᑦ ᐊᑭᓂᐊᕐᓂᖓᑦ
ᑯᕉᓂᑲ ᐂᑉᐸᖏᑦ 10:1-19
1ᕆᕼᐅᐳᐊᒻ ᓯᑭᒻᒧᐊᕐᐳᖅ, ᐃᓄᓕᒫᑦ ᐃᓴᕆᐊᓕᒥᐅᑦ ᓯᑭᒻᒧᐊᕆᕗᑦ ᑖᑦᓱᒥᖓ ᐊᖓᔪᖅᑳᕐᔪᐊᓐᖑᕐᑎᑦᓯᔭᕐᑐᕐᓗᑎᒃ. 2ᔨᕈᐳᐊᒻ ᓂᐹᑎᐅᑉ ᐃᕐᓂᖓ ᑐᓴᕋᒥ ᑕᒪᑐᒥᖓ ᐄᑦᔨᑉᑎᒦᓪᓗᓂ ᓱᓕ, ᕿᒫᓯᒪᓚᐅᕋᒥ ᐊᖓᔪᖅᑳᕐᔪᐊᕐᒥᑦ ᓲᓗᒨᓂᒥᑦ, ᑕᕝᕙ ᔨᕈᐳᐊᒻ ᐅᑎᕐᐳᖅ ᐄᑦᔨᑉᑎᒥᑦ. 3ᐃᓄᐃᑦ ᑎᓕᓯᕗᑦ ᑎᑭᖁᓪᓗᒍ; ᑕᕝᕙ ᔨᕈᐳᐊᒻ ᐃᓄᓕᒫᓪᓗ ᑲᑎᓪᓗᑎᒃ ᕆᕼᐅᐳᐊᒧᐊᕐᐳᑦ ᐅᖃᐅᑎᓪᓗᒍᓗ, 4“ᐊᑖᑕᕕᑦ ᓲᓗᒨᓂᐅᑉ ᐊᒃᓱᕈᕐᓇᕐᑐᓂᒃ ᐱᓇᓱᐊᕐᑎᓚᐅᕐᐹᑎᒍᑦ. ᒫᓐᓇ ᑍᒤᒻᒪᑦ ᐅᖁᒤᑦᑐᑦ ᐊᒃᓱᕈᕈᑎᒋᓗᐊᕐᓯᒪᔭᕗᑦ ᐊᒃᓱᕈᕐᓇᓗᐊᕈᓐᓃᕐᑎᒃᑯᕕᒋᑦ, ᑕᕝᕙ ᐃᓕᖕᓂᒃ ᐱᔨᑦᓯᕐᓂᐊᕐᐳᒍᑦ.” 5ᑖᑦᓱᒪ ᐅᖃᐅᑎᕔᑦ, “ᐊᖏᕐᕋᕆᑦᓯ ᐅᓪᓗᐃᑦ ᐱᖓᓱᑦ ᐊᓂᒍᕐᐸᑕ ᐅᑎᓛᕆᕗᓯ.” ᑕᕝᕙ ᐃᓄᐃᑦ ᐊᖏᕐᕋᕐᐳᑦ. 6ᐊᖓᔪᖅᑳᕐᔪᐊᖅ ᕆᕼᐅᐳᐊᒻ ᐊᐱᕐᓱᕐᐳᖅ ᐃᓄᑐᖃᐅᓂᕐᓴᐅᔪᓂᒃ ᐊᑖᑕᒥ ᓲᓗᒨᓂᐅᑉ ᐃᓱᒪᓕᐅᕐᑎᕕᓂᖏᓐᓂᒃ, ᐅᖃᕐᓗᓂ, “ᖃᓄᖅ ᐃᓱᒪᕕᓯ ᐃᓄᐃᑦ ᐅᖃᐅᑎᒐᔭᕈᒃᑭᑦ?”
7ᑖᒃᑯᐊ ᑖᑦᓱᒧᖓ ᑭᐅᕗᑦ, “ᐃᓄᐃᑦ ᑖᒃᑯᐊ ᐱᔨᑦᓯᑦᓯᐊᕈᒪᒍᕕᒋᑦ ᑭᐅᑦᓯᐊᕐᓗᒋᓪᓗ ᕿᓄᐊᕆᔭᖏᓐᓂᒃ, ᑍᒤᒃᑯᕕᑦ ᐃᓕᖕᓄᑦ ᐱᔨᑦᓯᑦᓯᐊᕐᓂᐊᕐᐳᑦ ᐃᓱᖃᖏᑦᑐᒧᑦ.”
8ᑭᓯᐊᓂ ᓈᓚᒍᒪᓚᐅᓐᖏᓚᖅ ᐊᖓᔪᒃᓯᐅᔪᑦ ᐅᖃᐅᓯᕆᔭᖏᓐᓂᒃ, ᐃᓅᓱᖕᓂᕐᓴᓅᖓᕐᓗᓂ ᐱᕈᕐᓴᖃᑎᒋᓚᐅᕐᑕᒥᓂᒃ ᐃᓱᒪᓕᐅᕐᑎᖃᖔᕈᒪᓚᐅᕐᐳᖅ. 9ᑖᒃᑯᓄᖓ ᐊᐱᕆᒋᕔᑦ, “ᖃᓄᕐᓕ ᐃᓱᒪᕕᓯ? ᐃᓄᐃᑦ ᐅᖃᐅᑎᒐᔭᕈᒃᑭᑦ ᐅᕙᓐᓄᑦ ᐅᖃᓚᐅᕐᑐᑦ, ‘ᐊᑖᑕᕕᑦ ᐅᖁᒤᒃᓴᕐᑎᑦᓯᑦᔪᑎᒋᓚᐅᕐᑕᖏᑦ ᐅᕿᒡᓕᒋᐊᕐᑎᓚᐅᒃᑭᑦ’?”
10ᑖᒃᑯᐊ ᐃᓅᓱᒃᑐᑦ ᐱᕈᕐᓴᖃᑎᕕᓂᖏᑕ ᐅᖃᐅᑎᕚᑦ, “ᐃᓄᐃᑦ ᑖᒃᑯᐊ ᐅᖃᐅᑎᔭᕆᐊᖃᕐᐸᑎᑦ ᐃᓕᖕᓄᑦ ᐅᖃᓚᐅᕐᑐᑦ: ‘ᐊᑖᑕᕕᑦ ᐅᖁᒤᒃᓴᕐᑎᓚᐅᕐᒪᑎᒍᑦ ᐱᓇᓱᐊᒐᒃᓴᑦᑎᓐᓂᒃ, ᑕᒪᓐᓇ ᐅᕿᒡᓕᒋᐊᕐᑎᑦᓱᓐᓇᕐᐱᐅᒃ ᐅᕙᑦᑎᓐᓄᑦ?’; ᑖᒃᑯᐊ ᐅᖃᐅᑎᔭᒃᓴᕆᕙᑎᑦ, ‘ᐃᕿᖅᑯᕋ ᓯᓕᖕᓂᕐᓴᐅᓂᐊᕐᐳᖅ ᐊᑖᑕᒪ ᖁᒃᑐᕋᖓᓂᑦ! 11ᒫᓐᓇᓕ, ᐊᑖᑕᒪ ᐅᖁᒤᒃᓴᕐᑎᓚᐅᕐᒪᓯ ᐊᒡᔭᕋᒃᓴᑦᓯᓐᓂᒃ, ᐅᕙᖓᓕ ᐅᖁᒤᓕᑎᒃᑲᓐᓂᕐᓂᐊᕐᐸᒃᑲ. ᐊᑖᑕᒪ ᐋᖅᑭᒋᐊᖃᑦᑕᓚᐅᕐᐹᓯ ᐃᐱᕋᐅᑕᕐᒧᑦ, ᐅᕙᖓᓕ ᐋᖅᑭᒋᐊᖃᑦᑕᕐᓂᐊᕐᐸᑦᓯ ᓯᑯᕐᐱᐅᓂᓄᑦ ᑲᐴᑎᓕᖕᓄᑦ!’”
12ᐅᓪᓗᐃᑦ ᐱᖓᓱᑦ ᐊᓂᒍᕐᒪᑕ ᔨᕈᐳᐊᒻ ᐃᓄᓕᒫᓂᒃ ᐃᓚᖃᕐᓗᓂ ᐊᖓᔪᖅᑳᕐᔪᐊᕐᒧᑦ ᕆᕼᐅᐳᐊᒧᐊᕐᐳᑦ, ᐊᖓᔪᖅᑳᕐᔪᐊᖅ ᐅᖃᓚᐅᕐᒪᑦ, “ᐅᓪᓗᑦ ᐱᖓᓱᑦ ᐊᓂᒍᕐᐸᑕ ᕾᓛᕆᕗᓯ.” 13ᐊᖓᔪᖅᑳᕐᔪᐊᑉ ᐃᓄᐃᑦ ᐅᖃᕐᕕᒋᕔᑦ ᐋᓐᓂᕐᓇᕐᑐᐊᓗᖕᓂᒃ, ᐃᓄᑐᖃᐅᓂᕐᓴᐅᔪᑦ ᐃᓱᒪᓕᐅᕈᑎᒋᓯᒪᔭᖏᑦ ᑲᒪᒋᓇᒋᑦ, 14ᐅᖃᕐᕕᒋᕔᑦ ᐃᓅᓱᖕᓂᕐᓮᑦ ᐃᓱᒪᓕᐅᕈᑎᖏᑦ ᒪᓕᒡᓗᒋᑦ ᐅᖃᕐᓗᓂ, “ᐊᑖᑕᒪ ᐊᒡᔭᒐᒃᓴᑦᓯᓐᓂᒃ ᐅᖁᒤᒃᓴᕐᑎᓚᐅᕐᐹᓯ, ᐅᕙᖓᓕ ᐅᖁᒤᒃᓴᕈᑎᓯ ᐃᓚᒃᑲᓐᓂᕐᓂᐊᕐᐸᒃᑲ; ᐊᑖᑕᒪ ᐋᖅᑭᒋᐊᖃᑦᑕᓚᐅᕐᐹᓯ ᐃᐸᕋᕐᑐᕐᓗᓯ; ᐅᕙᖓᓕ ᐋᖅᑭᒋᐊᖃᑦᑕᕐᓂᐊᕐᐸᑦᓯ ᓯᑯᕐᐱᐅᓂᓄᑦ ᑲᐴᑎᓕᖕᓄᑦ.” 15ᐊᖓᔪᖅᑳᕐᔪᐊᖅ ᐃᓄᐃᑦ ᐅᖃᐅᓯᕆᔭᖏᓐᓂᒃ ᓈᓚᓚᐅᓐᖏᓚᖅ, ᐊᑕᓂᐅᑉ ᐅᖃᐅᓯᕆᓚᐅᕐᑕᖓ ᓇᓛᐅᑦᓯᖁᓪᓗᒍ, ᐊᑕᓂᖅ ᐅᖃᓚᐅᕐᒪᑦ ᐊᕼᐂᔭᒃᑯᑦ ᓮᓗᓁᑎᒥᐅᑕᒃᑯᑦ ᔨᕈᐳᐊᒻᒧᑦ ᓂᐹᑦ ᐃᕐᓂᖓᓄᑦ.
16 #
ᓴᒧᐃᓕ ᐂᑉᐸᖏᑦ 20:1. ᐃᓄᐃᑦ ᖃᐅᔨᒐᒥᒃ ᐊᖓᔪᖅᑳᕐᔪᐊᕐᒧᑦ ᓈᓚᒃᑕᐅᖏᓐᓂᕐᒥᖕᓂᒃ, ᐃᓄᐃᑦ ᐊᖓᔪᖅᑳᕐᔪᐊᕐᒧᑦ ᑭᐅᕗᑦ, “ᖃᓄᖅ ᐱᕙᓪᓕᕐᑎᑕᐅᕕᒃᓴᖃᕐᐱᑖ ᑍᕕᑎᒃᑯᓐᓂᑦ? ᔨᓯᐅᑉ ᑭᖑᕚᖏᓐᓂᑦ ᑭᖑᕐᖑᑎᔭᒃᓴᖃᕈᓐᓃᕐᐳᒍᑦ, ᐊᑏ ᐃᓴᕆᐊᓕᒥᐅᖑᔪᓯ ᐊᖏᕐᕋᑐᐃᓐᓇᓕᕐᑕ! ᑍᕕᑎᐅᑉ ᑭᖑᕚᖏᑦ ᐃᒻᒥᖕᓂᒃ ᑲᒪᒋᓂᐊᓕᕐᒪᑕ.”
ᑕᕝᕙ ᐃᓴᕆᐊᓕᒥᐅᑦ ᐊᖏᕐᕋᓕᓚᐅᕐᐳᑦ. 17ᕆᕼᐅᐳᐊᒻ ᐊᖓᔪᖅᑳᕐᔪᐊᖑᓕᓚᐅᕐᐳᖅ ᐃᓴᕆᐊᓕᒥᐅᓄᑦ ᔫᑕᐅᑉ ᑭᖑᕚᖏᑕ ᓄᓇᖓᓃᑦᑐᓄᑦ ᐃᒡᓗᒐᓴᖏᓐᓄᓪᓗ.
18ᐊᖓᔪᖅᑳᕐᔪᐊᖅ ᕆᕼᐅᐳᐊᒻ ᑎᓕᓯᓚᐅᕐᐳᖅ ᐊᑐᕌᒻᒥᒃ, ᑖᓐᓇ ᐊᖓᔪᖅᑳᕆᔭᐅᔪᖅ ᓴᓇᔨᓄᑦ ᐊᒃᓱᕈᕐᑎᑕᐅᓪᓗᑎᒃ ᓴᓇᑎᑕᐅᔪᓄᑦ, ᑎᑭᒻᒪᑦ ᐃᓴᕆᐊᓕᒥᐅᓕᒫᓄᑦ ᒥᓪᓗᕐᑕᐅᓪᓗᓂ ᑐᖁᑕᐅᕗᖅ. ᑕᕝᕙ ᕆᕼᐅᐳᐊᒻ ᑐᐊᕕᕐᓗᓂ ᕿᒧᒃᓯᐅᑎᒥᓄᐊᕐᓗᓂ ᐊᒃᓴᓗᐊᓕᖕᒧᑦ, ᕿᒫᒃᓯᕗᖅ ᔨᕉᓴᓕᒧᑦ. 19ᑍᒪᓐᖓᓂᑦ ᐱᒋᐊᕐᓗᑎᒃ ᐅᓪᓗᒥᒧᑦ ᐃᓴᕆᐊᓖᑦ ᐊᑭᕋᕐᑐᓕᕐᐳᑦ ᑍᕕᑎᐅᑉ ᑭᖑᕚᓕᒪᖏᓐᓂᒃ.
20ᐃᓄᐃᑦ ᐃᓴᕆᐊᓕᒃᑯᑦ ᑐᓴᕋᒥᒃ ᔨᕈᐳᐊᒻ ᐅᑎᕐᓯᒪᓕᕐᓂᖓᓂᒃ, ᕾᖁᕚᑦ ᑲᑎᒪᔪᓄᐊᖁᓪᓗᒍ ᑕᕝᕙᓂ ᐊᖓᔪᖅᑳᕐᔪᐊᓐᖑᕐᑎᑉᐹᑦ ᐃᓴᕆᐊᓕᓕᒫᒧᑦ. ᑖᒃᑯᐊ ᒪᓕᒃᑐᖃᕈᓐᓃᓚᐅᕐᐳᑦ ᑍᕕᑎᐅᑉ ᑭᖑᕚᖏᓐᓂᒃ, ᔫᑕᐅᓪᓕ ᑭᖑᕚᖏᑦ ᒪᓕᒃᑐᑑᓕᕐᐳᑦ ᑍᕕᑎᐅᑉ ᑭᖑᕚᖏᓐᓂᒃ.
ᓯᒤᔭᐅᑉ ᐅᖃᓪᓚᖕᓂᖓ
ᑯᕉᓂᑲ ᐂᑉᐸᖏᑦ 11:1-4
21ᕆᕼᐅᐳᐊᒻ ᑎᑭᓐᓇᒥ ᔨᕉᓴᓕᒧᑦ, ᑲᑎᖁᔨᕗᖅ 180,000ᓂᒃ ᐅᓇᑕᕐᑐᒃᓴᑦᓯᐊᕙᐅᓂᕐᐹᓂᒃ ᔫᑕᐅᑉ ᐱᓐᔭᒥᓂᐅᓪᓗ ᑭᖑᕚᖏᓐᓂᒃ ᐅᓇᑕᕆᐊᕈᒪᓪᓗᓂ ᐃᓴᕆᐊᓕᐅᑉ ᑭᖑᕚᖏᓐᓂᒃ, ᐊᖓᔪᖅᑳᕐᔪᐊᖃᕐᕕᒃ ᐅᑎᕐᑎᑦᓱᒪᓪᓗᒍ ᕆᕼᐅᐳᐊᒻᒧᑦ ᓲᓗᒨᓂᐅᑉ ᐃᕐᓂᖓᓄᑦ. 22ᒎᑎᐅᓪᓕ ᐅᖃᕐᑎᖓ ᓯᒤᐊ, ᒎᑎᒧᑦ ᐅᖃᐅᑎᔭᐅᕗᖅ, 23“ᐅᖃᐅᑎᒍᒃ ᕆᕼᐅᐳᐊᒻ ᓲᓗᒨᓂᐅᑉ ᐃᕐᓂᖓ, ᔫᑕᐅᑉ ᐊᖓᔪᖅᑳᕐᔪᐊᖓ, ᔫᑕᐅᓪᓗ ᐱᓐᔭᒥᓂᐅᓪᓗ ᑭᖑᕚᖏᑦ ᐃᓄᓕᒫᓪᓗ, 24‘ᐊᑕᓂᖅ ᐃᒫᒃ ᐅᖃᕐᐳᖅ, ᐅᓇᑕᕆᐊᕐᑐᒃᓴᐅᓐᖏᓚᓯ ᓇᖕᒥᓂᖅ ᖃᑕᓐᖑᑎᑦᓯᓐᓄᑦ ᐃᓴᕆᐊᓕᒥᐅᓄᑦ. ᑕᒪᑦᓯ ᐊᖏᕐᕋᑐᐃᓐᓇᓕᕆᑦᓯ ᑕᒪᓐᓇ ᐱᐅᓯᕆᓕᕐᑕᓯ ᐅᕙᖓ ᑍᒤᑎᓐᓇᒃᑯ.’” ᐊᑕᓂᐅᑉ ᐅᖃᐅᓯᕆᔭᖏᑦ ᑎᓕᓯᑦᔪᑎᖏᓪᓗ ᓈᓚᒃᑕᐅᓚᐅᕐᐳᑦ, ᐊᖏᕐᕋᕐᓗᑎᒃ ᐊᑕᓂᐅᑉ ᐅᖃᐅᓯᖓ ᒪᓕᒡᓗᒍ.
ᔨᕈᐳᐊᒻ ᑐᓄᐃᓂᖓ ᒎᑎᒥᒃ
25ᐃᓴᕆᐊᓕᐅᑉ ᐊᖓᔪᖅᑳᕐᔪᐊᖓ ᔨᕈᐳᐊᒻ ᓄᓇᓕᖕᒥᒃ ᓯᑭᒻᒥᒃ ᖃᖅᑲᓃᑦᑐᒥᒃ ᐊᕙᓗᕐᔪᐊᓕᐅᕆᓚᐅᕐᐳᖅ ᖃᖅᑲᓕᖕᓂ ᐃᕗᕅᒦᑦᑐᒥ, ᑕᕝᕙᓂᓗ ᓄᓇᖃᓚᐅᑲᒡᓗᓂ; ᓅᓚᐅᕆᕗᖅ ᐱᓄᐃᓕᒥᒃ ᓴᓇᓕᕆᓪᓗᓂ. 26ᔨᕈᐳᐊᒻ ᐆᒻᒪᑎᒥᒍᑦ ᐃᓱᒪᖃᓚᐅᕐᒪᑦ, “ᐊᖓᔪᖅᑳᕐᔪᐊᖃᕐᕕᒃ ᐅᑎᕐᓂᐊᕐᑐᒃᓴᐅᓕᕆᕗᖅ ᑍᕕᑎᐅᑉ ᑭᖑᕚᖏᓐᓄᑦ; 27ᐃᓄᐃᑦ ᔨᕉᓴᓕᒧᐊᕈᑎᒃ ᑐᓂᕐᕈᓯᕆᐊᕐᑐᕐᓗᑎᒃ ᑐᒃᓯᐊᕐᕕᒡᔪᐊᒥ, ᑕᕝᕙ ᐃᓄᐃᑦ ᐆᒻᒪᑎᖏᑦ ᐅᑎᕐᓂᐊᕆᕗᑦ ᐊᑕᓂᕐᒧᑦ, ᑐᖁᑕᐅᓗᖓᓗ ᐅᑎᕐᓂᐊᕐᐳᑦ ᕆᕼᐅᐳᐊᒻᒧᑦ ᔫᑕᐅᑉ ᐊᖓᔪᖅᑳᕐᔪᐊᖓᓄᑦ.”
28 #
ᒨᓯᓯ ᐂᑉᐸᖏᑦ 32:4. ᐃᓱᒪᒃᓴᕐᓯᐅᓚᐅᕐᓗᓂ, ᒪᕐᕉᖕᓂᒃ ᐃᒻᒧᒃᓯᐅᒐᐅᑉ ᓄᕐᕋᓐᖑᐊᖏᖕᓂᒃ ᓴᓇᕗᖅ ᒎᓘᓪᓗᒋᒃ, ᐃᓄᐃᓗ ᐅᖃᐅᑎᓪᓗᓂᒋᑦ, “ᐊᑯᓂᐅᓗᐊᓕᕐᒪᑦ ᑍᒪᓐᖓᑦ ᔨᕉᓴᓕᒧᐊᖃᑕᕐᓗᓯ ᑐᒃᓯᐊᕆᐊᕐᑐᕐᓗᓯ, ᐃᓕᑦᓯ ᐃᓴᕆᐊᓖᑦ ᐃᓄᖏᑦ ᐅᕝᕙᐅᓇ ᒎᑎᓯ ᐄᑦᔨᑉᑎᒥᑦ ᐊᐅᓪᓚᕐᑎᑦᓯᓚᐅᕐᑐᖅ!” 29ᐂᑉᐸᖓ ᓄᕐᕋᓐᖑᐊᖅ ᐃᓕᓪᓗᓂᐅᒃ ᐱᑎᓕᒧᑦ ᐂᑉᐸᖓᓗ ᑖᓐᒧᑦ. 30ᑍᒤᒻᒪᑦ ᐃᓄᐃᑦ ᐊᔪᕐᑐᓕᓕᕐᐳᑦ, ᑐᒃᓯᐊᕆᐊᖃᑦᑕᕐᓗᑎᒃ ᐱᑎᓕᒧᑦ ᑖᓐᒧᓪᓗ. 31ᔨᕈᐳᐊᒻ ᑐᒃᓯᐊᕐᕕᓕᐅᕐᑎᑦᓯᕗᖅ ᐱᖑᐃᑦ ᖄᖏᓐᓂ, ᓂᕈᐊᕐᓗᓂᓗ ᑐᓂᕐᕈᓯᕐᑎᑦᓯᔨᓂᒃ ᓕᕔᑎᐅᖏᑦᑐᓂᒃ.
ᐱᑎᓕᒥ ᑐᒃᓯᐊᕐᓂᐅᑉ ᓇᕐᕈᓇᕐᓯᑎᑕᐅᓂᖓ
32 #
ᒨᓯᓯ ᐱᖓᔪᖏᑦ 23:33,34. ᔨᕈᐳᐊᒻ ᐋᖅᑮᒃᑲᓐᓂᓚᐅᕆᕗᖅ ᐅᒃᐱᕐᓂᖅ ᐱᑦᔪᑎᒋᓪᓗᒍ ᓇᓪᓕᐅᓐᓂᕐᓯᐅᕐᕕᖕᒥᒃ, ᐅᓪᓗᐃᑦ 15ᖓᓂ ᑕᖀᑦ 8ᖓᓂ, ᔫᑕᒥ ᓇᓪᓕᐅᓐᓂᕐᓯᐅᕐᕕᐅᑉ ᐊᑦᔨᖓᓂᒃ, ᑕᕝᕙᓂᓗ ᐱᑎᓕᒥ ᑐᓂᕐᕈᓯᕐᕕᖕᒥᒃ ᓄᕐᕋᓐᖑᐊᓄᑦ ᒎᓗᓄᑦ ᓴᓇᓚᐅᕐᐳᖅ, ᐃᓕᔭᐅᑎᓪᓗᒋᑦ ᐱᑎᓕᒥ ᑐᓂᕐᕈᓯᕐᑎᑦᓯᔨᒥᒡᓗ ᑎᓕᓯᓪᓗᓂ ᓴᓇᔭᕕᓂᖓᓂᒃ ᐱᔨᑦᓯᕐᓂᐊᕐᑐᒥᒃ. 33ᐅᓪᓗᐃᑦ 15ᖓᓂ ᑕᖅᑮᑦ 8ᖓᓂ ᓇᖕᒥᓂᕐᒥᓄᑦ ᐅᐸᓗᖎᕐᑕᒥᓂᒃ ᑐᓂᕐᕈᓯᕐᓗᓂᓗ ᑐᓂᕐᕈᑎᒥᒃ ᑐᓂᕐᕈᓯᕐᕕᖕᒥ ᐱᑎᓕᒥ, ᐱᒋᐊᕐᑎᓚᐅᕐᑕᒥᓂᒃ ᓇᓪᓕᐅᓐᓂᕐᓯᐅᕐᑕᐅᖃᑦᑕᖁᓪᓗᒍ ᐃᓴᕆᐊᓕᐅᑉ ᐃᓄᖏᓐᓄᑦ.
Currently Selected:
ᐊᑕᓃᑦ ᓯᕗᓪᓖᑦ 12: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
