ᐊᑕᓃᑦ ᓯᕗᓪᓖᑦ 11
11
ᓲᓗᒨᓂᐅᑉ ᒎᑎᒥᒃ ᑐᓄᑦᓯᓂᖓ
1 #
ᒨᓯᓯ ᑕᓪᓕᒪᖏᑦ 17:17. ᓲᓗᒨᓂ ᐊᕐᓇᓂᒃ ᐅᓄᕐᑐᓂᒃ ᓄᓇᓕᒡᔪᐊᑦ ᐊᓯᖏᓐᓂᑦ ᐱᓯᒪᔪᓂᒃ ᐱᐅᒃᓴᓚᐅᕐᒪᑦ; ᐊᖓᔪᖅᑳᕐᔪᐊᑉ ᐄᑦᔨᑉᑎᒥᐅᑕᐅᑉ ᐰᕉᑉ ᐸᓂᐊᑕ ᐊᓯᖏᓐᓂᒃ ᓄᓕᐊᓂᒃᑲᓐᓂᓚᐅᕐᐳᖅ ᕼᐃᑍᑎᒥᐅᑕᕐᒥᒃ, ᒧᐊᐱᒥᐅᑕᕐᒥᒃ, ᐊᒧᓁᑎᒥᐅᑕᕐᒥᒃ, ᐄᑐᒥᒥᐅᑕᕐᒥᒃ, ᓮᑐᓂᒥᐅᑕᕐᒥᒡᓗ. 2#ᒨᓯᓯ ᐂᑉᐸᖏᑦ 34:16; ᒨᓯᓯ ᑕᓪᓕᒪᖏᑦ 7:3,4.ᑖᒃᑯᐊ ᓄᓕᐊᕐᑖᕆᓚᐅᕐᑕᖏᑦ ᐃᓅᖃᑎᒌᒡᔪᐊᓂᑦ ᐃᓴᕆᐊᓕᒥᐅᖑᖏᑦᑐᓂᑦ ᐊᑕᓂᖅ ᐃᓴᕆᐊᓕᓄᑦ ᐅᖃᓚᐅᕋᓗᐊᕐᑎᓪᓗᒍ, “ᐃᓅᖃᑎᑐᖃᕆᓐᖏᑕᑦᓯᓐᓂᒃ ᓄᓕᐊᓂᒃᑐᒃᓴᐅᓐᖏᓚᓯ, ᑍᒃᑯᐊᓗ ᑍᒤᓕᐅᕐᑐᒃᓴᐅᖏᓐᓂᕗᑦ ᐃᓕᑦᓯᓐᓄᑦ, ᓇᓗᓇᖏᒻᒪᑦ ᐆᒻᒪᑎᑦᓯᓐᓂᒃ ᓴᖑᑎᑦᓯᒐᔭᕐᒪᑕ ᐅᒃᐱᓕᕐᑎᓪᓗᓯ ᒎᑎᒋᔭᒥᖕᓄᑦ”; ᓲᓗᒨᓂ ᑲᔪᓯᓚᐅᕐᐳᖅ ᐊᕐᓇᓄᑦ ᐅᖓᒋᓕᕐᑕᒥᓄᑦ. 3ᓲᓗᒨᓂ 700ᓂᒃ ᓄᓕᐊᖃᓚᐅᕐᐳᖅ, ᐊᖓᔪᖅᑳᕐᔪᐊᕐᒥᐅᑕᓂᒃ, 300ᓂᒡᓗ ᓄᓕᐊᒃᑲᓐᓂᖃᕐᓗᓂ; ᑖᒃᑯᐊᓗ ᐆᒻᒪᑎᖓᓂᒃ ᓴᖑᑎᑦᓯᓚᐅᕐᐳᑦ ᒎᑎᒥᑦ. 4ᐃᓄᑐᖃᐅᓕᕐᓗᓂ ᓲᓗᒨᓂᐅᑉ ᐆᒻᒪᑎᖓ ᓄᓕᐊᖏᑕ ᓴᖑᑎᓚᐅᕐᐹᑦ ᒎᑎᓐᖑᐊᓄᑦ ᐱᓇᓱᐊᓕᕐᓗᓂ; ᐆᒻᒪᑎᒃᑯᑦ ᐊᒃᓱᕈᕈᓐᓃᓚᐅᕐᒪᑦ ᐊᑕᓂᕐᒧᑦ ᒎᑎᒥᓄᑦ, ᐊᑖᑕᒥ ᑍᕕᑎᐅᑉ ᑲᔪᓯᓂᕆᓚᐅᕐᑕᖓᑐᑦ. 5ᓲᓗᒨᓂ ᑐᒃᓯᐊᖃᑦᑕᓕᓚᐅᕐᐳᖅ ᐋᔅᑕᕉᑎᒧᑦ ᐊᕐᓇᐅᓪᓗᓂ ᓮᑐᓂᒥᐅᑦ ᒎᑎᓐᖑᐊᖓᓄᑦ, ᒧᓕᑭᒧᓪᓗ ᐊᒧᓁᑎᑦ ᒎᑎᓐᖑᐊᖓᓄᑦ ᒎᑎᐅᑉ ᓇᕐᕈᒋᔭᖓᓄᑦ. 6ᑍᒤᒻᒪᑦ ᓲᓗᒨᓂ ᐊᔪᕐᑐᓕᓚᐅᕐᐳᖅ ᐊᑕᓂᕐᒧᑦ, ᒪᓕᑦᓯᐊᕈᓐᓃᕐᓗᓂᓗ ᐊᑕᓂᕐᒥᒃ, ᐊᑖᑕᒥᓂᒃ ᑍᕕᑎᒥᒃ ᐃᒡᔭᕐᓯᔪᓐᓃᓚᐅᕐᐳᖅ. 7ᓲᓗᒨᓂ ᓴᓇᓚᐅᕆᕗᖅ ᑐᒃᓯᐊᕐᕕᖕᒥᒃ ᑭᒨᓯᒧᑦ ᒧᐊᐱᒥᐅᑦ ᒎᑎᓐᖑᐊᖓᓐᓄᑦ ᒎᑎᐅᑉ ᓇᕐᕈᒋᔭᖓᓄᑦ, ᑐᒃᓯᐊᕐᕕᖕᒥᒡᓗ ᒧᓕᑭᒧᑦ ᐊᒧᓁᑎᒥᐅᑦ ᒎᑎᓐᖑᐊᖓᓂᒃ ᒎᑎᐅᑉ ᓇᕐᕈᒋᔭᖓᓂᒃ ᔨᕉᓴᓕᐅᑉ ᑕᓕᕐᐱᐊᓂ ᓯᕿᓂᐅᑉ ᓄᐃᕕᐊᑕ ᓇᓛᓂ. 8ᑐᒃᓯᐊᕐᕕᖕᓂᒡᓗ ᓴᓇᓚᐅᕐᐳᖅ ᓄᓕᐊᒥᓄᑦ ᓄᓇᖃᑎᑐᖃᕆᓐᖏᑕᖏᑕ ᐃᓯᕐᓗᐊᕐᓂᑎᑦᓯᕕᒃᓴᖏᓐᓂᒃ ᑐᒃᓯᐊᕐᓗᑎᒃ ᑐᓂᕐᕈᓯᕐᕕᒃᓴᖏᓐᓂᒃ ᒎᑎᓐᖑᐊᒥᖕᓄᑦ. 9ᐊᑕᓂᕐᓗ ᓂᓐᖓᓚᐅᕐᐳᖅ ᓲᓗᒨᓂᒧᑦ, ᐆᒻᒪᑎᖓ ᐊᑕᓂᕐᒥᑦ ᓴᖑᓯᒪᓕᓚᐅᕐᒪᑦ ᐃᓴᕆᐊᓕᒥᐅᑦ ᒎᑎᖓᓐᓂᑦ, ᒪᕐᕈᐃᕐᓱᕐᓗᓂ ᓴᖅᑭᓯᒪᑎᓪᓗᒍ ᑖᑦᓱᒧᖓ, 10ᐊᑕᓂᐅᑉ ᐃᓂᕐᑎᕐᓯᒪᒐᓗᐊᕐᑎᓪᓗᓂᐅᒃ, ᒎᑎᓐᖑᐊᓄᑦ ᑐᒃᓯᐊᖃᑦᑕᖁᓇᒍ; ᑭᓯᐊᓂᓕ ᐊᑕᓂᐅᑉ ᐃᓂᕐᑎᕆᐅᑎᒋᓯᒪᔭᖓᓂᒃ ᒪᓕᒍᓐᓃᓚᐅᕐᐳᖅ. 11ᑍᒤᒻᒪᑦ ᐊᑕᓂᐅᑉ ᓲᓗᒨᓂ ᐅᖃᐅᑎᕚ, “ᐱᔮᕆᓪᓗᑎᑦ ᐅᕙᓐᓄᑦ ᐊᖏᖃᑎᒌᒍᑏᑦ ᓯᖁᒥᒃᑲᕕᐅᒃ, ᓈᓚᖏᓪᓗᑎᓪᓗ ᐱᖁᔭᓐᓂᒃ, ᒫᓐᓇ ᓱᓕᓪᓚᕆᒡᓗᖓ ᐊᖓᔪᖅᑳᕐᔪᐊᖑᓂᕐᓂᒃ ᐊᕐᓵᕐᓂᐊᓕᕐᐸᒋᑦ ᑐᓂᓗᒍᓗ ᐱᔨᕕᑦ ᐃᓚᖓᓐᓄᑦ. 12ᑭᓯᐊᓂ ᐊᑖᑍᑦ ᑍᕕᑎ ᐱᔪᑎᒋᓪᓗᒍ ᑍᒤᓕᐅᕐᓂᐊᖏᑦᑐᖓ ᐃᓅᑎᓪᓗᑎᑦ, ᑭᓯᐊᓂ ᐃᕐᓃᑦ ᐊᖓᔪᖅᑳᕐᔪᐊᓐᖑᕐᐸᑦ ᑍᒤᓕᐅᓛᕐᐳᖓ. 13ᑭᓯᐊᓂᓕ ᐊᖓᔪᖅᑳᕐᔪᐊᖑᓂᖓ ᐊᑕᖏᕐᓗᒍ ᐲᕐᓂᐊᓐᖏᒃᑲᓗᐊᕐᐸᕋ; ᐱᓂᐊᕐᓂᖃᓛᕐᐳᖓᓕ ᐊᑕᐅᓯᕐᒥᒃ ᑭᖑᕚᖑᖃᑎᒌᓂᒃ ᐊᒥᐊᒃᑯᔪᒫᕐᐸᕋ, ᐱᔨᒐ ᑍᕕᑎ ᐱᔪᑎᒋᓪᓗᒍ ᔨᕉᓴᓕᓗ ᐱᔪᑎᒋᓪᓗᒍ ᓇᖕᒥᓂᖅ ᓂᕈᐊᕐᓯᒪᒐᒃᑯ.”
ᓲᓗᒨᓂᐅᑉ ᐊᑭᕋᕐᑐᕐᑎᖏᑦ
14ᐊᑕᓂᐅᑉ ᓲᓗᒨᓂ ᐊᑭᕋᕐᑐᕐᑎᖃᕐᑎᓕᕐᐹ, ᕼᐊᑖᑦᒥᒃ ᐄᑐᒥᒥᐅᑕᕐᒥᒃ; ᐊᖓᔪᖅᑳᕐᔪᐊᖓᑦᑕ ᖃᑕᓐᖑᑎᖓᑕ ᐃᓚᖓᓐᓂᒃ. 15ᑕᒪᑐᒪ ᓯᕗᓂᑐᖃᖓᒍᑦ ᑍᕕᑎ ᓵᓚᒃᓴᕐᑎᓪᓗᒍ ᐄᑐᒥᒥᒃ, ᔪᐊᐱ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᑕᕝᕗᓐᖓᓚᐅᕐᓯᒪᖕᒪᑦ ᑐᖁᖓᔪᓂᒃ ᐃᓗᕕᕐᓯᔭᕐᑐᕐᓗᓂ, ᐊᖑᑎᓕᒫᑦᓯᐊᓂᒃ ᐃᑐᒥᒥᐅᑕᓂᒃ ᑐᖁᑦᓯᓚᐅᕐᓯᒪᖕᒪᑦ. 16ᔪᐊᐱᐅᑉ ᐅᓇᑕᕐᑐᒃᓴᑦ ᐃᓚᒋᔭᓂ ᐃᓚᒋᓪᓗᒋᑦ ᑕᕝᕙᓃᓚᐅᕐᓯᒪᖕᒪᑕ ᑕᖅᑭᓂᒃ ᐱᖓᓲᔪᕐᑐᓂᒃ, ᑕᕝᕙᓃᓪᓗᑎᒃ ᐊᖑᑎᓕᒫᓂᒃ ᑐᖁᑦᓯᓚᐅᕐᓯᒪᖕᒪᑕ. 17ᕼᐊᑖᑦ ᕿᒫᓚᐅᕐᓯᒪᖕᒪᑦ ᐄᑦᔨᑉᑎᒧᑦ, ᐊᑖᑕᖓᑕᓗ ᐱᔨᖏᑦ ᐄᑐᒥᒥᐅᑍᑦ, ᑍᑦᓱᒪᓂᐅᑎᓪᓗᒍ ᕼᐊᑖᑦ ᓱᕈᓯᑯᓘᓚᐅᕐᐳᖅ. 18ᒥᑎᐊᓂᒥᑦ ᐊᐅᓪᓚᕋᒥᒃ ᐸᕌᓐᒧᐊᓚᐅᕐᐳᑦ, ᐃᓚᑖᕐᓗᑎᒃ ᐊᖑᑎᓂᒃ ᑕᕝᕙᓐᖓᑦ ᐄᑦᔨᑉᑎᒧᐊᓚᐅᕐᐳᑦ, ᐊᖓᔪᖅᑳᕐᔪᐊᒧᐊᕐᓗᑎᒡᓗ ᐰᕉᒧᑦ ᐄᑦᔨᑉᑎᐅᑉ ᐊᖓᔪᖅᑳᕐᔪᐊᖓᓄᑦ, ᑖᑦᓱᒪᓗ ᐃᒡᓗᑖᕐᑎᓚᐅᕐᐰᑦ, ᓂᕿᑖᖃᑦᑕᓕᕐᑎᓪᓗᒋᓪᓗ, ᓄᓇᑖᕐᑎᓪᓗᓂᒋᓪᓗ. 19ᕼᐊᑖᑦ ᖁᕕᐊᒋᓪᓗᒍ ᐃᓚᓐᓇᕆᔭᕐᑖᓚᐅᕐᒪᑦ ᐰᕉᒥᒃ, ᑖᑦᓱᒪ ᐊᖓᔪᖅᑳᕐᔪᐊᑉ ᐂᒥᓂᒃ ᑯᐃᓐ ᓄᑲᖓᓂᒃ ᑕᐱᓂᓯᒥᒃ ᓄᓕᐊᓂᒃᑎᓚᐅᕐᐹ. 20ᑕᐱᓂᓯᐅᑉ ᓄᑲᖓ ᐃᕐᓂᕐᑖᓚᐅᕐᐳᖅ ᔨᓄᐹᑕᒥᒃ, ᑖᓐᓇ ᑕᐱᓂᓯᒥ ᐱᕈᕐᓴᓚᐅᕐᐳᖅ ᑯᐃᓐᒦᓪᓗᓂ ᐊᖓᔪᖅᑳᕐᔪᐊᒃᑯᕕᖕᒥ ᐃᓅᖃᑎᖃᕐᓗᓂ ᐊᖏᕐᕋᖃᕐᓗᓂᓗ ᐰᕉᑉ ᐃᕐᓂᖏᓐᓂ. 21ᕼᐊᑖᑦ ᑐᓴᕋᒥ ᐄᑦᔨᑉᑎᓂᒦᓪᓗᓂ ᑍᕕᑎᒎᖅ ᑐᖁᖕᒪᑦ, ᔪᐊᐱᓗᒎᖅ ᑐᖁᖕᒥᖕᒪᑦ ᐅᓇᑕᕐᑐᒃᓮᑦ ᐊᖓᔪᖅᑳᖓᑦ, ᕼᐊᑖᑦ ᐰᕉᒧᑦ ᐅᖃᕐᐳᖅ, “ᐊᖏᕐᕋᕐᑎᑕᐅᔪᒪᓕᕐᐳᖓ ᓄᓇᑐᖃᕆᔭᓐᓄᑦ.” 22ᐰᕉᑉ ᐊᐱᕆᕚ, “ᓱᓇᒥᒃ ᑐᓂᔭᕆᐊᖃᕐᑕᓐᓂᒃ ᐃᓕᖕᓄᑦ ᑐᓂᓯᓚᐅᖏᓐᓇᒫ? ᑕᒪᓐᓇ ᐅᑎᕈᒪᑦᔪᑎᒋᓕᕐᐱᐅᒃ ᓄᓇᑐᖃᕐᓄᑦ?”
ᕼᐊᑖᑦ ᑭᐅᕗᖅ, “ᐊᐅᓪᓚᕈᓐᓇᕐᑎᑕᐅᑐᐃᓐᓇᕈᒪᕗᖓ.”#11:22 ᑖᓐᓇ ᐄᑐᒥᒥᐅᖑᖕᒪᑦ, ᕼᐊᑖᑦ ᐊᖏᔪᐊᓗᖕᒥᒃ ᐱᐅᒋᔭᐅᓚᐅᓐᖏᓚᖅ, ᐊᑭᕋᕆᔭᐅᓪᓗᓂᓗ ᐃᓴᕆᐊᓕᓄᑦ
23ᓱᓕᑦᑕᐅᖅ ᒎᑎᐅᑉ ᕇᔭᓐ ᐃᓔᐊᑕᐅᑉ ᐃᕐᓂᖓ ᓲᓗᒨᓂᒥᒃ ᐊᑭᕋᕐᑐᕐᑎᓕᕆᕚ, ᕇᔭᓐ ᕿᒫᓚᐅᕐᒪᑦ ᐊᖓᔪᖅᑳᒥᓂᑦ, ᐊᖓᔪᖅᑳᕐᔪᐊᒥᒃ ᕼᐊᑕᑎ-ᔨᕆᒥᒃ ᔫᐸᒥᐅᑕᕐᒥᒃ. 24ᐊᖑᑎᓂᒃ ᑲᑎᑦᓯᓚᐅᕐᐳᖅ ᑖᒃᑯᓄᖓᓗ ᓯᕗᓕᕐᑎᐅᓕᕐᓗᓂ ᐱᕋᔭᖕᓄᑦ ᐃᕐᓯᓇᕐᑐᓄᑦ, ᑍᒤᓚᐅᕐᐳᖅ ᑕᒪᓐᓇ ᑍᕕᑎ ᑐᖁᕅᓚᐅᕐᑎᓪᓗᒍ; ᑖᒃᑯᐊ ᑕᒫᓯᑰᓯᒧᐊᓚᐅᕐᐳᑦ, ᑕᕝᕙᓂᓗ ᓄᓇᖃᓕᕐᓗᑎᒃ, ᑕᕝᕙᓂᓗ ᐊᖓᔪᖅᑳᕐᔪᐊᓐᖑᕐᑎᓚᐅᕐᐹᑦ ᑕᒫᓯᑰᓯᒥ. 25ᑖᓐᓇ ᐃᓴᕆᐊᓕᓄᑦ ᐊᑭᕋᕆᔭᐅᓚᐅᕐᐳᖅ ᓲᓗᒨᓂᐅᑉ ᐃᓅᓂᓕᒫᖓᓂ, ᐅᐃᒪᓵᕆᓂᕐᓂᒃ ᐱᓂᐊᕐᓂᖃᕐᓗᓂ ᕼᐊᑖᑉ ᐱᓇᓱᐊᓚᐅᕐᓂᖓᑐᑦ; ᐃᓴᕆᐊᓕᒥᐅᑦ ᐊᑭᕋᕆᓚᐅᕐᐰᑦ, ᓯᕆᐊᒥ ᐊᖓᔪᖅᑳᕐᔪᐊᖑᓪᓗᓂ.
ᒎᑎᐅᑉ ᐊᖏᕐᓂᖓ ᔨᕈᐳᐊᒧᑦ
26ᔨᕈᐳᐊᒻ ᓂᐹᑎᐅᑉ ᐃᕐᓂᖓ, ᐃᕗᕅᒥᐅᑉ ᑭᖑᕚᖓ ᔨᕆᑕᒥᐅᖅ, ᓲᓗᒨᓂᐅᑉ ᐱᔨᖓ, ᐊᓈᓇᖃᓚᐅᕐᑐᖅ ᐅᐃᒡᒐᕐᓂᕐᒥᒃ ᔨᕈᐊᒥᒃ, ᑖᓐᓇ ᐊᑭᕋᕐᑐᓕᓚᐅᕆᕗᖅ ᐊᖓᔪᖅᑳᕐᔪᐊᒥᒃ ᓲᓗᒨᓂᒥᒃ. 27ᐃᒫᒃ ᑕᕝᕙ ᐱᑦᔪᑎᖃᕐᓗᑎᒃ ᐊᑭᕋᕐᑐᓕᓚᐅᕐᐳᖅ ᐊᖓᔪᖅᑳᕐᔪᐊᕐᒥᒃ.
ᓲᓗᒨᓂ ᐳᕐᑐᓯᒋᐊᕐᓯᓚᐅᕐᒪᑦ ᓄᓇᒥᒃ ᔨᕉᓴᓕᒥ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒥᒃ, ᐋᖅᑭᒃᓱᐃᓪᓗᓂᓗ ᓯᖁᑦᑎᕐᓯᒪᔪᓂᒃ ᐃᒡᓗᒐᓮᑦ ᐊᕙᓗᕐᔪᐊᖓᓂᒃ ᐊᑖᑕᖓᑕ ᑍᕕᑎᐅᑉ ᐃᒡᓗᒐᓴᖏᓐᓂ. 28ᔨᕈᐳᐊᒻ ᐆᒻᒪᕆᒃᑑᓚᐅᕐᐳᖅ, ᓲᓗᒨᓂᐅᑉ ᐃᓱᒪᒐᔪᖕᓂᖓ ᖃᐅᔨᒐᒥᐅᒃ, ᐊᖓᔪᖅᑳᓐᖑᕐᑎᓚᐅᕐᐹ ᐊᑭᓕᕐᓱᕐᑕᐅᓇᑎᒃ ᓴᓇᑎᑕᐅᔪᓄᑦ ᔫᓯᐱᐅᑉ ᑭᖑᕚᖏᓐᓄᑦ. 29ᑍᑦᓱᒪᓂᐅᑎᓪᓗᒍ, ᔨᕈᐳᐊᒻ ᐊᐅᓪᓚᕐᐳᖅ ᔨᕉᓴᓕᒥᑦ, ᒎᑎᐅᑉ ᐅᖃᑎᖓᑕ ᐊᕼᐂᔭᐅᑉ ᓮᓗᓁᑎᒥᐅᑕᐅᑉ ᑲᑎᕚ ᐊᖅᑯᑎᒥ. ᐊᕼᐂᔭᓕ ᓄᑖᒥᒃ ᐅᓕᒡᔪᐊᕐᑖᒥᓂᒃ ᐊᑐᓚᐅᕐᐳᖅ; ᑖᒃᑯᐊᒡᓗ ᒪᕐᕈᐃᓐᓇᐅᓪᓗᑎᒃ ᐊᖅᑯᑎᒦᓚᐅᕐᐴᒃ. 30ᑕᕝᕙ ᐊᕼᐂᔭᐅᑉ ᐅᓕᒡᔪᐊᖅ ᓄᑖᖅ ᐊᑐᕐᑕᓂ ᑎᒍᕚ, ᐲᕐᓗᒍᓗ ᐊᓕᒃᑐᕐᐹ 12ᓕᓪᓗᒍ. 31ᐅᖃᕐᓗᓂᓗ ᔨᕈᐳᐊᒻᒧᑦ, “ᑕᕝᕙᓐᖓᑦ ᖁᓕᓂᒃ ᑎᒍᓯᒋᑦ; ᐊᑕᓂᖅ ᐃᓴᕆᐊᓕᐅᑉ ᒎᑎᖓ ᐃᒫᒃ ᐅᖃᕐᒪᑦ, ‘ᑕᑯᒋᑦ, ᐊᖓᔪᖅᑳᕐᔪᐊᖑᓂᖅ ᓲᓗᒨᓂᒥᑦ ᐲᕐᓂᐊᓕᕐᐸᕋ, ᑐᓂᓗᑎᓪᓗ ᖁᓕᓂ ᑭᖑᕚᖑᖃᑎᒌᓂᒃ. 32ᓲᓗᒨᓂ ᐊᑕᐅᓯᕐᒥᒃ ᐱᓯᒪᓂᐊᕐᐳᖅ, ᐱᔨᒐ ᑍᕕᑎ ᐱᓪᓗᒍ ᔨᕉᓴᓕᒻᓗ, ᐃᒡᓗᒐᓮᑦ ᑖᒃᑯᐊ ᓂᕈᐊᕐᓯᒪᒐᒃᑭᑦ ᓄᓇᓕᒫᒥᑦ ᐃᓴᕆᐊᓕᒥᐅᓂᑦ. 33ᕿᒤᓯᒪᓕᕐᒪᑦ ᐅᕙᓐᓂᒃ ᑐᒃᓯᐊᖃᑦᑕᓕᕐᓗᓂᓗ ᒎᑎᓐᖑᐊᓄᑦ ᐋᔅᑕᕉᑎᒧᑦ ᓮᑐᓂᒥᐅᑦ ᒎᑎᖓᓐᓄᑦ, ᑭᒧᓯᒧᓪᓗ, ᒧᐊᐱᒥᐅᑦ ᒎᑎᖓᓐᓄᑦ, ᒥᐅᓪᑲᒻᒧᓪᓗ ᐊᒧᓁᑎᑦ ᒎᑎᖓᓐᓄᑦ, ᐊᑐᕐᑕᐅᖁᔭᒃᑲ ᐊᑐᕈᓐᓃᕐᒪᒋᑦ ᐱᐅᔪᓂᒃ ᐱᓇᓱᐊᕈᓐᓃᕐᒪᑦ, ᐊᑖᑕᖓᑕ ᑍᕕᑎᐅᑉ ᒪᓕᑦᓯᐊᓚᐅᕐᑕᖏᓐᓂᒃ. 34ᑕᒪᒃᑭᕐᓗᒍᓕ ᐊᖓᔪᖅᑳᕐᔪᐊᒃᑯᕕᒃ ᐲᕐᓂᐊᖏᓚᕋ ᓲᓗᒨᓂᒥᑦ; ᐊᐅᓚᑦᓯᔨᐅᑎᓐᓂᐊᕐᐸᕋ ᐃᓅᓯᓕᒪᖓᓂ, ᐱᔨᒐ ᑍᕕᑎ ᐱᔪᑎᒋᓪᓗᒍ, ᓂᕈᐊᕐᓯᒪᓚᐅᕋᒃᑯ ᑖᓐᓇ ᓈᓚᓚᐅᕐᒪᑦ ᐱᖁᔭᓐᓂᒃ ᒪᓕᒐᒃᓴᐅᖁᔭᓐᓂᒡᓗ; 35ᐊᖓᔪᖅᑳᕐᔪᐊᖑᓂᕐᒥᒃ ᓲᓗᒨᓂᐅᑉ ᐃᕐᓂᖏᑦ ᐊᕐᓵᓚᕐᐸᒃᑲ, ᑐᓂᓗᑎᓪᓗ ᖁᓕᓂᒃ ᑭᖑᕚᖑᖃᑎᒌᓂᒃ. 36ᑭᓯᐊᓂ ᐊᑕᐅᓯᕐᒥᒃ ᑭᖑᕚᖑᖃᑎᒌᓂᒃ ᓲᓗᒨᓂᐅᑉ ᐃᕐᓂᖓ ᐱᓯᒪᑎᓐᓂᐊᕐᐸᕋ, ᐱᔨᒐ ᑍᕕᑎ ᑭᖑᕚᕾᓐᓇᖁᓪᓗᒍ ᐃᑯᒪᑎᑦᓯᔪᒃᓴᒥᒃ ᖁᓪᓕᕐᒥᒃ ᔨᕉᓴᓕᒥ, ᑖᒃᑯᐊ ᐃᒡᓗᒐᓮᑦ ᓂᕈᐊᕐᓯᒪᒐᒃᑭᑦ ᑕᕝᕙᓂ ᐊᑎᕋ ᐃᓕᓯᒪᒐᒃᑯ. 37ᔨᕈᐳᐊᒻ ᐊᖓᔪᖅᑳᕐᔪᐊᓐᖑᕐᑎᓐᓂᐊᕐᐸᒋᑦ ᐃᓴᕆᐊᓕᒧᑦ, ᐊᐅᓚᑦᓯᓕᕐᓗᑎᓪᓗ ᐊᐅᓚᑦᓯᔪᒪᓂᓕᒫᕐᓂ ᓄᓇᓕᖕᓂᒃ. 38ᓈᓚᑦᓯᐊᕈᕕᖓ ᐱᖁᔨᑦᔪᑎᒋᔭᒃᑲᓗ ᒪᓕᒃᑯᕕᒋᑦ, ᐊᑐᕐᑕᐅᖁᔭᒃᑲᓗ ᒪᓕᒡᓗᒋᑦ ᐃᓅᓂᐊᕈᕕᑦ, ᓵᓐᓂᓗ ᓇᓛᒎᕐᑐᒥᒃ ᐱᓇᓱᐊᕐᓂᐊᕈᕕᑦ ᐊᑐᕐᑕᐅᖁᔭᒃᑲ ᐱᖁᔭᒃᑲᓗ ᒪᓕᖕᓂᐊᕈᕕᒋᑦ, ᐱᔨᑦᑐᑦ ᑍᕕᑎᑐᑦ, ᓇᔪᕐᓂᐊᕐᐸᒋᑦ, ᐊᖓᔪᖅᑳᕐᔪᐊᓐᖑᕐᑎᓐᓂᐊᕐᐸᒋᑦ ᐃᓴᕆᐊᓕᒧᑦ ᐊᑦᑕᕐᓇᖏᑦᑐᒥᒃ, ᑍᕕᑎᒥᒃ ᐃᑲᔪᓚᐅᕐᓂᕋ ᒪᓕᒡᓗᒍ, ᑍᒫᒃᑕᐅᖅ ᐃᓴᕆᐊᓕ ᐃᓕᖕᓄᑦ ᑐᓂᓂᐊᕐᐸᕋ. 39ᓲᓗᒨᓂᐅᑉ ᐊᔪᕐᑐᓕᓂᖓ ᐱᓪᓗᒍ ᑍᕕᑎᐅᑉ ᑭᖑᕚᖓ ᓱᒋᐊᕐᓂᐊᕐᐸᕋ, ᑭᓯᐊᓂ ᑕᐅᕗᖓᓕᒫᖑᖏᑦᑐᖅ.’”
40ᓲᓗᒨᓂᐅᑉ ᔨᕈᐳᐊᒻ ᑐᖁᑦᓱᒪᓚᐅᕐᐹ; ᔨᕈᐳᐊᒻᓕ ᒪᑭᓪᓗᓂ ᕿᒫᓚᐅᕐᐳᖅ ᐄᑦᔨᑉᑎᒧᑦ, ᐊᖓᔪᖅᑳᕐᔪᐊᒧᑦ ᓰᓵᒃᒧᑦ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᑕᕝᕙᓃᓪᓗᓂᓗ ᓲᓗᒨᓂᐅᑉ ᑐᖁᓂᖓ ᑎᑭᓪᓗᒍ.
ᓲᓗᒨᓂᐅᑉ ᑐᖁᓂᖓ
ᑯᕉᓂᑲ ᐂᑉᐸᖏᑦ 9:29-31
41ᑕᒪᕐᒥᒃ ᓲᓗᒨᓂᐅᑉ ᐱᓂᐊᕐᓂᕆᓯᒪᔭᖏᑦ, ᐱᓇᓱᐊᕐᓂᕆᓯᒪᔭᓕᒫᖏᓪᓗ, ᓯᓚᑐᓂᖓᓗ, ᑎᑎᕋᓯᒪᕗᑦ ᓲᓗᒨᓂᐅᑉ ᐅᓂᒃᑲᐅᓯᐅᓯᒪᓂᖓᓂ. 42ᓲᓗᒨᓂ ᔨᕉᓴᓕᒥ ᐊᖓᔪᖅᑳᕐᔪᐊᖑᓚᐅᕐᐳᖅ ᐃᓴᕆᐊᓕᓕᒫᓄᑦ ᐊᕐᕌᒍᑦ 40 ᓈᓪᓗᒋᑦ. 43ᓲᓗᒨᓂ ᑐᖁᖕᒪᑦ ᐃᓗᕕᕐᑕᐅᕗᖅ ᑍᕕᑎᐅᑉ ᐃᒡᓗᒐᓴᖏᓐᓄᑦ, ᐃᕐᓂᖓᑕ ᕆᕼᐅᐳᐊᒻ ᐃᓇᖏᕐᐹ ᐊᖓᔪᖅᑳᕐᔪᐊᓐᖑᕐᓗᓂ.
Currently Selected:
ᐊᑕᓃᑦ ᓯᕗᓪᓖᑦ 11: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
