ᔪᐊᓇᓯ ᓯᕗᓪᓖᑦ 4

ᐊᓂᕐᓂᖅ ᓱᓕᔪᖅ ᐊᓂᕐᓂᕐᓗ ᓱᓕᖏᑦᑐᖅ

1ᓇᒡᓕᒋᔭᒃᑲ, ᐊᓂᕐᓃᑦ ᑕᒪᕐᒥᒃ ᐅᒃᐱᕆᓂᐊᕋᓯᒋᒃ, ᐊᓂᕐᓃᓪᓕ ᐆᒃᑐᕐᓯᒋᒃ ᒎᑎᒥᑦ ᐱᖕᒪᖔᑕ; ᐊᒥᓱᑦ ᓇᓚᐅᑍᔫᓐᖑᐊᕐᑐᑦ ᓇᒧᑐᐃᓐᓇᖅ ᐂᓯᒪᖕᒪᑕ ᓯᓚᕐᔪᐊᕐᒧᑦ. 2ᐃᒫᒃ ᖃᐅᔨᒪᔪᓐᓇᕐᓂᐊᕐᐸᓯ ᐊᓂᕐᓂᖅ ᒎᑎᒥᑦ ᐱᓯᒪᖕᒪᖔᑦ: ᐊᓂᕐᓃᑦ ᑕᒪᕐᒥᒃ ᓇᓗᓁᕐᓯᔪᑦ ᔩᓱᓯ ᙭ᔅᑑᓯᒥᒃ ᑎᒥᑖᕐᓯᒪᔪᒥᒃ ᑖᒃᑯᐊ ᒎᑎᒥᓐᖔᕐᓯᒪᕗᑦ. 3ᐊᓂᕐᓃᓪᓗ ᑕᒪᕐᒥᒃ ᔩᓱᓯᒥᒃ ᑎᒥᑖᕐᓯᒪᔪᒥᒃ ᓇᓗᓁᕐᓯᖏᑦᑐᑦ ᒎᑎᒥᓐᖔᕐᓯᒪᓐᖏᓚᑦ. ᑖᓐᓇᓗ ᐊᓂᕐᓂᖅ ᑍᒤᑐᖅ ᙭ᔅᑑᓯᒥᒃ ᐊᑭᕋᕐᑐᕐᑐᒥᑦ ᐱᓯᒪᕗᖅ, ᑐᓴᕐᓯᒪᒐᑦᓯᐅᒃ ᑎᑭᓛᕐᑎᓪᓗᒍ, ᒫᓐᓇᓗ ᑕᒫᓃᓕᕇᕐᐳᖅ ᓯᓚᕐᔪᐊᕐᒥ.

4ᕿᑐᕐᖔᑯᓗᒃᑲ, ᒎᑎᒧᑦ ᐱᒋᔭᐅᕗᓯ, ᑖᒃᑯᓂᖓᓗ ᓵᓚᖃᕐᐳᓯ; ᑖᓐᓇ ᐃᓗᑦᓯᓐᓃᑦᑐᖅ ᐱᔪᓐᓇᕐᓂᕐᓴᐅᖕᒪᑦ ᓯᓚᕐᔪᐊᕐᒥᑦᑐᒥᑦ. 5ᑖᒃᑯᐊ ᓯᓚᕐᔪᐊᕐᒥᐅᑕᐅᕗᑦ, ᑍᒤᒻᒪᑦ ᓯᓚᕐᔪᐊᑉ ᐱᖏᓐᓂᒃ ᐅᖃᖃᑦᑕᕐᐳᑦ, ᓯᓚᕐᔪᐊᕐᒥᐅᓪᓗ ᓈᓚᒃᐰᑦ. 6ᐅᕙᒍᓪᓕ ᒎᑎᐅᑉ ᐱᒋᕚᑎᒍᑦ. ᒎᑎᒥᒃ ᖃᐅᔨᒪᔪᓄᑦ ᓈᓚᒃᑕᐅᕗᒍᑦ, ᒎᑎᒥᓪᓗ ᐱᖏᑦᑑᑉ ᓈᓚᓐᖏᓛᑎᒍᑦ. ᑕᒪᑐᒧᖓ ᖃᐅᔨᒪᔪᓐᓇᕐᐳᒍᑦ ᐊᓂᕐᓃᑦ ᓱᓕᔪᑦ ᐊᓂᕐᓃᓪᓗ ᑕᒻᒪᕐᑎᑦᓯᔪᑦ ᓇᓪᓕᐊᖑᖕᒪᖔᑕ.

ᒎᑎ ᓇᒡᓕᖕᓂᐅᕗᖅ

7ᓇᒡᓕᒋᔭᒃᑲ, ᓇᒡᓕᒃᑎᒌᓚᐅᕐᑕ; ᓇᒡᓕᖕᓂᖅ ᒎᑎᒥᑦ ᐱᖕᒪᑦ, ᓇᒡᓕᒍᓱᒃᑐᕐᓗ ᒎᑎᒥᑦ ᐃᕐᓂᐊᖑᓯᒪᕗᖅ ᒎᑎᒥᒡᓗ ᖃᐅᔨᒪᓪᓗᓂ. 8ᓇᒡᓕᒍᓱᖏᑦᑐᕐᓕ ᒎᑎᒥᒃ ᖃᐅᔨᒪᓐᖏᓚᖅ; ᒎᑎ ᓇᒡᓕᖕᓂᐅᖕᒪᑦ. 9ᒎᑎᐅᑉ ᓇᒡᓕᖕᓂᓂ ᐊᑯᓐᓇᑦᑎᓐᓄᑦ ᓴᖅᑭᑎᓚᐅᕐᐹ, ᒎᑎᐅᑉ ᐃᕐᓂᑐᐊᓂ ᑎᓕᓚᐅᕐᒪᒍ ᓯᓚᕐᔪᐊᕐᒧᑦ, ᐅᕙᒍᑦ ᑖᑦᓱᒨᓇ ᐃᓅᖁᓪᓗᑕ. 10ᑕᒪᓐᓇ ᑕᕝᕙ ᓇᒡᓕᖕᓂᖅ, ᒎᑎ ᓇᒡᓕᒋᓯᒪᒐᑦᑎᒎᖏᑦᑐᖅ ᑖᑦᓱᒪᓕ ᓇᒡᓕᒋᖄᓚᐅᕐᒪᑎᒍᑦ ᐃᕐᓂᓂᓗ ᑎᓕᓚᐅᕐᒪᒍ ᐊᔪᕐᓂᕗᑦ ᑖᑦᓱᒨᓇ ᐃᓱᒪᒋᔪᓐᓁᕐᑕᐅᖁᓪᓗᒋᑦ.

11ᓇᒡᓕᒋᔭᒃᑲ, ᑍᒫᒃ ᒎᑎᐅᑉ ᓇᒡᓕᒋᑎᒋᒃᐹᑎᒍᑦ, ᐅᕙᒍᑦᑕᐅᖅ ᑕᕝᕙ ᓇᒡᓕᑎᒌᒃᑐᒃᓴᐅᕗᒍᑦ. 12#ᔪᐊᓇᓯ 1:18.ᒎᑎᒥᒃ ᑕᑯᔪᖃᓚᐅᕐᓯᒪᓐᖏᓚᖅ; ᓇᒡᓕᒋᖃᑦᑕᐅᑎᒍᑦᑕᓕ, ᒎᑎᐅᑉ ᓇᔪᕐᐹᑎᒍᑦ ᓇᒡᓕᖕᓂᖓᓗ ᐃᓗᑦᑎᓐᓂ ᓈᒻᒪᒃᓯᕗᖅ.

13ᑕᒪᑐᒥᖓ ᖃᐅᔨᑦᔪᑎᖃᕐᐳᒍᑦ ᑖᑦᓱᒪᓃᓐᓇᑦᑕ ᑖᓐᓇᓗ ᐃᓗᑦᑎᓐᓃᒻᒪᑦ, ᓇᖕᒥᓂᖅ ᐊᓂᕐᓂᕐᒥᓂᒃ ᑐᓂᓯᕕᒋᓚᐅᕐᒫᑎᒍᑦ. 14ᑕᑯᓯᒪᕗᒍᑦ ᓇᓗᓁᕐᓯᕗᒍᓪᓗ ᐊᑖᑕᐅᑉ ᐃᕐᓂᓂ ᑎᓕᓚᐅᕐᒪᒍ ᓯᓚᕐᔪᐊᕐᒥᐅᓄᑦ ᐱᐅᓕᔨᐅᖁᓪᓗᒍ. 15ᓇᓪᓕᐊᑦ ᔩᓱᓯ ᒎᑎᒧᑦ ᐃᕐᓂᐅᓂᖓᓂᒃ ᓇᓗᓁᕐᓯᔪᖅ, ᒎᑎ ᑖᑦᓱᒪᓃᑉᐳᖅ, ᑖᓐᓇᓗ ᒎᑎᒦᓪᓗᓂ. 16ᒎᑎᐅᓪᓗ ᓇᒡᓕᖕᓂᖓ ᐅᕙᑦᑎᓐᓄᑦ ᓇᖕᒥᓂᖅ ᖃᐅᔨᒪᓪᓗᒍ ᐅᒃᐱᕆᕙᕗᑦ.

ᒎᑎ ᓇᒡᓕᖕᓂᐅᖕᒪᑦ, ᓇᒡᓕᖕᓂᕐᒦᑦᑐᕐᓗ ᒎᑎᒦᑉᐳᖅ, ᒎᑎᓗ ᑖᑦᓱᒪᓃᓪᓗᓂ. 17ᑕᒪᑐᒨᓇ ᓇᒡᓕᖕᓂᖅ ᓈᒻᒪᒃᓯᑎᑕᐅᑦᓯᐊᕐᐳᖅ ᐅᕙᑦᑎᓐᓄᑦ, ᖁᓚᖏᑦᔪᑎᒃᓴᖃᖁᓪᓗᑕ ᐃᖅᑲᕐᑐᐃᕕᒃ ᓇᓪᓕᐅᑎᒃᐸᑦ, ᑖᓐᓇ ᑍᒤᑦᑑᖕᒪᑦ ᐅᕙᒍᑦᑕᐅᖅ ᑍᒤᑦᑑᒋᕗᒍᑦ ᒫᓂ ᓯᓚᕐᔪᐊᕐᒥ. 18ᓇᒡᓕᖕᓂᖅ ᓯᕘᕋᓂᕐᑕᖃᓐᖏᓚᖅ, ᓇᒡᓕᖕᓂᐅᑉ ᓈᒻᒪᒃᓯᑦᓯᐊᕐᑑᑉ ᓯᕘᕋᓂᖅ ᐊᓂᑎᑉᐹ. ᓯᕘᕋᓂᖅ ᓱᒋᐊᕐᑕᐅᓂᕐᒥᒃ ᐱᑦᔪᑎᖃᕐᒪᑦ, ᓯᕘᕋᔫᓪᓗ ᓇᒡᓕᖕᓂᖅ ᓈᒻᒪᒃᓯᑎᓯᒪᓐᖏᓛ.

19ᓇᒡᓕᖕᓂᖃᕐᐳᒍᑦ, ᑖᑦᓱᒪ ᓇᒡᓕᒋᖅᑳᓚᐅᕐᒫᑎᒍᑦ. 20ᓇᓪᓕᐊᑦ, ᒎᑎᒥᒃ ᓇᒡᓕᒍᓱᖕᓂᕋᕐᐸᑦ, ᐅᒃᐱᕐᑑᖃᑎᒥᓂᒡᓗ ᐆᒥᓱᒡᓗᓂ, ᑖᓐᓇ ᓴᒡᓗᑐᔫᕗᖅ; ᖃᑕᓐᖑᑎᓂ ᑕᑯᔪᓐᓇᕐᑕᓂ ᓇᒡᓕᒋᔪᓐᓇᖏᒃᑯᓂᐅᒃ, ᒎᑎ ᑕᑯᓚᐅᕐᓯᒪᓐᖏᑕᓂ ᓇᒡᓕᒋᔪᓐᓇᓐᒋᓛ.#4:20 ᓇᒡᓕᒋᔪᓐᓇᓐᖏᓛ ᐅᕝᕙᓗ ᐱᓐᓈᕆᔪᓐᓇᓐᖏᓛ 21ᑖᑦᓱᒪ ᑐᓂᓯᕕᒋᕚᑎᒍᑦ ᐱᖁᔭᒥᒃ, ᐃᒫᒃ ᓇᓪᓕᐊᑦ ᒎᑎᒥᒃ ᓇᒡᓕᒍᓱᒃᑯᓂ ᐃᓅᖃᑎᒥᓂᒃᑕᐅᖅ ᓇᒡᓕᒍᓱᒃᑐᒃᓴᐅᕗᖅ.

Currently Selected:

ᔪᐊᓇᓯ ᓯᕗᓪᓖᑦ 4: EAIB

Highlight

Copy