Luka 23
23
Yeesu oy Pilate o timba
1Náa ke ve sɔŋŋɔ ve sɛw tɛʼ, ve luu pan Yeesu tana pilate o timba. 2Ve gbɔ nɔ, ve bi̧i̧ Yeesu təŋŋa Pilate o timba ve fee: «Ki vi zee wa̧y ɛnɔ de gippa náa vin verɛ: O feet vo doo ve tok zɔmɔgɔl Ampərɛl oppo sɛ, kə fee boo Kiris, Gbɛ̧ɛ̧ kɛŋ yɔ». 3Pilat vi Yeesu: «Mɔ náa yuuda ve Gbɛ̧ɛ̧ von yɔrɛ?» Yeesu hi̧i̧za: «mɔ fee de yɔ». 4Pilat feeza náa kɔ maak ak kɛŋŋɔ vɛ vere náa duʼ nɔ vɛ: «Mi zeen moò gbo̧o̧k wa̧y nɛnɔ oppo kay toʼonaa nɔ yɛ». 5Ɛn ve sɛn zɔʼɔ zɔʼɔ vere gɔtii ve fee: «Oy yaʼa zikkɔ kɔtɔke kɔlla vere moò oora ani. O bi̧i̧y Galile, o daay hɛk Yuuda ba sɛw tɛʼ, ɓɔllɛ nɛnɔ, o yaa de nɛ».
Yeesu oy Helot o timba
6Pilat fee ka kii moò ɛn vɛ nɔ, o virɛ: «Wa̧y ɛnɔ oy Galilerɛ?» 7Ɛn o kii Yeesu bo yaay Galile, hɛk Helot bo buu nɔ oppo nɔ, o yaʼ tana Helot oppo, yo̧o̧n ɛnɔ Helot o zeruzalɛm tuu vin. 8Helot hə̧ Yeesu nɔ, sȩȩzarɛ kpɛŋ. Bɔk kii vey moo moò annɛ faa, bɔk hi̧i̧ ka hə̧ʼə̧ zɛɛ; O tu̧u̧ nɔ Yeesu ka bore kɔra hɛn yella. 9O viʼi moò ɓooza̧a̧, Ɛn ɗaa Yeesu hi̧i̧zina hɛn zɔʼ yɛ. 10Náa kɔ maak ak kɛŋŋɔ vɛ, vere náa it Moyi̧zə moò buu an vɛ bɔk ve ɛtuu, ve təŋ Yeesu Helot o timba və̧ə̧kza̧a̧. 11Helot vere wa̧a̧ vɛɛ̀ an vɛ ve zɛɛ Yeesurɛ, ve zaaarɛ, ve kə dɔza sâm za̧ǎ̧, pik an Helot yaʼ kən Yeesu Pilat oppo. 12Helot vere Pilat bɔk vesin tinba nɔ za̧a̧ka; Yo̧o̧n ɛnɔ, ve bi̧i̧zin gbaare oppo.
Ve yȩʼ Yeesu doo, vɔrɛ
Mat 27:15-26; Mar 15:6-15; Zâŋ 18:39–19:16
13Pilat ya̧a̧ sɔŋ náa kɔ maak ak kɛŋŋɔ vɛ, kɛŋ kappa nɔ vɛ, vere náa ve sɛw tɛʼ. 14Náa ɛnɔ ve sɔŋŋi nɔ, o feet vo: «Vo panzi yaa wa̧y ɛnɔ, vo feezi o boy gippa zikkɔ yɔ. Ki viʼi moò o vo timba sɛw tɛʼ mi kə zeen moò gbo̧o̧k vo yaa təŋŋina nɔ yɛ. 15Helot zeen moò gbo̧o̧k oppo yɛ, Ɛnɔ o yaʼ kən pa vo yaa o ze. Too ɛnɔm wa̧y ɛnɔ kɔn gbo̧o̧k zɔʼ gɔɔ lii kaa ba vɔza vo oppo nɔ yɛ. 16Mii wa̧a̧a̧ vere ɓɛtta zaʼ mii hoozaa». 17Duʼ Pak òo lii tuŋ, Pilat hoozi vo há̧a̧ lik naʼre daŋga. 18Ɛn ɗaa ve dii wɔɔk gbattaa ve fee: «mɔ vɔt wa̧y ɛnɔrɛ, mɔ hoozi vi Barabasi!» 19Barabas bɔk o dɔ lik naʼre nɔ, bɔk o kɔl kɔtɔke kap aʼre tuu, o vɔt ha̧ǎ̧. 20Pilat hi̧i̧ ka hoozi Yeesurɛ, o kə moot vo zɔʼ ɓɛʼ. 21Ɛn náa ve gbat wɔɔka: «mɔ gaʼa tap ɓanzinna ba, mɔ gaʼa tap ɓanzinna ba!» 22Pilat iŋ yak moot dɔʼ ta̧a̧to an kə feet vo: «Hɛ̧ɛ̧n ɓɛɛn o kɔ ɓimmɔ nɛɛ? Mi zeen moò gbo̧o̧k zɔʼ oppo, kaa o lii vɔɔ̌ nɔ yɛ. Mii wa̧a̧a̧ vere ɓɛtta, pik an mii hoozaa». 23Ɛn ɗaa náa ve sɛn wɔɔk gbataa aʼvin, doo ve gaʼ Yeesu tap ɓanzinna ba. Wɔɔk gbatta vonnɔ baʼarɛ. 24Pilat ɓa kɔt vo hɛn ve hi̧i̧ nɔrɛ. 25O hoozi wa̧y náa ve hi̧i̧i̧, bɔk dɔ lik naʼre, moò o kɔʼ kɔtɔke vere vɔɔ vɔta nɔrɛ, kə po vo Yeesu doo ve kɔʼɔ hɛn bo ve hi̧i̧ nɔ bɔ.
Ve gaʼ Yeesu tap ɓanzinna ba
Mat 27:32-44; Mar 15:21-32; Zâŋ 19:17-27
26Yɛɛ bɔk vey panna Yeesu ka ve tak gaʼa nɔ, ve kasinga wa̧y zɔʼ nii an Simɔŋŋi, o wa̧y Sirɛnee, o key kəy han. Wa̧a̧ vɛɛ nɔ ve soʼorɛ, ve ganza tap ɓanzinna nɔ doo oorin Yeesu piki. 27Náa ve duʼza̧a̧ ve òo Yeesuy, vere kep ve daŋ, vey ba̧a̧a̧, vey ɓɛɛ Yeesu moò ani. 28Yeesu fil kə o ve po fee: «Kep zeruzalɛm vɛ, vo ba̧a̧ moò min sɛ! Vo ba̧a̧ ak wɔɔk voni vere sam von vɛ moò voni! 29Yo̧o̧n de gbɔy tuu vey fee: “Za̧a̧ de zee kep zi̧i̧ akkɔ vey vere kep ve ha̧a̧n tan yɛ, ve pon tan va̧a̧ o ve kəŋŋe yɛ ɓimmɔ vey.” 30Ɛnɔ náa vey kə feeza gbɔkkɔ vɛ: “Vo wani ivi fɔn!” Ɛn gbɔk wagaa nɔ vɛ: “Vo ɗin virɛ!” 31Ɛnɔ òo ve kɔ tap ha̧a̧n too ɛnɔmmɔ, laʼ ɔɔn nɔ vey kɔʼɔ an tuu bɔgɛ?» 32Ve pan wa̧p kɔl hɛn ɓɛɛ ak ve itto tin sɛw, ka ve tak vɔt vo vere Yeesu daŋ. 33Ɛnɔ ve gbɔ yɛɛ ve ya̧a̧ bo «wɔɔk neŋŋa» nɔ oppo, wa̧a̧ vɛɛ nɔ ve gaʼ Yeesu tap ɓanzinna ba yɛɛ ɛnɔ oppo, ve gaʼ wa̧p itto kɔl hɛn ɓɛɛ akkɔ ve tap ɓanzinna ba vin sɛw, daŋga o naak za̧a̧ ba, zɔʼ nɔ o naak kpay ba. 34Ɛnɔ Yeesu fee: «Baa, mɔ hoozi vo hɛn ɓɛɛ vonnɛ, Ɛnɔ ve gaan hɛn vey kɔlla nɔ yɛ». Ve yə̧ʼzin sam an vɛ o ve yɛɛ ba ve goo koyya ka ve gaa hii key hakka sammɔ yɛɛrɛ. 35Náa ve dii ɛtuu, ve torɛ. Náa kɛŋ yuuda nɔ vɛ, ve zaa Yeesurɛ ve fee: «Bɔk o sɔt náa zɔʼ verɛ; Do sɔt wɔɔk an dɔm bɔ, òo o Kiris, Go̧o̧ge wəʼə nɛy ginu nɔ gɔ!» 36Wa̧a̧ vɛɛ nɔ ve sɛw ve zaa Yeesurɛ vin; Ve diŋŋi o hɛge, ve poʼo hɛn mɛk vo̧o̧ri, 37ve fee: «Oò mɔ náa yuuda ve gbɛ̧ɛ̧ voni nɔ, mɔy, mɔ sɔt wɔɔk mɔn bɔ!» 38Ve dɛ̧ɛ̧ hɛn tap ɓanzinna nɔ oppo Yeesu o dakke ɛŋgɔʼ: «Wa̧y nɛnɔ o náa yuuda vɛ gbɛ̧ɛ̧ voni». 39Náa kɔl hɛn ɓɛɛ ak ke ve gaʼ vo Yeesu o sɛkpa nɔ vɛ, zɔʼ daŋga zɛɛ Yeesurɛ fee: «Mɔ paam Kiris yɔ yɛrɛ? Mɔy, mɔ sɔt wɔɔk mɔn bɔ mɔ kə sɔt vi dɔm sɛw!» 40Ɛn wa̧y zɔʼ nɔ bɔ̧ɔ̧za daaa moǒ kə feeza: «Mɔ waan Go̧o̧ge doo yɛɛrɛ? Mɔy gaa de gim da̧a̧ nɛy vin sɛw. 41Ban o ba po nɔ, lii kaa ve kɔ ba too ɛnɔm, ɛnɔ ba hakke de ban hɛn lii o ba kɔm ba nɛy; Ɛn, an o kɔn hɛn ɓɛɛ yɛ». 42Kə fee: «Yeesu, yo̧o̧n oò mɔ yaay too Gbɛ̧ɛ̧ vin nɔ, mɔ gay dɔm». 43Yeesu hi̧i̧za: «Mi feezum moò za̧ǎ̧ ginu: Munɛ mɔy kanna vegaa mi Go̧o̧ge o yɛɛ kandi za̧a̧re daŋ (Go̧o̧ge o yɛɛ dəəre)».
Yeesu vɔɔ ani
Mat 27:45-56; Mar 15:33-41; Zâŋ 19:28-30
44Yo̧o̧ bɔk san gbɔra daake, yo̧o̧ nɔ dȩȩzin ɓɛ yɛ: Visam sa̧a̧ hɛkpa tuu ha̧ gbɔ yo̧o̧ tan ta̧a̧to mim yakpa nɔ oppo. 45Bahuur Go̧o̧ge ligi intuu nɔ iŋŋ hɛge ta̧a̧zin yɛɛ itto. 46Yeesu wa̧a̧ yakka aʼvin: O fee: «Baa, mi ɛ kən vɔ̂k min um naʼa̧». O moò yak ɛnɔ kəzəkkɔ, o vɔrɛ. 47Wa̧a̧ vɛɛ kɛŋ Rɔmmɔ hə̧ hɛn daa ɛnɔ, o gbəŋ Go̧o̧gey, o kə fee: «Ginu, wa̧y ɛnɔ kana hɛn zɔʼ yɛ!» 48Náa ke ve yaa duʼza̧a̧ ka ve to nɔ ve tɛʼ, ve hə̧ hɛn daa ɛnɔ, ve dɛn naak kəŋŋe ve ɗɛɛ kə o ve kare fo̧o̧ vɔ vorɛ. 49Yeesu gbaare an ve tɛʼ, vere kep bɔk ve ooray tɔŋ Galile nɔ ve diiy tɔŋgba ka ve to hɛn de daa nɛy.
Ve yaʼ Yeesu fo̧o̧ an gakke
Mat 27:57-61; Mar 15:42-47; Zâŋ 19:38-42
50Wa̧y zɔʼ daŋga, náa visin moò o ve tiŋza̧a̧re nii an Zozɛfi, o wa̧y za̧ǎ̧, moò an likkɛ, 51O dɔn daaa ve moò von, vere kɔm von ve kɔ nɔ ve yɛ, bɔk o wa̧y Arimatee, náa Yuuda o ve hɛkpa, ɛn bɔk oy laa Go̧o̧ge Gbɛ̧ɛ̧ an de yaa nɛy. 52O tak zee Pilate, ka haa Yeesu fo̧o̧ an nɛy. 53Pik an o siziy fo̧o̧ nɔ tap ɓanzinna ba tuu, go̧o̧na vere sâm buyya, o yaʼa gak bɔk ve a̧a̧ gbɔk waa ba, gak ɛnɔ bɔk ve ləəna vɔɔ zɔʼ tin dee yɛ. 54Bɔk yo̧o̧ kɔm dɔʼ saa ba, náa Yuuda yo̧o̧ wə̧ə̧ri vonnɔ bɔk de saniyaarɛ. 55Kep bɔk ve yaay Galile vere Yeesu daŋŋɔ vɛ, ve tɔga Zozɛf daŋ ve to gakkɔ, ka ve hə̧ ke ve hokke Yeesu fo̧o̧ an nɔ tuubɔgɛrɛ. 56Pik an ve ɗɛɛ kə kare, ve gak kum muŋaa, vere kum sa̧a̧ka ka ve tak guuza Yeesu fɔn. Yo̧o̧ wə̧ə̧riba nɔ ve wə̧ə̧rɛ kere, too Moyi̧zə moò buu an fee nɔm.
Currently Selected:
Luka 23: dae
Highlight
Copy
Compare
Share
Want to have your highlights saved across all your devices? Sign up or sign in
