Luka 22
22
Náa kɛŋ ve a̧a̧za Yeesu bulla
Mat 26:1-5; Mar 14:1-2; Zâŋ 11:45-53
1Duʼ nan ve kuun waak tin yɛ, ve ya̧a̧ bo pâkka nɔ de sanna gbɔy nɔ oppo. 2Náa kɔ maak ak kɛŋŋɔ vɛ vere náa it Moyi̧zə moò buu an vɛ ve teee yana ka ve vɔt Yeesurɛ, ɛn ɗaa doo kɔ vo náa verɛ.
Zudas san hera Yeesu náa kɛŋŋɔ o ve naʼa maa
Mat 26:14-16; Mar 14:10-11
3Ɛnɔ sɛɛɗan dɔ Zudas ve ya̧a̧a̧ bo Iskariyotti nɔ oppo, o Yeesu kaam an boʼzoo itto nɔ vɛ o ve tiŋza̧a̧re. 4Zudas tak kiizingay náa kɔ maak ak kɛŋŋɔ vɛ vere náa laa Go̧o̧ge likkɔ vɛ kɛŋ von vey, o teee yana ka het vo Yeesu ze nɛy. 5Kɛŋŋɔ vɛ sȩȩt vorɛ ve bɛnaa bo vey poʼoo hel waa tin. 6Zudas ɓa hi̧i̧rɛ kə teee yana za̧a̧za̧a̧ ka het vo Yeesu náa doo ve gaa sɛ.
Yeesu de gakka lɛm pâkkɔ vegare kaam an vey
Mat 26:17-25; Mar 14:12-21; Zâŋ 13:21-30
7Yo̧o̧ duʼ, nan waak paamɛ nɔ gbɔy ma, kaa vey sə̧ə̧ tɛ̧ɛ̧ waa vɛ ka ve dəə lɛm pâkka. 8Yeesu yaʼ ɓəəzi Piyɛr vere Zâŋ tinba dee, feet vo: «Vo tak yoon pa vo lɛm Pâkkɛy». 9Ve viʼi: «Mɔ hi̧i̧ vi tak yoon tin anɛ?» 10O hi̧i̧t vo: «Vo kiirɛ: òo vo gbɔ kare tuu nɔ, voy kasingaa ha̧a̧ zɔʼ de ganna maam pɛɛka. Vo oora tak ka̧a̧ de dɔra tin nɔ oppo, 11vo feeza wa̧y ka̧a̧ akkɔ: “Wa̧y it hɛn de vimma: Ka̧a̧ mii lɛgaa kaam min vɛ lɛm Pâkkɔ tin nɔ bo de anɛ?” 12Ɛn oy it vora lik aʼ goʼ ka̧a̧ daake nɛy vere hɛn nɔ ve tɛʼ intuu, vo yoon lɛmmɔ oppo». 13Kaamɔ ve tak, ve zee hɛn nɔ vɛ tɛʼ too Yeesu ke feet vo nɔm, ɛn ve yoon lɛm Pâkkɔ oppo.
Go̧o̧ge nanna
Mat 26:26-30; Mar 14:22-26; 1Kɔ 11:23-25
14Yɛɛ fee ka lii kəzəkɔ, Yeesu zɔɔ lɛm lɛra vega Yaʼyɛɛ nɔ vey. 15O feet vo: «Mi hi̧i̧rɛ kpɛŋ ba lɛ vo lɛm Pâkkɔ daŋ doʼ, kay gaa gim ze! 16Ɛnɔ mii feet vora, Mii lɛnna lɛm Pak ɓɛ yɛ, de gbɔra yo̧o̧n kɔl an nɔ de kura Go̧o̧ge o Gbɛ̧ɛ̧re tin nɔ oppo». 17O kə iŋ makka, o dɛnza Go̧o̧ge naak tin kə fee: «Vo ɓa mak nɛnɔ vo yə̧ʼzin hɛn intuu nɔ o vo yɛɛ ba; 18Ɛnɔ mi feet vora, bi̧i̧ de ɓɔllɛ nɛ, mi zɔn bum ɓɛ yɛ de gbɔra yo̧o̧ Go̧o̧ge Gbɛ̧ɛ̧ an de yaa tin nɔ oppo». 19Pik an o iŋ nanna, o dɛnza Go̧o̧ge naak kəzəkɔ, o kpəllɛ kə po vorɛ fee: «De nɛnɔ fo̧o̧ mini, de voni, vo kɔ too ɛnɔm ka vo vəʼə gaani oy». 20Ve lɛ nan si̧ʼ nɔ, Yeesu iŋ makka po vo too ɛnɔm vin. O fee: «mak nɛnɔ, de Go̧o̧ge yak tasin an pəŋ ii mɛɛme guu moò von nɛy. 21Ɛn vo torɛ: Ha̧a̧ de a̧a̧zira bullɔ oy nɛ, oy lɛgii de lɛm yɛɛ daŋ! 22Ginu, ha̧a̧ tan an de vɔraa, too Go̧o̧ge fee nɔm; Ɛn yɔʼ de zee ha̧a̧ de a̧a̧zaa bullɔrɛ!» 23Yeesu kaam an ve kii ɛnɔ, ve bi̧i̧ visinna o ve yɛɛ ba, ka ve gaa hii ke kaa bo de kɔra hɛn ɛnɔ yɛɛrɛ.
Hii o kɛŋ ɗəə tin ɓimmɔ yɛɛ?
Mat 20:24-28; 19:28; Mar 10:41-45
24Yeesu kaam an ve dii yusinna o ve yɛɛ ba kpɛŋ, ve hi̧i̧ ka ve gaa hii ke bore bi̧i̧ kɛŋ o ve tiŋza̧a̧re tuu tin yɛɛrɛ. 25Yeesu feet vo: «Zikkɔ vɛ gbɛ̧ɛ̧ von vey buu voo ɛn náa ɛ gɔti ak vey kɔra kɔm o ve daake nɔ, ve hi̧i̧ doo ve ya̧a̧ vo “náa kɔ hɛn za̧a̧ vey.” 26Ɛn o vo po nɔ, vo kɔ too vo vin sɛ. On za̧ǎ̧ nɔ, há̧̧a̧ kɛŋ o vo tiŋza̧a̧re nɔ, do bi̧i̧ tan wagaǎ, ɛn ha̧a̧ de buu yɛɛ nɔ, do bi̧i̧ too ha̧a̧ de kɔzaa há̧a̧ kɔmmɔ vin. 27Ɛnɔ hii o kɛŋ ɗəə ɓimmɔ yɛɛ, Ha̧a̧ zɔɔ de lɛra lɛmmɛyrɛɛ, haarɔɔ ha̧a̧ kɔ kɔm akkɛyrɛ? Há̧a̧ zɔɔ de lɛra lɛmmɛy, paam ɛŋgɔ yɛrɛ? Min mii o vo tiŋza̧a̧re nɛ too kɔ kɔm ak vin! 28Bɔk vo kanga mii tuŋ, yɛɛ mi gaa gim tin nɔ vɛ oppo sɛw tɛʼ; 29Too Baa o poy Gbɛ̧ɛ̧ nɔm, mii po vora too ɛnɔm vin: 30Voy lɛraa, voy zɔra vegaa mii ii Gbɛ̧ɛ̧re, voy kə zɔɔ gbɛ̧ɛ̧ dɔm ba, voy yȩʼȩ zik Islayɛl boʼ zoo itto nɔ vey».
Yeesu fee Simɔŋ Piyɛr boy pa voo
Mat 26:31-35; Mar 14:27-31; Zâŋ 13:36-38
31Yeesu feeza Simɔŋ Piyɛr! «Simɔŋ, Simɔŋ, mɔ kiirɛ! Sɛɛɗan haa ka daksi vorɛ tɛʼ too vey daksi denne ka ve ɓɛ̧ɛ̧zin toot dȩȩt vere ɔkkɔ vin. 32Ɛn ɗaa kii faazum yak baa kam yaa tit si̧i̧ ɛtta mɔn sɛ. Oò mɔ ɗɛɛ kəy iipo nɔ, mɔ sen daam verɛ». 33Piyɛr feeza: «Gbɛ̧ɛ̧ kɛŋ, mi ɓa hi̧i̧rɛ, bay takka lik naʼre daŋ, ɛn bay vɔra daŋ». 34Yeesu hi̧i̧za: «Mi feezummɛ Piyɛr, munɛ nɔɔk ka gbəl ɓɛɛ ze nɔ, mɔy fee dɔʼ ta̧a̧to boo gaani yɛ».
Hel saʼaa, lɛm saʼaa, pak bindɛlla
35Pik an Yeesu feet vo: «Bɔk mi yaʼ vo yɛɛ, hel waa paamɛ saʼa paamɛ, tɛk paamɛ nɔ, hɛn zɔʼ lɔɔ voy tin nɛ?» Ve hi̧i̧za, «hɛn lɔɔn vii yɛ» 36Ɛn o feet vo: «Ɓɔllɛ nɛnɔ ha̧a̧ òo ɛ de hel waarɛ do iŋŋɛ, ha̧a̧ òo ɛ de saʼarɛ, do iŋŋɛ; Ha̧a̧ òo ɛ̂n pak bindɛl yɛ, do mak sam an do ɓa daŋga. 37Ɛnɔ mi feet vorɛ: Hɛn Dɛptɛlle fee nɔ do ku iipo: “Bɔk ve waʼ dɔza náa kɔl hɛn ɓɛɛ ak o ve sɛkke.” Ɛnuu, hɛn liiza mi nɔ, de kɔraa». 38Kaamɔ ve feeza: «Gbɛ̧ɛ̧ kɛŋ, pak bindɛl de nɛ itto». Yeesu hi̧i̧t vo: «Ɛnɔ liirɛ».
Yeesu faa yak gbɔk oliviye ƴɛɛ ba
Mat 26:36-46; Mar 14:32-42
39Yeesu vuk dɔk gbɔk oliviye ba, too o nɛnin nɔm, kaam an ve oorarɛ. 40O gbɔ yɛɛ nɔ oppo nɔ, feet vo: «Vo faa yakkɛ, ka vo yaa wanna hɛn sɔɔtummɔ ve oppo sɛ». 41Pik an, o yəəzingi vo, too pîn gbəlla, yɛɛ tak pɛ tin nɔ oppo nɔm. O ɗiksi dɔʼ ɗuk hɛge kə faa yakka 42o faa ɛŋgɔ: «Baa, oò mɔ hi̧i̧rɛ nɔ, mɔ yəənzi mak gaa gim ɛn nɛ. Ɛn sɛw tɛʼ gaa mɔ kɔ hɛn mi hi̧i̧ nɛy sɛ, ɛn mɔ kɔ too mɔ hi̧i̧ nɔm». 43Ɛnɔ Go̧o̧ge zə̧ə̧ an zɔʼ siyy bɛlba, hən Yeesu o timba ka senarɛ. 44Yeesu doo kɔʼɔrɛ kpɛŋ, o faa yak vere gɔtii ɓɛʼ aʼvin, zum an fi too mɛɛ̀m la de so̧o̧ra hɛge nɔm. 45Yeesu si̧t yak faara kəzəkɔ, o luu bɛlba, ɗɛɛ kəy kaam an o ve po, zee vo vey nəmme, ve noorɛ fo̧o̧ vɔ vorɛ. 46O feet vo: «Vo nə moò nɛɛ? Vo luu bɛlba vo faa yakka, ka vo yaa wan hɛn sɔɔtumɛ sɛ».
Ve so Yeesurɛ
Mat 26:47-56; Mar 14:43-50; Zâŋ 18:3-11
47Yeesu bɔk oy yak mootpa kere, náa ve duʼza̧a̧ ve gbɔyrɛ, zudas o kaam boʼzoo itto nɔ o ve tiŋza̧a̧re ɛt voy yɔ; O diŋ yaa Yeesu o hɛge ka va̧a̧rɛ. 48Yeesu feeza: «Zudas, mɔ va̧a̧ ha̧a̧ tan an doʼ kam heʼe zerɛ?» 49Yeesu kaam an ve hə hɛn de gbɔy ɛn nɔ, ve viʼi: «Gbɛ̧ɛ̧ kɛŋ, kaa vi wa̧a̧zi vo vere pak bindɛl vin veyrɛ?» 50Ha̧a̧ zɔʼ daŋga o ve tiŋza̧re, do fa̧a̧ wa̧y kɔ maak ak kɛŋ zɔʼ, kɔm ak an, kɔʼ an naak za̧a̧ ba nɔ hɛy. 51Ɛn Yeesu fee: «Vo ɛrɛ, ɛnɔ liirɛ». O so̧o̧ wa̧y nɔ kɔʼ an nɔ pooza kərɛ. 52Pik an Yeesu feeza náa kɔ maak ak kɛŋŋɔ vɛ, náa laa Go̧o̧ge likkɔ kɛŋ von vɛ, vere kɛŋ kap ke ve yaa ka ve soʼo nɔ vɛ: «Vo yaay vere, pak bindɛllɔ vɛ, vere gbaŋŋɔ vɛ, too baay yuu vin. 53Yo̧o̧ tuŋ, bɔk mii vega vo Go̧o̧ge ligi, vo teen sonira yɛ. Ɛn yo̧o̧ tan nɛnɔ de voni vere hɛn ɓɛɛ nɔ vɛ vey itta gɔti von vinni».
Piyɛr pa Yeesurɛ
Mat 26:57-58, 69-75; Mar 14:53-54, 66-72; Zâŋ 18:12-18, 25-27
54Ve so Yeesu kəzəkkɔ, ve pan tana wa̧y kɔ maak ak kɛŋ o kaa. Piyɛr òo vo piki o yəəzingi vorɛ. 55Bɔk ve aŋ vɛɛ gba̧ʼ tiŋza̧a̧re tuu ɛn Piyɛr zɔɔ náa ke ve zɔɔ kək vɛɛ nɔ o ve tiŋza̧a̧re. 56Kep kɔm ak zɔʼ hə̧ Piyɛr oy zɔɔri vɛɛ yakpa tuu; O toʼo za̧a̧za̧a̧ ziklikliklik kə fee: «Wa̧y ɛnɔ sɛw bɔk de ɛmgaa oy!» 57Ɛn Piyɛr paʼarɛ fee: «Kep, mi gaana yɛ». 58An kaʼso, ha̧a̧ zɔʼ hə̧ʼə̧, kə fee: «Mɔ sɛw mɔ daŋga o ve tiŋza̧a̧re!» Ɛn Piyɛr hi̧i̧za wa̧y nɔ: «Hə̧ə̧̌ mi paam o ve tiŋza̧a̧re yɛ». 59Kaa kɔ yo̧o̧ tan daŋgarɛ, ha̧a̧ zɔʼ ɓɛʼ sɛn fee: «Ginu wa̧y ɛnɔ bɔk vegare oy, ɛnɔ o wa̧y Galilee». 60Piyɛr hi̧i̧: «Mi gaan hɛn mɔy hi̧i̧ra fee nɔ yɛ». Yɛɛ bɔk oy moó tin nɔ oppo vin, nɔɔk hȩȩrɛ. 61Gbɛ̧ɛ̧ kɛŋ fil to Piyɛr nɔre zik. Ɛnɔ Piyɛr vəʼə gaa hɛn Gbɛ̧ɛ̧ kɛŋ ke feeza: «Nɔɔk ka hȩȩ munɛ ze nɔ, mɔy payya dɔʼ ta̧a̧to boo gaani yɛ nɔrɛ». 62Piyɛr vuk tak ba̧a̧rɛ aʼvin kpɛŋ.
Ve zɛɛ Yeesurɛ, ve kə dɛnaarɛ
Mat 26:67-68; Mar 14:65
63Wa̧p bɔk vey laa Yeesu nɔ vɛ ve zɛɛrɛ, ve kə dɛnaarɛ. 64Ve waa gbɔy an nɛ ve kə viʼi: «Mɔ gaa hii dɛnum yɛɛ? Mɔ feet vi bɔ» 65Ve feeza yak zɛɛk zɔʼ ve ɓooza̧a̧.
Yeesu oy náa kɛŋ visin moò o ve timba
Mat 26:59-66; Mar 14:55-64; Zâŋ 18:19-24
66Yɛɛ dɛ̧ɛ̧ yɔŋgay nɔ, náa kɛŋ zik yuuda nɔ vɛ, náa kɔ maak ak kɛŋŋɔ vɛ, vere náa it Moyi̧zə moò buu an vɛ, ve sɔŋŋɛ. Ve pani Yeesu o ve yɛɛ visin moòre, 67Ɛn ve viʼi: «Mɔ Kiris yɔrɛ? Mɔ feet virɛ». O hi̧i̧t vo: «Ooy feet vora nɔ, voy tu̧u̧nii yɛ. 68Ooy kə vi vora moǒ ɛn voy hi̧i̧zinira yɛ. 69Ɛn ɗaa bi̧i̧ de ɓɔllɛ nɛ, ha̧a̧ tan an de zɔɔ Go̧o̧ge gɔti ak o naak za̧a̧ba». 70Ve sɛw tɛʼ ve feeza: «Mɔn, mɔ Go̧o̧ge tan anirɛ?» O hi̧i̧t vo: «Voy fee yɔ: Mii too ɛnɔm». 71Ɛn kəzəkɔ ve fee ʼ: «Kan ba vo vere ha̧a̧ sək moò ak zɔʼ ɓɛ yɛ! Ba voy, ba kii vo yak moot an vɛ ma!»
Currently Selected:
Luka 22: dae
Highlight
Copy
Compare
Share
Want to have your highlights saved across all your devices? Sign up or sign in
