Luka 24
24
Yeesu niŋzi vɔɔ yɛɛre
Mat 28:1-10; Mar 16:1-8; Zâŋ 20:1-10
1Yo̧o̧ dumas ba yoŋgay nɔmpo, keppɔ ve tak gakpa, ve pan kum sa̧a̧k bɔk ve gakkɔ ve tin. 2Ve zee pîn bɔk ve zu̧ʼun gak yakkɔ kik tak tɔŋgba; 3Ve dɔ zo̧o̧rɛ, Ɛn ve zeen Gbɛ̧ɛ̧ kɛŋ Yeesu fo̧o̧ an yɛ. 4Ve gaan hɛn ka ve vəʼə nɔ yɛ, kaʼso Wa̧p zɔʼ ve itto ve hən o ve timba ɛtuu vin sâm von vɛ dȩȩzinaza̧a̧. 5Keppɔ doo kɔ vorɛ ve du gbɔy von hɛge, wa̧p itto ɛnɔ ve feet vo: «Voy teee wa̧y za̧a̧n ɛnɔ vɔɔ o ve tiŋza̧a̧re nɔ moò nɛɛ?» 6O paam ɛtɛɛ yɛ, o niŋzi kəy vɔɔ yɛɛre za̧a̧na. Vo vəʼə kə hɛn bɔk o feet vo bɔk oy Galile nɔ oppo kere nɔ teee: 7“Ha̧a̧ tan an do ve heza náa kɔl hɛn ɓɛɛ ak vey, do ve gaʼa tap ɓanzinna ba, yo̧o̧ dɔʼ ta̧a̧to an de niŋzi kəy vɔɔ yɛɛre za̧a̧na.”» 8Ɛnɔ keppɔ ve vəʼə gaa Yeesu yak moot an nɔn. 9Ve luu gakpa tuu nɔ ve tak ooza kaam boʼ zoo daŋga nɔ vɛ hɛn ɛnɔ verɛ tɛʼ, vere kaam zɔʼ nɔ ve sɛw tɛʼ. 10Kep òo moò ɛn ve nɔ, bɔk Maari waa Magdala nɛy, Zaan ni, vere Maari Zâk naʼ ani. Vere kep zɔʼ ve tin, ve ooza Yaʼyɛɛ nɔ vɛ moò da̧a̧ nɛy vin. 11Ɛn ɗaaʼ, Yaʼyɛɛ nɔ ve tu̧u̧ nɔ ka bore yo̧o̧ yak ɓaʼ ve ɓan keppɔ ve moò von yɛ. 12Ɛtuum vin Piyɛr luu at tak gakpa; O suu, hə̧ sam bɔk ve niʼnaa nɔ vɛy zaʼ. Pik an o ɗɛɛ kə o kaa, kɔʼɔ ɓaʼ bit hɛn ke daa ɛn oppo nɛy.
Kaam itto ve kasinga Yeesu yana Emmawusɔ oppo
Mar 16:12-13
13Yo̧o̧ da̧a̧ ɛnɔ oppo vin, kaam ve itto vey takka kap wagaa zɔʼ ve ya̧a̧ bo Emmawus, kaa kɔ ɛmbi yo̧o̧ tan ittorɛ ka gbɔ zeruzalɛm ze nɔ gɔ. 14Vey moo hɛn bɔk daa tɛʼ nɔ vɛy. 15Vey mòò yusinna ɛn dɔmmɔ, Yeesu yaa zee vo ɛtuu vere wɔɔk ani tɔgi vo yana daŋ. 16Ve həʼ̧ə̧rɛ ɗaa, hɛn zɔʼ yaŋ vo gaaarɛ. 17Yeesu vi vo: «Hɛ̧ɛ̧n voy yusinna ɛmbiba ɛnɔ nɛɛ?» Ve diirɛ, fo̧o̧ vɔ vorɛ tɛʼ. 18Wa̧y zɔʼ daŋga, nii an Keleyopas, hi̧i̧za: «Náa vey kanna zeruzalɛmmɔ ve tɛʼ, ve gaa hɛn bɔk daa yo̧o̧ bɔk vəə tak si̧ʼtum nɛnɔ ve oppo nɔrɛ, mɔ gaan hɛn bɔk daa yo̧o̧ si̧ʼtumba nɔ yɛ yɔ um da̧a̧re zaʼ!» 19O vi vo: «hɛ̧ɛ̧n daa nɛɛ?» Ve hi̧i̧za: «Hɛn bɔk daa Yeesu wa̧y Nazarɛttɔ oppo nɛy! Bɔk o Porofɛt gɔti akka, bɔk o it o kɔm ba, o yak moot ba, sȩȩ Go̧o̧ge o timbarɛ vere náa o ve timba sɛw tɛʼ. 20Náa kɔ maak ak vin vɛ kɛŋ von vɛ, vere náa kɛŋ kap vin vɛ, ve heʼe doò ve vɔzarɛ, ve gaʼa tap ɓanzinna ba. 21Bɔk vi tu̧u̧ nɔ, baa o de wa̧y kaa de sɔ̌tta zik Islayɛllɔ yɔ u̧; Ɛn, hɛn ɛnɔ bɔk daa nɔ, kɔ munɛ dɔʼ ta̧a̧to ma. 22Ɛnɔ ɓɛʼ, kep zɔʼ ve, ivi tiŋza̧a̧re, ke ve yaa feet vi moò tɛɛ, kɔ vi bit; Ke yɔŋgay yɛɛ hamba, ve tak gakpa, 23Ve zeen fo̧o̧ an yɛ, ve ɗɛɛ kəy oot vi, Go̧o̧ge zə̧ə̧ an bo ve hən o ve po, bo ve feet vo, o boy za̧a̧na. 24Wa̧p zɔʼ ve, ivi tiŋza̧a̧re ɓɛʼ ve tak gakpa, ve zee too keppɔ ke ve yaa fee nɔm, ɛn ve hən Yeesu yɛ». 25Ɛnɔ Yeesu feet vo: «Náa gaan moò yɛ ɛn voy, vo ɓan hɛn Go̧o̧ge yaʼyɛɛ an bɔk ve fee nɔ yɛ! 26Ke liin Kiris kaa gaa gim too ɛnɔm doʼ, ka dɔn o gbəəme ze yɛrɛ?» 27Pik an, o òo wat vo hɛn dɛptɛl moò sɔŋ o daake nɔ ve tɛʼ, bi̧i̧ Moyi̧zə o dɛptɛlle, kə goʼtak Go̧o̧ge yaʼyɛɛ an o ve dɛptɛlle nɔ ve sɛw tɛʼ. 28Vey sanna gbɔra kap ke vey takka tin nɔ oppo dɔmmɔ, Yeesu kɔ too de daa vəə yana ani nɔm. 29Ɛn ve faararɛ ve fee: «Mɔ kangaa vey vi tɛɛ; Yo̧o̧ tun ma, vi̧i̧ de sa̧a̧ya̧a̧rɛ vin». Yeesu dɔgi vo kàa kangi vo tuu. 30O zɔɔgi vo yɛɛ lɛ lɛmba daŋ, iŋ nan nɔ kə dɛnza Go̧o̧ge naak tin; O kpəl nan nɔ yə̧ʼ vorɛ. 31Ɛnɔ nɔt von kǔl ve gaaarɛ; Ɛn Yeesu tɛk o ve timba tuurɛ ʼwa̧ʼ. 32Ve feezin o ve yɛɛ ba: «Ke paam too vɛɛ de aŋŋa o ba si̧i̧ ba nɔm yɛɛ ke oy òo watpay yak moot dɛptɛl fee nɔ ve yanaa nɔ oppo yɛrɛ?» 33Ve luu nɔmpo ve ɗɛɛ kə tak zeruzalɛm. Ve tak zee kaam boʼzoo daŋga nɔ ve sɔŋ vere daaa zɔʼ ve tin, 34Ve sɛw tɛʼ ve feeza kaam itto nɔ vɛ: «Gbɛ̧ɛ̧ kɛŋ niŋzi kəy za̧a̧na ginu! Simɔŋ ke hə̧ʼə̧rɛ!» 35Kaam itto nɔ ve oot vo hɛn ke daa yanaa nɔrɛ vin, ve fee: «Ki vi gaa bo Yeesuy nɔ yɛɛ ke o kpəl nan yə̧ʼ tin nɔ oppo».
Yeesu iza kaam an ve gbɔyya
Mat 28:16-20; Mar 16:14-18; Zâŋ 20:19-23; Yaʼ 1:6-8
36Kaamɔ bɔk vey moò yakpa ɛn dɔmmɔ, Yeesu hən o ve tiŋza̧a̧re tuu vere wɔɔk ani kə feet vo: «Za̧a̧ do kanga voy!» 37Doo kɔ vo, ve niŋŋɛ kpɛŋ ve tu̧u̧ nɔ ka bo ve hə̧ de gappa. 38Ɛn Yeesu feet vo: «hɛ̧ɛ̧n kɔ vo kpadak nɛɛ? Vo ɛ moò yulla ɛnɔ o vo si̧i̧ ba nɔ moò nɛɛ? 39Vo to naak min vɛy vere dɔʼ min vɛy: De mii ɓim! Vo so̧yrɛ, vo toyrɛ, ɛn gap ɛ̂n hɛ̧p yɛ ɛ̂n neŋ yɛ, ɛn min voy hə̧ra mi ɛrɛ». 40Oy feet voo ɛn nɔ, o it vo naak an nɔ vɛ vere dɔʼ an nɔ vɛ tin. 41Kaamɔ vɛ si̧i̧ dȩȩ vorɛ kpɛŋ, kɔ vo bit, kaa ve tu̧u̧na kere yɛ, Yeesu vi vo: «Vo ɛ de hɛn lɛra tɛɛrɛrɛ?» 42Ve poʼo dut naara daŋga. 43O iŋ duttɔ kə lɛ o ve timba tuu. 44Pik an o feet vo: «Bɔk mi vega voy kere nɔ: Bɔk mi feet vo baa: Hɛn dɛ̧ɛ̧ iipo Moyi̧ze o moò buure, Go̧o̧ge yaʼyɛɛ an o ve Dɛptɛlle, vere Dɛptɛl gə̀ə̀mɔ vɛ oppo tɛʼ nɔ de kuraarɛ». 45Ɛnɔ o kûl vo moò gaa o ve wɔɔke doò ve gaa hɛn dɛ̧ɛ̧ dɛptɛlle nɔ verɛ. 46O feet vo: «Hɛn ve dɛ̧̀ɛ̧ nɔ de nɛ: Kiris do gaa gimma, pik an dɔʼ ta̧a̧to ba, de niŋzii vɔɔ yɛɛre, 47Vere nii ani, ve oozaa zikkɔ ve tɛʼ ɛŋgɔ: Vo fil kandi vonnɛ ɛn Go̧o̧ge de hoozi vora hɛn ɓɛɛ von verɛ, do bi̧i̧ zeruzalɛm; 48Vo de náa sək moò hɛn ɛnɔ oppo tɛʼ yɔ. 49Ɛn mii yaʼan vo yaa hɛn baa min bɔk bɛn vo nɛy, òo voy nɔ vo kan kap aʼre, gɔti bɛlba nɔ ka yaa o vo po doʼ».
Yeesu luu dɔk bɛlba
Mar 16:19-20; Yaʼ 1:9-11
50Pik an Yeesu vukkaa kaam an vɛ kare tuurɛ, o pan vo tak kap tɔŋ Bɛtani; O gan naak an vɛ bɛlba su vorɛ. 51Yɛɛ bɔk de su voo tin nɔ, o heezingi vo oppo, luu dɔk bɛlba. 52Kaamɔ o ve po nɔ, ve gabaarɛ, ve ɗɛɛ kə Zeruzalɛm, vere si̧i̧ dȩȩta kpɛŋ. 53Tuŋ kaamɔ ve tak Go̧o̧ge ligi, ve gbəŋ Go̧o̧gey.
Currently Selected:
Luka 24: dae
Highlight
Copy
Compare
Share
Want to have your highlights saved across all your devices? Sign up or sign in
