Urom 9
9
Kutọ Upọl gbe le bendi Izwel
1Igie angi mi ndu kọng i, mi yi ke Ujeso Kristi a, mi kọng kigyang a, mi ba uman a ye. Ugim ugi a naa mi ushada, Ukatia Kunyọng u tyung le ki yi na. 2Lityam ligi li sho le kimbwee le kutọ ahwu ku tọ mi ishu ọ, kusu ọ, 3gbe le bendi begi, Izwel. Gbe ki nya kpel abe, ha mi kọng ha Unim bii he le u ke ushang ubibi fe-m mi hwan, u tang mi he abwo le ha Ujeso Kristi. 4Be yi bendi Izwel a, Unim a waa kung abe le be kwu bebwaa-ma, u kung ifem ima tyung abe, u kọng ndọ ha abe, u ke be Iten ima, u tyung abe kukwo kugyang ahwu be fe-e u ke be ikyeb. 5Be shi igia betie-tyan abe gbel. Ukristi ugyang, undi angwu a hwan he, u yi kubọng kubel kugyang a. Ufe angwu u yi Unim angwu a hwo puu, ipee i kwu ke-e ngyọ igye kpam. Ki ngyọ na li kọng.
Ugia Unim a hwo puu
6Ki yi le igie Unim i mbu gyan a ye. Bendi puu abe be be le he ubu Izwel na be yi Izwel ye. 7Nyọng le gbe be be le he Izwel, be fel bebwaa Ebraham a puu ye. Ukpọ gbe ha Azik na be be nde shob bebwaa amen.#9:7 Ukpi-kikwu 21:12 8Ashin ki ze le, bebwaa abe be ma hwan he lihwan undi-gye he ubu Ebraham na Unim u kung a be na bebwaa-ma ye, ukpọ abe be hwan gbe he ukyeb Unim na u kung abe na bebwaa-ma. 9Nyọng Unim a ma ke Ebraham ukyeb, a ma kọng igie anyin, “Uze kigbe ashin mi ba tem ba ka ungye-gang Usara unwaa-ngikye.”#9:9 Ukpi-kikwu 18:10; 14
10Ashin kife-kife a ye. Urebeeka ungye Azik a ma shi lizam, hwan begbe. Atyam begbe ana na u yi Azik. 11Nyọng be ma wa hwan abe ọ, ngwu be shi kiwọm ọ ma ye, ma kibibi ọ, nyọng kinunung ọ ye, le ki kwu na Unim a waa. 12Unim a ma de Urebeeka le “Angwu gbel u ba kwa he kubwo angwu kisun a.”#9:12 Ukpi-kikwu 25:23 Ki yi gbe he aki a ye, ki yi gbe ha Unim ugyang angwu a mbe a. 13Ki yi nya ana be fee he kushia Unim a le, “Ki nyin mi le Ujekọb, ukpọ mi tel Isọ.”#9:13 Umalakai 1:2; 3
14He ashin, li ha da le ana a? Le Unim u yi ubibi a? Dia! 15Le-iti a ma de Umosis le,
“Mi kwa le inung le beshi
ha undi angwu migyang mi kee.”#9:15 Ligye 33:19
16Ashin ki tyung le u gia angwu Unim u gia a gbe kpee igim bendi-gye ọ, nyọng aki abel ọ ye, u kee-kee ba le he beshi bema a. 17Be fee he kushia Unim le Unim a ma de Ufero, Usu Igypt le, “Mi kwa-a kusu le mi kung ikeb igi tyung gbe he awo, kasu kagi ka fem mbee igye puu a.”#9:17 Ligye 9:16 18Ki nung ngwọng le Unim a tyung beshi ha undi nyọng ufe a kee, u shi undi u teb lityam nyọng ufe a kee.
19Pisoye undi ususo u bii mi le, “Fe kibang a, Unim u ha ben bendi he ashi be shi, gbe kitaa Unim a shi undi le u kwu na u kwu?” 20Ukpọ ayang u yi a wo undi-gye angwu wo mbe lityam bii Unim kibibi? Kiki ki nya bii undi angwu a mbe shi le, “Ki shi na a, wo mbe-m kitaa i a?”#9:20 Azaya 29:16; 45:9 21Undi angwu u mbe biki u yi le ikeb le u mba biki bifee le he ubibi limbe ken. U mba ashi ken ki kwa ka kunyọng kipam, u mbe ashel ki kwu ashi ke liti liyang-yang.
22Ki yi kitaa ken ha Unim. Ma na Unim a kee le u tyung ingyo ima ha abe be waa ndọ linim he be be nde ikeb ima ọ, u so-i ngib lityam a ndọ abe. 23U ngib lityam le he u tyung inung ikandi ima ha bendi abe u yi le beshi ha abe, abe a kam sasa ndọ le be kwu he ifem ima a. 24Bel na li yi bendi bemen abe a gia le be kwu bema i. A gia li le he bendi Ijuus ufe-ufe a ye, a gia bendi le he abọng angi a teng ọ titi. 25He kushia Uhosia, be fee le Unim a de le,
“Bendi abe le-iti be ma yi bendi begi a ye,
mi ba ko abe le, ‘Bendi begi.’
Kubọng ahwu le-iti ki ma nyin mi le hwu ye,
mi fel ko ahwu le, kubọng kugi.”#9:25 Uhosia 2:23
26Bendi he kiteng ashi mi ma de be le,
“ ‘Ma yi bendi begi a ye,’
bendi bemen ana na be be de be le,
‘Ma yi bebwaa Unim angwu u yi uwum a.’ ”#9:26 Uhosia 1:10
27Azaya angwu a maa tye ugie kisọm Unim a ma kii gbe le bendi Izwel le,
“Ma na bendi Izwel be go kugii na ayia lishọ ọ,
bendi zang na be teng abe be be kwu le likpan.
28Ada u ba tang ushe
uma fa he lishi le akye.”#9:28 Azaya 10:22, 23
29Azaya a ma mbee kọng le,
“Ki be kwu le Ada ikeb puu
u be teng ubu utyan zang ọ ndọ ye,
hang li mbee na kubọng
Usọdọm le Ugomora.”#9:29 Azaya 1:9
Abọng-ale ye Izwel
30Li ha de le ana a? Ki yi le bendi abe be yi Ijuus a ye, abe be ma be kaa ikaa ọ le he be be kwu benunung ye, Unim a kpe be le be yi benunung likọye be bọng ha Ujeso Kristi. 31Ukpọ bendi Izwel abe be ma kaa ndọ Iten Umosis le he be kwu benunung, be ma ndọ Iten imen ana mbee ye. 32Kibang a, be ma fel benunung ye? Be ma fel benunung ye, likọye be ma kaa le be kwu benunung gbe he andọ-ale Iten a, gbe he abọng-ale ha Ujeso Kristi a ye. Be ma gbaa limbu he kukọ. 33Nya ana be ma fee he kushia Unim le Unim a de le,
“Nde, mi beb kukọ he Uzayọn
ahwu ku shi bendi be gbaa mbu.
Ukpọ undi uyang-yang angwu a bọng ha
ufe angwu u yi kukọ kumen ana,
u mbwa ye, u fe-e he ishwia ye.”#9:33 Azaya 8:14; 28:16
Currently Selected:
Urom 9: KUIL
Highlight
Copy
Compare
Share
Want to have your highlights saved across all your devices? Sign up or sign in
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.