Urom 10
10
1Bebuye, mi yi le kigyọ he lityam kaang le bendi begi, Izwel, be kwu le likpan kunyọng. Mi kọng ha Unim le u kpan abe. 2Mi naa ushada gba le be le be yi le kigyọ gbe le Unim, ukpọ kigyọ kibel ki yi faale lingye. 3Kukwo ahwu Unim u shi bendi be fel benunung he ashi ama, ku nung abe ye. Ukpọ be kaa le kuhwobel le he be fel benunung he ashi Unim. He ashin be swan le be keb kuhwobel ka Unim he u shi abe be fel benunung ye. 4Gbe ki yi le Ujeso Kristi a be mbee shi ashi ki ma yi le hang Iten a na i shi, le he undi uyang-yang angwu a bọng he ahe u fel ununung he ashi Unim.
5Le-iti Umosis a ma fee gbe le kukwo ahwu undi u fel ununung he ashi Unim gbe he andọ-ale Iten. A fee le, “Gbe undi a ndọ Iten puu u kwa le likpan.”#10:5 Iten ashangale 18:5 6Ukpọ akwole kpa-kpa angwu gbe he abọng-ale u da le, “Shi kọng he awo lityam le, ‘Ayang u nya mbo gye he kusi lifung-atabe?#10:6 Iten lefee 30:12’ ” (le u ha le be le Ujeso Kristi he itang) 7“gbe na a ye ‘Ayang u nya shul gye he kusu behwu?’ ”#10:7 Iten lefee 30:13 (le u ha le be le Ujeso Kristi le he kusu behwu). 8Ashi be fee he kushia Unim na ki yi le, “Kisọm Unim ki fel kpee-kpee ha amen. Kife na bendi be kọng gbe le shi, be gim gbe le shi he atyam abel.”#10:8 Iten lefee 30:14 Kisọm kimen i ki yi kisọm gbe le abọng-ale ashi li bun a. 9Gbe wo buu ungwu ugang kọng gboo le Ujeso u yi Ada a, wo bọng lityam ken le Unim a wum he le he lihwu, wo kwa le likpan kunyọng. 10Gbe undi a bọng ha Ujeso Kristi lityam ken, Unim u kpa he le u yi ununung. Gbe undi a buu ungwu uma kọng gboo le Ujeso u yi Ada a, u kwa le likpan kunyọng. 11Be fee he kushia Unim le, “Undi uyang-yang angwu a bọng he ahe, u fa he ishwia ye.”#10:11 Azaya 8:14; 28:16 12Ashin ki yi ke undi uyang-yang, ma u yi Ijuus a ọ, ma u yi Ijuus a ye ọ. Ada a ken na u yi Atyabel. Bendi puu abe be ko he lizen lima, u ka abe kukwun kyo-kyo. 13Ki yi nya ana be fee he kushia Unim a le, “Undi uyang-yang angwu a ko he lizen Ada, u kwa le likpan kunyọng.”#10:13 Ujowel 2:28-32
14Ki nya sha na a, bendi be ko he lizen undi angwu be wa bọng he ahe ye? Ki nya sha na a, be bọng he ahe gbe be wa gyo gbe le he ye? Ki nya sha na a, be gyo gbe le he faale afa-ale undi a le bun de be? 15Ki nya sha na a, undi u le bun de be faale angwu a sọm he? Ki yi nya ana be fee he kushia Unim a le, “Abele Unwaa-kisọm a ngbeb he ashi bendi abe be kpe kisọm kinunung.”#10:15 Azaya 52:7
16Ukpọ bendi Izwel puu na be kpe kisọm kinunung ashina ye. Azaya angwu u tye ugie kisọm Unim a de le, “Ada, nyọng ki yi i, ayang a ha kpe ashi li bun?”#10:16 Azaya 53:1 17Ki nung ngwọng le abọng-ale a ba gba ha agyo-ale igie Unim, agyo-ale kisọm kinunung gbe le Ujeso Kristi. 18Mi bii le, ki nya yi kigyang a le bendi Izwel be waa gyo kisọm kinunung ye a? Dia, be gyo. Ki yi nya ana be ma fee he kushia Unim a le,
“Kisọm ashi bebwaa-kisọm bema be bun
ki gye mbee igegem iyang-yang puu
he igye i.”#10:18 Agyam 19:4
19Mi mbee bii le, ki nya yi kigyang a le kisọm kimen i ki nya nung bendi Izwel ye a? Ukpi-kikwu mi kung igie Umosis fan kibibi. Umosis a kọng le Unim a de le,
“Mi Unim, mi ba sha amen ma bung ashi
ha bendi abe be yi kubọng kugi a ye.
Mi sha amen ma fel le ingyo ha bendi abe be yi le lingye ye.”#10:19 Iten lefee 32:21
20Azaya ọ titi a kọng gboo faale kushel le Unim a de le,
“Mi fem kuhwo-gi tyung bendi abe be ma
shun mi ye,
abe be ma kee mi ye, be nde-m.”#10:20 Azaya 65:1
21Ukpọ gbe le bendi Izwel Unim a de le,
“Kung le ha liti kukwun, mi ndaa abwo
le mi kpe bendi begi abe be kwọm kutyung,
be shi lishi likaa-likaa.”#10:21 Azaya 65:2
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.