Urom 8
8
Likpan gbe he Ukatia Kunyọng
1He ashina, bendi a be be gwa kuhwobel ipel ha Ujeso Kristi, ki tem yi le linim ke be ye, 2likọye ikeb Ukatia Kunyọng angwu a be le likpan gbe ha Ujeso Kristi, a fem kung li le he abwo kiban le lihwu. 3Iten i ma yi le ikeb le i kpan li ye, likọye bel bendi-gye li ma yi le ikeb angi li ndọ angi ye. Ukpọ Unim a shi ashi iten ana i ma shi mbee ye. A shi ashi gbe he asọm-ale Unwaama angwu be hwan na bel a be li shi kiban i. Unwaama umen i a mbee le ikeb kiban ashi ki yi ha abel. 4Unim a shi ashin le li fel benunung na iten i kee li le li kwu. Li kwa na gbe li ma ma tan na Ukatia Kunyọng u teng li a, li tan na bigyọ agwo atyan bi teng li a ye.
5Bendi abe be tan na bigyọ agwo abel bi teng abe a, be kee-kee gim na be shi nyin kuhwobel ufe-ufe a. Ukpọ bendi abe be tan na Ukatia Kunyọng u teng abe a, be kee-kee gim na be shi ashi Ukatia Kunyọng a kee a. 6Bendi abe be kung igim ibel ndọ he bigyọ agwo abel a, be tan le lihwu gwa kuhwobel. Ukpọ bendi abe be kung igim ibel ndọ ha Ukatia Kunyọng a, be kwa le likpan le ikwun ngyọ igye kpam. 7Undi angwu u tan na bigyọ agwo ama bi teng he a, u kwa undi-linaa Unim a, likọye u ka Iten Unim ife ye. U ha ndu kwa le ikeb ka angi ife ye. 8Kigyang-kigyang, bendi abe be tan na bigyọ agwo abel bi teng abe a, be ha ndu sha nyin Unim ye.
9Ukpọ men ufe, gbe ki yi le Ukatia Kunyọng u yi ha amen atyam kigyang, ma tan na bigyọ agwo amen bi teng amen a ye, ma tan na Ukatia Kunyọng u teng amen a. Undi uyang-yang angwu u yi le Ukatia Kunyọng Ukristi he ahe lityam ye, ha u yi ke Ujeso Kristi a ye. 10Gbe Ujeso Kristi u yi ha amen atyam a, ma na inyia-hwo imen i be hwo he kuhwo kiban ọ, Ukatia Kunyọng u ba ka amen likpan kunyọng likọye Ujeso a shi amen ma fel benunung he ashi Unim. 11Unim angwu a wum Ujeso le he lihwu, gbe Ukatia Kunyọng uma u yi ha atyam amen, ha ki nung ngwọng le ufe angwu a wum Ujeso Kristi le he lihwu u ba wum amen ọ titi le he lihwu gba he ikeb Ukatia Kunyọng uma umen angwu u yi ha amen a na.
12Bebuye, he ashin, ki yi le kiwọm ashi ki yi le li sha, ki yi le li bọng bigyọ agwo bi teng li ye. 13Gbe ma bọng bigyọ agwo bi teng amen, ha ma hwa. Ukpọ gbe ma kung ikeb Ukatia Kunyọng gwu bigyọ agwo, ma kwa le likpan ligyang angyel.
14Bendi puu abe Ukatia Kunyọng u teng abe, be yi bebwaa Unim a. 15Ukatia Kunyọng angwu ma kpe, a shi amen ifee a ye, nyọng u shi amen le ma fel he kushel a ye. A shi amen ma fel bebwaa Unim a. Ufe na u shi li li ko Unim le, “Ada! Atya-tyan!” 16Kitaa ana na Ukatia Kunyọng u de li he atyam atyan le li yi bebwaa Unim a kigyang-kigyang. 17Gbe li yi bebwaa-ma a, bel ọ li za lishi lima. Bel le Ujeso Kristi li ba kpa abi a kam ndọ he, likọye gbe li bọng kpe kingie utung he ahe, ha li ba kwa he ifem utung he ahe.
Kingie kanaa-anaa i le ifem le he kushu
18Mi ngye dang le bingie abi li kpe kanaa-anaa i bi kpee ifem angi Unim u be ke li ye. 19Biwọm puu abi Unim a shi he igye anyin bi fel ngib lityam a kwa nyọng kunyọng ahwu Unim u be tyung ifem bebwaa-ma he igye gboo. 20Unim a keb limbe igye anyin ke angyu-ale, gbe he ikeb ima a, na limbe ligyang li kee a ye, he lishi andọ-ale. 21Unim a shi ugim ndọ fel kwu u nyọng kunyọng ahwu u pel biwọm puu abi a shi tyang abwo le he lifee ke bibibi le lihwu, le he bi tem ban ye. Be ba fel pọ, Unim u fem abi na u fem bebwaa-ma.
22Li ngye le kpam be wu kunyin i, biwọm abi Unim a shi bi beb he kingie le lishi andọ-ale na ungingye angwu u shi uzwaa na. 23Biwọm abi bi teng iteng abi Unim a shi bife-bife na bi beb ye, ukpọ bel-agyang abe a ke li Ukatia Kunyọng uma na ukpi-kikwu kuke kuma ọ li yi le kibebeb he lityam nyin i na li kwu li nyọng le u tyung gboo le li yi bebwaa-ma a. Li mbee kwu li nyọng kunyọng ahwu u be kpan inyia-hwo ityan le he lihwu i. 24Bel abe li fel le likpan kunyọng ma, li fel le lishi andọ-ale he biwọm abin. Gbe li kpe kiwọm ma, li tem ndọ lishi a le li kwu le shi ye. Ki nya sha na a, undi u mbee ndọ lishi kiwọm ashi a fel le shi? 25Ukpọ gbe li ndọ lishi kiwọm ashi li wa fel le shi ye a, li ngib lityam kwa nyọng ashi.
26Kitaa kimen na Ukatia Kunyọng ọ u kpel li likọye li yi kang-kang he kukwo Unim ye. Li ngye na li kọng ha Unim na ki yi le li kọng ọ ye. Ukpọ Ukatia Kunyọng u kọng ha Unim he kuhwo kutyan, u kọng igie angi undi-gye u kọng mbee ye he kibebeb. 27Unim angwu a ngye atyam atyan, a mbee ngye ugim Ukatia Kunyọng uma. Ukatia Kunyọng u kọng ha Unim ka bendi Unim, nya ana Unim ugyang a kee.
28Li ngye le kiwọm kiyang-yang ashi ki shi, Unim u sha ashi ki ba le kinunung ka bendi abe ki nyin abe le he, abe a ko le be shi ashi a kee. 29Bendi abe Unim a ma waa le be kwu bema, a kam ndọ ọ ma le be ba kwa na Unwaama, le he Unwaama ana u kwu ukpi-kikwu unwaa he liwu bebwaa-nde gbam. 30Abe a shi abe be fel tata ke-e, u ko abe le be fel bema. Abe a ko abe le be fel bema, u shi abe be fel betaa-betaa he ashi ama. Abe a shi abe be fel he betaa-betaa, u shi abe be kwu he ifem utung he ahe.
Lihwo mbee akekel puu
31Kibang ki teng le li kọng? Gbe Unim u yi li he item, ki gbee li le angwu u tel li ye. 32Unim a nyim li Unwaama ye, a kung he ke li puu. He ashin, faale ifung u ka li biwọm puu kuke. 33Ayang u nya tyung li bel bendi abe Unim a waa kung kubwo he kiban? Unim ugyang na a de le li yi-e betaa-betaa gelalala. 34Ayang u nya de le li zi libi? Ki yi le undi ye! Ujeso Kristi angwu a hwo ke li, Unim a wum he le he lihwu, kanaa-anaa i u yi kwu he kubwo lizen Unim, u kya fa Unim he kuhwo kutyan. 35Kibang ki nya tang li he abwo le ha benyin Ujeso Kristi? Ma ki kwu ugil-ale ọ, ki kwu kingie ọ, be teb le bel ọ, ki kwu itung ọ, ki kwu libọng ọ, ki kwu be-gyọng ọ, ki kwu lihwu ọ, abin puu, ki yi le ashi ki tang li he abwo le he benyin Ujeso Kristi ye a kpam! 36Ki yi nya ana be fee he kushia Unim a le,
“He kuhwo kugang, wo Unim,
na be gwu li mbee kunyọng puu.
Be kung li na itia angi be le gwu na.”#8:36 Agyam 44:22
37Ukpọ he biwọm abin puu, bel li hwo mbee kakekel puu gbe ha Ujeso Kristi angwu ki nyin he le bel. 38Mi ngye dang le ki yi le ashi ki tang li he abwo le he benyin Ujeso Kristi ye. Ma likpan ọ, ma lihwu ọ, ma idengel Unim ọ, ma biwọm bisuso abi bi yi le ikeb he lifung-atabe ọ, ma biwọm abi kanaa-anaa i ọ, ma abi bi be le he kushu ọ, 39ma abi he lifung-atabe ọ, ma abi he kusu behwu ọ, ki yi le ashi ki yi le ikeb le ki tang li he abwo le he benyin abe Unim u yi le be ha abel gbe ha Ada Ujeso Kristi ye a kpam.
Currently Selected:
Urom 8: KUIL
Highlight
Copy
Compare
Share
Want to have your highlights saved across all your devices? Sign up or sign in
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.