Urom 4
4
Gbe he abọng-ale Ebraham, Unim a kpe-e le u yi ununung
1Kibang li nya kọng le, Ebraham angwu u yi atietyan he abwo? Unim a ma kpe-e le u yi ununung le gbe a shi aki a? 2Ki be kwu le Unim a kpe Ebraham le u yi ununung gbe he aki a, hang u yi le kiwọm ashi u pwọm ungwu gbe le shi. Ukpọ u yi le ashi u pwọm ungwu gbe le shi he ashi Unim ye. 3Kushia Unim kufe ku kọng le ana? “Ebraham a ma fe lityam ha Unim, he ashina Unim a kpe-e na undi ununung he ashi ama.”#4:3 Ukpi-kikwu 15:6
4Nyọng undi u shi aki, be ka he unde he aki angi a shi. Ashina ki yi kuke a ye, ki yi kiwọm ashi ki yi kpe-kpe a. 5Ukpọ gbe undi u fe lityam he aki angi ufe-gyang a shi a ye, ukpọ u fe lityam ha Unim angwu u shi bendi-biban be fel benunung a, Unim u kpa undi umen ana le u yi ununung gbe he abọng-ale uma. 6Udebid ọ a kọng kitaa a ken, nyọng a kọng gbe le igọ angi i yi ke undi angwu Unim a kpe-e na undi ununung he ashi ama fem aki ama tyang. 7A de le,
“Kukwun ku yi ke bendi
abe Unim a tyang biban bibel ke be,
u mbee le bibibi bibel.
8Kukwun ku yi ke undi uyang-yang
angwu biban bima, Ada u tem bo abi fe-e ye.”#4:8 Agyam 32:1, 2
9Bendi abe be ten befe-befe na ikwun imen i yi ke be a, ha i yi ke abe be ten ye ọ titi? Li be kọng ma le Unim a ma kpe Ebraham le u yi ununung gbe he abọng-ale ama a. 10He kunyọng ahwu a ma kpe Ebraham le u yi undi ununung ana, a ma ten ma a? Dia, nya he kunyọng kumen ana a ma wa ten ye. 11He kunyọng ahwu a ma so kididim undi, a ma bọng ha Unim, he ashina Unim a ma kpe-e le u yi ununung. Unim a ha kung de-e le u ten he ki tyung kitaa le Unim a kpe-e le u yi ununung. Kife na ki shi Ebraham a fel atyam bendi puu abe be bọng ha Unim, Unim u kpe be le be yi benunung, ma na be ten ye ọ. 12U mbee shi atyam bendi abe be ten, gbe be bọng ha Unim na Ebraham a ma bọng kung le ha kunyọng ahwu a ma so kididim undi.
13Le-iti Unim a ma ke Ebraham le igia ima ukyeb le be ba za lishi igye. Unim a ma ke be ukyeb angwun le gbe be ndọ Iten Umosis a ye, a ma ke be ahe le gbe Ebraham a bọng ha ufe Unim a, he ashina Unim a kpe-e na undi ununung he ashi ama. 14Ki be kwu le abe be ndọ Iten Umosis na be zi lishi igye na Unim a kyeb, ha ashin ki ze le abọng-ale u yi kididing, ukyeb Unim u shi le lifem ye. 15Likọye uten u ba le kingie, Ukpọ he kipi uten u yi ye, bendi be ban uten ye.
16He ashina, gbe he abọng-ale na undi u kpe ukyeb Unim he ki tyung gboo le ki kee-kee yi he beshi Unim na a ke li ukyeb uma. U sha ukyeb angwun ka igia Ebraham puu kuke, u kee-kee ka igia angi i ndọ Iten Umosis a ye, u ka abe be bọng ha ufe Unim na Ebraham a ma bọng. Ebraham u yi atya-tyan bel puu abe li bọng ha Unim. 17Ki yi nya ana be fee he kushia Unim a le Unim a de Ebraham le, “Mi sha-a wo fel atyam abọng gbam.”#4:17 Ukpi-kikwu 17:5 Ebraham a kpe ukyeb angwun nya he ashi Unim ugyang a, Unim angwu ufe a bọng he ahe. Unim umen i na u wum akwọm, u sha biwọm abi bi ma yi ye le bi fel.
18Ebraham a ma gye kushu fe lityam ha Unim, ma na ashi Unim a kyeb he ki maa ndu gbe ishu ọ. He ashin Ebraham a ma fel atyam abọng gbam nya ana Unim a de-e. Be fee he kushia Unim le Unim a de-e le, “Igia igang i ba go kugii kaang na ikpen he kusi.”#4:18 Ukpi-kikwu 15:5 19Nya he kunyọng kumen ana, Ebraham a maa ndu fel aze asi adyọng, a ma nde kuhwo-ma a fel na likwọm na, u ngye le ungye-ma Usara ishu i gbe le lihwan. Ma na ọ, a ma gye kushu fe lityam ha Unim. 20A ma fel le igim ifee gbe le ukyeb Unim ana ye. A maa tem fel ka Unim ipee. He ashina a ma fel le ingie he afele lityam ha Unim, 21le gbe a ngye dang le Unim u yi le ikeb le u sha nya ana a ke ukyeb. 22Fe na ki yi atan-lengi angwu Unim a kpe-e le u yi undi ununung a.#4:22 Ukpi-kikwu 15:6 23Igie anyin ima yi ke Ebraham uteteb a ye. 24Bel puu ọ, ki yi ke li titi. U kpa li le li yi benunung, gbe li bọng ha ufe Unim angwu a wum Ada Ujeso le he lihwu. 25Ujeso umen i na le-iti be ma gwu-e he kuhwo biban bityan, ukpọ Unim a wum he le he lihwu le he u shi li li fel benunung he ashi ama.
Currently Selected:
Urom 4: KUIL
Highlight
Copy
Compare
Share
Want to have your highlights saved across all your devices? Sign up or sign in
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.