Urom 3
3
Unim u ndọ igie ima
1Nyọng ki yi nyin, kibang ki ha yi lifem le undi u kwu Ijuus? Kibang ki ha yi lifem le undi u ten? 2Ki yi le lifem he akwo gbam. Ukpi-kikwu, bendi Ijuus na Unim a ma kpi-kikwu kung igie ima fe be he kubwo.
3Gbe bendi besuso be shi ashi Unim a kọng ye, kutyung akwọmale kubel ku nya sha Unim le u tem shi ashi a kọng le u sha ye a? 4Dia! Ma bendi puu he igye anyin be swan le be fa Unim ye ọ, mbee kunyọng puu Unim ufe u sha ashi a kọng. Ki yi nya ana be fee he kushia Unim a le,
“Wo Unim, kunyọng kuyang-ayang wo kọng igie,
ki nung ngwọng le igie igang i yi kigyang,
nyọng be kaa nde, mbee kunyọng puu wo hwa.”#3:4 Agyam 51:4
5Ukpọ pisoye bendi besuso be da le kibibi ashi li shi ki sha bendi be nda kinunung Unim, ha ashina ki ze le ana a? Ki ze le Unim u sha kibibi a, nyọng u ke li kingie he biban bityan a? 6Dia! Abi bendi be tan kọng ana, gbe Unim u yi ununung ye, u ba tang igye ushe na a? 7Pisoye undi ususo u da le uman uma u sha bendi be nda kigyang Unim gboo, he ashina be kung ifem ke-e. He kimen ana, kibang a, Unim u ha tang libi ke-e le u yi undi-kiban? 8Bitaa bendi abena be da le, “Gbe ki yi kitaa ana a, ma li gye kushu shi kibibi le he bendi be nde kinunung Unim.” Bendi besuso be fel ba iman ọ le bel na li kọng ashina. Unim u ka abe kingie ashi ki kee nya del-del.
Ki yi le undi angwu u yi ununung ye
9He kimen i, li ha de le na, bel Ijuus ife li yi he libwo linunung hwo bendi abe be teng a? Kpaa ye! Mi be kọng ma le, bendi puu, ma Ijuus ọ, ma Ijuus a ye ọ, befe puu be yi kitaa ken, puu ubel be yi he abwo kiban. 10Ki yi nya ana be fee he kushia Unim a le,
“Ki yi le undi ken ọ angwu u yi ununung
he ashi Unim ye.
11Ki yi le undi angwu kigyang ki nung he ye,
ki yi le undi angwu u shun kukwo Unim ye.
12Undi uyang-yang a swan kukwo Unim,
befe a puu be fel kididing.
Undi ken-ken ọ a teng angwu u shi
kinunung ye.”#3:12 Agyam 14:1-3; 53:1-3; Ubun-ityang 7:20
13“Igie ibel i ban na likwun ungwu hwuo,
Be lam bendi le iman angi i sho
he ingwu ibel gbam.”#3:13 Agyam 5:9
“Igie ibel i do nya ana bezu ushii a.”#3:13 Agyam 140:3
14“Ingwu ibel i sho le atye, i sho le igie ibibi.”
15“Be gba he abee he bihwu agwu-ale.
16He kiteng kiyang-yang be gye, be tan le
kutọ le linim ka bendi.
17Be ngye na be kwu ikwun-ikwun ye gbang.”#3:17 Agyam 59:7, 8
18“Be shel Unim ọ ye.”#3:18 Agyam 36:1, 2
19Li ngye le Iten angi Unim a ma ke, i yi ke bendi abe a ke be angi a. He ashina ki yi le kiwọm ashi undi u kwu kubwo hwaa ye, igye puu i ba naa ushe he kushu Unim. 20Ki yi le undi angwu a ndọ Iten he u kwu ununung he ashi Unim ye. Ashi Iten ife i shi ki yi le i tyung undi-kiban kima a.
Akwole ununung gbe he abọng-ale
21Ukpọ kanaa-anaa i Unim a tyung gboo kukwo ahwu u shi bendi be fel benunung he ashi ama. Kukwo ahwun ku gbe kpee Iten Umosis ye, ma na Iten imen ana le bitye-ugie kisọm Unim be ma naa Ushada gbe le hwu ọ. 22Unim u sha bendi be fel benunung he ashi ama gba he abọng-ale ubel ha Ujeso Kristi a. U sha ashin ka bendi puu abe be bọng, ma be yi Ijuus ọ, ma be yi Ijuus a ye ọ, ki yi le atyetye ye. 23Bendi puu be shi kiban, be gyan ifem Unim. 24Ukpọ gbe he inung Unim le beshi bema, u sha bendi be tem fel benunung gba ha Ujeso Kristi angwu a pọng li kuke. 25Unim a kung he ke le be shang, le gbe he anung ama u tyang biban bityan ka li, bel abe li bọng he ahe. Unim a shi ashin he u tyung kinunung kima a. Le-iti a ma ngib lityam nda biban bendi gwa ashi wa. 26Ukpọ kanaa-anaa i a shi kukwo ahwu u tyang biban ke bendi, u tyung le u yi ununung, u mbee tyung le u sha undi uyang-yang angwu a bọng ha Ujeso u kwa ununung.
27He ashina, ki nya yi le kiwọm ashi bel li kung pwọm ungwu a? Kpaa ye! Ki yi le gbe li ndọ Iten imen a na na li yi benunung i ye, ki yi le gbe li bọng ha Ujeso Kristi a. 28Li so-i kọng le undi u fel ununung he ashi Unim, gbe a bọng ha Ujeso Kristi a, ki gbe kpee Iten Umosis ye gbang. 29Unim u yi ke Ijuus ife-ife a? U yi ke bendi abe be yi Ijuus a ye befe ye a? U yi ke bendi puu, 30Gbe Unim u kee-kee yi a ken a. U kpa bendi Ijuus abe be ten le be yi benunung, gbe be bọng ha Ujeso Kristi a. Kitaa a ken, u kpe bendi abe be ten ye le be yi benunung, gbe be bọng ha Ujeso Kristi. 31Gbe ki yi le undi u fel ununung he ashi Unim gba he abọng-ale a, ashin ki ze le Iten ife i mbee a? Dia, li tyung bendi ashi ki yi kikwu Iten a.
Currently Selected:
Urom 3: KUIL
Highlight
Copy
Compare
Share
Want to have your highlights saved across all your devices? Sign up or sign in
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.