Urom 5
5
Ikwun le lishi andọ-ale
1He ashin le gbe ki yi le Unim a kpe li le li fel benunung gbe he abọng-ale utyan, li fel ikwun ha Unim gbe ha Ada Ujeso Kristi. 2Ujeso Kristi na a buu li kukwo le li ngye beshi Unim gbe he abọng-ale utyan he ahe. U tyung beshi Unim ha abel, bel li yal gọ, likọye li ndọ lishi le li ba kwa ipel ha Unim he ifem ima. 3Li yal gọ he bingie ọ titi, likọye li ngye le bingie bi ka lityam angib-ale, 4Lityam angib-ale li ka li likpe, likpe li ka li lishi andọ-ale. 5Lishi andọ-ale li fa li he ishwia ye likọye, Unim a ke li Ukatia Kunyọng uma angwu u shi li li kwu le benyin Unim he atyam atyan kaang.
6He kunyọng ahwu li ma kpan kuhwotyan mbee ye, Ujeso Kristi a ma be hwo ke li bel bendi-biban he kunyọng ahwu Unim a ndọ. 7Ki yi le kingie na undi u bọng hwo ke undi ununung ọ. Pisoye undi u nya zam kam le u hwa ka undi angwu a ngbeb. 8Ukpọ Ujeso Kristi a hwo ke li bel, nyọng li ma so bendi-biban. Kitaa a na na Unim a tyung na ki nyin he le bel kindee-kindee.
9Le gbe Unim a kpe li le li fel benunung gbe he anung Ujeso, ki yi faale ifung le u fel kpan li le he ingyo Unim. 10Nyọng li ma yi bendi-linaa Unim a, gbe he lihwu unwaama Ujeso Kristi a shi li li fel ikwun ha Unim. Gbe kanaa-anaa i li fel ikwun ha Unim a, Ujeso angwu u yi uwum u ba kpan li mbee akekel puu. 11Ashin kife-kife a ye. Li yal gọ he kuhwo ashi Unim a shi ke li gbe ha Ada Ujeso Kristi, angwu a shi li li fel ikwun ha Unim.
Lihwu gbe he Adam, likpan gbe ha Ukristi
12Nya ana kiban ki ngwee he igye gbe ha undi ken, kiban ki be le lihwu. Kitaa ana na lihwu li fel gwu bendi puu he kuhwo kiban.
13Ki nung ngwọng le kiban ki ma fel he igye ma ukpọng Unim u ha ke Umosis Iten. Ukpọ he kipi uten u yi ye, be bo kiban fa undi ye. 14Kpi kung le he kunyọng ahwu Adam a shi kiban kpam be wu he kunyọng Umosis na lihwu li keb li fel gwu bendi puu, ma besuso be yi le abwo he aban-ale uten Unim ipel ha Adam ye ọ. Adam u yi kitaa undi angwu Unim a ma kyeb le u ba baa.
15Be yi le atyetye. Adam a be le kiban, ukpọ Ujeso Kristi a be le inung Unim. Gbe Adam a shi kiban, lihwu li fel gwa bendi. Ukpọ inung Unim i dyam gbe-gyọng. Undi ken angwu u yi Ujeso Kristi na a be le inung Unim imen ana ke li kuke. 16Wo kung kuke Unim tie he kiban Adam ye, ushe ama-ale gbe he kiban undi ken a be le linim, ukpọ ma na bendi be shi biban gbam ọ, he kuhwo kuke Unim, be fel benunung he ashi ama. 17Gbe he kuhwo kiban undi ken, lihwu li gbe be he igye he kuhwo kiban undi umen ken ana. Ukpọ paa he ashi undi angwu ken ashi ana, Ujeso Kristi a shi ki dyam gbe-gyọng. Bendi puu abe be kpe kuke beshi Unim, Unim a shi abe be fel benunung he ashi ama, be ba kwa le likpan angi li ngyọ igye, be be kwu besu gbe ha ufe, Ujeso Kristi.
18Nya ana kiban undi ken ki be le linim be ke bendi puu, kitaa kimen na gbe he inung undi ken, bendi be hwaa le he linim, be fel le likpan kunyọng. 19Le gbe undi ken a kpo uteb Unim, bendi puu be fel bendi-biban. Kitaa kimen na le gbe undi angwu ken a ke Unim ife, a shi bendi gbam be fel benunung he ashi Unim.
20Unim a ke Uten le bendi be ngye le be yi bendi-biban a. He kipi biban bi go, beshi Unim be go ha kaang. 21Nya ana ikeb kiban i be le lihwu, kitaa imen i na beshi Unim be be le akwole kpa-kpa li kwu le likpan kunyọng angi li ngyọ igye kpam gbe ha Ada Ujeso Kristi.
Currently Selected:
Urom 5: KUIL
Highlight
Copy
Compare
Share
Want to have your highlights saved across all your devices? Sign up or sign in
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.