Urom 11
11
Agbang bendi Izwel abe be teng
1Mi mbee bii kibibi kisuso. Unim a nya zob bendi bema gbang-gbang a? Kpaa ye! Migyang ufe, mi yi undi Izwel a, mi be ubu le ha atya-tyan Ebraham a, mi shi kikwu-lihwan Ubenjamen a. 2Unim a zob bendi bema abe a ngye-e le ha linde-linde ye. Ma ngye ashi be fee he kushia Unim gbe le Elaija ye a, na a ma kii fe Unim gbe le bendi Izwel. 3A ma de Unim le, “Ada, bendi aben be gwu bitye-ugie kisọm kigang, be gyeb kimbe ashi be shang a. Mi ututeb na mi fel teng angwu mi fa-a, be tan kee mi le he be gwu.”#11:3 1 Besu 19:10, 14 4Unim a ma ha fan he le, “Mi ndyel bendi asi lisi kugbe lihwo le kadyọng ife le bendi asi lihwo abe be wa keb linung fe Unim Ubaal ye.”#11:4 1 Besu 19:18 5Kitaa kimen na ki yi kunyin i, ki gia teng le bendi Izwel zang abe Unim a gia kung gbe he inung le beshi bema. 6Gbe Unim a waa kung abe gbe he beshi bema le inung ima a, ashin ki ze le a waa abe gbe he ashi befe be shi a ye. U be waa abe gbe he ashi be shi a, hang inung ima imen i yi inung igyang a ye.
7Li ha de le ana a? Bendi Izwel be nde ashi be ma kee ye. Inwaa bendi zang bemen abe Unim a waa na be nde shi. Unim a shi abe be teng iteng be kwọm kutyung. 8Ki yi nya ana be fee he kushia Unim a le,
“Unim a shi abe be fel faale ugim le lityam.
A shi abe be fel na bendi abe be hwọ ashi,
be kwọm kutyung kpam be kunyin i.”#11:8 Iten lefee 29:3, 4
9Udebid ọ titi a kọng le,
“Unim u shi abe be mbu he bikpam-kpọ nyọng
be shi bipam, be mbu,
Unim u ke be kingie he ashi be shi.
10Atọng-shi a hwọ he be tem nde ye,
u so abe bengbeb abe be keb abe ugang
ngyọ igye kpam.”#11:10 Agyam 69:22, 23
Ibubu angi i tye gwaa
11Mi mbee bii le, ashin ki ze le bendi Izwel be mbu le he be tem bo ye a? Dia! Le gbe bendi Izwel be shi kiban, Unim a buu kukwo ke bendi abe be yi Ijuus a ye le be kwu le likpan kunyọng, he ki shi bendi Izwel be bung ashi. 12Ukpọ gbe kiban kibel ki be le kinunung ke bendi abe be teng he igye anyin, umbeb ubel u be le kinunung ke bendi abe be yi Ijuus a ye, nyọng bendi Izwel puu be be ke Unim ife, na Unim u be ke bendi kukwun ku go le kwọm!
13Men abe ma yi Ijuus a ye na mi ndu kọng ha amen i. Mi yi Unwaa-kisọm Ujeso Kristi angwu Unim a sọm le mi bun kisọm de men, aki anyin a yi-m he kukpo kaang. 14Pisoye mi sha bendi begi, Izwel, be fel bel ibel le he be fel le likpan kunyọng. 15Nyọng Unim a ma zob bendi Izwel, ashina ki ma shi kukwo ke bendi abe be teng puu he igye i be fel ikwun ha Unim. Na ki be kwu nyọng Unim u be tem kpe be le be fel bema a? Ki ba kwa ana bendi be hwo tem wum a. 16Gbe undi a te le uhwaa kiwọm le he ahe utia, ki yi del-del, ki shi tata ke Unim, ashin ki ze le ashi ki teng puu ọ ki yi ashi Unim a. Gbe idaa ukwan i yi angi Unim a, ha ibubu ọ i yi angi Unim a.
17Gbe be kpi tang ibubu isuso le he ukwan angwu be ko le Olif wu le hel, be be le ibubu kifee ukwan umen ana le he kiteng kisuso be tim gwaa ha le i fel zi le ha idaa, 18men ma fel nde kuhwo-men le ma yi he kukpo hwo ibubu angi ifufe ana ye. Gbe ma shi na, ma gim ashin, men na ma kwu idaa naa ye, idaa na i kwu amen naa. 19Pisoye ma da le be kpi tang ibubu imen ana wu le hel, le he be be le men tim gwaa ha a. 20Ki yi na kigyang. Be kpi tang ibubu imen ana angi i yi bendi Izwel, likọye be bọng ha Ujeso Kristi ye a. Men ufe, be tim amen gwaa ha ukwan likọye ma bọng ha Ujeso Kristi a. He ashin, ma kwu le idim ye, ma kwu le kushel hwan. 21Gbe Unim a tyang ibubu igyang angyel ye, u ha ndu tyang bifee ọ ye.
22Ashin ki tyung li na Unim a ngbeb inung, u shi ukaa-ukaa. U yi ukaa-ukaa ha bendi abe be tyang kukwo kuma, u ngbeb inung ha amen, gbe ma gye kushu ngyọ kwu he kukwo kuma. Ukpọ gbe na a ye, u kpya tang amen ọ titi. 23Bendi Izwel ọ titi, gbe be tyang abwo le kutyung akwọmale, tem bọng ha Ujeso Kristi, Unim u tem le be tim gwaa nya he ukwan he kipi be ma yi, likọye u yi le ikeb angi u shi na. 24Men abe ma yi Ijuus a ye, ma yi na ibubu bifee ukwan, li nde le Unim u yi le ikeb angi a tang amen le ha be tim gwaa he ukwan ugyang. He ashin li ngye dang le u yi le ikeb angi u tem le bendi Izwel abe be yi na ibubu ukwan Olif umen ana ugyang be tim gwaa ha kaa ye.
Izwel puu be ba fel le likpan
25Bebuye, mi kee le likọng likandi angi Unim a fem tyung he igye gboo nyin li nung amen ngwọng, teng ma ha gim le ma ngye mbee biwọm puu. Likọng angi ha li yi le bendi Izwel be kwọm kutyung ngyọ igye kpam a ye. Unim a waa abe be teb lityam le be kwọm kutyung kpam bendi abe be yi Ijuus a ye abe ki yi le be kwu le likpan, be gbe sho kugii. 26Kitaa i na bendi Izwel puu be be kwu le likpan nya ana be fee he kushia Unim le,
“Undi-likpan u ba ba le he Uzayọn,
u ba mbee le kibibi puu le ha ubu Ujekọb.
27Ashin na ki yi ukyeb angwu mi kọng ndọ le mi ba sha ka abe,
nyọng mi kung biban bibel.”#11:27 Azaya 59:20, 21
28Bendi Izwel be fel bendi-linaa Unim a, likọye be swan le be kpa kisọm kinunung ye. He ashina, men a be ma yi Ijuus a ye ma nde libwo fel le likpan. Ukpọ Unim a waa kung abe le be yi bema a, ki so-i nyin he le be he kuhwo ukyeb angwu a ke betiebel. 29Gbe Unim a waa kung bendi le be kwu bema, u ke be kukwun, u tem gie ugim uma ye. 30Le-iti men abe ma yi Ijuus a ye ma ma ka Unim ife ye, ukpọ kanaa-anaa i Unim a tyung beshi ha amen likọye bendi Izwel be ka he ife ye. 31Kitaa kimen na bendi Izwel be kpo uteb Unim le he Unim u be kwu le beshi ha abe he umbee-likel nya ana u yi le beshi ha amen kunyin i. 32Unim a ngib bendi puu fe, be fel na igaadye a he kutyung akwọmale kubel, le he u be tyung beshi bema ha abe puu.
Agyam ipee
33Inung Unim i dyam, u bilishi kaang, u ngye biwọm puu.
Ayang u nya ngye ashi Unim a fe he lityam?
Ayang u nya shob igba-akwo Unim?
34Ki yi nya ana be fee he kushia Unim a le,
“Ayang a ngye ugim Ada?
Ayang a nya kpe le u teb Unim?#11:34 Azaya 40:13
35Ayang a ke Unim
kiwọm fe-e lihwọ?”#11:35 Ujob 41:11
36Unim na a shi biwọm puu, ufe na u kam abi,
puu abi bi shi ke-e ufe a.
Ipee i kwu ke-e ngyọ igye kpam. Ki ngyọ na mi kọng.
Kushia Unim: Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Bible™, New Testament
Copyright © 1982, 2025 by Biblica, Inc.
Used with permission.
All rights reserved worldwide.