Umatiu 14
14
Be tang lishi Ujọn angwu u maa wu bendi umbwo
(Mak 6:14-29; Luk 9:7-9)
1Nya he kunyọng kumen ana na Uherọd Antipas angwu a ma yi usu Ugalili a ma gyo gbe le Ujeso. 2A kung de bendi bema le, Ujọn angwu u maa wu bendi umbwo na a tem wum le he lihwu. Kife na ki tan le shi u shi bikwole-kuhwo bimen kitaa i.
3Kitaa i na Ujọn a ma hwo. Uherọd a ma kpe kung Uherọdias angwu a ma yi ungye unwaa-nam Uherọd angwu be ko le Ufilip. 4Ujọn angwu u maa wu bendi umbwo a maa da Uherọd kpam le uten a bọng le u kpe kung Uherọdias ye. Uherọd a kọng, be kwu Ujọn be fe-e ashishi-likaa te le he le fe he igaadye. A shi ashin he kuhwo Uherọdias a. 5Uherọd a ma kee le u gwa Ujọn, ukpọ a maa shel na u gwu-e likọye bendi Ijuus be maa da le u yi utye-ugie kisọm Unim a.
6He liti ken Uherọd a shi kipam awel-ale liti lihwan lima. Unwaa Uherọdias a ma ngyọ angyọ he ashi begaa-ndi puu, ki nyin Uherọd he lityam. 7A ke-e ukyeb le u tyuu he kiwọm kiyang-yang ashi a kee. 8A le bii anam. Anam a teb he le u le de Uherọd le u tang lishi Ujọn angwu u maa wu bendi umbwo, fe he undọ tyuu he kanaa-anaa nyin. Unwaa umen ana a tem le de-e nya ana anam a kọng. 9Ki ma ban usu he lityam. Ukpọ le gbe a ke ukyeb he ashi begaa-ndi bema, a ke udaa le be le shi nya ana a kee. 10Uherọd a ma sọm, be le kwu Ujọn ha he igaadye tang lishi. 11Be be le lishi lima he uplaya be ke unwaa umen ana, a kpe ngi le ke anam. 12Bendi-utung Ujọn be be kung kikem kima le ngi, be ha le de Ujeso ashi ki shi.
Ujeso a ke bendi asi lisi kugbe lihwo lefee le asi lihwo lizi
(Mak 6:30-44; Luk 9:10-17; Jọn 6:1-14)
13Ujeso a gyo ashin, a kung gbe le he kiteng ashi a ma yi, le ngwee he kinọng lishọ gye he kiteng ashi undi u yi ye. Bendi be gyo gbe le shi, be gbe pwọm he he abee. 14Ujeso a kung fem le he afee kinọng be nde liwu bendi. Beshi be ma shi-e le be kaang. A ma mbee bendi-angbam abe be be ha.
15Nyọng likwu-lukwu li maa ndu gyeb, bendi-utung bema be be hwaa le he, de-e le, “Likwu-lukwu li gyeb ma. Bendi be nde nyin he kiteng ashin ye. Sọm bendi aben gye he ishaale he be le kee lizi ndyeb zi.”
16Ujeso a kung de be le, “Ki yi kpe-kpe le be gye ye. Men-agyang ma ke be ashi be zi.”
17Be kung de-e le, “Li kee-kee yi le bikem ibred bidyọng le ikwan ifee a.”
18Ufe a kung de be le, “Be le bi ke-m.” 19A kung de bendi bemen ana le, be bel kwu ko he bikpam. A kpe bikem ibred bidyọng le ikwan ifee ana kwu he abwo, a kung ashi gye he kusi lifung-atabe pee Unim. A kung ibred bun ibun-ibun ke bendi-utung bema, be kpe ke bendi abena. 20Puu ubel be ma zi gwul. Bendi-utung Ujeso be gbọng bigem abi be zi bi teng, bi sho bitetel lihwo le bi bifee. 21He liwu bendi abe be ma zi lizi ana, bekandi bengikye befe-befe be maa mbee asi lisi kugbe lihwo le kugbe kafee le bendi asi lihwo, fem bengingye le inwaa-bwan tyang.
Ujeso a tan he likwu umbwo
(Mak 6:45-52; Jọn 6:15-21)
22Ujeso a ha de bendi-utung bema le be le ngwee he afee kinọng lishọ ndu gye he igbindi umbwo angwel. A ha de bendi abe be teng le be ndu gye. 23Nyọng a de bendi abena be gbe ligye mbee, a mbo gye he kusi ukwel ututeb le kọng ha Unim. Likwu-lukwu li gyeb, Ujeso a ma yi ha he kusi ukwel ututeb. 24Kinọng ki ma tọ fel le kigbe le ha ugoigye. Ushob umbwo a maa bọng kinọng ki te sii ye, likọye kufem ku maa sha nda ashi hwaa le shi.
25Le ashi liti, Ujeso a tan he likwu umbwo le hwaa le be. 26Nyọng bendi-utung bema be ma nde-e u tan he likwu umbwo, be ma fel he kushel kaang. Be maa fel kung kya le “Uhwu-tang a.”
27Ujeso a kung de be nya kukwo-kukwo le, “Ma kwu lityam, mi a, ma shel ye.”
28Ipita a kung de-e le, “Ada, gbe ki yi awo a, de-m le mi tan he likwu umbwo be hwaa le wo.”
29Ujeso a kung de-e le, “Be.”
Ipita a fem le he afee kinọng tem abee he likwu umbwo, u la hwaa le Ujeso. 30Ukpọ nyọng Ipita a bel ashi nde kufem kukandi, a fel he kushel, a keb anim-ale gye he liten umbwo, u fel kya ko Ujeso le, “Ada, kpan mi.”
31Nya kukwo-kukwo, Ujeso a nda kubwo kwu-e, de-e le, “Wo fe lityam ha ami gbung ye. Ki shi na a, wo yi fel tyang ityang?”
32Nyọng be ngwee he afee kinọng kushu-kwan, kufem ku kwun. 33Bendi-utung Ujeso abe be ma yi ha afee kinọng, be fe Ujeso de-e le, “Wo yi Unwaa Unim a kigyang.”
34Nyọng be ma gyọng umbwo ukandi, be le shul he kipi ashi be ko le Ugenesaret. 35Nyọng bendi ugegem umen ana be shob Ujeso, Be sọm ko bendi-angbam abe be yi he abọng angi a yi ha kel-kel, be be le be hwaa le Ujeso. 36Be tim Ujeso anung le u tyang bendi-angbam be tyọ he kubwo he ungwu aliga ufe-ufe ọ. Bendi puu abe be ma tyọ he kubwo be ma mbee.
Currently Selected:
Umatiu 14: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
