Umatiu 15
15
Ashi ki shi undi u kwu utaa-utaa ye
(Mak 7:1-13)
1Bendi Iferesis le bitisha Iten be be le he Ujeruselem be hwaa le Ujeso. Be bii he le, 2“Ki shi na a, bendi-utung begang be ban itel angi betie-tyan be ke li? Be to abwo he kukwo ahwu ku yi kpa-kpa na itel ityan i yi ma ukpọng be ha zi lizi ye.”
3Ujeso a kung bii abe le, “Ki shi na a, men ma ban Iten Unim, ma shi Iten angi imen igyang? 4Unim a de le, ‘Fe atia le anaa,’#15:4 Ligye 20:12; Iten lefee 5:16 u mbee de le undi angwu a kọng ban atyam ọ, anam ọ, be gwu-e.#15:4 Ligye 21:17; Iten ashang-ale 20:9 5Ukpọ men ufe ma hwọ bendi le gbe undi u yi le kiwọm ashi hang a kung kpel atyam ọ, anam ọ, gbe a ko ashi le kuke Unim, 6ha ki tem yi le u ke atyam le anam ife ye. Ma bia igie Unim he kuhwo Iten imen. 7Men bendi bikpe-ashi abe ma yi ashi le benyin, lityam le bebọng, Azaya a ma tye ugie kigyang a gbe le men. A ma kọng le, Unim a de le,
8“ ‘Bendi aben be ka-m ife he ungwu, ufe-ufe a.
Ukpọ atyam abel a yi kigbe-kigbe le ha ami.
9Ife angi kitaa i i yi kididing a.
Be hwọ Iten angi bendi-gye a.’#15:9 Azaya 29:13 ”
10Ujeso a ha ko liwu bendi abe be yi ha be hwaa le kuhwo-ma, a kung de be le: “Ashi mi ndu de men i, ma dang kutyung gyo ashi he ki nung amen. 11Kiwọm ashi undi u kung fe he ungwu na ki shi-e u fel le umbe ye, ukpọ kiwọm ashi u kọng le he ungwu be he igye na ki shi-e u fel le umbe.”
12Bendi-utung bema be ha be hwaa le he, bii he le, “Wo yi nya ngye le bendi Iferesis be yi fel he ingyo he kunyọng ahwu wo yi kọng igie angina bee?”
13A kung ityang bun le, “Kikwukwan kiyang-yang ashi Atyagi angwu he lifung-atabe na a kwan ye, be wob ashi le idaa le idaa tyang le hel.” 14A ha de bendi-utung bema le, “Ma tyang abe; be yi bihwọ-ashi abi bi teng bendabel bihwọ-ashi a. Gbe uhwọ-ashi u teng undema uhwọ-ashi befe puu befee be mbwa fa he kubel.”
15Ipita a de le, “De li ashi ityang anyin i ze.”
16Ujeso a kung bii abe le, “Men ọ titi ki wa nung amen ye a? 17Ma ngye le gbe undi a kung kiwọm fe he ungwu, u za ashi fa he lifung, u ngya ashi fa he libel abung, ki mbee he le he inyia-hwo ye a? 18Biwọm abi undi u kọng le he ungwu uma be he igye bi ba le he ahe lityam a. Bife na bi shi undi-gye u fel le umbe. 19Igim ibibi angi i be le he lityam undi-gye na i shi-e u gwu undi, u shi kiban agbele ipel, u wul na bitwole bi wul, u zi kazi, u be uman, u kọng ban bendi. 20Biwọm abin na bi shi undi u fel le umbe. Lizi azele faale abwo ato-ale he kukwo ahwu uten a kọng na ki shi undi-gye u fel le umbe ye.”
Abọng-ale ungingye Ukenan
(Mak 7:24-30)
21Ujeso a ha bo le he kipi a ma yi ana, gye he kiteng ashi ki ma yi gwaa ha ashi angi be ko le Utaya befe le Usaidọn. 22Ungingye angwu a maa be le he Ukenan, angwu a ma yi ha he Udada umen ana, a be hwaa le Ujeso, kii fe-e le, “Ada, wo igia Udebid, beshi be sha-a le mi. Nde unwa-agi ungingye, ikeb ibibi i kwu-e betye-betye.”
23Ujeso a ma wa fan he kiwọm ye, bendi-utung bema be be de-e le, “Ndo ungingye angwun gbe le hen, u fem li kushun gba gyọng.”
24Ujeso a kung fan ungingye umen ana le, “Mi kee-kee be ke bendi Izwel abe be yi na itia angi i nim a.”
25Ungingye umen ana a be tim anung he kushu Ujeso, de-e le, “Ada, kpel mi.”
26Ujeso a ha mbee fan he le, “Ki ngbeb le be kung lizi inwaa-bwan ke ibwọ ye.”
27Angwu ungingye ana a kung fan he le, “Ada, ki yi na. Ukpọ ibwọ ọ i za atan angi betya-bel be taa wu he itang.”
28Ujeso a kung de-e le, “Wo ungingye umen i, abọng-ale agang a dyam, mi hwọ igben angi wo kee.” Unwaa ungingye umen ana a ma mbee nya he kunyọng kumen ana.
Ujeso a ke bendi asi lisi kugbe lihwo lizi
29Ujeso a gbe le he kiteng ashina le gbe gwaa ha ungwu umbwo Ugalili. A mbo gye he kigugo le bel kwu ko. 30Bendi gbam be be le bendi abe be hwo abee le abe be hwọ ashi le abe be kwọm umbel le abe be mbu bitaa angbam atyetye-atyetye be hwaa le he. A ma mbee abe puu. 31Ki ma kwu bendi he kuhwo na bendi abe be kwọm umbel be fel kọng, abe be hwo abee be fel tan, abe be hwọ ashi be fel nde. Be pee Unim bendi Izwel.
32Ujeso a ha ko bendi-utung bema be he kiteng ken, u de be le, “Beshi be shi-m le bendi aben kaang likọye kunyin ki fel ati akie na be kwu utung ha ami, be tem yi le ashi be zi ye. Nya ana itung i ndo abe i, mi kee le mi da abe le be ndu gye he ishu ibel faale afa-ale mi ke be lizi ye, teng itung i la tyan abe tyang he kukwo.”
33Bendi-utung bema be bii he le, “He kung nyin undi u ha nde lizi hen ugbaa-libeb angi li kpe ke kigegang bendi aben?”
34Ujeso a kung bii abe le be yi le bikem ibred ha bifung?
Be fan he le, be yi le bikem ibred bidyọng-ifee le inwaa ikwan zang.
35Ujeso a ha de liwu bendi bemen ana le be kwu ko he itang. 36A ha kpe bikem ibred idyọng-ifee le ikwan kwu he ahe kubwo, u pee Unim. A kung abi bun ibun-ibun ke bendi-utung bema. Befe be ha kpe abi le ke bendi abena puu. 37Befe puu be ma zi gwul. Bendi-utung bema be gbọng bigem abi be zi bi teng, bi ma sho bitetel bidyọng-ifee. 38He liwu bendi abe be ma zi lizi ana, bekandi bengikye befe-befe be ma yi asi lisi kugbe lihwo, fem bengingye le inwaa-bwan tyang. 39Ujeso a ha de bendi abena le be ndu gye. Ufe-gyang a bo le ngwee he afee kinọng lishọ ndo he kigie kubọng Umagadan.
Currently Selected:
Umatiu 15: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
