Umatiu 13
13
Ityang gbe le undi angwu u kwan bikwukwan
(Mak 4:1-9; Luk 8:4-8)
1Nya he liti limen ana Ujeso a bo le he ushọm angwu a ma yi kwu gye he ungwu kidyeshọ, bel kwu ko he u hwọ bendi biwọm. 2Bendi gbam be ma sho kel-kel fe-e. He ashina a bo le ngwee he kinọng lishọ, bel kwu ha, bendi be sho he ugoigye. 3A hwọ abe biwọm gbam gbe he ityang. A de be le, “Undi-utia a ma gye itọng bikwukwan ima awee-ale. 4Nya ana a maa wee itọng bikwukwan he utia, itọng isuso i mbu wu he ubi-kukwo, linyun li be kpi angi mbel. 5Isuso i mbu pwọm he likwu utie-ukọ he kipi itang i ma yi gbung ye, itọng i mbi akikye, likọye itang i ma go ye. 6Ukpọ nyọng ishu i ma be, i bi gwu bikwukwan bimen ana, likọye bi ma yi le idaa ye. 7Itọng isuso i mbu wu he kipi ítọng i yi. Nyọng ítọng i mbi, i mbel nim angi. 8Itọng isuso i mbu wu he itang inunung. I mbi, i kaa shi itọng. Aten asuso a shi itọng asi adyọng, asuso itọng asi akie, asuso itọng lisi le ngi lihwo go hwo angi be ma kwan.” 9Ujeso a ha kung de be le, “Angwu u yi le atyung kigyo, u gyo.”
10Bendi-utung Ujeso be be hwaa le he, be bii he le, “Ki shi na a, wo kọng ha bendi abena he ityang a?”
11Ujeso a kung fan abe le, “Men na Unim a tyung amen kundyel gbe le kiteng kusu lifung-atabe. A tyung abe befe a ye. 12Undi angwu u yi le kiwọm, u mbee kwa le shi ki go. Ukpọ undi angwu u yi le shi ye, ake u yi le ke zang ọ, be ba pan kpa kung he ake. 13Atan-lengi angwu mi bun gbe he ityang a u yi le,
“Ma na be yi ashi pee ọ, be nda ye.
Ma na be kwom atyung ye ọ, be gyo ọ nyọng ki nung abe ọ ye.
14He abe na ki fe sho ugie angwu Azaya a ma tye. A ma fee le Unim a de le,
“ ‘Bendi aben be ba gyo agyo-ale, ukpọ ki nung abe ye.
Be ba nda, ukpọ be ngya ashi be nde ye,
15likọye be teb atyam,
be kwọm atyung abel,
be mbee shib ashi abel,
teng be nda le ashi abel,
be gyo,
be nde shob,
be bel hwaa le mi, mi mbee abe.’ ”#13:15 Azaya 6:9, 10
16Ujeso a mbee de le, “Ikwun i kwu ke itọng-shi imen le gbe ma nda, i mbee kwu ke atyung amen le gbe ma gyo. 17Kigyang-kigyang mi de men le, bitye-ugie kisọm Unim gbam le bendi Unim besuso be ma kee le hang be nde abi ma nde i, be mbee gyo abi ma gyo i, ukpọ be ma nda ọ, nyọng be gyo ọ ye.”
18“Ma dang kutyung he men ma gyo ashi ityang angi gbe le itọng bikwukwan anyin i ze. 19Itọng angi i mbu wu he ubi-kukwo i yi na bendi abe be gyo kisọm ashi gbe le kiteng kusu Unim, ki nung abe ye, usu bibibi, u ba kpa kung kisọm kigyang le ha abe atyam. 20Itọng angi i mbu wu he utie-ukọ i yi na bendi abe be gyo kisọm Unim be kpe shi le igọ, 21ukpọ ki ngwee ha abe atyam ye likọye be yi faale idaa. Be bọng ha Unim he kanwaa kunyọng zang. Gbe be kpe kingie likọye be bọng ha kisọm kimen i, be wee abwo nya kukwo-kukwo. 22Angi i mbu wu he kipi ítọng i yi, i yi na bendi abe be gyo kisọm gyo-gyo, ufung awa-ale angwu gbe le biwọm abi he igye anyin le benyin bingbeb bi gwu kisọm ashi be gyo, be tem shi ashi ye. 23Itọng angi i mbu wu he itang inunung i yi na bendi abe be gyo kisọm, ki nung abe. Be ba le lifem li kwa na aten angi a shi itọng asi adyọng, asuso itọng asi akie, asuso lisi le ngi lihwo go hwo na angi be ma kwan.”
Ityang gbe le abia
24Ujeso a bun ityang isuso de be le, “Kiteng kusu lifung-atabe ki yi na undi angwu a wee itọng bikwukwan inunung he utia uma. 25He liti ken le kusu he kunyọng ahwu bendi puu be yi he kunde, undi-linaa uma a be wu ikwu abia ha he utia iwit gbe le ha. 26Bikwukwan abi binunung bi mbi kaa kpe, bi shi azam, keb ahwan-ale; abia ọ a hwan.
27“Bendi aki ungikye umen ana be be de-e le, ‘Ukandi, nde le wo ma kwan itọng bikwukwan binunung bife-bife a ha awo utia? Abia a fe a ha be le kung a?’
28“Ugyang utia a kung fan abe le, ‘Undi-linaa na a shi kimen i.’
“Bendi aki be kung bii he le, ‘Wo kee le li le gbel abia angi ha a?’
29“ ‘Dia,’ a ma fan abe ‘likọye gbe ma gbel abia, ma waa le iwit ọ. 30Ma tyang abi bi kaa utung-utung kpam nyọng liti angi be tam. Mi ba da bendi abe be tam le be nam abia ha kushu, gbọng angi bwọ abwọ-abwọ ting-shi kinde. Be ha tam iwit angi inunung fe-m he abel.’ ”
Ityang gbe le utọng Umustad le Iyist
(Mak 4:30-32; Luk 13:18-19)
31Ujeso a bun ityang isuso de be le, “Kiteng kusu lifung-atabe ki yi na utọng angwu be ko he igie Beke le umọstad, angwu a zen hwo itọng puu. Undi u kung he kwan he ahe utia. 32Ma na ufe na u yi utọng bikwukwan angwu a zen hwo puu ọ, u mbia, kaa dyam hwa bikwukwan puu. U fel ukwan, linyun li be so he ibubu ima.”
33Ujeso a mbee bun ityang de be le, “Kiteng kusu lifung-atabe ki yi na iyist angi i shi ibred i mbwee na a. Ungingye u kung angi bel pel ha itasa ifel-awa ikie he kikpetie, i gboo kpe mbee angi puu.”
34Ujeso a ma bun biwọm abin puu da bendi gbam gba he ityang a. A maa da abe kiwọm faale ityang ye. 35A ma shi nya ana utye-ugie kisọm Unim a kọng le-iti a. A ma kọng le,
“Mi ba kọng ha abe gba he ityang.
Mi ba da abe biwọm abi bi yi he kundyel
kung le ha he kunyọng ahwu Unim a shi igye.”#13:35 Agyam 78:2
Ujeso a kọng ashi ityang angi gbe le abia i ze
36Ujeso a ha gbe le ha he liwu bendi le ngwee he afee ushọm. Bendi-utung bema be kung be hwaa le he de-e le, “De li ashi ityang angi gbe le abia angi he utia i ze.”
37Ujeso a kung fan abe le, “Undi angwu a wu itọng inunung u yi Unwaa undi-gye a, 38utia u shi igye anyin, itọng inunung i shi bendi abe be yi ke kiteng kusu lifung-atabe, abia a yi bendi abe be yi ke usu bibibi, 39undi-linaa angwu a kwan abia u shi Usu bibibi. Kunyọng ahwu be tam ku shi umbee-likel liti igye anyin, bendi abe be be tam be shi idengel Unim.
40“Nya ana be maa gbọng abia ting-shi kinde, kitaa kimen na ki be kwu he umbee-likel liti igye anyin. 41Mi Unwaa Undi-gye, mi ba sọm idengel igi i la gbọng bendi puu, le he kiteng kusu kigi abe be maa shi bendi be shi biban, le bendi bebibi abe be teng puu, 42la fa he kinde kikandi he kipi be be kwu kii, be kem ishang le kimbwee kaang. 43Bendi Unim befe be ba taa na libwee he kiteng kusu lifung-atabe Atyabel Unim. Undi uyang-yang angwu u yi le atyung kigyo, u gyo.”
Ityang gbe le kingbeb kundyel le ukpana
44“Kiteng kusu lifung-atabe ki mbee yi na kiwọm ashi ki kaa kate ashi ki yi ndyel he kupung. Gbe undi a gia ashi, u tyang ashi ndyel ha. U gbe le ha le igọ le kung biwọm bima puu abi u yi le bi ndyeb zi, u tem le ndyeb kung kupung kumen ana.”
45“Kiteng kusu lifung-atabe ki mbee yi na undi-ushi u shun kiwọm kinunung ashi ki yi na kukpana. 46Gbe a le nde shi ki kaa kate, u tem le kung biwọm abi u yi le bi ndyeb zi le ndyeb kiwọm kimen ana.”
Ityang gbe le Kataa
47“Kiteng kusu lifung-atabe ki mbee yi na kataa ake be tyang gye he umbwo, ka le kwu bitaa ikwan atyetye-atyetye. 48Gbe kataa ka sho, bendi abe be kwu ikwan be su le ke gye he ugoigye le bel kwu ko taa angi. Be kung ikwan angi inunung fe he bigbọ bibel, be kung bizizi le inọng lishọ wu le hel. 49Kitaa kimen na ki be kwu he umbee-likel liti igye anyin. Idengel Unim i ba la taa bendi bebibi le ha abe benunung, 50ta le abe bebibi la tya he kinde kikandi. Bendi bemen i be ba kya ha, kem ishang le kimbwee kaang.”
51Ujeso a kung bii abe le, “Biwọm abin bi nung amen a?” Be bọng.
52Ujeso a kung de be le, “Ashin ki ze le gbe undi uyang-yang angwu u hwọ bendi Iten, a bel undi-utung kiteng kusu lifung-atabe u kwa nya ana ugyang usha-ale angwu u gye he kipi ashi a ndọ biwọm le kung biwọm bifufe le abi bitim be he igye a.”
Utye-ugie kisọm Unim angwu be ke-e ife ye
(Mak 6:1-6; Luk 4:16-30)
53Nyọng Ujeso a bun ityang anyin puu, a ha gbe le ha he kiteng kimen ana, 54gye he kubọng kuma. Nya ana a ma yi ha, a ma hwọ bendi he ushọm ubel angwu be kwu liwu. Bendi abe be gyo he, ki kwu abe he kuhwo. Be fel bii le, “A ha be le lishi-abyele anyin, le ikeb angi u shi bikwole-kuhwo abin le kung a?” 55Be mbee bii le, “U yi unwaa ukapenta a ye a? Umeri na u yi anam ye a? Ujems le Ujosef le Usaimọn le Ujudas na be yi bebwaa-nde ye a? 56Bebwaa-nde abe bengingye na li yi le bende i puu ye a? A be le bimen i le kung a?”
57Be fel tel he. Ujeso a kung de be le, “Bendi be ka utye-ugie kisọm Unim ife mbee bipi puu, ukpọ bendi abe he kubọng kuma le kikwu-lihwan kima be ka he ife ye.”
58A shi bikwole-kuhwo gbam he ahe kubọng ye, likọye be ma fe lityam he ahe ye.
Currently Selected:
Umatiu 13: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
