Uluk 8
8
Ityang gbe le undi angwu u wu itọng bikwukwan
(Mat 13:1-9; Mak 4:1-9)
1Nyọng ashina ki mbee, Ujeso a ma gye mbee bipi bun kisọm kinunung gbe le kiteng kusu Unim. Bendi-utung bema puu lihwo le be befee be maa tan utung he ahe. 2Bengingye abe a ma mbee abe angbam le abe a ma ndo ikeb ibibi le ha abe be ma yi utung he ahe gye ha. Bengingye aben na be ma te utung he ahe: Umeri Magdalen angwu Ujeso a ma ndo ikeb ibibi idyọng-ifee le he ahe, 3le Ujoana angwu ukye-ma, Ukuza, a ma yi ukandi he ushọm Uherọd le Usuzana le bengingye besuso gbam abe befe-gyang le kuhwobel be ma fọ igben Ujeso le angi bendi-utung bema.
4Bendi be be mbee bipi le be ba hwaa le Ujeso. He kunyọng ahwu be ma gbọng liwu, Ujeso a bun ityang de be le, 5“Ungikye ken a ma gye itọng bikwukwan awole. Nya ana a maa wu itọng bikwukwan he utia, isuso i mbu wu he ubi-kukwo. Bendi be gbe tem angi abee. Linyun li be kpi angi mbel. 6Isuso i mbu pwọm he kukọ he kipi itang i yi gbung ye. He kunyọng ahwu i mbi, i hwo likọye umbwo u hwa yi ha he itang ye. 7Isuso i mbu wu he liwu ítọng. I mbi utung ha ítọng. Ítọng i mbel nim angi. 8Isuso i mbu wu he itang inunung. I mbi, i kaa shi itọng kugbe kadyọng hwo kitaa be ma kwan.”
Ujeso a ha kung kọng fem he igye le “angwu u yi le atyung kigyo, u gyo.”
9Bendi-utung Ujeso be bii he ashi ityang anyin i ze. 10Ujeso a de be le: “Men na Unim a tyung amen kundyel gbe le kiteng kusu kima. Mi bun biwọm da bendi abe be teng he igye anyin gba he ityang he be be nde,
“ ‘Ma na be yi ashi pee ọ, be nda ye. Ma na be kwom atyung ye ọ, be gyo ọ nyọng ki nung abe ọ ye.’#8:10 Azaya 6:9, 10
Likpe ityang angi gbe le itọng bikwukwan awole
(Mat 13:18-23; Mak 4:13-20)
11“Ashin na ki yi likpe ityang anyin. Itọng i yi na igie Unim. 12Itọng angi i mbu wu he ubi-kukwo i yi na bendi abe be gyo igie Unim gyo-gyo, usu bibibi u be kpe kung angi le ha abe atyam he be bọng ye, teng be kwa le likpan kunyọng. 13Itọng angi i mbu pwọm he kukọ i yi na bendi abe be gyo igie Unim kpe ngi le igọ. Ukpọ i ngwee ha abe atyam ye likọye be yi faale idaa. Be bọng he kanwaa kunyọng zang a. Gbe ugil-ale a be, be tyang abọng-ale. 14Itọng angi i mbu wu he liwu ítọng, i yi na bendi abe be gyo igie Unim, ukpọ ufung awa-ale mbee kunyọng gbe le biwọm igye anyin, le bingbeb, le benyin igye anyin bi tim gwu angi ma ukpọng i ha kaa kpe, nya ana kikwukwan ashi agbe ama a bi ye. 15Itọng angi i mbu wu he itang inunung i yi na bendi abe be gyo igie Unim kwu angi fe he lityam linunung angi li ke ife kaa kpe nya ana kikwukwan ashi ki wum agbe.”
Ujeso a bun ityang gbe le kimọ-kinde
(Mak 4:21-25)
16Ujeso a mbee kọng le, “Undi u ha ndu gba kimọ-kinde kung kigbọ sha ashi ọ, nyọng u kung le ndọ he liten ibee-dye ọ ye. U kung ashi la ndọ he kusi he kudyan ushọm he bendi abe be be ha afee he be nde a. 17Kiwọm kiyang-yang ashi ki yi he kundyel, be ba ba le shi he kugboo he bendi be nde shi, be gyo ashi. 18Ma baa kuhwo-men na ma gyo kigyo, likọye undi angwu u yi le kiwọm, Unim u mbee ba ka he fa pel, ukpọ undi angwu u yi le kiwọm ye, ake a gim le u yi le ke ọ, Unim u ba kpa kung he ake.”
Anam Ujeso le bebwaa-nde
(Mat 12:46-50; Mak 3:31-35)
19Bebwaa-nam Ujeso le anam be be le be ba hwaa le he, ukpọ bendi be sho gbe abe be nde kukwo gbe le hwaa le he. 20Undi ususo a de Ujeso le, “Anaa le bebwaa-naa be yi naa he igye be kee a.”
21Ujeso a kung de be befe puu le, “Bendi abe be gyo igie Unim, be ke angi ife na be yi andagi le bebwaa-ndagi.”
Ujeso a kwun kufem
(Mat 8:23-27; Mak 4:35-41)
22He liti ken Ujeso befe le bendi-utung bema be le ngwee kinọng lishọ. A de be le, “Ma li gye he igbindi kidyeshọ ashel.” Be bo. 23Nya ana be maa nde ashi gye, Ujeso a le nde gbam gbe he kunde. Kufem ku keb apu-ale. Umbwo a ma fel tab fa he kinọng. Puu ubel be ma fel he be-gyọng bebibi.
24Bendi-utung Ujeso be le wum he de-e le, “Ukandi, ukandi, li nim inim dii!”
Ujeso a kung bo kinaa kọng ha kufem le umbwo le bi kwun atyung. Bi kung kwun atyung shang. 25Ujeso a bii bendi-utung bema le, “He kung abọng-ale amen a yi?”
Ki ma kwu abe he kuhwo, be fel shel. Be bii bende le: “Kibang kitaa undi ashi u yi? U kọng ha kufem le umbwo, bi ka he ife.”
Ujeso a mbee ungikye angwu ikeb ibibi i ma yi he ahe
(Mat 8:28-34; Mak 5:1-20)
26Ujeso befe le bendi-utung bema be gyọng gye he igbindi umbwo Ugalili he kipi bendi Ugerasene be nde. 27Ujeso a fem le he kinọng fem-fem kpee ha ungikye angwu a ma be le he lifung-ushu, ikeb ibibi i ma yi he ahe. Ungikye umen i a maa sha bigbọ ki gbe kigbe, u nde he ushu ye. A maa nda he kipi akwun a yi a kpam. 28A nde Ujeso, a kung kung kaang, u tim anung he itang kọng igie ikaa-ikaa le, “Ujeso, Unwaa Unim angwu a dyam, wo la sha-m na a? Mi tim-a anung le wo ke-m kingie ye.” 29(Ungikye ana a ma kọng ashin le gbe Ujeso a ma de ikeb ibibi le i fem le he ahe a.) Ikeb ibibi ana i maa kwa he mbee kunyọng. Ma na be ma fee lifung he abee le ashishi-likaa he abwo he be kang he ọ, a ma shwa tang angi. Ikeb ibibi ana i sha he u geb tya he ugbaa-libeb.
30Ujeso a bii he le “be ko-a le ana?”
A fan Ujeso le be ko he le kugii likọye ikeb ibibi gbam i yi he ahe. 31I tim Ujeso anung le, u ndo angi gye he libel angi li faale likel a ye.
32Ikamgbo gbam i ma yi ha he kigugo kpee-kpee, i tan za. Ikeb ibibi ana i tim Ujeso anung le u tyang angi i le ngwee ikamgbo angina, a bọng. 33Ikeb ibibi angina i fem le ha ungikye angwuna le ngwee ikamgbo. Ikamgbo ana i buu gbe le mbu hwo fe he kidyeshọ.
34Bendi abe be maa kang ikamgbo be nde ashi ki shi, be buu gye he lifung-ushu le itia le bun gbe le shi de bendi. 35Bendi be gye ha le be la nda ashi ki shi. Be be hwaa le Ujeso, be nde ungikye umen angwu ikeb ibibi i ma fem le he ahe ana u yi kwu gwaa ha Ujeso. A ma fel fe inditen, ki nung he ngwọng. Puu ubel be ma fel he kushel. 36Bendi abe be ma yi ha nde ashi ki shi be ma bun de bendebel na ungikye angwu a ma sho le ikeb ibibi ana a mbee. 37Le gbe befe puu he kigie Ugerasene be maa shel kaang, be de Ujeso le u gbe le ha. Ujeso a le ngwee he kinọng lishọ gbe ligye.
38Ungikye angwu ikeb ibibi i ma fem le he ahe ana a tim Ujeso anung le u tyang he u gye utung he ahe. Ujeso a swan, u de-e le, 39“Tem gye he usha-ale le de bendi ashi Unim a shi ka-a.” Ungikye angwuna a bo le tan mbee lishi angina puu bun de bendi ashi Ujeso a shi ke-e.
Ujeso a wum unwa-ani ungingye, u mbee ungingye lingbam
(Mat 9:18-26; Mak 5:21-43)
40Nyọng Ujeso a le wu he igbindi umbwo angwel, bendi be ma kpe-e igọ-igọ, likọye be ma yi kwu be nyọng he inyọng. 41Ungikye angwu be ko le Ujairus a be le hel. A ma yi ukandi a he ushọm Unim angwu Ijuus i kwu liwu. A be tim anung he itang tim Ujeso anung le u gye he ahe usha-ale, 42likọye unwaama ungingye angwu u yi-e a ken u la hwa. Unwaa umen i u yi aze lihwo le ngi afee.
Nya ana Ujeso a gbe u gye ha, bendi be maa kin kukwo tya nyii he indihen-indihen. 43Ungingye ususo a ma yi ha he liwu angwu a ma wu anung kpam le wu aze lihwo le ngi afee. A ban unde uma puu ke bendi-usi, ukpọ undi ken ọ, usi uma a ma nyin he ye. 44Ungingye ana a tan tel Ujeso ha he liwu bendi. A kung kubwo tyọ he he ungwu aliga. Anung ama a tang nya kukwo-kukwo.
45Ujeso a kung bii le, “Ayang a tyọ mi kubwo?”
Undi-undi a de le ufe a ye. Ipita a kung de-e le, “Ukandi, bendi be sho fa-a kel-kel, be yi nyii a.”
46Ujeso a kung de le, “Undi a tyọ mi kubwo, likọye mi ngye le ikeb i gbe le ha ami.”
47Ungingye umen ana a nde le a tem ndyel ashi mbee ye, u fel tung fọfọ. A be tim anung he itang he kushu Ujeso. He ashi bendi puu, a de Ujeso atan-lengi angwu a tyọ he kubwo le kitaa ashi a mbee nya kukwo-kukwo. 48Ujeso a kung de-e le, “Unwa-agi, abọng-ale agang a sha-a wo mbee. Gye le kukwun.”
49Nya ana Ujeso a maa so-i kọng ashin, undi a be le he ushu ukandi ushọm Unim angwu Ijuus i kwu liwu be de ukandi umen ana le unwaama a hwo. U tem fem Ada kushun ye.
50Ujeso a gyo ashi be kọng, a de Ujairus le u shi shel ye. U kee-kee fe lityam he ahe, ma unwaama u mbee.
51Be le wu ha he usha-ale ukandi umen i, Ujeso a bọng le bendi be te utung he ahe he afee ushọm yam-yam ye, a kee-kee bọng le Ipita le Ujọn le Ujems le atyam unwaa le anam na be te. 52Bendi puu abe be ma yi ha be maa kya kung agelibe. Ujeso a de be le be shi kii ye. Unwaa angwun a hwo ihwo ye, a mbu kunde a.
53Befe puu be maa fel gwee he likọye be ngye dang le a hwo ihwo. 54Ujeso a gye le be he afee, a kung kubwo kwu-e he kubwo de-e le, “Unwaa-gi, bo kinaa.” 55Unwaa ana a tem wum, nya kukwo-kukwo a bo kinaa. Ujeso a de be le be ke unwaa umen ana lizi he u zi. 56Ki ma kwu atyam le anam he kuhwo kaang, ukpọ Ujeso a de be le be de undi ashi ki shi ye.
Currently Selected:
Uluk 8: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
