Uluk 9
9
Ujeso a sọm bendi-utung bema lihwo le be befee gye he igye
(Mat 10:5-15; Mak 6:7-13)
1Ujeso a ko bendi-utung bema abe lihwo le be befee be he kiteng ken. U ke be ikeb le be ndo ikeb ibibi le ha bendi, be mbee bendi-angbam. 2A ha sọm abe le be le tan bun de bendi gbe le kiteng kusu Unim. Be mbee bendi le he angbam. 3Ujeso a de be le, “Ma kwu kiwọm gye ha ye. Ma kung utyuu ọ, nyọng ma faa ibam ọ, nyọng lizi ọ, nyọng unde ọ ye. Ma te le aliga afee ye. 4He kiteng kiyang-yang ashi ma gye, ma kwu he ushu undi angwu a kpe men kpam ma gbe-gbe le ha he lishi limen ana. 5He kiteng kiyang-yang ashi ma te bendi be kpe men ye, ma gbe le ha he lishi limen ana shel kumbul-mbul le ha amen abee wu he itang he ki tyung abe kibibi ashi be shi.” 6Be bo le tan he lishi liyang-yang bun kisọm kinunung gbe le Ujeso, be mbee bendi.
7Nyọng Uherọd, usu Ugalili, a gyo gbe le biwọm puu abi bi ma shi, a maa fel tyang gba le bi, likọye bendi besuso be ma de le Ujọn angwu u wu bendi umbwo a tem wum le he lihwu. 8Besuso be de le Elaija na a tem be. Besuso be de le utye-ugie kisọm Unim na a tem wum le he lihwu. 9Uherọd a kung kọng he ahe lityam le, “Mi ma kọng, be gwu Ujọn tang lishi. Ayang u ha yi ungikye angwu mi gyo gbe le he i?” U fel kee kukwo ahwu u nde Ujeso.
Ujeso a ke bendi asi lisi kugbe lihwo lefee le bendi asi lihwo lizi
(Mat 14:13-21; Mak 6:30-44; Jọn 6:1-14)
10Bebwaa-kisọm Ujeso abe a ma sọm gye he igye be tem be de-e biwọm puu abi be shi. A kpe be gye le be he kipi ashi ki yi gwaa he lishi angi be ko le Ubesaida, befe-befe be le kwu ha. 11Nyọng bendi be gyo ashin, be tye kwuo pwọm he. A kpe be, u bun de be le Unim u ndu fem kusu kuma he igye. U mbee abe be ma yi gogo ye.
12Nyọng libwee li maa ndu ngwee, bendi-utung bema abe lihwo le be befee be be hwaa le he de-e le u de bendi aben le be ndu gye he ishaale le itia angi i yi kpee-kpee he be kee lizi le kiteng ashi be nde, likọye bendi a nde he kiteng ashina ye.
13Ujeso a kung de be le, “Men-agyang ma ke be ashi be zi.”
Be de-e le, “Li kee-kee yi le bikem ibred bidyọng le ikwan ifee a. Wo kee le li le ndyeb lizi be ke kigegang liwu bendi aben a?” 14(Bengikye befe-befe be maa mbee asi lisi kugbe lihwo le kugbe kafee le bendi asi lihwo.) Ujeso a de bendi-utung bema le be de bendi abena be be kwu ko he akwu-akwu. Likwu-lukwu li kwu bendi asi afee le be lihwo. 15Be kpe be kwu ko he akwu-akwu. 16Ujeso a kung bikem ibred bidyọng le ikwan ifee ana kwu he kubwo, nde ashi gye he lifung-atabe, u pee Unim. A kung angi bun ibun-ibun ke bendi-utung bema le be kpe ke bendi. 17Befe puu be ma zi gwul. Bendi-utung Ujeso be kung gbọng bigem abi be zi bi teng. Bi sho bitetel lihwo le bi bifee.
Ipita a ko Ujeso le Ukristi
(Mat 16:13-19; Mak 8:27-29)
18He liti ken Ujeso a maa kọng ha Unim ututeb. Bendi-utung bema be be hwaa le he. A ha kung bii abe le: “Bendi be kọng le mi yi ayang a?”
19Be fan he le, “Bendi besuso be de le wo yi Ujọn angwu a maa wu bendi umbwo a, besuso be de le wo yi Elaija a, besuso be de le utye-ugie kisọm Unim na a tem wum le he lihwu.”
20A kung bii abe le, “Men ufe ma ha gim le mi yi ayang a?”
Ipita a fan le, “Wo o yi Ukristi a.” (Ukristi na Unim a kyeb le u ba sọm ba he igye anyin le u kwu Undi-likpan.)
Ujeso a kọng gbe le lihwu lima
(Mat 16:20-28; Mak 8:30–9:1)
21Ujeso a tye be uten le be de undi ashi ye. 22A mbee de be le, “Ki yi kpe-kpe le mi Unwaa undi-gye, mi be kpe kingie kaang, bekandi kubọng le abe be shang Unim le bitisha Iten be be zob mi. Be ba gwa-m, ukpọ mi ba tem wum le he lihwu he liti angi lekie.”
23A ha kung de be puu le, “Undi uyang-yang angwu a kee le u pwọm mi u zob kuhwo-ma. U bọng lihwu kung kikpakpa kima ashi be be maa he bee so pwọm mi mbee ati. 24Undi angwu a kee le u kpan lishi lima, ha a nim le kuhwo-ma, undi angwu a bọng lihwu he kuhwo ahwu kugi na u be kwu le likpan. 25Kibang lifem angi li yi ke undi-gye le u kwu le biwọm puu he igye anyin, ukpọ u nim kunyọng kuma? 26Undi angwu ishwia i shi-e le mi le igie igi na ishwia i be shi-m mi Unwaa Undi-gye le he he kunyọng ahwu mi be be le ifem ityan, mi le Atyagi le angi idengel ima.
27“Kigyang-kigyang mi de men le, men besuso abe ma naa i ma ba hwa ye kpam ma gbe nde kiteng kusu Unim.”
Ujeso a gie he ashi bendi-utung bema
(Mat 17:1-8; Mak 9:2-8)
28Ki zi ati mbee adyọng-ikie na Ujeso a kọng ashin, a kpe Ipita le Ujọn le Ujems gye le be he ukwel le u la kọng ha Unim. 29Nya ana a maa kọng ha Unim, kushu kuma ku gie. Bihwọm bima bi fel bifung-bifung kpela-dada. Bi fel tim he ashi ngyal-ngyal-ngyal. 30Bendi befee be kung fem ha imbul-imbul be kọng he ahe. Be ma yi Umosis befe le Elaija a. 31Be be le ata-ale angwu le he lifung-atabe, be kọng ha Ujeso gbe le kitaa u ndu be shi ugim Unim gbe he ahwole he Ujeruselem. 32Ipita befe le bendema be nim kunde te be, ukpọ be wum nde ifem ima le bendi befee abe be ma yi utung he ahe. 33Nya ana bendi abena be maa ndu gbe tyang Ujeso, Ipita a kung de-e le, “Ukandi, kiteng ashin ki ngbeb ashi li ngyọ kwu i. Tyang li li kaa bebuu bekie, kugang ken, Umosis ken, Elaija ken.” (A ngye ashi a kọng ana ye gbang.)
34Nya ana a maa so-i kọng ashin, kibu ki be le he kusi, be shi abe kpem, baa Ipita be fel shel. 35Be gyo lingbam Unim le ha he kibu ana le, “Angwun na u yi Unwa-agi angwu mi waa sọm. Ma dang kutyung gyo he.” 36Be gyo lingbam puu, Ujeso a fel ututeb. He kunyọng kumen ana bendi-utung Ujeso be fan gbe le shi ye. Be de undi kiwọm ken ọ ashi be nde ye.
Ujeso a mbee unwaa ungikye angwu ikeb ibibi i yi he ahe
(Mat 17:14-18; Mak 9:14-27)
37Nyọng ashi a ma taa, be shul le ha he ukwel. Bendi gbam be be kpee le Ujeso. 38Ungikye ken le ha he liwu a kung gaa le, “Ukandi, mi tim-a anung le wo nde unwa-agi, mi kee-kee yi le ufe-ufe a! 39Ikeb ibibi i kwa he, u gaa kaang. Ikeb ibibi ana i sha he u mbwa he itang fel tim gbel, u zi bihwu he ungwu. I do he gba kigbe kaang, i shwee tyang he ye. 40Mi tim bendi-utung begang anung le be ndo ikeb imen i, ukpọ be ndo angi mbee ye.”
41Ujeso a kung fan le, “Men ugbe angwu ma yi faale abọng-ale, mi kwu utung ha amen le kigbe na a, ma ha fe lityam ha ami? Ma kee le mi ngib lityam le men le kigbe na a?” A ha kung de ungikye ana le u be le unwaama hwaa le he. 42He kunyọng ahwu unwaa umen ana a ma nde ashi gye hwaa le Ujeso, ikeb ana i shi-e a mbu he itang, u tim gbel. Ujeso a gaa fe ikeb ibibi ana le i fem le he ahe, u mbee unwaa tem le he ke atyam. 43Ki ma kwu bendi abena puu he kuhwo gbe le bedyan Unim.
Ujeso a mbee kọng gbe le lihwu lima
(Mat 17:22-23; Mak 9:30-32)
He kunyọng ahwu ki ma so-e kwu abe he kuhwo gbe le biwọm puu abi Ujeso a ma shi, Ujeso a de bendi-utung bema le, 44be naa lityam le ashi u la de be i ye. Be ba kwa he ufe Unwaa Undi-gye, fa bendi-gye he abwo. 45Ashi a kọng, ki nung abe ye. Unim a ma ndyel ashi le ha abe teng ki nung abe. Be maa shel na be bii he gbe le shi.
46Bendi-utung Ujeso be keb be kin kukandi le bende gbe le undi angwu a dyam hwo he liwu libel. 47Ujeso a ma ngye ashi be maa gim, a ha kpe unwa-ani be naa he ahe ufaa. 48A kung de be le, “Undi angwu a kpe unwaa angwun he lizen ligi, ha a kpe-m mi a. Undi angwu a kpe-m, ha a kpe Ada angwu a sọm mi a. Undi angwu a zen hwo puu he liwu limen na u yi ukandi.”
49Ujọn a de Ujeso le, “Ukandi, li nde undi ususo u ndo ikeb ibibi he lizen ligang. Li swan le u ndo angi ye, likọye u yi he liwu lityan a ye.”
50Ujeso a de be befe le bendi-utung bema abe be teng le, “Kwom he kukwo ye. Undi angwu u yi linaa ha amen ye, u yi ke men a.”
Kubọng Usameria be swan Ujeso
51He kunyọng ahwu ki ma fel kpee-kpee le Ujeso u ndu gya he lifung-atabe, a shi ugim le hang a gye he Ujeruselem. 52A sọm bebwaa-kisọm bema gbe kushu. Be gye he lishi kubọng Usameria le be la kam biwọm ndọ he. 53Ukpọ bendi abe ha be bọng kpe-e ye, likọye be ngye dang le u gya he Ujeruselem a. 54Ujems le Ujọn abe be yi bendi-utung Ujeso be gyo ashi ki shi, be bii he le, “Ukandi, wo kee le li ko Unim he u sọm kinde le he lifung-atabe be shi gwu abe a?” 55Ujeso a bel ashi nde be, a swan fe be he abwo. 56Be kung gbe ndo he lishi lisuso.
Bendi abe be kee le be pwọm Ujeso
(Mat 8:19-22)
57Be gbe be gya le kukwo. Ungikye ususo a be de Ujeso le, “Mi kee le mi pwọm a gya he kiteng kiyang-yang ashi wo gye.”
58Ujeso a kung de-e le, “Ife i yi le abel angi i nde, linyun li shi le agwu, ukpọ mi Unwaa undi-gye mi yi le kiteng ashi mi nde gbam mbu kunde ye.”
59A de undi ususo le u pwọm he.
Angwu ha a de-e le, “Ukandi, ndọ mi le ngi atyagi ma ukpọng.”
60Ujeso a fan he le, “Tyang akwọm a ngi akwọm abel. Wo gye le bun gbe le kiteng kusu Unim.”
61Angwu ken a de-e le, “Ukandi, mi pwọm a, ukpọ ndọ mi le de bendi begi le ishu i so ma ukpọng.”
62Ujeso a fan he le, “He aki ashele, undi uyang-yang angwu a kung uhwaa kwu he kubwo, u tem fel nde gye he item gbung, ha u yi le lifem ke kiteng kusu Unim ye.”
Currently Selected:
Uluk 9: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
