Uluk 1
1
Atan-lengi angwu Uluk a fee kushia ahwun
1Ukandi Utiofilus ugi, wo ngye le bendi gbam be ma kaa he be fee gbe le biwọm abi bi ma shi he liwu lityan, abi li bọng le bi shi kigyang-kigyang. 2Be fee abi bendi abe be ma nde biwọm abin le he ukpi-kikwu be de li. Bendi bemen i be ma bun gbe le bi. 3Ukandi Utiofilus, le gbe mi sọ kikwu biwọm bimen i puu, mi gim le ki ngbeb le mi fee da-a gbe le bi kung le ha he ukpi-kikwu, tyuo-tyuo-tyuo le tang he umbee-likel. 4Mi sha ashin he wo ngye dang le biwọm abi be hwọ a bi yi kigyang a.
Udengel a de le be ba hwan Ujọn angwu u wu bendi umbwo
5He kunyọng ahwu Uherọd a ma yi usu Ujudia, ki ma yi le ungikye ususo angwu a maa shang Unim. Be maa ko he le Uzakariya. A maa ba le he kikwu-lihwan Abija ashi be maa shang Unim. Be maa ko ungye-ma le Alizabet. Ufe ọ titi a maa ba le ha he kikwu-lihwan Erọn ashi ki maa shang Unim a. 6Puu abe be ma yi bendi benunung a he ashi Unim. Be maa ka Iten Ada puu ife, be shi faale uben. 7Be ma yi le unwaa ye, likọye Alizabet a ma ngyọ kukwọm. He kunyọng kumen i ufe le Uzakariya be ma tọ kaa.
8He liti ken Uzakariya a maa sha aki ama he ushọm Unim na undi angwu u shang Unim u shi. Ki ma fel kunyọng kuma a. 9Be ma shi ububo-ububo a ha waa he, na be shaa shi. Be ma waa he le u kung biwọm abi bi nung nyin ting-shi ke Unim. A kung gbe gye he Ushọm Ada. 10He kunyọng ahwu kunyọng Unim ashang-ale ku ma fel, ugban bendi abe be teng be maa kọng ha Unim he igye.
11Udengel Ada a be fem he ahe ha. A ma yi naa le he kigie kubwo lizen he kiteng ashang-ale ashi be ting inyim ikwan shi kinde ke Unim. 12Uzakariya a nde-e, a fel he kushel, u fel tung fọfọ. 13Udengel umen ana a kung de-e le, “Uzakariya, shi shel ye. Wo kọng ha Unim, a gyo-a. Alizabet, ungye-gang, u ba sha lizam hwan na unwaa ungikye. Ki yi le wo ba kwa he lizen le Ujọn. 14Wo ọ, bendi ọ, ma ba gọ kaang he kunyọng ahwu be be hwan he. 15U ba kwa undi ukandi a he ashi Unim. U ba ngwa kingwu-ngwo ashi ki bwọm ye. U ba shwa le Ukatia Kunyọng kung le ha he lifung anam a. 16U ba sha bendi Izwel gbam be tem item ba hwaa le Ada Unim. 17U ba tie Ada Ujeso kushu na undi angwu u tye ugie kisọm Unim. U ba kwa le ikeb le kunyọng Unim na Elaija a ma yi. U ba sha bebwaa le betya-bel ki fel nyin abe le bende. U be shi bendi abe be kpo lishi be fel bendi benunung. He kukwo ahwun u ba kam bendi ndọ Ada.”#1:17 Umalakai 4:6
18Uzakariya a ma kung bii udengel le, “Mi le ungyegi li kaa, ki ha ba sha na a he mi ngye le ashi wo kọng i ki yi kigyang a?”
19Udengel a kung de-e le, “Be ko mi le Ugebrel. Mi naa he ashi Unim mbee kunyọng. A sọm mi le mi be da-a kisọm kinunung ashin. 20Kisọm ashi mi da-a i, ki ba sha he kunyọng ahwu Unim a ndọ. Le gbe wo kpe kisọm kimen i ye, wo ba kwọm umbel kpam la kwọm he kunyọng ahwu ukyeb angwu mi ka-a i u be fe sho kigyang.”
21He kunyọng ahwun, bendi abe be ma yi kwu he igye be nyọng Uzakariya be maa fel tyang kiwọm ashi ki shi-e a kwu ha afee kipo Ushọm Unim gbe kigbe kitaa ana. 22He kunyọng ahwu a ma be he igye, a maa tem likọng mbee ye. Be ma nde shob le Unim a tyung he kiwọm le ha he kipo. Le gbe a kwọm umbel, a maa fel kọng ha abe he abwo a.
23Nyọng kunyọng kuma ahwu u shi aki he Ushọm Unim ku ma mbee, a ma tem gye he usha-ale. 24Ki kung zi ati zang, ungye-ma Alizabet a kung fel le lizam. A ma tem gye he igye ye wu afel adyọng. 25A kung de le, “Kitaa i na Ada a shi kinunung ha ami. A nde-m beshi le mi tem kwu le ishwia he ashi bendi ye.”
Udengel Unim a bun gbe le lihwan Ujeso
26He kunyọng ahwu Alizabet a ma shi lizam ki fel afel adyọng-ken, Unim a ma sọm udengel uma angwu be ko le Ugebrel gye he Unazaret he kubọng Ugalili. 27A ma sọm he hwaa le Umeri, unwa-asul angwu a wa gbe ipel ha ungikye ye. Ungikye ken angwu be ko le Ujosef a ma tyung he ndọ. Ujosef a maa ba le he kikwu-lihwan Usu Udebid a. 28Udengel ana a ma be hwaa le Umeri de-e le, “Kukwun ku yi ke awo angwu wo zi kufe kaang. Ada Unim u yi utung ha awo.”
29Nyọng Umeri a ma gyo ashi udengel a ma de-e, ufung a ma waa he kaang. A ma tyang ashi andee-inung angina a ze. 30Udengel a ma de-e le, “Umeri, shi shel ye. Unim a shi binunung ha awo kaang. 31Wo ba sha lizam hwan unwaa ungikye, ki yi le wo kwu-e lizen le Ujeso. 32Unwaa umen ana u ba kwa undi ukandi a. Be ba ko he le Unwaa Unim angwu a dyam hwo puu. Atya-tyan Unim u ba kwa he kusu ukandi na atiema, Udebid, a ma yi. 33U ba kwa usu kikwu-lihwan Ujekọb ngyọ igye kpam. Kiteng kusu kima ki ba kwa faale likel.”
34Umeri a ma kung de udengel le, “Mi wa gbe ipel ha ungikye ye. Ashin ki nya kwa na a?”
35Udengel a ma fan he le, “Ukatia Kunyọng u ba kwa ha awo. Ikeb Unim angwu a dyam hwo puu i ba mbo sha-a, wo ba hwan unwaa angwu u yi gelalala faale kiban, be ba ko he le Unwaa Unim. 36Wel gbe le uhwan-ugang, Alizabet, angwu be ma da le a ngyọ kukwọm. Ma na a kaa ọ, a shi lizam ki fel afel adyọng-ken. U ba hwan unwaa ungikye. 37Ki yi le ashi ki hwo Unim ye.”
38Umeri a ma de le, “Mi yi unwaa-kisọm Ada a. Ki shi fe-m nya ana wo kọng.” Udengel a ha gbe ligye.
Umeri a gye le kọng le Alizabet
39Nyọng udengel a gbe-gbe, Umeri a kung bo le akye he abee ndo he kigie kubọng Ujuda ashi ki yi bigugo-bigugo. 40A le wu ha, a gye he ushọm Uzakariya le kọng le Alizabet. 41He kunyọng ahwu Alizabet a gyo Umeri u kọng le he, unwaama a ma tye-e he lifung kpu. Ukatia Kunyọng a ma be hwaa le Alizabet. 42A ha kung gung he ikeb Unim le, “Kukwun ku yi-a he kuhwo hwo bengingye puu! Ku shi ha unwaa angwu u yi he kutyọ kugang. 43Ki kwu-m he kuhwo na wo, anam Ada, na wo be kọng le mi. 44Nyọng mi gyo-a gyo-gyo, unwaa a tim he lifung kpu le igọ.” 45Alizabet a ma mbee kọng le, “Kukwun ku yi ke undi angwu a bọng le kisọm ashi Ada a sọm hwaa le he ki ba sha nya ana a sọm.”
Umeri a ma gyam kugyam pee Unim
46Umeri a kung de le,
“Lityam ligi li fem Ada.
47Kunyọng kugi ku yal gọ ha Unim
angwu u yi Undi-likpan ugi.
48A tyung benyin ha ami, unwaama angwu
mi yi he kukpo ye.
Kung le he kunyọng ahwun gye kushu, bendi puu be fel ko mi le undi kukwun a,
49likọye Unim angwu u yi le ikeb puu a shi biwọm bikandi ke-m.
Lizen lima li yi tata ke Unim.
50Bendi puu abe be shel he,
u nda abe beshi he ugbe uyang-yang kpam.
51Ufe a tyung ikeb ima he apeb-ale liwu
bendi idim le igim ikaa-ikaa ibel.
52Unim u shul besu le he bidem kusu bibel.
Ukpọ u kung bendi abe be yi he kukpo ye gye
he kusi.
53U ka bendi-kindee biwọm binunung,
u ndo bendi-kingbeb wa he igye abubwo.
54A kpel ibọyi ima Izwel nya ana a ma
kọng ndọ ha betie-tyan le u tyung beshi.
55U nda Ebraham le igia ima beshi bel ashi
he item ye.
Beshi bema bemen i be yi ngyọ igye kpam.”
56Umeri a ma kwu utung ha Alizabet le wu afel akie, a ha tem gye he ushu uma.
Be hwan Ujọn angwu u wu bendi umbwo
57Nyọng kunyọng ku kung fel ahwu Alizabet u hwan, a kung unwaa ungikye hwan. 58Bendema le behwan-ma be gyo na Ada a tyung he beshi be dyam, be gọ utung he ahe.
59Nyọng unwaama a fel ati adyọng-ikie, bendi be be le be ten he. Be de le be kung he kwu atyam Uzakariya. 60Anam a swan, a de le be kwu-e le Ujọn hwan.
61Be kung de-e le, “Uhwan-ugang ken ọ a bọng lizen angina ye.”
62Be ma yọ abwo bii atyam unwaa le a kee le be ko unwaa le ana? 63A kung yọ abwo de le be ke-e kikpakpa. Be ke-e, a kung fee fe ha le be ko he le Ujọn. Befe puu, ki ma kwu abe he kuhwo kaang. 64Nya kukwo-kukwo umbel Uzakariya a buu, kabel ama ka bọ. A keb Unim apee-ale. 65Bendema puu be fel he kushel. Bendi puu he kigie Ujudia kimen ashi le he kusi kigugo ana be maa fel kọng gba le ashi ki shi. 66Befe puu abe be ma gyo gbe le biwọm abi bi shi, be gim gbe le bi, be maa fel bii le, “Unwaa umen i u ba kwa kibang kitaa undi a?” Ki ma nung ngwọng le ikeb Ada Unim i yi he ahe.
Uzakariya a tye ugie gbe le biwọm binunung abi Unim u be shi
67Uzakariya, atyam Ujọn, a ma yi le Ukatia Kunyọng kaang, a ma tye ugie gbe he ikeb Ukatia Kunyọng le,
68“Ipee i kwu ke Ada
angwu u yi Unim Izwel,
a be kpel bendi bema, u shi abe be fel pọ.
69A ke li undi angwu u yi le ikeb le u kpan li
le he ushọm ubọyi uma Udebid.
70Le-iti a ma ke ukyeb kọng gbe ha
bitye-ugie kisọm kima
71le u kpan li le ha bendi-linaa betyan,
u mbee kpan li le ha bendi puu abe be tel li.
72A ma de le u nda betie-tyan beshi,
u wel gbe le azu ama ke bendi bema
73A ma ke atietyan Ebraham ukyeb, u tam le,
74u ba kpan li le ha bendi-linaa betyan
he li fe-e faale kushel,
75li kwu bendi abe be yi betaa-betaa,
be shi benunung he ashi ama ngyọ igye kpam.
76“Unwa-agi Ujọn, Unim angwu a dyam hwo
puu u ba ko-a awo le utye-ugie kisọm Unim.
Wo na wo be tie kushu le kam kukwo ndọ Ada.
77Wo be de bendi abe u kam le be ba kwa le likpan kunyọng
angi li tyung le Unim a tyang biban bibel ke be.
78Unim utyan u yi le beshi, u shi le benyin.
U ba sha kikung-gboo ashi ki be le likpan kunyọng
ki taa ha abel na libwee li taa le he kusi.
79U be shi kikung-gboo ashi le he lifung-atabe
ki taa tyung bendi puu abe be shel lihwu
he ki nọng li le li gbe he kukwo ahwu ikwun.”
80Unwaa ana a kaa he agwo le kunyọng. A ma yi he ugbaa-libeb kpam le kwọm he liti angi a kpi aki ama ashele gboo he liwu bendi Izwel.
Currently Selected:
Uluk 1: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
