Uluk 2
2
Be hwan Ujeso
(Mat 1:18-25)
1Ha he kunyọng kumen ana, undi ken angwu be ko le Ọgọstus a ma yi Usu ukandi angwu he Urom. A ma tye uten le be fee azen bendi puu he ufam uma fe he kushia he be bo abe. 2Kunyọng kumen ana na be ma kpi-kikwu bo bendi, Ukwirinius u shi Usu he kubọng Usiria. 3Bendi beyang-yang be ma bo gye he lishi libel he be le fee azen abel.
4Ujosef a ma bo le he Unazaret he kubọng Ugalili, gye he lishi angi be ko le Ubetelehem he kubọng Ujudia. He lishi limen ana na be ma hwan Udebid. Ujosef a ma gye ha, le u la ka lizen lima, likọye be maa ba le he kikwu-lihwan Udebid a. 5Umeri angwu Ujosef a ma tyung ndọ a ma te utung he ahe he be le fee azen. A ma yi le lizam. 6He kunyọng ahwu be ma yi ha, ki ma fel kunyọng ahwu le Umeri u ndu hwan. 7A ma hwan uhwaa unwaama, a ma yi ungikye a. A ma kung bihwọm mbo shi-e le kie he kipo bitwole. Kukwo ku ma yi he ushọm begaa-ndi he kipi be kwu ye.
Idengel Unim i de bikang-itia le be hwan undi-likpan
8Ki ma yi le bendi abe be kang itia he kubọng kumen ana, be maa kang itia ibel he afee libeb le kusu. 9Udengel Ada a fem ha abe ha. Kikung-gboo Unim ki taa kel-kel fe be ha. Be fel le kushel kaang. 10Udengel a de be le be kwu le kushel ye. A be le kisọm kinunung ashi ki shi bendi beyang-yang be kwu le igọ. 11Kusu ahwu kunyin be hwan abe Undi-likpan he lishi Udebid. U yi Ukristi angwu Unim a waa sọm. 12Ashin na ki yi kitaa ashi ki tyung abe le ufe a. Be ba la nda unwaa ufufe. Be mbo bihwọm shi-e kie he kipo bitwole.
13Nya kukwo-kukwo idengel Unim i fem gbam, be fe ipel ha udengel angwu a be le kisọm ashina. I maa fel gyam agyam pee Unim le,
14“Ifem i kwu ke Unim angwu he kusi lifung-atabe.
Ikwun i kwu ha bendi-gye abe be zi kufe le he ahe.”
15Idengel imen i i tem gbe ligye gye he lifung-atabe. Bikang-itia be de bende le be gye he Ubetelehem le nde ashi Ada a de be le ki shi.
16Be bo nya kukwo-kukwo le nde Umeri le Ujosef ha le unwaa kie he kipo bitwole. 17Bikang-itia ana be ha kung bun de be kitaa ashi udengel Unim a de be gbe le unwaa umen i. 18Biwọm abi bikang-itia bi kọng, bi kwu bendi puu abe be gyo abi he kuhwo. 19Umeri a kwu abin puu fe he lityam, u shi ugim kaang gbe le bi. 20Bikang-itia be tem ligye. Be gyam agyam pee Unim he biwọm puu abi be gyo le abi be nde. Bi ma yi nya ana udengel a ma de be.
Be kwu-e le Ujeso
21He ati adyọng-ikie nyọng ki ma fel le be ten unwaa umen i. Be kwu-e lizen le Ujeso. Lizen limen ana na udengel Unim a ma de le be kwu-e ma ukpọng be ha shi lizam lima.
Be gye le Ujeso he Ushọm Unim he Ujeruselem
22Kunyọng ku ma fel le Ujosef befe le Umeri be shi na Iten angi Unim a ma ke Umosis i kọng he be fel betaa-betaa. Be kung unwaa gye le he he Ujeruselem le be la fa Ada he kubwo. 23Be ma fee he kushia Iten Unim le, “Utie-ushu unwaa ungikye uyang-yang, be ndọ he tata ke Ada Unim.”#2:23 Ligye 13:2, 12 24Be te he be mbee shang Ada na Iten ima i kọng le, gbe be shang inwaa ukwuo abakpa ifee ye, be shang lilulu lifee.#2:24 Iten ashang-ale 12:8
25Ungikye ususo a ma yi he Ujeruselem. Be maa ko he le Usimeọn. A ma yi undi ununung a, u shel Unim. A maa ndọ lishi le Unim u ba kpan bendi Izwel. Ukatia Kunyọng a ma yi he ahe, 26Ukatia Kunyọng a shi-e a ngye dang le u hwa ye kpam u gbe nde Ukristi, Undi-likpan angwu Ada a ma kyeb ndọ. 27Ukatia Kunyọng a ma shi-e a bo gye he Ushọm Unim. Ha he kunyọng ahwu atyam Ujeso befe le anam be be le he he Ushọm Unim he be kung he fe Unim he kubwo nya ana Iten i kọng, 28Usimeọn a kpe-e kwu he abwo, u pee Unim le:
29“Atyagi, wo shi ukyeb ugang,
kanaa-anaa i tyang imi ubọyi ugang, mi hwo le kukwun.
30Mi nde undi-likpan angwu wo sọm ma.
31Wo kam likpan limen i ndọ bendi puu he abọng puu.
32Likpan limen i li yi kikung-gboo ashi ki tyung bendi abe be yi Ijuus a ye abe be ngye a ye kukwo kugang,
ki ke Izwel bendi begang ifem.”
33Ki ma kwu atyam Ujeso befe le anam he kuhwo gbe le biwọm abi Usimeọn a kọng gbe le he. 34Usimeọn a ke be kukwun. A ha de Umeri angwu u yi anam unwaa le, “gbe he ahe, bendi gbam he Izwel be ba bel item ndọ Unim, besuso be be bel atyam abel hwaa le he. U ba kwa kitaa a le ha Unim ashi bendi gbam be be kọng ban. 35Biwọm bibibi abi be kọng bi fem igim ibel angi he kundyel be he igye. Ki ba nyam a he lityam nwing-nwing-nwing.”
36Ki ma mbee yi le ungingye ususo angwu a maa tye ugie kisọm Unim. Be maa ko he le Ana. U shi unwaa Upenuel angwu he kikwu-lihwan Asha. A ma gye libee le kwu aze adyọng-ifee, 37ukye-ma a ma hwo tyang he. A ma tọ kashi fel aze asi ande le ngi ande. A maa kwa he Ushọm Unim a kpo hwa. Ishu ọ, kusu ọ, a maa fa Unim, u kọng ha Unim le itung ando-ale. 38A be he Ushọm Unim he kunyọng kumen ana, u pee Unim. U fel kọng gba le unwaa umen i da bendi puu abe be ma ndọ lishi le Unim u ba kpan bendi Ujeruselem.
39He kunyọng ahwu Ujosef befe le Umeri be mbee biwọm puu abi Ada a ma kọng he Iten ima, be tem gye he lishi libel, Unazaret, he kubọng Ugalili. 40Unwaa ana a ma kaa he agwo, u fel kang-kang. A ma bilishi, u shi le kukwun Unim.
Ujeso a gye he Ushọm Unim he Ujeruselem
41Atyam Ujeso befe le anam be maa gya he Ujeruselem la sha kipam agbele-gyọng he lishi lize liyang-yang. 42He kunyọng ahwu Ujeso a ma fel aze lihwo le ngi afee, be gye kipam nya ana be shaa te. 43Be mbee le kipam puu, be tem ligye, be gya he ushu, ukpọ Ujeso a ngyọ kwu ha he Ujeruselem. Atyam le anam be ngye ye. 44Be maa kọng le u yi he liwu bendi. Be tan litan liti libo, be ha keb he ashun-ale ha behwan-bel le bendabel. 45Be nde-e ye, be tem gye he Ujeruselem le kee he. Be shun he ati afee. 46He liti angi lekie be le nde-e he Ushọm Unim utung ha bekandi Ijuus abe be hwọ bendi Iten. A maa gyo abe, u yii bii abe bibibi. 47Bendi puu abe be gyo he, ki kwu abe he kuhwo na a ngye kiwọm, u fan abe del-del-del. 48Ki kwu baa atyam he kuhwo he kunyọng ahwu be nde-e. Anam a bii he le, “Unwa-agi, ki shi na a, wo shi li kitaa i? Ufung a waa li, mi le atia, li yi li tan kee a.”
49A bii abe le, “Ma yi shun mi le ana a? Ma ngye le ki yi kpe-kpe le mi kwu he Ushọm Atyagi ye a?” 50Ashi a ma kọng ki ma nung abe ye.
51Ujeso a bo gbe utung ha abe gye he Unazaret. A maa ka abe ife mbee kunyọng. Anam a kpe biwọm abi a kọng puu fe he lityam. 52Ujeso a kaa likaa le lishi-abyele. Ki ma ngbeb Unim ọ, bendi-gye ọ, le he mbee kunyọng.
Currently Selected:
Uluk 2: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
