Uluk Kikwu likọng
Kikwu likọng
Kikwu likọng
Uluk a ma yi undi-usi a. Kikwu likọng kushia Uluk le ashi kushia Aki bendi-utung Ujeso, bi tyung kihwan ashia afee anyin. Ashia amen i puu afee, Uluk a ma fee angi hwaa le ungikye Igrik angwu a ma zi kasu angwu be maa ko he le Utiofilus, angwu lizen lima li ze le undi angwu ki nyin Unim le he. Lingbam le kukwo ahwu be fee kisọm kinunung Uluk le kushia Aki bendi-utung Ujeso ku tyung le, Uluk a ma yi ubi-ashi undi angwu a ma ngye na u fee kiwọm ndọ abwo swal, angwu a ma gye ushukwul gye le kigbe, u mbee shi undi ufam Igrik angwu a ngye akpe bendi Igrik.
Bendi gbam be gim le Uluk a ma yi undi abọng-ale angwu u yi undi Ijuus a ye a, le he kubọng Antiyọk angwu Usiria. A ma gye he Utrowas utung ha Upọl he utepwọm litan lima he agyam-ale abwo kisọm kinunung. Ma na ki yi le biwọm gbam abi bendi be fee gbe le Ujeso ọ, Uluk na a tyung kpee-kpee-kpee kitaa ashi biwọm bi ma shi, na undi angwu a ngye ityang u shi le li ngye gbe le biwọm gbam, he ashin, likọng lima li yi faale atyang-ale.
Angwu a fee
Uluk.
Atan-lengi
He u tyung kigyang likọng gbe le Ukristi, u mbee tyung le Ukristi u yi Unim u shi undi-gye he akwo puu, angwu a be he igye he u be pọng bendi-gye.
Kiteng
Urom gbe na a ye Usesaria.
Kunyọng
60 K.U.
Bendi lishi likọng
Ujeso le bendi-utung bema, Alizabet le Uzakariya; Ujọn angwu a maa wu bendi umbwo le bendi-utung bema; Umeri; Uherọd ukandi; Upalet; le Umeri Magdalen.
Lishi likọng
Uluk a tyung kitaa aki Ujeso na Umeezaya angwu Unim a wu-e behwu, le atan-lengi aki ama.
Biwọm kukpo
Uluk a tyung aki le ihwọ-ale Ujeso, na unung-ale gbe le aki likpan, u hwọ gbe le ushang akele Ujeso, kihwan kima ha bendi-likaa le bendi abe be yi Ijuus a ye, abe Ijuus i maa tal abe le he likọng Unim, u mbee tyung gbe le Ukatia Kunyọng. Kisọm kinunung Uluk na ki kwob hwo puu he bisọm binunung gbe le Ujeso.
Ibubu likọng
Kikwu likọng; ahwan-ale Ujeso le kute kuma (1:1–2:52)
Ujọn angwu a maa wu bendi umbwo, le ugil-ale Ujeso (3:1–4:13)
Aki Ujeso he Ugalili (4:14–9:50)
Litan Ujeso gye he Ujeruselem (9:51–19:44)
Aki Ujeso he Ujeruselem (19:45–20:47)
Igie atyele gbe le biwọm abi bi be be (21:1-38)
Lihwu le awum-ale Ujeso (22:1–24:53).
Currently Selected:
Uluk Kikwu likọng: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.