San Marcos 8

Jesuska chusku waranka runakunata kararka

(Mt 15.32-39)

1Chay punchakunapi kutikashka tantarirkakuna achka runakuna. Mana tiyashpan nima ima mikunankunapa, Jesuska kayashpan disipulunkunata rimarka:

2“Kay runakunaka shunkuynita llakichiwanahun. Ña kahunkuna kimsa puncha ñukawa, mana tiyanchu nima ima mikunankunapa. 3Karu llaktankunamanta shamushkakuna. Chayrayku mana karashpa wasinkunama kachashpaynika yarkaywa sanpayashpankuna wañunayankakuna ñanpita rihushkankunapi” 4Disipulunkunaka aynirkakuna: “Maypitaya tarishu achka panta kay chunlla allpapika.”

5Chaypiña Jesuska paykunata tapurka: “¿Maytukuy pantaya tiyan kankunapaka?”

Paykunaka aynirkakuna: “Kanchis panllami tiyan”.

6Chaypi Jesuska kamachirka chay runakunata tiyarinankunapa allpapi, chay washa apishpan chay kanchis pankunata, mañashkan washa pakishpan kurka disipulunkunata, paykunaña kunankunapa chay achka runakunata. Chasna paykunaka rurarkakuna. 7Chaymantapas masna challwastulla tiyarka, chayta Jesuska apishpan mañarka, chaytapas kamachirka chasnallatata kunankunapa. 8Tukuy runakuna mikurkakuna saksanankunakama, tantashpankuna puchurishkanta, untachirkakuna kanchis tasata. 9Chay mikushka runakunaka karkakuna chusku warankashina. Chay washa Jesuska rimarka “wasikichima kutiychi”.

10Chayratulla yaykurka botipi disipulunkunawa rinankunapa Dalmanuta allpama.

Tapuna shuk nima ima uras rikushkamanta

(Mt 16.1-4; Lc 12.54-56)

11Fariseokunaka paktamushpankuna kallarirkakuna rimanakunata Jesuswa, kamanankunapa payta tapurkakuna rurananpa shuk nima ima uras rikushkankunata. 12Atunta samashpan Jesuska rimarka: “¿Imaraykutaya kay runakunaka tapunahun shuk nima ima uras rikushkankunata ruranaynipa? Shutipata rimaykichi nima shuk nima ima uras rikushkankunta rurashanchu”.

13Chaypiña paykunata sakirka. Rirka yaykunanpa botipi rinanpa shuk chinpa yaku mayanma.

Jesuska yachachirka fariseokunapa yachachinankunata mana kasunankunapa

(Mt 16.5-12)

14Disipulunkunaka kunkarirkakuna apanata mikunata, chay botipika tiyahurka shuk panlla. 15Chaypiña Jesuska paykunata kamachirka: “Kuyrariychi fariseokunapa levaduranmata, chaymanta Herodespa levaduranmantapas”.

16Paykunaka tapunakurkakuna paykuna pura: “Payka rimahun panta mana apamushkanchirayku”.

17Jesuska chasna rimahushkankunata yachashpan rimarka: “¿Imaraykuta kankunapura pan mana tiyanchu nihunkichi? Mana chay panta kunkashkaykichimantachu kankunata rimahuni. ¿Manarachu atipankichi asirtanata? ¿Manachu yuyayyu kankichi? 18¿Tiyan ñawikichi, mana rikunkichichu? ¿Tiyan rinrikichi, mana uyankichichu? ¿Manañachu yuyarinkichi? 19¿Manarachu asirtankichi pichka panllawa pichka waranka runakunata karashkaynita? ¿Masna tasatata untachirkankichi chay pan puchurishkata?” Paykunaka aynirkakuna: “Chunka ishkay tasatami”.

20“Chaymanta kushpayni kanchis panta chay chusku waranka runakunata, ¿Masna tasatata untachirkankichi chay pan puchurishkata?” Paykunaka aynirkakuna: “Kanchis tasatami”.

21Chaypiña Jesuska paykunata rimarka: “¿Imashnataya manarachu asirtahunkichi?”

Jesuska anpirka shuk wiskuta Betsaida llaktapi

22Chaymanta rishpan Betsaida llaktapi paktarkakuna. Chaypi Jesusma pusharkakuna shuk wisku runata. Jesusta tapurkakuna chay wiskuta anpinanpa 23Jesuska apishpan makinta chay wiskupata, aparka chay llakta kanchama. Chaypi chay wiskupa ñawinpi tyukarka, chay washa churarka makinta paypi, tapurka: “¿Atipankichu imata rikunata?”

24Chay wiskuka awama rikushpan rimarka: “Rikuhunimi runakunata. Kaspikuna purihuktashina rikuhuni”.

25Jesuska kutikashka churarka makinta chay wiskupa ñawinpi, chay wiskuka chaypira atiparka sumakta rikunata tukuyta karupi shutillata rikurka. 26Chay washa Jesuska kacharka wasinma, chaypi rimarka: “Ama kay llakta chawpita pasankichu.”

Pedro rimarka Jesús Yaya Diospa kachashkan Kristu kananta

(Mt 16.13-20; Lc 9.18-21)

27Jesuska disipulunkunawa pakta rirkakuna chay Cesarea Filipo shutiyu llaktakunama. Chay ñanpipi, Jesuska paykunata tapurka: “¿Ima ninahuntaya runakunaka pimi kani ñukaka?”

28Paykunaka aynirkakuna: “Shukkuna ninahun Bawtisak Juan kanaykita; shukkunaka Eliaschari; ashwan shukkunaña, shuk maykan profetachari”.

29Chaymanta paykunataña tapurka: “Kankunaka, ¿Pimi kani niwankichitaya?” Pedroka aynirka: “Kanmi kanki Kristu”.

30Chaypiña Jesuska sumakta kunashpa rimarka nima pita rimanankunapa paymanta.

Jesuska rimarka wañunanmanta

(Mt 16.21-23; Lc 9.22-27)

31Chaymanta Jesuska disipulunkunata yachachirka: Ñuka Karipa Wawanka yapa parisinayni tiyan. Israel rukukuna, saserdotekunapa apunkunapas, Moisespa killkashkanta yachachikkunapas yapa chikniwankakuna, parisichiwankakuna, wañuchiwankakuna. Kimsa punchamantami kawsarisha. 32Kayta Jesuska rimarka paykunata tukuy shutipata. Chaypiña pedroka aparka chaynikstuma pushashpan rimarka: Ama chasna rimaychu yachachik.

33Chaypiña Jesuska tikrarishpan disipulunkunata rikushpan piñashpa Pedrota rimarka: “¡Anchuriy puntaynimanta, Satanas! ¡Kanka mana yuyarihunkichu Yaya Diospa munashkanta ashwan runakunapa yuyarinanllatami rimawahunki!”

34Chay washa kayarka runakunata chaymanta disipulunkunatapas, rimarka: —Maykanpas katinayawahushpanka ama rurachu pay munashkanllata, krusninta apishpan katiway.

35Tukuy maykanmi kawsayninta kishpichinayan, chinkachinkami; chaymanta tukuy maykanmi kawsayninta chinkachin ñuka ranti, Yaya Diospa suma ali shimin ranti, tarinkami. 36¿Imata valin shuk runa tukuy kay mundupi tiyashkata apinanpa, tukuy chaykunata apishpanpas, wiñaypa wañushpanka? 37¿Imatata atipan kunata runaka kawsaynin ranti?

38—Shuk kankunamanta kay millaypata rurak, mana kiriwak runakunapa puntanpi, pinkarishpanka ñukata katiwahushkanta rimanata, chaymantapas shiminita yachachinata. Chasna runataka ñuka Karipa Wawanpas kay allpama kutikashka shamuhushkayni uras pinkarisha paymanta. Chay punchaka Yaya Diospa paypa atun yachayninwa tukuy paypa angelkunawa pakta kutikashka shamusha.

Currently Selected:

San Marcos 8: QUP_B

Highlight

Copy