Lyanjiru 32

Yakobu kankulitanda kuliwona na Esawu

1Shakapanu Yakobu kendereyiti na mwanja gwakuyi, wantumintumi wa kumpindi wa Mlungu waliwoniti na yomberi, 2na Yakobu pakawawoniti kalonga, “Panu ndo pahala pa shipinga sha mashonta wa Mlungu!” Su kapashema pahala palii Mahanaimu.

3Yakobu kawalagaliriti wajumbi wamlongoleri kugenda kwa Esawu mlongu gwakuyi aku Seili, isi lwa Edomu. 4Kawalagaliriti pakalonga, “Hamumgambiri mtuwa gwangu Esawu ntambu ayi kuwera ntumintumi gwaku Yakobu kalonga hangu, nilikaliti pamuhera na Labani na wera aku mpaka vinu. 5Nana wang'ombi na punda na vipinga vya wakondolu na wantumintumi wapalu na wadala. Nikujegera ujumbi awu mtuwa gwangu, su neni mpati upendeleu kulongolu kwaku.” 6Wajumbi walii pawawuyiti na kumgambira Yakobu, “Tusoka kwa mlongu gwaku Esawu, na yomberi kamunjira kwiza kukwanka, pakawera na wantu miya msheshi.” 7Shakapanu Yakobu kaweriti na lyoga nentu pamuhera na shashatika, su kawabaguliti muvipinga wantu yawaweriti pamuhera na yomberi na wakondolu na wankanyama wamonga na ngamiya. 8Yomberi kaliholiti, “Handa Esawu pakiza na kushyagamiziya shipinga shimu, su shipinga shimonga shashisigaliti hashilishapiri.”

9Su Yakobu kaluwa, “Gwee Mlungu gwa mbuyi gwangu Abrahamu, Mlungu gwa tati gwangu Isaka! Gwee Mlungu yagung'ambiliti mbuyi muisi yangu kwa walongu wangu, gunagiliti kuntendera maheri. 10Neni nfiruwa ndiri kupata uheri wako yaguntendiriti neni ntumintumi gwaku, panokiti lushemba lwa Yoridani, weriti ndiri na shintu ira luhonga, kumbiti vinu nanavi vipinga avi viwili. 11Nikuluwa, gunopoli kulawa mumaya ga mlongu gwangu Esawu, toziya nana lyoga kuwera hakatukomangi na kutulaga twoseri, wamawu pamuhera na wana. 12Kumbiti gwenga gunagiliti, hanikutenderi maheri na hanishiyongeri shiyiwuku shaku shiweri shivuwa gambira muhanga gwa kumpwani mwa bahari, hapeni shiwezi kuwalangwa kwa uvuwa wakuyi.”

13Su Yakobu kagonjiti pahala palii pashiru panu, shakapanu katoliti muwankanyama yakaweriti nawu waweri lifupu kwa Esawu mlongu gwakuyi, 14wambuzi washidala miya mbili na wambuzi washipalu malongu mawili, wakondolu washidala miya mbili na washipalu malongu mawili, 15nkanyama ngamiya malongu matatu yawakonkuziya pamuhera na wana wawu, wang'ombi washidala malongu msheshi na pongu lilongu na punda washidala malongu mawili na washipalu lilongu. 16Kawapananiti wantumintumi wakuyi, kila yumu shipinga shakuwi, kawagambira, “Munongoleri pamleka lupenyu pakati pa shipinga na shipinga mumwanja gwenu.” 17Kamlagalira uli yakalongoleriti pakalonga, “Mlongu gwangu Esawu pakiza kuliwona na gwenga na pakakukosiya, gwenga gwa ntumintumi gwa gaa? Gwankugenda koshi? Na wankanyama awa wa gaa? 18Gwenga hagumwankuli, awu ndo ulunda wa ntumintumi gwaku Yakobu, na ali ndo lifupu lyaku gwenga mtuwa gwangu Esawu, na Yakobu mweni kankumberi kankwiza. 19Kalagaliriti ntambu iraa ayi kwa ntumintumi gwa shipinga sha pili na sha tatu na wamonga woseri, pakalonga, hamumgambiri Esawu visoweru viraa avi pamuliwona nayu, 20na hamumgambiri, ntumintumi gwaku Yakobu kakumberi kankwiza. Yakobu katenditi hangu pakalihola, pamonga hanimtendi kaleki kukalala kwa mafupu aga ganigalongoziya, shakapanu hawezi kuliwona nayu, pamonga hakananki.” 21Su kalongoziya mafupu gakuyi, kumbiti mweni kagonjiti muliringu pashiru panu.

Yakobu vinu kankushemuwa Israeli

22Pashiru panu Yakobu kimukiti, kawatola wadala wakuyi wawili, wantumintumi wadala wawili na wana wakuyi lilongu na limu, waloka lushemba lwa Yaboki. 23Pakawalokiziyiti kala kumwambu kulushemba walii yakaweriti nawa pamuhera na ulunda wakuyi woseri, 24Yakobu kasigaliti gweka yakuwi.

Shakapanu muntu yumu kiziti, kalikola nayu pawaligusiyana mpaka mandawira putiputi. 25Muntu ayu pakawoniti kuwera hapeni kamkanki Yakobu, su kamtilindula Yakobu muliwondu na yomberi katirinduka pakaweriti pakaligusiyana nayu.

26Shakapanu muntu ilii kamgambiriti Yakobu, gundeki ng'endi zangu, toziya kwankushiya.

“Kumbiti Yakobu kamgambiriti, hapeni nikuleki nakamu, mpaka guntekeleri!

27Muntu ulii kamkosiya, litawu lyaku gwa gaa?

Yomberi kamwankula, Yakobu. 28Muntu ulii kamgambira, hapeni gushemwi kayi Yakobu, kumbiti hagushemwi Israeli, toziya gusingana na Mlungu pamuhera na wantu, gukanka.

29Yakobu kamgambira, shondi shondi, nikuluwa gung'ambili litawu lyaku. Kumbiti yomberi kamgambiriti, kwantambu gaa gunkosiya litawu lyangu?

Shakapanu kamtekelera Yakobu palii.

30Yakobu kapashema pahala palii Penueli, pakalonga, nimwona Mlungu sheni kwa sheni, na neni howa ndiri.” 31Mshenji guweriti gulawa kala Yakobu pakawukiti Panueli, yomberi kaweriti kankujonda toziya ya lihondu lyakuyi. 32Su mpaka leru Waisraeli waliya ndiri msuli gwagulikolerana na lihondu, toziya muntu ulii kamtilinduliti Yakobu msuli gwagulikolerana na lihondu lyakuyi.

Currently Selected:

Lyanjiru 32: PBV

Highlight

Copy

Compare