Lyanjiru 33

Yakobu na Esawu wakulikola mawoku

1Su Yakobu kanyasuliti masu gakuyi, kamwona Esawu pakiza pamuhera na wantu miya msheshi. Palii kawatula gweka wana wakuyi pakati pa Leya na Raheli na walii wayaya wadala wawili. 2Kawatula wayaya pamuhera na wana wawu kulongolu, shakapanu Leya na wana wakuyi, na kumbeli nakamu wafata Raheli na Yusufu mwana gwakuyi. 3Shakapanu mweni kawalongoleriti, kagenditi kasuntama makukama mala saba, mpaka pakasokiti pakwegera na mlongu gwakuyi.

4Kumbiti Esawu katugiti kugenda kumwanka Yakobu, kamkisikira na woseri wawili walira. 5Esawu pakanyasuliti masu gakuyi na kuwawona ashina mawu na wana walii, kakosiya, “Awa ashina gaa waguwera nawu?”

Yakobu kamwankula, “Awa ndo wana, Mlungu kwa manemu gakuyi, kampananiti neni ntumintumi gwaku.”

6Shakapanu wayaya walii wasegeleriti pamuhera na wana wawu, wasuntamiti kwa ligoya. 7Viraa na Leya kiza pamuhera na wana wakuyi, kasuntamiti kwa ligoya, upeleru Raheli na Yusufu wiziti, wasuntamiti kwa ligoya.

8Esawu kakosiyiti, “Mana yakuwi shishi ya shipinga ashi shanuliwoniti nashi munjira?”

Yakobu kamwankula, “Ali ndo lifupu lyaku, su mpati upendeleu kulongolu kwaku, mtuwa gwangu.”

9Kumbiti Esawu kalonga, “Nana ulunda uvuwa mlongu gwangu, ulunda wa gwenga uweri waku gamweni” 10Yakobu kamgambira, “Ndala! Nikuluwa, handa nakaka mpata upendelewu kulongolu kwaku, gujimiri mafupu gangu. Nakaka kushiwona sheni shaku, ndo gambira kushiwona sheni sha Mlungu, kwa ntambu yagunankiti kwa uheri mkulu. 11Su nduwa gujimiri lifupu lyanikujegeriti, toziya ata neni viraa Mlungu kamotiziya, nana ulunda uvuwa.” Yakobu ntambu yakamzyangazyangiti Esawu, na yomberi kawankiti.

12Esawu kalonga “Yina! Twendeleyi na mwanja gwetu, neni hanikulongoleri.”

13Kumbiti Yakobu kamgambira, “Mtuwa gwangu, gwenga guvimana kuwera wana awa wanonu, viraa wankanyama awa wankukonkuziya, su neni nfiruwa kuyilolera weri. Wankanyama awa pawajeguwa mbiru kwa lishaka limu, woseri hawafuwi. 14Su nikuluwa gulongoleri, neni hanizi mpolimpoli ntambu yawatyanga wankanyama na wana, mpaka pansoka aku Seiri.”

15Esawu kalonga, “Mbaka nikulekeri wantu wamu waneni.” Kumbiti Yakobu kalonga, “Kwana nfiru gaa ya kutenda hangu? Guleki neni mpati upendelewu kulongolu kwaku, mtuwa gwangu.”

16Su lishaka ali Esawu kanjiti mwanja gwa kuwuya Seiri. 17Kumbiti Yakobu kagenditi Sukoti, na aku kalinyawira numba na visasa kwajili ya wankanyama wakuyi. Toziya ayi pahala panu pashemuwa Sukoti.

18Kulawa padan Aramu, Yakobu kasokiti nyanyi mulushi lwa Shekemu, muisi ya Kanani, kanyawa maringu pakwegera na isi ayi. 19Kahemeriti shiwanja kulawa kwa wana wa Hamori, tati gwa Shekemu, kwa beyi ya magwala miya ga mpiya, su kanyawiti liringu lyakuyi. 20Su kanyawa shitalawanda sha mabuwi sha kutambikira pahala palii na kupashema Mlungu ndo Mlungu gwa Israeli.

Currently Selected:

Lyanjiru 33: PBV

Highlight

Copy

Compare