Maake 14
14
Bɛye Gyisɛse bɛmaa na eza bɛhye Ye
1Ɛnee yeha kenle nwiɔ na Akpabɛnwo Ɛvoyia ne, Dwuuma Ɛnwomenlelielɛ Kenle ne wɔ ɛvolɛ ne anu mɔɔ bɛnli kpanwo mɔɔ bɛva mgbɔvonle bɛwula nu la adwu zo. Zɛhae mekɛ ye anu amuala, ɛnee azɛlɛvolɛ mgbanyinli ne mɔ nee asɔne mgbanyima ne mɔ tɛkpondɛ adenle mɔɔ bɛfa zo a bɛ sa kɛha Gyisɛse bɛkɛhye ye fealera nu na bɛahu ye la.
2Na bɛzele kɛ, “Yɛnrɛhola ɛhye yɛ wɔ Akpabɛnwo ɛvoyia ne anu, ɔluakɛ, saa yɛannea ye boɛ a nzaka bara.”
3Mekɛ ɛhye anu, ɛnee Gyisɛse wɔ kokobɛvolɛ Saemɔn sua nu wɔ Bɛtani; na mɔɔ bɛdi bɛ nɔsolɛ aleɛ ne la, raalɛ bie rale ɛkɛ, mɔɔ ɔlɛ toba bie mɔɔ alufuanlɛ mɔɔ sonle bolɛ la wɔ nu a. Na ɔbɔle toba ne ati na ɔwolale anatele ne amuala ɔguale Gyisɛse ati zo.
4-5Na bɛdabɛ mɔɔ bɛgua ɛkponle ne anwo bie la bie mɔ vale ɛya wɔ “deɛzɛkyelɛ” ɛhye anwo.
Na bɛzele kɛ, “Duzu ati a yezɛkye alufuanlɛ ɛhye a? Asoo ɔdɔnenle ye ɔliele ezukoa kpole yɛɛ ɔhyɛle ɔmaanle ehyiavolɛma a anrɛɛ ɔnyɛ boɛ ɔ?”
6Na Gyisɛse zele kɛ, “Bɛgyakyi ye; duzu ati a bɛlɛtea ye wɔ debie kpalɛ mɔɔ yeyɛ la anwo a? 7Bɛmɛ dahuu bɛ nee ehyiavolɛma a de a, yɛɛ bɛhyia bɛ moalɛ nwo noko ɛsesebɛ ɛsesebɛ, ɔti bɛkola bɛboa bɛ mekɛ biala mɔɔ bɛkulo la; na mame mɔ bɛ nee me ɛnrɛdɛnla ɛnrɛhyɛ biala.
8“Yeyɛ mɔɔ ɔkɛhola ye yɛ ala la, na yelumua yekpokpa me sonlabaka ne na yeziezie ye yemaa ɛzielɛ. 9Na mese bɛ nɔhalɛ nu kɛ, aleɛabo ɛleka biala mɔɔ bɛbaha Edwɛkpa ne la, bɛbahakye mɔɔ raalɛ ɛhye ɛyɛ la noko na bɛaye ye nwolɛ ayɛlɛ.”
10Na Dwudase Yesekaleɔto, mɔɔ ɔle ye ɛdoavolɛma ne mɔ anu ko la, hɔle azɛlɛvolɛ mgbanyima ne mɔ ɛkɛ na ɔ nee bɛ hyehyɛle kɛ ɔbaye Gyisɛse yeamaa bɛ.
11Na mɔɔ azɛlɛvolɛ mgbanyima ne mɔ dele deɛmɔti yera la, ɔyɛle bɛ fɛ totohyia ne ala, na bɛbɔle ye ɛwɔkɛ kɛ bɛbahyɛ ye debie mɔɔ sɔ ɛnyelɛ a. Ɔti ɔdaye noko ɔbɔle ɔ bo kɛ ɔkpondɛ adenle biala mɔɔ ɔfa zo a ɔkɛhola ɔkɛye Gyisɛse ɔkɛmaa la.
12Na kenle ne mɔɔ lumua wɔ Akpabɛnwo ɛvoyia ne anyunlu mɔɔ bɛku mboane ne mɔ wɔ nu la dwule la, ye ɛdoavolɛma ne mɔ bizale ye ɛleka mɔɔ ɔkulo kɛ ɔkɔdi Akpabɛnwo ɛvoyia aleɛ ne la. 13Ɔti ɔzoanle bɛ nuhua nwiɔ wɔ Gyɛlusalɛm kɛ bɛhɔyɛ nwolɛ anwomoalɛ biala mɔɔ hyia la.
Ɔzele bɛ kɛ, “Mɔɔ bɛlua adenle nu bɛlɛkɔ ala la, bɛbanwu nrenyia bie mɔɔ ɔzo nzule buakɛ la kɛ ɔ nee bɛ ɛlɛyia. Bɛdoa ye. 14Na aako ne mɔɔ ɔkɛlumua ɔkɛwolo nuhua la, bɛze aakomenle ne kɛ, ‘Yɛ menle ɛzoa yɛ kɛ yɛranlea ekpumgbunli ne mɔɔ wɔziezie nu wɔmaa yɛ mɔɔ nɔsolɛ yɛbarali Akpabɛnwo ɛvoyia aleɛ ne wɔ nu la!’ 15Ɔ nee bɛ bavo esianwu bie azo yeahɔhile bɛ ekpumgbunli kpole bie mɔɔ bɛziezie nuhua bɔkɔɔ a. Ɛkɛ ne a bɛziezie yɛ aleɛ ne a.”
16Amgba noko ɛdoavolɛma nwiɔ ne mɔ lumuale hɔle sua ne azo, na bɛhɔnwunle debie biala kɛmɔ Gyisɛse hanle ala la pɛpɛpɛpɛ na bɛzieziele Akpabɛnwo aleɛ ne.
17Ye nɔsolɛ nu, Gyisɛse nee ɛdoavolɛma ne mɔ mɔɔ ɛha la rale, 18na mɔɔ bɛde ɛkponle ne anwo bɛdi aleɛ ne la, Gyisɛse zele kɛ, “Nɔhalɛ nu mese bɛ kɛ bɛ nuhua ko mɔɔ nee me ɛlɛto ɛsalɛ la baye me amaa.”
19Ɛhye maanle alɔbɔlɛ hanle bɛ somaa ne ala, na bɛbɔle ɔ bo bɛbizebizale ye ngoko ngoko kɛ, “Awulae, ɛnee mame ɔ?”
20Ɔbuale bɛ kɛ, “Bɛdabɛ bulu nee nwiɔ ne anu ko mɔɔ ɔ nee me to ɛsalɛ ko wɔ ɛyɛba nu la ɔ. 21Ɔwɔ kɛ mewu kɛmɔ ngapezoma ne mɔ hanle dole ɛkɛ ne dɛbadɛba la; na emomu mɔɔ ɔlua ɔ nwo zo a bɛbaye me bɛamaa la, munzule ɛha ye. Aa, saa bɛanwo ye bɔbɔ a anrɛɛ ɔle kpalɛ ɔmaa ye!”
22Na mɔɔ bɛdi aleɛ ne la, Gyisɛse vale kpanwo na ɔzɛlɛle Awulae nyilalɛ ɔguale zolɛ, akee ɔbubule nu azinli azinli ɔhyɛle ɔmaanle bɛ na ɔzele kɛ, “Bɛlie bɛli, ɔluakɛ ɛhye a le me nwonane ne a.”
23Akee ɔvale nwanye kɔpo ko na ɔyɛle Awulae Nyamenle mo wɔ nwolɛ na akee ɔvale ɔmaanle bɛ; na bɛ muala bɛnlonle bie. 24Akee ɔzele bɛ kɛ, “Ɛhye a le me mogya ne mɔɔ bɛbahwi bɛagua wɔ menli dɔɔnwo ɛtane ti a la, na yemɔ yɛɛ bɛva bɛzɔ Awulae Nyamenle nee menli avinli ngyehyɛlɛ fofolɛ ne anloa a. 25Na mese bɛ nɔhalɛ nu kɛ me nee bɛ ɛnrɛnlo nwanye ɛhye bieko kɔkpula kenle ne mɔɔ mebanlo ye fofolɛ wɔ Awulae belemgbunli maanle ne anu la.”
26Akee nzinlii, bɛdole ayɛlɛyelɛ edwɛne na bɛhɔle Boka Ɔlivi ne azo.
27Na Gyisɛse zele bɛ kɛ, “Bɛ muala bɛbakpo me, ɔluakɛ, Awulae lua ngapezoma ne mɔ anwo zo ɛha kɛ, ‘Mebahu Boaneneavolɛ ne, na ɔlua zo mboane ne mɔ babɔ asande.’ 28Na nzinlii saa mevi ewule nu medwazo meba ngoane nu bieko a, mebalumua bɛ nyunlu wɔ Galeli na meayia bɛ wɔ ɛkɛ ne.”
29Na Pita zele ye kɛ, “Saa ɛdoavolɛma ne mɔ mɔɔ ɛha la kɛkpo wɔ bɔbɔ a, me ngomekye ɛdeɛ, menrɛkpo wɔ ɛlɛ!”
30Gyisɛse zele ye kɛ, “Pita, ɛbaza ɛ ne fane nsa wɔ me nwo kolaa na akɔlɛ abɔ fane nwiɔ wɔ ɛhyema aleɛbahye.”
31Na Pita zele ye kɛ, “Ɛhye angome ɛdeɛ, yemɔ Kyɛkyɛ! Saa ɔwɔ kɛ me nee wɔ wu bɔbɔ a menrɛkpo wɔ ɛlɛ!” Na zɔhane ala noko a bɛ muala bɛvuale bɛtafele zo a.
32Akee bɛradole mbaka tola bie mɔɔ bɛfɛlɛ ye Gɛtesɛmani Tola la, na Gyisɛse zele ye ɛdoavolɛma ne mɔ kɛ, “Bɛdɛnla ɛke bɛhendɛ me, na mekazɛlɛ.”
33Ɔvale Pita, Gyemise, nee Dwɔn ɔbokale ɔ nwo, na akee ɔbɔle ɔ bo kɛ ɔdi nyane nee alɔbɔlɛ kpole wɔ ye ahonle nu. 34Akee ɔzele bɛ kɛ, “Me ɛkɛla ɛlɛdi nyane ahɔ ewule nu bɔbɔ; bɛdenla ɛke bɛhendɛ na bɛ nee me ɛzinza.”
35Ɔhɔle ɔ nyunlu ekyii na ɔbutule aze na ɔzɛlɛle kɛ, saa ɔkɛyɛ boɛ a anrɛɛ amaneɛnwunlɛ dɔnehwele ne mɔɔ ɛlɛkendɛ ye la mmaba ɛlɛ.
36Na ɔzele kɛ, “Egya, Egya, debie biala ɛnza wɔ yɛ. Maa dwora kɔpo ɛhye ɛkpa me ti. Noko akee tɛ mɔɔ mame mekulo la ɔ, na emomu, wɔ ɛhulolɛdeɛ ɛdeɛ ne ɔ.”
37Akee ɔziale ɔrale ɛdoavolɛma nsa ne mɔ anwo ɛkɛ ne bieko na ɔradole bɛ kɛ bɛdeda. Na ɔzele kɛ, “Saemɔn! Wɔla ɔ? Wɔangola ɛ nee me anzinza dɔnehwele ko bɔbɔ ɔ? 38Bɛ nee me ɛzinza na bɛzɛlɛ na anrɛɛ yemɔ Abɔnsam bali bɛ nwo zo konim. Ɔboalekɛ, sunsum ne kulo, na nwonane ne a anwo ɛnyɛ se a.”
39Na eza ɔziale ɔhɔle bieko na ɔhɔzɛlɛle zɔhane ko ne ala. 40Ɔziale ɔrale bɛ nwo ɛkɛ ne bieko na ɔradole bɛ kɛ bɛdeda, ɔluakɛ ɛnee akee bɛvɛ somaa. Yɛɛ bɛannwu edwɛkɛ bieko mɔɔ bɛka bɛahile ye bɔbɔ a.
41Ɔrale mɔɔ tɔ, zo nsa ne la ɔzele bɛ kɛ, “Bɛhɔ zo bɛlafe; bɛlie bɛ menle! Kyɛkyɛ! Nafelɛ mekɛ ne ɛnyia ɛkpa nwolɛ. Bɛnlea! Bɛnyia bɛye me bɛwula atisesebɛvoma asa anu. 42Bɛrɛla! Bɛdwazo! Ɔwɔ kɛ yɛkɔ! Bɛnlea! Mɔɔ baye me amaa la ɛdwu ɛke dɛbadɛba!”
43Na ɛkɛ ne ala mɔɔ ɔ nloa wɔ zo ɔtɛtendɛ la, Dwudase, mɔɔ le ye ɛdoavolɛma ne mɔ ko, na yemɔ a baye ye amaa la nee menli dɔɔnwo mɔɔ bɛdu bɛfonyia mɔɔ Dwuuma asɔne mgbanyima nee azɛlɛvolɛ mgbanyima ne mɔ ɛzoa bɛ, na bɛdedɛ ahoholombaka nee nrɛlande mɔ la rale.
44Na Dwudase zele bɛ kɛ, “Ammaa bɛanvɛ na bɛanwu sonla mɔɔ bɛbahye ye la, saa mewolo menli ne mɔ anu na ahenle mɔɔ menwɔzoma ye la, ɛnee bɛze kɛ yemɔ ɛne.” 45Yemɔti mɔɔ bɛdwule ɛkɛ ne ala la pɛ, yɛɛ ɔhɔle Gyisɛse anwo ɛkɛ ne a. Ɔyɛle ye awawatuu na ɔzomanle ye kɛ asɛɛ ɛhulolɛ ngome ɛyi ye tɛkɛɛ la, na ɔzele kɛ, “Awulae!” 46Akee menli dɔɔnwo ne mɔɔ ɛdu ɛfonyia la hyele Gyisɛse na bɛzɔle ye nu kpundii kpalɛ. 47Akee Saemɔn Pita hwenle dadeɛ wɔ ye boa ne anu na ɔvale ɔpɛle Sɛlɛvolɛ Kpanyinli ne sonvolɛ ne anzo ko.
48Gyisɛse bizale bɛ kɛ, “Duzu ati a bɛdedɛ ahoholombaka nee nrɛlande mɔ nee adu bɛra me nwo zo bɛbahye me kɛ asɛɛ mele kodiawu anzɛɛ awule bie a? 49Duzu ati a bɛangye me wɔ Asɔne Sua Kpole ne anu a? Ɛnee mewɔ ɛkɛ ne mekilehile bɛ debie dahuu ne ala. Na ɛhye mɔ amuala noko ɛlɛsisi amgba, amaa mɔɔ ngapezoma ne mɔ hanle mɔɔ fale me nwo la ali munli.”
50Mekɛ ɛhye anu, ɛnee akee ye ɛdoavolɛma ne mɔ amuala ɛnriandi ye. 51-52Emomu, ɛnee kpavolɛ ko bie li bɛ nzi, mɔɔ ɛdanlɛ ala a bɔ ɔ kɔme nu a. Na mɔɔ menli ne mɔ yɛle kɛ bɛkye ye la, ɔguale ndwɛlɛ aze; ye ɛdanlɛ ne tetele kpasakpasa wɔ ɛhye ati. Ɔti ɔlɛ ɔ nwo zɔ a ɔnriandinle a.
Pita ɛkpo Gyisɛse
53Akee bɛvale Gyisɛse bɛhɔle Sɛlɛvolɛ Kpanyinli ne sua nu, na yeangyɛ biala yɛɛ azɛlɛvolɛ mgbanyinli ne mɔ nee Dwuuma mgbanyima mɔɔ ɛha la noko rayiale ɛkɛ ne a. 54Pita lile bɛ nzi moamoa lɔ dedee na akee ɔvale bɛ sa abo nyaa ɔhɔzele ngoko wɔ senle mɔɔ sonvolɛma ne mɔ ɛlɛte la anwo.
55Zɛhae mekɛ ye amuala, ɛnee azɛlɛvolɛ mgbanyinli ne mɔ nee Dwuuma Kɔɔto Kpole kpalɛ ne ɛlɛkpondɛ daselɛ adalɛ bɛali bɛatia Gyisɛse mɔɔ bɛgyinla zo a ɛnee Gyisɛse kɛli fɔlɛ na ɔlua zo bɛ sa aha ye bɛabua ye ewule fɔlɛ, na bɛahu ye a. Noko bɛ ɛvɛlɛ muala yɛle ɛvɛlɛhunlu. 56Alasevolɛ adalɛma dɔɔnwo ne ala yele bɛ nyunlu, noko akee bɛ nloa anzɛ bɛ nwo ɛlɛ, asolo awie biala daselɛlilɛ deɛ.
57Mɔɔ li amozi bɔkɔɔ la, mrenyia bie dwazole lile ɔ nwo daselɛ adalɛ zele kɛ, 58“Yedele kɛ ɔleka kɛ, ‘Mebabubu Asɔne Sua Kpole ɛhye mɔɔ menli vale bɛ sa zile la na meava kenle nsa meazi fofole mɔɔ beanva ɛsalɛ a bɛzile la!’ ” 59Na wɔ ɛhye anwo bɔbɔ, eza bɛ daselɛ ne mɔ mɔɔ bɛlile la anye ko!
60Akee Sɛlɛvolɛ Kpanyinli ne dwazole gyinlanle Kɔɔto ne anyunlu na ɔbizale Gyisɛse kɛ, “Ɛnrɛbua mɔɔ bɛlɛka bɛatia wɔ la anwo bie ɔ? Duzu a ɛlɛ ye ɛka wɔalie ɛdawɔ mumua nee nwo a?”
61Na ɛhye, Gyisɛse ambua nwole bie.
Akee Sɛlɛvolɛ Kpanyinli ne bizale ye kɛ, “Wɔmɔ a le Ngoanedievolɛ ne, Nyamenle Ra ne anzɛɛ?”
62Gyisɛse buale kɛ, “Medame ɔ, na bɛbanwu Mame, Sonla Ra ne kɛ, mede Nana Nyamenle asa fema ne azo na mevi anwuma amungu ne anu melesia meara azɛlɛ ye azo.”
63-64Na akee Sɛlɛvolɛ Kpanyinli ne vale ɛya ngome tetele ye tɛladeɛ ne anu na ɔzele kɛ, “Duzu bieko a yɛkpondɛ a? Duzu ati a yɛkɛhendɛ alasevolɛ bieko a? Bɛdabɛ bɛde ye munzudwɛkɛ ne. Duzu adwenlenzuzule a bɛlɛ ye wɔ nwo a?” Bɛ muala bɛbuale ye fɔlɛ kɛ ɔwɔ kɛ ɔwu.
65Akee bie mɔ bɔle ɔ bo kɛ bɛtoto nyɛlɛ ɔ nwo; bɛkyekyele ɔ nye ne mɔ na bɛbɔle ɔ bo kɛ bɛbobɔ ye abotokuma.
Mɔɔ bɛbobɔ ye abotokuma ne la, bɛzele kɛ, “Wɔmɔ kapezonli, nwane a bɔle wɔ mekɛ zɔhane anu a?” Sogyama ne mɔ mɔɔ ɛnee bɛ nee ye ɛlɛkɔ la bɛdabɛ bɔbɔ bɛbobɔle ye abotokuma ne bie maanle ɔyɛle alɔbɔlɛ.
66-67Mekɛ ɛhye anu, ɛnee Pita wɔ kɔɔto ne anzi nehane alie nwo ɛkɛ. Na mbɛlɛra ne mɔ mɔɔ sonle Sɛlɛvolɛ Kpanyinli ne la anu ko nwunle Pita kɛ ɔlɛte senle ne bie.
Ɔnleanle Pita koonwu na akee ɔzele ye kɛ, “Ɛdawɔ noko ɛle Gyisɛse, Nazalɛtenli ne ye ɛdoavolɛma ne mɔ anu ko.”
68Pita zale ɔ ne, na ɔzele kɛ, “Mɔɔ ɛlɛka la, menze nwolɛ bie hweledede!” Ɔhanle ɛhye na akee ɔhwenle ɔ nwo ekyii ɔhɔle kɔɔto sua ne anu ahanle.
Na ɛkɛ ne ala yɛɛ akɔlɛ bɔle a.
69Bɛlɛra ne nwunle ye na ɔbɔle ɔ bo kɛ ɔka yeahile menli mɔɔ gyigyi ɛkɛ ne la kɛ, “Yemɔ a gyi ɛkɛ ne la! Gyisɛse ye ɛdoavolɛma ne mɔ ko ɛne!”
70Pita zale ɔ ne bieko.
Na mɔɔ ɔhyɛle ekyii la, akee menli mɔɔ gyigyi senle ne anwo la bɛdabɛ bɛzele Pita kɛ, “Ɛdawɔ noko ɛle menli ɛhye mɔ bɛ nuhua ko, ɔluakɛ ɛle Galelinli, yɛɛ wɔ ɛdendɛlɛ noko kile!”
71Akee Pita bɔle ɔ bo kɛ ɔwa amonle na eza ɔka ndane kɛ, “Menze sonla ɛhye bɔbɔ mɔɔ bɛlɛka ɔ nwo edwɛkɛ la fee zɛ!”
72Na ɛkɛ ne ala yɛɛ akɔlɛ bɔle mɔɔ tia ye fane nwiɔ la a. Akee Pita hakyele edwɛkɛ ne mɔɔ Gyisɛse hanle hilele ye kɛ: “Kolaa na akɔlɛ abɔ fane nwiɔ la, ɛnee wɔkpo me fane nsa la.” Pita dwenlenle ɛhye anwo ala la akee ɔzunle kpole kpalɛ.
Currently Selected:
Maake 14: ONEN
Highlight
Share
Copy
Want to have your highlights saved across all your devices? Sign up or sign in
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
