Maake 15
15
Ndɛnebualɛ nee ye ɛhunlɛ
1Nwonlomɔ mangyee ne ala, azɛlɛvolɛ mgbanyinli ne mɔ, nee Dwuuma asɔne nu mgbanyinli, nee bɛ Nyamezonlenlɛ ahilehilevolɛ, Kɔɔto Kpole anzɛɛ Mɛla Eku ne amuala yiale nu kɛ bɛsuzu deɛ mɔɔ bɛkɛyɛ ye bieko la. Bɛ adwenlenzuzulɛ ne zile kɛ ɔwɔ kɛ bɛmaa azogya mɔɔ konlendeɛ wɔ bɛ nwo la fa Gyisɛse kɔmaa Paelɛte, mɔɔ gyi Wulomu Arane ne agyakɛ anu la.
2Paelɛte bizale ye kɛ, “Ɛnee wɔmɔ a ɛle Dwuuma ne bɛ belemgbunli ne la ɔ?” Gyisɛse buale ye kɛ, “Ɛhɛe, ɛdawɔ wɔha.”
3-4Akee azɛlɛvolɛ mgbanyinli ne mɔ hanle ninyɛmunli dɔɔnwo mɔɔ yeyɛ la hilele ye, na Paelɛte bizale ye kɛ, “Duzu ati a ɛmbua bie a? Asoo ɛnlɛ ɛhwee ɛnga wɔ mɔɔ bɛha bɛtia wɔ la biala anwo ɔ?”
5Noko akee Gyisɛse andɛ ɔ nloa anu bɔbɔ bieko, na ɛhye noko yɛle Paelɛte azibɛnwo totohyia.
6Na ɔle Dwuuma ne mɔ amaamuo kɛ saa Akpabɛnwo ɛvoyia ne dwu zo biala a, ɔwɔ kɛ Paelɛte ye Dwuuma mɔɔ bɛgua bɛ efiade la anu ko bɛmaa ɔkɔ ye sua nu, efiadedavolɛma ne mɔ anu ko biala mɔɔ menli ne kɛze kɛ bɛye ye la. 7Zɛhae mekɛ ye noko, ɛnee Dwuunli ko mɔɔ bɛfɛlɛ ye Balabase, mɔɔ bɛbua ye nee ɔ gɔnwo mɔ bie mɔɔ bɛhunle menli wɔ basabasayɛlɛ mekɛ bie anu la fɔlɛ la, noko la efiade ne bie.
8Na ɔrale ye kɛ menli dɔɔnwo bie hɔle Paelɛte anwo zo hɔzɛlɛle ye kɛ ɔye efiadedavolɛma ne mɔ anu ko ɔmaa bɛ kɛmɔ ɔyɛ ye ala la.
9Na Paelɛte bizale bɛ kɛ, “Ɛnee menye ‘Dwuuma Belemgbunli’ ne memaa bɛ ɔ? Yemɔ a le nuhua ne mɔɔ bɛkulo kɛ meye ye la ɔ?” 10Ɔluakɛ, ɛnee akee ɔdaye mumua ne yenwu kɛ ɔlua ɛkpɔlɛ gyɛne ti ala a azɛlɛvolɛ mgbanyinli ne mɔ ɛye Gyisɛse ɛmaa a.
11Mekɛ ɛhye anu, azɛlɛvolɛ mgbanyinli ne mɔ wulale menli dɔɔnwo ne anyebolo kɛ bɛbiza bɛmaa bɛye Balabase, na emomu, tɛ Gyisɛse ɔ.
12Paelɛte bizale bɛ kɛ, “Na saa meye Balabase a, ɛnee akee kɛ menyɛ nrenyia ɛhye mɔɔ bɛfɛlɛ ye bɛ belemgbunli la ɛ?”
13Bɛdeanle nu bɛzele kɛ, “Bɔ ye meanubaka nu!”
14Paelɛte bizale bɛ kɛ, “Na duzu ati ɔ? Duzu ɛtane a yeyɛ a?” Noko ɛnee bɔ zo mɔɔ bɛlɛtea nu kpole kpalɛ a: “Bɔ ye meanubaka nu!”
15Akee kɛmɔ Paelɛte noko sulo kɛ begyebegyeyɛlɛ kɛra, na ɔhulole kɛ ɔkɛmaa menli ne arɛle kɛdɔ bɛ azule nu la ati, ɔyele Balabase ɔmaanle bɛ. Na ɔmaanle bɛbilale Gyisɛse empele, na ɔyele ye ɔmaanle bɛ kɛ bɛhɔbɔ ye meanubaka nu.
16-17Na akee Wulomu azogya ne mɔ vale ye hɔle Arane ne anu, na bɛvɛlɛle Arane ne anu sinzavolɛma ne mɔ amuala maanle bɛrayiale, na bɛwulale Gyisɛse tɛladeɛ kɔbenle, na bɛnwonle mbowule abotile bɛkpolole ɔ ti. 18Akee bɛzomanle ye, bɛdeɛdeanle nu bɛzele kɛ, “Akoaba! Dwuuma Belemgbunli!” 19Na bɛvale empele bɛbilale ye na bɛtotole ɔ nwo nyɛlɛ na akee bɛhotole ye kɛ “bɛyeyɛ” ye.
20Mɔɔ akee bɛdabɛ bɛvɛle na bɛ kunlu dwole bɛ nwo la, bɛyele tɛladeɛ kɔbenle ne na bɛvale ɔdaye mumua ne ye deɛ ne bɛwulale ye bieko, na bɛ nee ye hɔle kɛ bɛkabɔ ye meanubaka nu.
21Na bɛhyele Saemɔn mɔɔ vi Saelini, mɔɔ ɛnee ɔvi namule nu ɔlɛba, na ɔ nee bɛ yiale la kɛ ɔboa Gyisɛse wɔ ye meanubaka ne ɛzoalɛ nu. Saemɔn ɛhye ɔ mra a le Alɛzɛnda nee Lufɛse.
22Na bɛ nee Gyisɛse hɔle ɛleka bie mɔɔ bɛfɛlɛ ye Gɔlogɔta, mɔɔ ɔ bo kile kɛ, Etile kanrɛlɛ la. 23Na bɛvale nwanye mɔɔ bɛva bɔnyema bɛfonla nu la bɛmaanle ye kɛ ɔnlo, noko akee ɔkpole. 24Na akee bɛbɔle ye meanubaka nu, na bɛhwenle ye tɛladeɛ ne anwo adunyi kɛ saa ɔkɛyɛ nwane deɛ a.
25Bɛbɔle kɛyɛ nwonlomɔ dɔne ngɔnla la yɛɛ bɛbɔle ye meanubaka nu a.
26Na bɛhɛlɛle deɛ mɔɔ ɔti bɛhunle ye la bɛguale ɔ ti sɔlɔ ɛkɛ ne wɔ taboa sinli bie azo. Deɛ mɔɔ bɛhɛlɛle la se, “Dwuuma ne bɛ Belemgbunli.”
27Zɔhane nwonlomɔ ne bɛbɔle awulema nwiɔ bie noko meanumbaka nu, bɛ meanumbaka ne mɔ wɔ ye ɛdeɛ ne foa nee foa yɛɛ yemɔ ɔwɔ bɛ avinli a. 28Ɔti ɛhye maanle Ngɛlɛlera ne mɔɔ se, “Bɛdianle ye bɛbokale ɛtanevolɛma anwo” la penle zolɛ.
29-30Menli mɔɔ ɛlɛpɛ nu ɛkɛ ne la zile ye amgbu, na bɛhɔsɔhɔsɔle bɛ ti.
Bɛzele kɛ, “Wio! Se wɔmɔ ɛne! Nɔhalɛ, ɛkola ɛbubu Asɔne Sua Kpole ne ɛgua na ɛsi ye kenle nsa pɛ! Saa ɛ nwo yɛ ɛzulolɛ zɛhae ɛdeɛ a, ɛnee die ɛ nwo, na fi meanubaka ɛhye azo dwu aze.”
31Azɛlɛvolɛ mgbanyinli ne mɔ nee asɔne mgbanyima mɔɔ gyigyi ɛkɛ ne la noko zile ye amgbu ne bie zele kɛ, “Awie mɔ ɛlielɛ a ɔ nwo yɛ nwolɛ ndɛ a, na ɔngola ɔnlie ɔdaye mumua ne ɔ nwo!”
32“Ei, Ngoanedievolɛ ne ɛne!” Menli ne mɔ wudole ye, na bɛzele ye zɛ. “Saa wɔmɔ yɛɛ ɛle Yizilayɛma Belemgbunli ne a ɛnee ɛvi meanubaka ne azo dwu aze na yɛbalie wɔ yɛali!”
Na nwulema nwiɔ ne bɔbɔ mɔɔ bɛdabɛ be nee ye dewu la noko zile ye amgbu.
33Na ewia henlema ne, awozinli kabii rahedale aleɛabo amuala dedee bɛbɔle ewiazo dɔne nsa.
34Na akee Gyisɛse vale ɛnelɛ kpole bie deanle nu zele kɛ, “Eli, Eli, lɛma sabaketani?” Ɔ bo a le kɛ: “Me Nyamenle, me Nyamenle, duzu ati a wɔkpo me a?”
35Menli mɔɔ gyigyi ɛkɛ ne la bie mɔ dwenlenle kɛ ɔlɛfɛlɛ kapezonli Yilaegya. 36Ɔti nrenyia ko bie nriandinle hɔvale emiane bɔle nwanye ɛnwonle bie anu na ɔdendenle ye anwuma wɔ baka ti ɔmaanle ye.
Akee nrenyia ne zele kɛ, “Bɛmaa yɛnlea kɛ saa Yilaegya kɛralie ye ɔkɛdwula ye aze amgba a!”
37Akee Gyisɛse eza deanle nu kpole bieko, na akee ɔwule.
38Na Asɔne Sua Kpole ne anu ɛdanlɛ ne suanle keledede vi ɔ ti zo radwule ɔ bo.
39Na mɔɔ Wulomu sogya kpanyinli ne mɔɔ gyi ye meanubaka ne anwo la nwunle kɛ ɔzile mɔɔ ɔwule la, ɔdeanle nu ɔzele kɛ, “Nɔhalɛ, ɛhye a le Nyamenle Ra ne a!”
40Ɛnee mraalɛ bie noko gyi moa ɛlɛnea ye, na bɛmɛ a le Male mɔɔ vi Magedala la, Male (mɔɔ ɔ mra a le Gyemise Ekyi nee Dwose la), yɛɛ akee Salome nee mɔɔ ɛha la. 41Bɛmɛ nee Galeli mraalɛ dɔɔnwo mɔɔ doale ye na bɛzonlenle ye wɔ Galeli, na bɛlile ɔ nzi bɛ nee ye rale Gyɛlusalɛm la.
42-43Ɛhye mɔ amuala zile wɔ kenle ne mɔɔ li Ɛnwomenlelielɛ Kenle ne anzi la. Amozi ekyii wɔ kenle ko ne ewia ne Dwosefi mɔɔ ɔvi Arelematia, na ɔlɛ dibilɛ kpole wɔ Dwuuma Kɔɔto Kpole ne anzɛɛ Mɛla Eku ne anu na eza noko ɔ nye la Nana Nyamenle Belemgbunli maanle ne adenle la, zile ɔ kɛnra hɔle Paelɛte ɛkɛ hɔzɛlɛle Gyisɛse funli ne.
44Ɛnee Paelɛte ɛnlie ɛnli kɛ Gyisɛse amgba ɛwu dɛbadɛba, ɔti ɔvɛlɛle Wulomu sogyanli kpanyinli ne mɔɔ nea ɛkɛ ne la na ɔbizale ye. 45Sogyanli kpanyinli ɛhye zile ye pi kɛ amgba yewu, ɔti Paelɛte zele Dwosefi kɛ akee ɔhɔva ye funli ne.
46Dwosefi dɔle kisane bie, na ɔyele Gyisɛse ɔvile meanubaka ne azo, na ɔvale ɔkyekyele ɔ nwo na ɔziele ye wɔ bolɛ mɔɔ bɛze ye nla la anu, na ɔhundole bolɛ ɔnyinle anlenkɛ ne anloa.
47Na Male mɔɔ vi Magedala la, nee Male, Gyisɛse ɔ nli, noko wɔ ɛkɛ ne ɛlɛnea melɛ mɔɔ bɛdole Gyisɛse nla nu la.
Currently Selected:
Maake 15: ONEN
Highlight
Share
Copy
Want to have your highlights saved across all your devices? Sign up or sign in
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
