Iŋɛ́nínɛ yi Isáaŋ 7
7
Ɔlɔŋ ú peétépí pé Yésus anɛ nikúli ní Támbák
1É kélém kúɛ́yɛ́, yɛɛ́n Peéŋele péni petényí ké embún éni yé kúúsí, pákímba imfún esie íni sí kúúsí, ɛ́ɛ́ tɛ ómoómí tifúkít e kúúsí, tɛ ká asaá, tɛ á putɛ́. 2Yɛɛ́n andíkɛ́k Éŋele olotí umákatinan kiáyí kí nipálɛ́n; umapá na puákɛ́n pulínsí pú Támbák ewú unyɛɛ́ ɔ́ kusɔ́t. Ne ekelú mɔkɔ́n ukanyi é Peéŋele epe péni pámaápiá pukaaka pú kuséésitenyi kúúsí na asaá: 3«Nutiɛ́kɛ́t kuɛl kúúsí kilɔk, tɛ asaá tɛ matɛ́; túsiɛ́l kuák siki eŋelípuólí u Támbákɛ́ɛ waasɔ́ pulinsí á nupɔl.» 4Yɔɔ́p pɔ́ɔyɔ kitáám kí pɛɛnd epé pámaák pɔ́ pulinsí á nupɔl: pámapá tukɔ́n ambak ne etín áandɛ́ ne túni, ké esíp yeem yé nikúli ní Isilayɛ́ɛl: 5Tukɔ́n túát na túandɛ́ é nikúli ní Yúta, tukɔ́n túát na túandɛ́ é nikúli ní Lupɛ́n, tukɔ́n túát na túandɛ́ é nikúli ní Káat, 6tukɔ́n túát na túandɛ́ é nikúli ní Asɛ́ɛl, tukɔ́n túát na túandɛ́ é nikúli ní Nɛfɛtalí, tukɔ́n túát na túandɛ́ é nikúli ní Manasé, 7tukɔ́n túát na túandɛ́ é nikúli ní Símiyon, tukɔ́n túát na túandɛ́ é nikúli ní Léfi, tukɔ́n túát na túandɛ́ é nikúli ní Isakáal, 8tukɔ́n túát na túandɛ́ é nikúli ní Sapulɔ́ɔŋ, tukɔ́n túát na túandɛ́ é nikúli ní Yúsɛp, tukɔ́n túát na túandɛ́ é nikúli ní Pɛŋɛsamɛ́ŋ. 9Pukáán tápukan, yaand oyoosin, yɛɛ́n kimbí kí pɛɛnd mɔɔnd tiányípá ukuan. Pámapá pɛɛnd pá punyapitɔŋɛ pí kúúsí kuum, punya ésípi yeem, punyatukálɛ tuum. Pámapá petényí ó pusíó pú indáŋa no ó pusíó pú mɔnɔ́ kitúúmbɛ́ɛ, na pinyuŋa piifúmfɛ́ɛ nɔ piɔŋɛ́ kɔ́ ɔmbɔ́k. 10Pɔ́ɔyɔ ekelú mɔkɔ́n ɛ́ɛ́: «Kisótio óókoólinon ku Támbákɛ́ɛ waasɔ́ unyɛɛ́ ɔnyɔ́l kí indáŋa nɛɛyɛ́ nɔ mɔnɔ́ kitúúmbɛ́ɛ!» 11Peéŋele pɔ́ɔpɔŋ indáŋa, posíósió na piluŋaluŋa pínyɛɛ́ píni; péesuk tunúú e kúúsí ó pusíó pú indáŋa, póond pɔ́ɔlɔŋimɛt, tupɔl túɔ́p kííken kúúsí ó kuómokosi Támbákɛ́ɛ. 12Pɛ́ɛlɛ ɛ́ɛ́: «Anakáánɛ! Támbákɛ́ɛ waasɔ́ ɛ́ɛ́kɛɛsikɛnɛn no kiómoko, nuúmu, tutáát, ilémbie, nukanyi, pukaaka ni imbekí é teeníík ne níík! Anakáánɛ́!» 13Osíósíó omotí wookiŋówun ɛ́ɛ́: «Pénín pɛɛnd epéné pɛ́nyɛɛ́ na pinyuŋa piifúmfɛ́ɛ? Naánɛ́ póólinonée?» 14Yoondinyi wɔ́ ɛ́ɛ́: «Ɔkúnɔ́kɔn, aŋúɛ emenyené.» Wɔ́ káámɛ ɛ́ɛ́: «Pányɛ pɛɛnd epé páányípá é muyú muukɔ́n. Páásuká pinyuŋa píɔ́p péfúúmi pɛ́ɛ á manɔ́ŋ mɔ́ mɔnɔ́ kitúúmbɛ́ɛ. 15kúúkɔ́ pɛ́nyɛɛ́ petényí ó pusíó pú indáŋa i Támbák, póómokosi wɔ́ putúum putúum, puɔ́súm puɔ́súm kɛ́ɛ́yɛ́ á kitamb. Ewú unyɛɛ́ ɔnyɔ́l kí indáŋa kapá ekííkí wɔɔpɔ́. 16Tɛ puɔ́s insaná tiákaand anúmat wɛɛ́tɛ, tɛ niíta nítíákaand kuɛl wɛɛ́tɛ; tɛ ɔɔ́ny, tɛ elúlúke wɛ́ɛ́yɛ́ tiákaand epíkíik pɔ́. 17Ó pusíó ɛ́ɛ́ mɔnɔ́ kitúúmbɛ́ɛ unyɛɛ́ etényí ɛ́ kikɛtɛ́kɛtɛ́ɛ kí indáŋa kapá ekííkí wɔɔpɔ́, ukeendesi pɔ́, uyuukan nɔɔpɔ́ é nuúyu núsílanɛ́ɛ moomb méekenyée kusɔ́t. Támbák koond úwóónit pɔ́ andilɛ́ kitikit kɔ́ɔ́p ké eŋís.»
Currently Selected:
Iŋɛ́nínɛ yi Isáaŋ 7: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL