Iŋɛ́nínɛ yi Isáaŋ 6
6
Mɔnɔ́ kitúúmbɛ́ɛ mátúan kuolun pilití pítíndátɔ́
1É kélém kúɛ́yɛ́, yɛɛ́n mɔnɔ́ kitúúmbɛ́ɛ u Támbák móólún kilití kíkutúan é pilití epie pítíndátɔ́neémue pémeélité kálatɛ na pɛ́ɛ. Umɛɛlɛ́ wooluno kilití kikáánɛ́, yɔɔ́p kiluŋaluŋa kímotí, é píni, mɔ́ɔ́yɛ́t ne ekelú mɔkɔ́n, ɛlɛɛ́ imbalamandá, ɛ́ɛ́: «Óló!» 2Yooyoosin, yɛɛ́n kikapilɛ́ kiifúmfɛ́ɛ. Ewú umaápá ɔtɔ́pímɔ́t kɛ́ɛ mapá na kipɛs kɔ́ ɔmbɔ́k; waapia indanyáa i mɔɔnd úmányipíányɛn, woond waayɔɔk á kuapíányɛ́n kɔɔ́mɔ kitikit. 3Aká mɔnɔ́ kitúúmbɛ́ɛ moólún kilití kíkáandíɛ, yɔɔ́p kiluŋaluŋa kíkáandíɛ ɔ́ɔyɔ ɛ́ɛ́: «Óló!» 4Kipál timaná, kikapilɛ́ kílotí waa, tupilitupilɛ. Ewú umaápá ɔtɔ́pímɔ́t kɛ́ɛ waapia pukaaka ɛ́ɛ́ úkúŋɛt kiyeéwe e kúúsí ɛ́ɛ́ pɛɛnd ɔ́ɔ́ninɔn, póond péeki wɔ́ imfak i pitíí yiiŋɔ́n. 5Umɛɛlɛ́ wooluno kilití kíkátátúɛ, yɔɔ́p kiluŋaluŋa kíkátátúɛ ɔ́ɔ́yɔ ɛ́ɛ́: «Óló!» Yoyoosin, yɛɛ́n kikapilɛ́ kiiŋénépén. Ewú umaápá ɔtɔ́pímɔ́t kɛ́ɛ mapián pufɛkɛ́n pinuá kɔ́ ɔmbɔ́k. 6Yɔɔ́p puandá ɛlɛɛ́ ekelú, woólinon ɛ́ kikɛtɛ́kɛtɛ́ɛ kí piluŋaluŋa epie píni, wɔ́ɔyɔ ɛ́ɛ́: «Kílo omoómí u imbɛsɛ á pinamá pí puóli pú puɔ́s púmoómí, pokílo pátátɔ́ pɔ́ ɔlɛ́k á pinamá pí puóli pú puɔ́s púmoómí. Ɔtipikɔ́ɔ́tɛn kisɛŋ na makɛp!» 7Mɔnɔ́ kitúúmbɛ́ɛ u Támbák mɛɛlɛ́ wooluno kilití kíkénie, yɔɔ́p kiluŋaluŋa kíkénie ɔ́ɔyɔ ɛ́ɛ́: «Óló!» 8Yooyoosin, yɛɛ́n kikapilɛ́ ilíndiilíndɛ. Ewú umaápá ɔtɔ́pímɔ́t kɛ́ɛ nyɛ kisiɛ́n ɛ́ɛ́: «Nikúe», wɔ́ ó pusíó kitɔŋ kí peekúén ɔ́ɔ́ŋɔn kɛ́ɛ́yɛ́. Péékeeki pɔ́ pukaaka á niap nímoómí ká aŋap éni yɛ́ pɛɛnd pé kúúsí kitikit ɛ́ɛ́ pɔ́ɔ́nɔ pɔ́ ne pitíí, nɔ ɔndumɔ́, na puandá kitikit púnyɛɛ́ púkuɔ́n mɔɔnd, na manyam mé ekít mé kúúsí. 9Mɔnɔ́ kitúúmbɛ́ɛ mɛɛlɛ́ wooluno kilití kí kátáanuɛ, yɛɛkɛɛ́n, iŋúsíkúsíe i kɔɔ́mɔ pátálanɛ́ nupoo nú Támbák, pɛɛnd epé pɔ́mɔɔ́nɔ́ ó pusíó pú mekélíe má Támbák, pɔ́ andíkɛ́k petétúnyí pɛ́ɛ́yɛ́. 10Pɛɛnd pakáánɛ́ mapá páánsa na pukaaka, pɛ́ɛlɛ ɛ́ɛ́: «Efuŋ kilɔ́mbɔ́ anyɛ kifúúmak oond ɔɔyɔ kémuémue, ekepéétenyi kuám níík ó kusóósosi pɛɛnd pé kúúsí pɔ́mɔɔ́tuɔ́nɔ́ ɛ́ɛ́ pásámb kilia kí manɔ́ŋ máásɔ́?» 11kúúkɔ́ pémeéki siki mɔɔndɛ kinyuŋa kiifúmfɛ́ɛ, pɛ́ɛ́pí kɔɔ́p ɛ́ɛ́ páand epééti pukét ɛ́ɛ́ ɔlɔŋ ú pɔ́kúɔ́p epé pɔ́kɔɔ́nyɔ́ɔ́n niaŋ níɔ́p ɔ́ɔsiwɔɔ́kɛ́n pɔ́. 12Yaand kuɛ́n mɔnɔ́ kitúúmbɛ́ɛ óóluno kilití kíkátíndátúɛ. Umɛɛlɛ́ wooluno, kúúsí kuépíéyitin na pukaaka; ɔɔ́ny wéénep ɛlɛɛ́ pilaá pí pulík, oólí wuum wáanyua ɛlɛɛ́ manɔ́ŋ. 13Muótíótío múnyɛɛ́ mɛnɛ́mɛnɛ́ɛ múakua e kúúsí yá aná masamɔ́ mɔɔtɔmbɔ́ kulukutené e kúúsí aká emfún wɔɔkɔ́n fúkenée. 14Mɛnɛ́mɛnɛ́ɛ wáasákɛn ɛlɛɛ́ akan páákalanɛ́ɛ; ikɛ́l na mulua múepíéyitin tɛ ɛ́ɛ́ múand apá kɔɔ́mɔ mamaápá insúá. 15Pefuŋ pé kúúsí, piandá pí pɛɛnd, pɔkɔ́n pé pisimb, inɛ́m sí pɛɛnd, pimfuŋáfuŋa pí pɛɛnd, nɔ piɔ́lí piim, nɛ pɛɛnd peem pɛ́nyɛɛ́ weéŋelí, peem pɛ́ɛ́pínɛmbɛn kí imbík nɛ ɛ́ kikɛtɛ́kɛtɛ́ɛ kí atányi yɔɔkɔ́n kí ikɛ́l. 16Pɔ́ɔyɔn ikɛ́l na atányí yɔɔkɔ́n ɛ́ɛ́: «Ánutúkuanɛn núond nútúnɛmbɛn kaáyɛ́ ne eŋís yá mɔɔnd unyɛɛ́ ɔnyɔ́l kí indáŋa, kaáyɛ́ ni ilóp í mɔnɔ́ kitúúmbɛ́ɛ. 17Ó pusíó ɛ́ɛ́ puɔ́s puukɔ́n pú ilóp yɔ́ɔ́p máasíám, tɛ mɔɔnd omoómí tipá pɔ́kuɔ́t yɛ́ɛ.»
© 2026, CABTAL