Iŋɛ́nínɛ yi Isáaŋ 8
8
Pómóólún kilití kíkátíndátɔ́neémue
1Mɔnɔ́ kitúúmbɛ́ɛ mɛɛlɛ́ wooluno kilití kíkátíndátɔ́neémue, kiyeéwe kíapá mɛnɛ́mɛnɛ́ɛ é kiénsi kí kikulɛ́. 2Yɛɛ́n Peéŋele epe pátíndátɔ́neémue pɛ́nyɛɛ́ petényí ó pusíó pú Támbák. Péekeeki pɔ́ insɛ́p ítíndátɔ́neémue. 3Éŋele olotí woosiondó á masiá má putálɛ́n kifunɔ́; umapián kɛ́ɛ́yɛ́ kɔ́ ɔmbɔ́k puandá epú pépúlulesíé pulɔ á pɔ́, putúúné no kóol. Péekeeki wɔ́ pulɔ puólíkóoli ɛ́ɛ́ weeki asɛ nupoo, ni imbísókólí sí peétépí pé Yésus peem, á putálɛ́n kifunɔ́ pú kóol púnyɛɛ́ ó pusíó pú indáŋa. 4Inyóki sí pulɔ símoólínón á puandá epú Éŋele maápíán kɔ́ ɔmbɔ́k síámákatɛn Támbákɛ́ɛ ni imbísókólí sí peétépí pé Yésus. 5Éŋele wɔɔkɔ́l puandá pépúlulesíé pulɔ kɔ́ɔk, wowóónyi pú na pikána pí niwánɛ́n nínyɛɛ́ iŋúsíkúsíe i putálɛ́n kifunɔ́, waatɔ́ɔt puɔ́ e kúúsí; imbalamandá síánsɛt, ikelú siɔ́pɛk, mumuɛnyimuɛnyɛ múasak mɛnɛ́mɛnɛ́ɛ, kúúsí kúepíeyitin. 6Peéŋele pátíndátɔ́neémue pámaápián insɛ́p ítíndátɔ́neémue pɛ́ɛpiɛ́yɛn ɔ́ kutɔ́ŋɛt sɛ. 7Éŋele ukutúan wɔɔtɔ́ŋɛt insɛ́p yɛɛyɛ́. Iŋum i atányí ne yiik mɔɔsɔ́ na manɔ́ŋ yaakɔɔn kúúsí. Niap nímoómí ká aŋap átát yé kúúsí níapɛk, niap nímoómí ká aŋap átát yá matɛ́ níapɛk, pikuti piikɔ́si kitikit píapɛk. 8Éŋele ukáandíɛ wɔɔtɔ́ŋɛt insɛ́p yɛɛyɛ́. Puandá ɛlɛɛ́ kiandákáand kí ɔkɛ́l ú yiik; póokombín pú ká asaá. Niap nímoómí ká aŋap átát yá asaá níɛ́yɛ manɔ́ŋ. 9Niap nímoómí ká aŋap átát yá piluŋaluŋa písɔ́tɔnɛ́ɛ ká asaá níekú, niap nímoómí ká aŋap átát yé pesitíme níakatɛk. 10Éŋele ukátátúɛ wɔɔtɔ́ŋɛt insɛ́p yɛɛyɛ́. Kiandákáand kí yoótíótio, kímaápúlúlá ɛlɛɛ́ kiít kí tupal, kíɛfɔk mɛnɛ́mɛnɛ́ɛ; kíakɔɔn niap nímoómí ká aŋap átátɔ́ sí isaá siiŋétí ne tuúyu. 11Kisiɛ́n kí yoótíótio ikáán kínyiɛ́ ɛ́ɛ́: Kunua. Niap nímoómí ká aŋap átátɔ́ yó moomb níɛkɛɛ́y kitɔ́nd, pɛɛnd puólíkóoli páapuwá moomb makáánɛ́, peem péekú ó pusíó ɛ́ɛ́ ilɔk mapá ó moomb. 12Éŋele ukéni wɔɔtɔ́ŋɛt insɛ́p yɛɛyɛ́. Páasápɛt niap nímoómí ká aŋap átátɔ́ yɔ́ ɔɔ́ny, yó oólí no yó muótíótio. Imbíne yaakɔɔn niɛ́tɛ niap nímoómí ní ɔɔ́ny, ní oólí na ní muótíótio. Niap nímoómí ní puɔ́s ne putúk ká aŋap átátɔ́ níakua imbíne. 13Yaand oyoosin. Yɛɛ́n nukóli ééleken kaáyɛ́ɛ é kietelíe. Yɔɔ́p núu núɔyɔ ekelú mɔkɔ́n ɛ́ɛ́: «Kilɔk kikáánɛ́ óó! Kilɔk kikáánɛ́ óó! Kilɔk ákuanɛn pɛɛnd pé kúúsí aká Peéŋele epe pátátɔ́ péményisíén kɛɛ́nyɛ́ɛlɛ pɔ́tɔ́ŋɔ́ insɛ́p siɔ́p!»
© 2026, CABTAL