2 Korɛŋto 7
7
1Pɔ́ŋmɛ́ páá pɛ́ mə ŋkʉyě kaʼatɛ nɛ́, njʉ́ péré kaʼ pɛɛ yiŋí nɛ́, piŋi sǒ mbəb yiŋi ne tómbəb yiŋí, ŋkyé ŋkɔŋɔ yɔ́b yɛ́ tɛɛmbɛ a síŋ ndzab mbəb yiŋi, kii ŋgâ zhʉye yiŋí nɛ́. Néré kɛ́ʼɛ́, piŋi sáʼtʉŋ, cʉ̌yi mbɛ pú Mboʼmvé tɛ́ ŋgú mê. Piŋi faʼ nɛ́ kɛ́ʼɛ́ ne pɔ́ɔ́ Mboʼmvé.
Ndebéne mɛ́ Pɔ́lə kɛ tsɛ́ʼɛ́ Korɛŋto nɛ́
2Puŋ téŋé ywoʼ ndzó ndzɔʼ yuŋ ne psi. Psi sháŋa mbəb ntsyé ŋɔŋ pó, mbé shʉyɛ̂ ŋɔŋ mkpéé foʼ ye pó. Psi kɛ pe tsɔ́ʼ sí mbəb ŋɔŋ ndzɔ́ʼɔ́ puŋ pó. 3Mə ntsɔ́ yekénɛ́ no ne puŋ, pe ne fǐʼne wuŋ pó. Ŋkyé ŋgâ mə kɛ pě nsó ŋgâ pǔŋ ndzó ndzɔʼ zhí, kaʼatɛ mbáŋ zhyémve yɛ́ psi náʼá mpfɔ́ nɛ́.
4Mə ntíí ŋkɔŋɔ ndzɔʼ ya náá pé mbəb puŋ, ntséʼé ntiʼéne kaʼatɛ ŋkyé wuŋ, ntséʼé tsúbɔndzɔʼ zááme, mbɛ ndzɔ́ʼɔ́ ŋkɔŋɔ ŋgəʼo zhí náá, mə ke tsɛʼɛ ndebéne zááme. 5Ŋkhoʼyɛ́ psi kɛ páŋá Makadoniya nɛ́, psi kɛ zyé mbé tséʼé mɔ́ŋ saŋ ne fúrune pó. Pɛ ŋgəʼo gháʼmbwó myí. Pɛ ntsɔ̂ kɛ zhyɛ̂ ywí ntɛ́ɛ́, pɔ́ɔ́ pó mbɛ́ ndzó ndzɔʼ zhí. 6Ntsʉʼmbé Mboʼmvé, yé wɛ́ a fɛ́ tʉ̌ŋ pwó pɔŋ pɛ́ mbwó mɔ́b pɔ́d nɛ́, kɛ níŋí ndzɔʼ zhí, ŋgyɛ̂ Titə kʉ́yó pfúŋɔ́ psi. 7Ke mbé pɛɛ ne ndaʼ njʉ́ a kɛ ŋkʉyó nɛ́ pó, tsʉʼmbɛɛ ne tʉŋ mɛ́ pǔŋ kɛ fɛ́ pwó ye nɛ́. A kɛ sə́ŋɛ́ ywí ne kpaʼ yɔ́b yɛ́ ndzɔʼ yuŋ kɛ tsé kʉ́yé nɛ́, ne ntsúŋine mɛ́ pǔŋ kɛ tséʼé nɛ́, ne zyaŋámbəb yɛ́ pǔŋ tséʼé ŋkyé ya nɛ́. A kɛ pé néré kaʼatɛ mə mbó tséʼé ndáá Ndebéne zááme ŋkʉ́rʉ́.
8Ɔ́ŋɔ́ a pɛ́ɛ́ yɛ́ ŋweʼe yɛ́ mə kɛ fɛ́ ne puŋ nɛ́ kɛ fɛ̌ ntsúŋine nɛ́, mbǒ a tsé mbé vaʼa ya ŋkhoʼyɔŋ pó. Mbɛ mbéyɛ́ a kɛ váʼ ya nɛ́, mbǒ ŋweʼe yéré mə njʉ́ ŋgâ a kɛ ke mváʼá wuŋ, mbɛ ne mɔ́ŋtiʼa khoʼ. 9Mə tsé nɛ́ ndébɛ ŋkhoʼyɔŋ. Mbe pé ŋkyé ntsúŋine múŋ pó, ntsʉʼ mbé ŋkyé sɛrɛ́ ndzɔʼ yɛ a fɛ́ ne puŋ nɛ́. Ŋkyé ŋgâ ntsúŋine múŋ kɛ twɔ̌ pwó Mboʼmvé, kaʼatɛ, tɛɛmbɛ psi nsó ŋgâ, psi kɛ pe zhyɛ́ puŋ tséʼé cyó ŋgəʼo pó. 10Ŋkye ŋgâ ntsúŋine yɛ́ a twɔ́ pwó Mboʼmvé nɛ́, fɛ̌ sɛrɛ́ ndzɔʼ yɛ́ a tsyaŋa pɔŋ fɛ ndúŋú ndzǔne, kii cyó swɔ̂ne pó mbé nɛ́. Ntsʉʼmbé, ntsúŋine yɛ́ a twɔ́ pwó mvémvé nɛ́, fɛ̌ vó. 11Puŋ zhʉ́ nɛ́ yɔ́b yɛ́ ntsúŋine yɛ́ a twɔ́ pwó Mboʼmvé nɛ́, zhyɛ̂ mbəb puŋ nɛ́:
ɔ́ŋɔ́ puŋ kɛ tséʼé zyaŋámbəb ne ŋgyɛ̌ne pɛ meno!
Pǔŋ kɛ yɔ́ŋ vɔ̌no!
Pǔŋ kɛ nsó meno kəpɔŋ pɛ́ pɔŋ kɛ zhyɛ́ nɛ́!
Pǔŋ kɛ tséʼé pɔ́ɔ́ ne ŋgyɛ̌ne no kəpɔŋ!
Pǔŋ kɛ kʉyě ne mbône njʉ́ ya!
Pǔŋ kɛ tséʼé zyaŋámbəb ne fǎʼne pwó Mboʼmvé!
Pǔŋ kɛ pe tee kii zhyɛ́ no mbəb ŋɔŋ wɛ́ a kɛ vɔ̂ no nɛ́ pó!
A ne ŋkɔŋɔ ndzáʼá náá, Pǔŋ kɛ nyǒʼ ne tómbəb yuŋ ŋgâ puŋ sǒ ndáŋ, ne yéré no. 12Mbɛ mbé yɛ́ mə ŋwéʼé ŋweʼe ne puŋ nɛ́, mbǒ a pɛɛ ŋkyé ŋɔŋ wɛ́ a faʼa kəpɔŋ nɛ́ pó, mbé pɛɛ ŋkyé ŋɔŋ wɛ́ pe fǎʼ kəpɔŋ mbəb ye nɛ́ pó. A pɛɛ ne nyǒʼne ne puŋ, zyaŋámbəb yɛ́ puŋ tséʼé ŋkyé ywí nɛ́, siŋ Mboʼmvé.
13Yekénɛ́ yɔ́b yɛ́ nɛ́, a kɛ tsúbú ndzɔʼ zhí nɛ́. A ke mbé pɛɛ ndaʼ tsúbɔndzɔʼ pó, psi tséʼé ndebéne ŋkʉ́rʉ́ zááme ŋkyé ndebéne mɛ Titə tséʼé ŋkyé njʉ́, ŋkɔŋɔ wuŋ náá, puŋ kɛ zhyɛ́ ŋgâ ndzɔʼ ye pe fwóme nɛ́. 14Ŋkyé ŋgâ a pɛ́ɛ́ yɛ́ mə kɛ naʼ ntiʼe ŋkyé wuŋ siŋ ye nɛ́, a kɛ pe fɛ́ cyó pfɔ́shʉ́ŋ ne mo pó. Ntsʉʼmbɛ njʉ́ psi kaa kɛ tsɔ́ mbwɔ̂ ne puŋ nɛ́ pó, ndaʼ yéré kɛ kúʼɔ́ ne psi ne ndɔ̌ne wuŋ tiʼé nuŋ siŋi Titə. 15Néré kɛ́ʼɛ́, kəŋe yɛ́ a tséʼé ŋkyé wuŋ nɛ́, ke mê mě mvǐ ŋkhoʼyɛ́ a kpǎŋa zóʼntswee yɛ́ ŋkɔŋɔ wuŋ náá tséʼé nɛ́, ŋkhoʼyɛ́ a kpaŋa mbziʼe njʉ́ puŋ kɛ ghəyɛ́ wé ne ŋgúʼune zááme kaʼatɛ nɛ́. 16Mə tséʼé ndebéne ŋkyé njʉ́ mə nzé ŋgâ tɛɛmbɛ mə tíí ndzɔʼ ya mbəb puŋ ne ŋkɔŋɔ no náá nɛ́.
Currently Selected:
2 Korɛŋto 7: XMG
Highlight
Share
Copy
Want to have your highlights saved across all your devices? Sign up or sign in
