2 Korɛŋto 6
6
Yɔ́b yɛ́ a nyóʼó ŋgâ psi ndáá ghaŋántɔ́b Kristo nɛ́
1Néré kɛ́ʼɛ́, njʉ́ a faʼa psyɛ̌ Mboʼmvé nɛ́, psi póʼómbwó nɛ́ ne puŋ ŋgâ kii puŋ ndɛ ŋgyɛ́ wéʼé ndúŋú foʼndzəndzoʼ yɛ́ Mboʼmvé kɛ fɛ́ ne puŋ nɛ́. 2Ŋkyé ŋgâ a tsɔ́ ŋgâ:
«Mə kɛ zóʼ tséʼé wo ŋkhoʼyɛ́ a kɛ tsyɛ́ ne mo nɛ́,
mbɛ zhyémve ndzǔne, mə ŋkʉ́yó kpéé wo.»
Ŋkhoʼ yéré kiʼi kúʼú nɛ́ ŋkhoʼyɔŋ.
Zhyémve ndzǔne kiʼi mbé nɔŋ.
3Psi tsé mbé zɔŋɔ ŋgyɛ́ no yɛ́ a mváʼá ntsyé ŋɔŋ nɛ́ pó, kɛ́ʼɛ́ ŋgâ kii faʼ zhí ndɛ tséʼé cyó yɔ́ʼɔ́ yɛ́, á tsé fɛ́ nsó nɛ́. 4Psi nyóʼ mbəb zhí ne tómbəb zhí ne ŋkɔŋɔ ndzáʼá náá ne puŋ, ŋgâ psi ghaŋáfaʼ Mboʼmvé
pé ne mgbaa ndzɔʼ zááme,
ndzɔ́ʼɔ́ ntsúŋine,
ndzǐʼne,
pɛ pɔ́ɔ́,
5pɛ gbaa pɛ, pe kɛ gbíí ywí nuŋ nɛ́,
tsáŋ mɛ́ psi kɛ kúŋ nɛ́,
vaʼ pɛ́ pe kɛ maʼ ŋkyé ywí nɛ́,
pɛ káŋá pɛ́ psi kɛ tséʼé nɛ́,
pɛ zhyémve pɛ́ psi kɛ yáʼ kii zhyé nɛ́,
pɛ mwɔ̌zó pɛ́ a kɛ kaa ywí nɛ́.
6A záʼá ndúŋú tsómvé ŋgerɛ́ŋged yɛ́ psi kɛ tséʼé nɛ́,
pwɛ zɛ́no zhí,
gbǎndzɔʼ,
ne no sʉ́ʼʉ pɛ́ psi kɛ zhyɛ̂ nɛ́,
pwɛ faʼ pɛ́ Zhʉye Yáŋme kɛ fáʼ nɛ́,
ne ndáá kəŋe yɛ́ psi kɛ tséʼé nɛ́,
7nsó no sísíŋ
tʉ̌ŋ Mboʼmvé,
ŋkɔŋ máʼa ntsɔ̂,
pwɛ khǔntsɔ̂ psíbɛ mbəb, ne ŋgyɛ̌ne no yɛ́ á ŋgerɛ́ŋged nɛ́, siŋ Mboʼmvé,
8ndzɔ́ʼɔ́ ghɛ́ɛ́, kii ndzɔ́ʼɔ́ ncóʼne,
ŋkhoʼyɛ́ pe kɛ nâ ywí njʉ́ pukəpɔŋ kii pusʉ́ʼʉ nɛ́,
ŋkhoʼyɛ́ pe kɛ nâ ywí njʉ́ ghaŋá mbwɔ̂, ntsʉʼŋgɛmbɛ́ psi pé puŋgerɛ́ŋged nɛ́,
9ŋkhoʼyɛ́ pé nâ ywí pe njʉ́ kii pe zɛ́ ywí nɛ́ po, ntʉʼŋgɛmbɛ́ pe zɛ́ ywí nɛ́.
Ŋkhoʼyɛ́ pe kɛ nâ ywí pe njʉ́ pfɔpɔŋ, ntʉʼŋgɛmbɛ́ psi pe pumɔ́b nɛ́.
Ndzaa ywí ne ŋgəʼo kii ghɛ̂ ŋgyɛ́ psi pfo nɛ́.
10Ŋkhoʼyɛ́ psi kɛ tsé tsúŋɛ tsʉʼ ŋgɛmbɛ ke ndébɛ yɛbɛ́ nɛ́,
psi pɛ́, psi kɛ pé pɛ mbɔ́ŋmbɔŋ, ntsʉʼgɛmbɛ ŋgyɛ́ pɔ́ŋ zááme cʉ́ʼɔ́ pɛ́ foʼ nɛ́!
Psi pɛ́, psi kɛ pe tséʼé cyó yɔ́b pó, ŋgɛmbɛ ntséʼé ŋkɔŋɔ yɔ́b náá nɛ́.
11Pukorɛŋto, psi kɛ nsó no ne puŋ pe yʉŋíme, psi kɛ kě ŋkɔŋɔ pfɔ̂ zhí náá ne puŋ. 12Psi kɛ pe tɔ́ʼɔ́ wúŋ pó, a kɛ pó nyóʼ puŋ ne psi ŋgâ, psi kɛ pe pɛ́ ndzó ndzɔʼ yuŋ, tɛ́ mbé pó. 13Puŋ ke ŋgyɛ̂ yuŋ nɛ́ mbəb psi, njʉ́ psi zhyɛ mbəb puŋ nɛ́. Mə ntsɔ́ nɛ́ ne púŋ pe njʉ́ tɛd ndɛ ntsɔ́ pwó pɔŋ pé nɛ́. Mbɛ puŋ, pǔŋ ke ŋaʼ ŋkɔŋɔ ndzɔʼ yuŋ nɛ́ náá.
Puŋ ndɛ ntə́b kpěnsěnyi yɛ́ á tsyɛ́ nɛ́ pó
14Kii pǔŋɛ pɔŋ pɛ́ pɔ́b tséʼé psyɛ́ndzɔʼ nɛ́ pó, ndɛ ntə́b kpěnsenyi. Ŋkyé ŋgâ a kpěnsenyi yɛ́, á tsyɛ́ nɛ́ pó. Tɛɛmbɛ no ŋgerɛ́ŋged tə́b pú mbwɔ̂? Tɛɛmbɛ ndáŋne tə́b pú ndzə́ndzə́b? 15Tɛɛmbɛ Kristo pú Sátaŋ nsó ndzóʼo? Tɛɛmbɛ ŋɔŋ wɛ́ a tséʼé psyɛ́ndzɔʼ nɛ́ pú ŋɔŋ wɛ́ a tséʼé psyɛ́ndzɔʼ nɛ́ pó, tə́b no?
16A kɔ́ tsetsɛrɛ ndáb Mboʼmvé pú pɛ ywoʼɔ́syé? ŋkyé ŋgâ ŋgɛ ŋkhu ne piŋi, piŋi pɛ́ yiŋi pé ndáb Mboʼmvé, ye wɛ́ a mɔ́b nɛ́ mbziʼe njʉ́ ŋkɔʼɔtómbəb ye kɛ nsó ŋgâ:
«Mə náʼá tsó mbó nyí tsetsɛrɛ pɔ́b.
Mə náʼá mbɛ Mboʼmvé wɔ́b, pɔ́b pe pumésɔŋ páá.
17Puŋ twɔ́ nɛ́ tsetsɛrɛ pɔ́b, ntsɛ́ ne mbaʼá,
njʉ́ Ntsɛɛpɔŋ nsó nɛ́. Kii puŋ kébe ywɔ̌ siŋɛ mbəb
kɛ́ʼɛ́ ŋgâ mə ghə́yɛ́ wuŋ.
18Mə náʼá mbɛ taʼ tɛd ne puŋ, puŋ pɛ́ ne mo mbé pɔ́ŋ páá pe mbzíŋi kii pé pěŋgyé.» A nsó Ntsɛɛpɔŋ, yé wɛ́ a ndɛ nʉʉ ŋɔŋ pe tsɔʼ nɛ́ pó.
Currently Selected:
2 Korɛŋto 6: XMG
Highlight
Share
Copy
Want to have your highlights saved across all your devices? Sign up or sign in
