2 Korɛŋto 8
8
Ghebe pwó pɔ́ŋmɛ́
1Pɔ́ŋmɛ́ páá, psi zɔŋɔ ŋgyɛ́ puŋ zé foʼndzəndzoʼ yɛ́ Mboʼmvé fɛ́ pwó pɔ́ŋmɛ́ pɛ́ pɔ́b ndzó ndáméted ndzó pɛ́rɛ́ ŋgɔŋ Makadoniya nɛ́. 2Mbɛ njʉ́ pɛ́ mkpeʼe kɛ fɛ́ pɛ́ ŋgəʼo ne pɔ́b zááme nɛ́, pɔ́b kɛ ké mbó tsɛʼɛ ndebéne gháʼmbwó, yɔ́b yɛ́ pɔ́b kɛ fɛ nɛ́, ke záá zaá kaʼatɛ. 3Mə ndzé kpaʼ sísíŋ ŋgâ pɔ́b kɛ fɛ́ yɔ́b yɛ́ a kɛ ghɛmbɛ tɛɛmbɛ pɔ́b fɛ́ nɛ́, kaʼatɛ mbó fɛ́ a tsɛɛ néré. Pɔ́b kɛ fɛ́ ne tómbəb yɔ́b, kii pe zíʼɛ́ wɔ́b ziʼ. 4Pɔ́b kɛ póʼmbwó zááme, ŋgâ psi ke ntee mɛndɔ́b, pɔ́b ke ndɛrɛ́ wɔ́b mɔ́ŋ yɔ́b, ne ŋgebéne pǔkristo núŋ. Ŋkyé ŋgâ a kɛ pɛ́ ne pɔ́b pé njʉ́ taʼ foʼndzəndzoʼ nɛ́. 5Pɔ́b kɛ pě fɛ́ mbəb yɔ́b pwó Ntsɛɛpɔŋ ŋkɔ́ŋ, njʉ́bí fɛ́ ne psi mbziʼe njʉ́ Mboʼmvé kɛ zɔŋɔ nɛ́. Pɔ́b kɛ fɛ́ kaʼatɛ fáá njʉ́ a kɛ ghɛmbɛ psi kpáŋa nɛ́. 6A kɛ zhyɛ yéré nɛ́, psi póʼmbwó pwó Titə ŋgâ a mee faʼ sʉ́ʼʉ yekénɛ́ puŋ tsé ndzɔŋɔ ŋgyɛ́ ne ndzɔʼ sʉ́ʼʉ nɛ́, ntsʉ́ntsʉŋ njʉ́ a kɛ ke zyé nɛ́. 7Ntsʉʼmbé, ŋkɔŋɔ mɔ́b pɛ́ puŋ tséʼé náá nɛ́, ke mbɛɛ pe zááme: psyɛ́ndzɔʼ, fɛ́ ntsóne no, zɛ́no, pwɛ ŋkɔŋɔ mbziʼe mbziʼe zyaŋámbəb náá, né kəŋe yɛ́ psi kɛ fɛ ne puŋ nɛ́. Néré, psi zɔŋɔ ŋgâ puŋ ké mbó mbɛ yuŋ pɛ fǒʼ fôʼ, ne ŋkhoʼyɔŋ wɛ́ pe tsé maʼa ghebe nɛ́. 8Mə ndzíʼɛ wuŋ ziʼ nɛ́ pó. Mə ntébé zyaŋámbəb pecyó pɔŋ ne puŋ kɛ́ʼɛ́ ŋgâ, puŋ yǎ ndúŋú nyóʼ ŋgâ kəŋe yɛ́ puŋ tséʼé ŋkyé pɔ́ŋmɛ́ nɛ́, a sísíŋ. 9Puŋ zé mbziʼe njʉ́ Yěsô Kristo, Ntsɛɛpɔŋ wíŋi nyǒʼ pǔpfob yé ne piŋi nɛ́. Yé wɛ́ a kɛ pé foʼ nɛ́, a séd tsʉʼ mbɔ́ŋ ŋkyé wúŋ, ndɔ̂ no mbɔ́ŋ ye yéré ŋgyɛ̂ puŋ tsʉʼ pɛ foʼ.
10A taʼ kpaŋató yɛ́ mə fɛ́ ndúŋú no yɔŋ nɛ́. A pú nɛ́ ŋgâ puŋ tíí máʼ pó. Puŋ pɛ́ puŋ kɛ pé sɔ́ pɔŋ ne fɛ́ne ŋgoʼnâŋ, ntsʉʼ ké mbé pɛɛ ndaʼ ne ŋgyɛ̌ne no pó, kémbó mbé pɛ sɔ́ pɔŋ ne kpǎŋne tó ndúŋú nɛ́. 11Ŋkhoʼyɔŋ káʼa puŋ méé nɛ́ faʼ yɛ́ puŋ zyé nɛ́. Néré kɛ́ʼɛ́, ne fuʼ yɔ́b yɛ́ puŋ tséʼé nɛ́, puŋ tsʉyɛɛ ŋgyɛ̌ yɔ́b sʉ́ʼʉ yɛ́ a ghɛmbɛ puŋ tíí tó puŋ ne ŋgyɛ̌ne nɛ́. 12Ŋkhoʼ yɛ́ kpaŋató ŋɔŋ ye sʉ́ʼʉ nɛ́, pé ghə́yɛ́ wé kpaʼ sʉ́ʼʉ, kii tsé ndiŋɛ́ yɔ́b a tséʼé nɛ́, mbɛ yɔ́b yɛ́ wo tséʼé nɛ́ khǒ níŋ, 13a pó nɛ́ mbé pɛɛ ŋgâ puŋ ŋkhú pɛ mbɔ́ŋmbɔŋ ŋkyé ŋgâ puŋ ŋgebɛ́ pecyó pɔŋ pó. Ntsʉʼmbé a pɛɛ ŋgâ ŋkɔŋɔ pɔŋ náá pe ntsʉ́ŋtsʉ́ŋ. 14Ne ŋkhoʼyɔŋ wɔŋ wɛ́ puŋ tséʼé a záá ŋgaʼ nɛ́, a ndúŋɔ yé khóóme yɛ́, a ne pɔ́b nɛ́, kɛ́ʼɛ́ ŋgâ cyó zhyémve yɛ́ pɔ́b tséʼé a záá nɛ́, a kémbó ndúŋú ye khóóme yɛ́ a ne puŋ nɛ́. Yéré ŋkʉ́yó ke zhyɛ́ puŋ pe ntsʉ́ŋtsʉ́ŋ. 15Mbziʼɛ njʉ́ a ŋweʼéme ŋgâ: «Ŋɔŋ wɛ́ a kɛ ŋwee á záá nɛ́, kɛ pe tséʼé kaʼatɛ pó. Ŋɔŋ wɛ́ a pó ŋwee a khóóhóó nɛ́, kɛ pé káá cyó yɔ́b pó.» 16Ŋgúʼune pɛ pwó Mboʼmvé, ye wɛ́ a níŋí zyaŋámbəb ndzó ndzɔʼ Titə ŋgâ a fáʼa ne puŋ nɛ́. 17Pé kɛ káʼa wé a psyɛ́, mbəb ye pó zyáŋá kaʼatɛ a ke ŋǎ ne kpee ndéé ŋkʉ́yó pfúŋɔ́ puŋ. 18Psi kɛ twɔ́ wé, pú mɔ́ŋmɛ́ wɛ́ ŋkɔŋɔ yáʼméted náá tsɔ sʉ́ʼʉ Ŋkyé wé ne mbziʼe faʼ yɛ́ a tsé fáʼa ne no Ŋkəŋ sʉ́ʼʉ nɛ́. 19Ŋkʉ́rʉ́, yáʼméted kémbó ntsɔ́ʼɔ pé ye, ne ntsyaŋáne ywí ne ŋgúne fáʼ yéré fáʼa kəŋe. Faʼ yɛ́ psi faʼa ŋgâ ghɛ́ɛ́ Ntsɛɛpɔŋ ghú ssó, ŋgɛmbɛ ŋgyɛ̌ ŋgâ pe zhʉ́ kpaŋató zhí yé sʉ́ʼʉ yéré. 20Psi tsé ntáʼa ŋkɔŋɔ ndzáʼáme náá, ŋgâ psi ndɛ ŋgyɛ́ taʼ no ndúŋú mbób zááme yéré yɛ́, pe fɛ́ ne psi nɛ́, kɛ́ʼɛ́ ŋgâ pɔŋ ndɛ ndǎ ndúŋú, nsó kəpɔŋ ŋkyé ywí. 21Psi ké mbé táʼá ne ŋgyɛ̌ne no sʉ́ʼʉ ndaʼ ne míí Ntsɛɛpɔŋ pó, psi kémbó taʼá ne ŋgyɛ̌ne, mbɛ ne míí pumésɔŋ. 22Psi ntwɔ́ pɔŋ pɛ́ pé tsɔ́ʼ nɛ́ pwɛ mɔ́ŋmɛ́ wɛ́ psi kɛ kpeʼe zyaŋámbəb ye kaʼatɛ njʉ́, a kiʼi ŋgɛmbɛ ne ŋkhoʼyɔŋ, zyaŋámbəb yéré, ké ŋgǔ ne ssó nɛ́. A pó ntíí ndzɔʼ ye mbəb puŋ kaʼatɛ. 23Ŋgɛ ŋkhú ne Titə, a ŋgaŋakpee ya, mbó mbé ŋɔŋ wɛ́ psi tɔbɔ faʼa pfúŋɔ puŋ nɛ́. Pɔŋmɛ́ píŋi pɛ́ pe tsɔ́ʼ nɛ́, a pɔŋ pɛ́ pe tsɔʼɔ ndzó pɛ yáʼméted, pɔ́b faʼa ŋgâ ghɛ́ɛ́ Kristo ghú ssó nɛ́. 24Kəŋe yɛ́ a ndzó ndzɔʼ yuŋ nɛ́, puŋ nyóʼ nɛ́ mbəb pɔ́b, yáʼméted zhʉ́, pwɛ ntiʼene yɛ́ psi tiʼe ne wúŋ pfúŋɔ́ pɔ́b nɛ́.
Currently Selected:
2 Korɛŋto 8: XMG
Highlight
Share
Copy
Want to have your highlights saved across all your devices? Sign up or sign in
