Lomɛ́ŋ 7

Bisele dɛguánd gumányɛ́ganɛn eŋédeb

1Belimen bám agá guádáb, ngúgála gán anɛ band bálɛnsaná bisele. Bisele guɔyɔ buanda ubú mɔnd biananá ká wál gɛsɛgɛl gidigid umaányá gusɔ́dɔn, nugúlɛnsaan bú bese na bese. 2Dígɔ́l bulinsi, bisele guɔyɔ ká, agánd unyá egiŋén gúbianan ká úsɔ́dɔɔn na ɔnɛ́m waga guám agá nigú. Ɔnɛm mégú, bisele bɛ́lɛ́ŋaná agánd uwaány na ɔnɛ́m waga dɛguánd gubianan wɔ́. 3Búmoól gɔg ká, ɔnɛ́m ɔgɔ́s, agánd uwaány sɔ́dɔɔn na mɔnd ondodi, umaánd isɔm; ɔnɛ́m mégú, bisele guɔyɔ ká uganyá gúbíbianan. Igiány gigúl, ugany bégúgiŋ mɔnd ondodi, udimaánd isɔm. 4Belimen bam, anaány banuá sɔ́n, nunyá anɛ numegú agá giáy gɛ́lɛ́ŋaná bisele, gágual ká nunyɛ babɛ́ládán na nuɔ́l ná Kilíse. Nɛnuán nuguɔ́bɔnɛn mɔnd ondodi, waád uwaány unyá ewe umaányɔ́g aga ebeguén, anaány ká diála manda mányá bese agá eŋís yá Gɔdányá. 5Kanyɛ́ gunyá ká, gigúl dínyá gubá dɛsɔ́dɔɔn anyɛ́ díbílénené, manda amabɛ́ móloninó agás gá ɛdɛm biáfɛ́gaan agá bisele, ká médídígeen duɔ́l dásɔ gidigid ká duála ubú bisele diɔ́yɔ́nɔ́, disúgúdenyi ege nigú. 6Nɛ́nuán gɔg, dɛnyɛ baádɔ́gánán na bisele busió bum, gágual ká dinyɛ beguén na buanda búnyá gubá búdiágaan bɛmbɔg. Diganyɛ bágual dialaan Gɔdányá buol na gɛŋɛ́lɛŋɔ́siɔ gá gubá, anyɛ́ Ɛsámb yá Mefúny dídíyenyé, saá sɔ́n agá nŋili ɛyɛ́ bisele binyá ɔ́ŋɔ́ŋɔ́ máabá bídídíyenyi.

Buól bá bisele

7Ány gɔg, nguamba guɔyɛd ká giág e? Bisele nyɛ buanda bumoom ná bɛfal e? Ágó! Bisele águal ká ɛ́lɛ́ns gɛfal. Ndɛɛ́gubá wa gɔlɛns biád bá bɛsɛmɛ́dɛ́n bá nuɔ́l gúmabá ká bisele dimɔyɛd ká: Edibísésidenyi. 8Kanyɛ́ gɔg gɛfal máandɛ́n agá gélem gá bisele ká yála biád bá manda giod. Gágual ká, bisele máal bɛ́dɛ́bá, gɛfal nyɛ́ giguén. 9Nsua, anyɛ́ bisele máal bɛ́dɛ́bá, mmɔsɔ́dɔɔ́n. Bisele malá na gusiáma, iyabia bɛsɛmɛ́dɛ́n báguala gɛfal, 10yaŋuá inyɛ eguén: Bisele bímáabá ká bíban band agá gusɔ́d, águŋaban agá nigú. 11Gágual ká gɛfal mandɛ́n agá gélem gá bisele, igiénéŋ, anaány gúnyá, igiɔ́ŋɔ́n. 12Ta nɔ́, bisele bíbɛ́ muát bíguúlenin aga Gɔdányá, bisúŋígin bág sɔ́n ólonin aga Gɔdányá. Bíbí osi na bese. 13Ány gɔg buand búnyá bese guɔ́nɔnɛn e? Ágó! Gɛfal giɔ́nɔnɛnɔ́: Gíguandɛn agá buanda búnyá bese ká gíŋɔ́n, ány gɛfal ánɛ́g bese na bese gɔɔ́gɔ anyɛ́ búnyá, na ányɛ́ gínyá na ɔndɔndɔ aga gélem gá bisele.

Gɛfal gumányɛ́ganɛn mɔnd

14Dɛgɔ́lɛnsan ká bisele gúlenin aga Gɔdányá, yaŋuá gɔg inyɛ gɔɔ́gɔ mɔnd, inyɛ eyúgénén niaŋ ná giɔ́l agá gɛfal. 15Anaány yaŋuá muát, ndiɔ́bɔ́nɔ́ ta buanda agá ubú yalaná. Ubú mbílénené ndɛguála bɔ́, ubú ndiébílénéne búbú yalaná. 16Mmála ubú ndiébílénéné, inyɛ ekelu na bisele yond yádábaan ká bínyɛ́ bese. 17Saá yaŋuá yalaná nɔ́, gɔg gɛfal gínyá agám gá ɔdɛm. 18Gágual ká ngúlɛnsan ká, bese dɛ́bá wagubá agamia, anaány gúnyá, agá ɔnɔ́n wá mɔnd uwɔ́ ínyá. Ngúbíléne guala bese, magɛ́nda máguala bese waád ndiábiánaná, 19bese uwɔ́ mbílénené, ndɛguala wɔ́, gɛfal igí ndiébílénené, gɛ́gɛ́ yalaná. 20Mmála ubú ndiébílénéné, saá yaŋuá yalaná anaány, gɛfal gínyá nagadá wam giálaná nɔ́. 21Nŋuɔsɔn gɔg gisele egie ká: Gigúl mbílénené ká yála bese, gɛfal yalana. 22Nagadá wam wa ɔdɛm, ngúbíléne bisele bá Gɔdányá. 23Nguɔ́sunɔ agám gá nuɔl gɔg ká, gisele gíndodi nyɛ́ kɔ́ gínusenyé gisele igí nsiŋi yám bílénené. Gisele igiány igí ndiébílénéné gúŋondonyi giɔ́l gá gɛfal gínyá nagadá wam. 24Gusɔ́g nam! Ányá uganúŋáŋɔ́n gá nuɔl enue núbaná nam aga nigú e? 25Nukany bá aga Gɔdányá uganɔ́ŋáŋɔ́n agá gélem gá Yésu Kilíse, Ɔgúnɔ́ wasɔ! Na nsiŋi yám, nŋuádábaan bisele bá Gɔdányá, biád bá bɛsemɛ́dɛn bá nuɔ́l nám guála ká mbá giɔ́l gá bisele bá gɛfal.

Currently Selected:

Lomɛ́ŋ 7: MMU2

Highlight

Copy