Lomɛ́ŋ 8

Giáŋɔna agá nŋili ya Ɛsámb yá Mefúny

1Nɛ́nuán gɔg, bádɛ́bá báguand gugélenyi ebe bányá baladán ná Yésu Kilíse. 2Gágual ká gisele gá Ɛsámb yá Mefúny yéŋené gusɔ́d aga gélem gá Yésu Kilíse maŋáŋɔn agá gisele gá gɛfal na nigú. 3Gɔdányá ógufuógi ubú bisele bá Moyíso diábána bágual, gágual ká band dɛmabá na bugaga bógúfuógonyi bí. Gɔdányá uwɔ́, uwal bú anyɛ́ umáadɔ́m mɔɔn waga na nuɔl núbɛ́fuágananá ná bél bɛfal ká wáŋɔ́n bɔ́ agá gɛfal. Anaány Gɔdányá méegélényí gɛfal gínyá agá band. 4Umáal anaány ká difuógi busi ubú bisele ɔ́yɔnɔ́, basuá ɔbɔ́ didiándɔ gusɔ́dɔɔn agá gubílén gás, gɔɔ́gɔ agá gubíléne gá Ɛsámb yá Mefúny. 5Búnyɛ ká, ebe bɔsɔ́dɔnɔ́ agá gubílén gá duɔ́l dɔ́b guála manda mólóninó ɔgɔ́b gá ɛdɛm. Ebe gɔg bɔ́sɔ́dɔnɔ́ anyɛ́ Ɛsámb yá Mefúny bílénené, guala ubú Ɛsámb yá Mefúny bílénené. 6Mɔnd máala gubílén gá nuɔ́l nág, ugúbaan agá nigú, ewe uládaná Ɛsamb yá Mefúny gubaan agá gusɔ́d na bumben. 7Mɔnd walaná gubílén gá nuɔ́l nág nyɛ ɔmbɛlɛ́mbɛ́l wá Gɔdányá, udɛguanda anyɛ́ bisele bá Gɔdányá ɔ́yɔnɔ́, udɛbá muát wáguandɛd nɔ́. 8Ebe bándana agá gubílén gá duɔ́l dɔ́b, bádɛ́bá báguala anɛ́ Gɔdányá bílénené. 9Banuá gɔg, nudɛgúsɔdɔɔn agá gubíléne gá duɔ́l dán; nugúládaan Ɛsámb yá Mefúny. Anyɛ́ gunyá ká Ɛsámb yá Mefuny yá Gɔdányá nyɛ aganuá, mɔnd udiábiánáná Ɛsámb yá Mefúny yá Kilíse, udɛbá wá Kilíse. 10Búnyɛ nɔ́ ká duɔ́l dán gúbianan ká dúgú góbúsió bá gɛfal. Ta anaány, ímábá Kilíse nyɛ agán gá ɛdɛm, Ɛsámb yá Mefúny gúnuéŋen gusɔ́d gágual ká Gɔdányá gúnuánan besi bá band agág góbúsió. 11Búmábá ká Ɛsámb yá Mefúny yá ewe uméenyúgí Yésu Kilíse egé ebeguén nyɛ́ agán gá ɛdɛm, uwɔ́ waád agá nŋili yá Ɛsámb yá Mefuny yág inyá agán gá ɛdɛm ugenuenyi sɔ́n duɔ́l dán dúbiananá ká dúgú. 12Belimen bám, dinyɛ na ofín, ofín uwaány dɛgɔ́lɛ́ŋá duɔ́l dás ká dɛsɔ́dɔɔn anyɛ́ dúbílénené. 13Gágual ká, numɔ́sɔ́dɔɔn gá guládaan gubílén gán, nugegú; númɔ́sɔ́dɔɔ́n anyɛ́ Ɛsámb yá Mefúny ɔ́yɔnɔ́, numɔɔ́n gubá gán gá gɛfal, nugɔsɔ́d. 14Kányɛ gúnyɛ ká, ebe gidigid ɔbɔ́ Ɛsámb yá Mefúny éndenyé nyɛ baan bá Gɔdányá. 15Nudɛmabianan Ɛsámb yá Mefúny numáabiá, búdimabá ká ínuóndonyi biɔ́l bímaányá na buwa, búmabá ká nubá bá Gɔdányá yónd yála ká diɔ́yɔɔn wɔ́ ká: Ába, anaány gúnyá ká Babá. 16Ɛsámb yá Mefúny íyɛ́ muát, gudiɔ́yɔɔn ká dinyɛ baan bá Gɔdányá. 17Anɛ́ búnyá gɔg ká dɛnyɛ baan bá Gɔdányá, dɛgadáŋáb niaf agá manda ɔmɔ́ umáadɛ́dánɛn. Dɛgadáŋáb manda amaány ɔlɔŋ na Kilíse, gágual ká, dɛ́mɔ́bɛ́gɔɔ́n anyɛ uwɔ́, dɛgadáŋáb nugúm anyɛ uwɔ́.

Nugúm núlené

18Gá úgám, nguánan ká muyú má gɛsɛgɛl gá inen dɛbá na nŋediny na nugúm unú Gɔdányá génúdídíye. 19Gus gidigid ugú Gɔdányá máalɔŋá nyɛ eŋís agá nŋili ká guán gɛsɛgɛl ɛgɛ́ Gɔdányá génúdíye ebe bányá baan bág: 20gágual ká, gus uguány gidigid magɔɔ́n agá bugaga bá gilé gilé, saá gágual ká gúgú muát gúméebílén, Gɔdányá umáag gɔ́ agá bugaga ubuány. Ta nɔ́, gus uguány maányá gubióndonyi ɔdɛm, 21gágual ká bágáŋɔ́n gú agá bugaga búgádaná buónd buádɛgaan gú agá buɔ́l. Ány bábia niaf agá gubɛ́bia na agá nugúm ná baan bá Gɔdányá. 22Dɛgɔ́lɛ́nsaan gɔg nɛ́nuán ká gus gidigid ɔgɔ́ bámaálɔŋá maányá gubɛma guónd guɔ́bɛ́gɔɔn gɔɔ́gɔ anɛ agánd ubiénené. 23Saá gúgɔ́ eŋényé gusúg, basuá sɔ́n ɔbɔ́ dimáakɛ́n gubia Ɛsámb yá Mefúny anyɛ bidɔ́mɔ, dɛnyɛ eŋís agá nŋili, dibídenyi ká Gɔdányá ál ká dɛ́bá mbanda baán bág wónd udiádábɛn giáŋɔna busió bum. 24Búgúdídíyenyi ká Gɔdányá modísódí, ta anyɛ́ dimányá gúbídenyi manda amaány. Gigúl ɛgɛ́ bánaná buanda ubú báganá ɔdɛm gá bú, ubuány dɛ́bá guág ɔdɛm sɔ́n, ányá gɔg, unyá waguágan ɔdɛm gá buanda ubú wánaná e? 25Dímondonyi ɔdɛm ká buanda ubú dídiánána, dinyɛ eŋís agá nŋili gá gubídényi bú. 26Anaány sɔ́n, Ɛsámb yá Mefuny íyɛ́ sɔ́n dídúgúnené, gágual ká dɛdɛ́bá na magɛnda. Dɛdɛgúlɛnsaan gubísógólidi anyɛ́ buófonó, kanyɛ́ búnyá ká, Ɛsámb yá Mefuny iyɛ́ muát ígúbísógólonyi Gɔdányá gás góbúsió na gɛbɛm ɛgɛ́ niíd diábáná bágɔ́lɛns guɔyɛd. 27Ewe wánaná ɛdɛm gúlɛnsan buanda ubú Ɛsámb yá Mefúny ambaná guófún: gágual ká ígúbísógólonyi Gɔdányá gɔɔ́gɔ anɛ Gɔdányá muát bílénené góbusió bú ebe bányá bág. 28Dɛgɔ́lɛnsan sɔ́n ká, manda gidigid mámanɛná ebe bébílénené Gɔdányá, ebe umáabɛ́lɛ́gɛ́n gɔɔ́gɔ anɛ́ uméeŋín ndán, uguála ká mábá bese gɔ́b góbusió. 29Kányɛ gúnyá ká, ebe ɔbɔ́ Gɔdányá máakɛ́n gueyid nsua, umasɔ́mb sɔ́n nsua ká, bábɛ́fuág mɔɔn waga, anaány ká, ubá mbɔ́lɔ́bɔl yá bendimén giod. 30Ebe ɔbɔ́ Gɔdányá máasɔ́mb ká wéyid nsua, umabɛ́lɛ́gɛ́n bɔ́ sɔ́n, ɔbɔ́ úmaábɛ́lɛ́gɛ́n, umondi bɔ́ sɔ́n band bányá besi agág gá eŋís, ɔbɔ́ umóondí bɔ́ besi, uwéŋin bɔ́ sɔ́n nugúm nág.

Ɛlɛga yá Gɔdányá nyɛ duúmé

31Giág gindodi dínyá bɔ́guɔyɛd e? Gɔdányá mábá nasɔ, ányá unyá bégúdémbényi nasɔ e? 32Ta mɔɔn waga wá muát, udɛmabagɛn wɔ́ nugényigény, uwéŋin wɔ́ ká úgú gás góbúsió basuá bem. Nanyá udiábáná bágúdɛ́fá buand gidigid agá gélem gá mɔɔn waga e? 33Ányá unyá wɔgusɔ́mɛ́n ebe ɔbɔ́ Gɔdányá máakɛ́n gueyid e? Ta mɔnd, gágual ká Gɔdányá guɔ́yɔ́ ká bádɛ́bá na gɛgua. 34Ányá unyá bɔ́guɔyɛd gɔg ká bányɛ́ na gɛgua e? Ta mɔnd! Gágual ká Yésu Kilíse megú, uwanyɔg agá ebeguén, unyɛ agá ɔmbɔ́g ɔnɛm wá Gɔdányá, ugúbísógólonyi gás góbusió. 35Giág gínyá bágúdiádɔ́n na ɛlɛ́ga ya Kilíse e? Muyú e? Nŋágɛ́nɛn e? Nugényígeny e? Nsana na gɔsɔ́g e? Ta ɔ́g ká bɔbɛ na nigú e? 36Musámb má Mbɔbɔnɔ guɔ́yɔ ká: Sig buɔ́síɔ band guamba gudiɔ́nɔ gɔ́w góbusió aŋuá Ɔgúnɔ́, bɔ́dɛ́gɔ́lɔɔn anɛ bɛdɔ́mba bɛ́gúsige. 37Ta anyɛ́ búnyá anaány, basuá dinyá guyág, agá gélem gá ewe uméedíbílén. 38Ɛɛ́ɛɛ! Ngúlɛnsan bese na bese ká buanda búganúdiádɔ́n na ɛlɛka yág dɛba: Ta nigú, ta gusɔ́d, ta ɛngɛlɛs bá Gɔdányá, ta mefuŋ, ta biliíndie, ta manda mábiálaná ínen, ta máganúbiála nŋɔɔ́guɔ́, ta buanda búnyá na bugaga ugumuana, 39ta manda má muana, ta manda má gusígúsié wá gus, ta gɛlɔŋalɔŋa gimodió, ta buanda búdɛ́bá búgúdiádɔ́n na ɛlɛka ɛyɛ́ Gɔdányá didíyenyé agá gélem gá Ɔgúnɔ́ wasɔ Yésu Kilíse.

Currently Selected:

Lomɛ́ŋ 8: MMU2

Highlight

Copy