Lomɛ́ŋ 6

Nigú na gusɔ́d aga Yésu Kilíse

1Diɔ́yɛd ká nanyá e? Dɛ́baan nobusió na guala bɛfal ká bese wa Gɔdányá dég e? 2Ágó! Dɛmadɔ́mbɛ́n agá nigú, iniál ká diádɔ́gan na gɛfal. Nanyá dɛnyá báguand guond gá gúsɔ́dɔɔn agá gɛfal e? 3Nugúbiélibieli ká basuá gidigid ɔbɔ́ diméedúbén, ká dɛbá babɛ́ládán na Yésu Kilíse, dimedúbén ɔlɔŋ naga agág gá nigú e? 4Kánɛ gúnyɛ ká, agá nduén dimóobínyó ɔlɔŋ naga, ká dɛ́bá babɛ́ládán agá nigú, gɔɔ́gɔ anɛ́ Kilíse máanyɔ́g aga ebeguén agá bugaga bá nugúm ná Síe, basuá sɔ́n dɛ́sɔ́dɔɔn gɛŋɛ́lɛŋɔ́siɔ gá gusɔ́d anyɛ uwɔ́. 5Búnyɛ́ ká, ɔ́gɔ dɛnyɛ babɛ́ládán naga agá nigú nɛ́bɛ́fuágananá nág, anaány dɛganɔ́bá sɔ́n babɛ́ládán naga agá guanyɔg gá ebeguén gúbɛ́fuágananá gág. 6Nsɛ́ dɛ́lɛ́ns bese na bese ká, gubá ugú dɛmáabá na gú nsua, Gɔdányá máal ká gúgú agá bɔdɛ́d bá gɛsanda ɔlɔŋ na Kilíse, ká gɛfal gínyá nagadá wa nuɔ́l nás élíki, didiánd gubá biɔ́l bá gɛ́. 7Gágual ká, ewe unyá eguén dɛbá sɔ́n buóny na gɛfal. 8Ɔ́gɔ dinyɛ beguén ɔlɔŋ na Kilíse, diguóndonyi ɔdɛm ká, digɔsɔ́dɔɔn naga. 9Dɛ́gɔ́lɛnsan bese na bese ká, feké anyɛ́ Kilíse maányɔ́g agá ebeguén, udɛguand guguénen; nigú dɛbá báguand guyág wɔ́. 10Umegú gɛsɛgɛl gímoom gá bɛsɛgɛl bim ká gɛfal diánd gúbia bugaga. Nɛ́nuán unyɛ ɔ́gɔ́s, gusɔ́d guág nyɛ góbusió bá Gɔdányá. 11Banuá sɔ́n, nɛnám nímoom, ánubián anɛ beguén agá giáy gɛ́lɛ́ŋaná gɛfal, núbián anɛ bɔgɔ́siɔ́ góbusió bá Gɔdányá agá giáy gɛ́lɛ́ŋaná nɛlad na Yésu Kilíse. 12Gɛfal diguánd gubianan ká gɛ́mányɛ́ganɛn duɔ́l dán dúguénené, ká duála biád bá manda dúbílénené guala 13Nudiánd guádáb ká nuág maláŋ má duɔ́l dán agá gɛfal, ká mála gɛfal. Énuéŋín mɔ́ aga Gɔdányá anɛ bɔgɔ́siɔ́ bányá guanyɔg agá ebeguén. Énubiéŋín busió bum agagá gá buol, ká duɔ́l dán bá nŋili yá gunúdúgúne ká nuála ubú búnyá gindényé. 14Gɛfal dɛgand gunúbianan, anyɛ́ gúnyá ká, bisele dɛguánd gunúbianan, nugúsódɔɔn gɔg agá bese uwɔ́ Gɔdányá núdíyenyé.

Gualaan busi buól

15Anɛ́ bisele diándá gúdɛ́bianana, dɛganyá agá bese wá Gɔdányá dídíyényé, kanyɛ́ gunyá ká diala gɛfal e? Ágó! 16Nudɛgɔ́lɛnsan ká, númébiéŋin banuá bamuát agá mɔnd ká nuálaan wɔ́ buol anyɛ biɔ́l, nuala wɔ́ nŋɔ́bɛnɔ, numɛ́y biɔ́l bág e? Igiány gigúl, nunyɛ biɔ́l bá gɛfal gɛbaná nanɔ́ agá nigú, ta ɔ́gɔ ká nunyɛ biɔ́l bá Gɔdányá, ugonuóndi besi agág góbúsió gágual ká nuguála wɔ́ nŋɔ́bɛnɔ. 17Nukany bá aga Gɔdányá! Núgubá biɔ́l bá gɛfal, kányɛ nunyá gual nŋɔ́bɛnɔ na ɔdɛm wán gidigid agá gufúnyifunyi ugú bámáanúfá. 18Bágunuáŋɔ́n agá gɛfal, nuganyɛ biɔ́l bá busi. 19Ngúgála gaán anyɛ́ band bá gus gálaná, gágual ká nudɛgɔ́sɔ́ŋɔ́na fiaŋ. Nsua anyɛ́ numáag maláŋ maán anɛ biɔ́l gá gúbídɔ́bɔ na manda má gɛfal málaná ká nuala Gɔdányá ɔduɔ́ gulal. Ánuág maláŋ maán nɛnuán anɛ biɔ́l gágualan busi buol na gusɔ́dɔn gusɔ́d guálaná Gɔdányá bese. 20Gigúl numáabá biɔ́l bá gɛfal, nudɛmabianan gɛgɔ́da gá guala busi. 21Núgudáŋáb gɔg giág, anɛ́ nunyá guala manda ménuéŋené ɔduɔ́ gunɔ́ nɛ́nuán e? Mágúban nanɔ́ ege nigú! 22Nɛ́nuán gɔg, bágunuáŋɔ́n agá gɛfal, nuganyɛ biɔ́l bá Gɔdányá, ugenuendenyi agá gusɔ́d guálaná Gɔdányá bese, nuónd núbia agá gúsúgúdenyi, gusɔ́d gá medug mem, búbú núdáŋábaná. 23Gágual ká, bɛnama bá gɛfal nyɛ́ nigú, ubú Gɔdányá éŋené gilé gilé nyɛ gusɔ́d gá medug mem, agá nɛlad na Yésu Kilíse, Ɔgúnɔ́ wasɔ.

Currently Selected:

Lomɛ́ŋ 6: MMU2

Highlight

Copy