Lomɛ́ŋ 5

Yésu Kilíse mádiág agá bumben na Gɔdányá

1Ŋɛ́ɛ, Gɔdányá ógudióndi bindényé agág gá eŋís agá guádáb gás, dɛganyɛ nɛ́nuán gá bumben naga aga gélem gá Ɔgúnɔ́ wasɔ Yésu Kilíse. 2Na Yésu, dɛgubianan agá nŋili yá giondiɔdɛ́mɔ́, giás gá gúbɛ́sɛdɛnɛn Gɔdányá wa ɛlɛ́ga, uwɔ́ waád walaná dɛ́bá baluán ɛŋaŋa agagá. Diguɔ́bɔɔn bese dibiondonyi ɔdɛm ká, dɛgabia nugúm ná Gɔdányá. 3Saá ubuány gusúg, diguɔ́bɔɔn bese ta aga guɔ́bɛ́g gás, dɛlɛnsan ká guɔbɛ́g guála mɔnd bá na guéhihenyi, 4guɔ́mínɔn ólon na nuládád ta muyú bá, ewe unyá na nuládád gúbianan guág ɔdɛm, 5guág ɔdɛm uguány dɛbá múnéŋén, gágual ká ɛlɛ́ga yá Gɔdányá nyɛ́ iséléméndény agás gá ɛdɛm nagadá, agá nŋili ya Ɛsámb yá Méfuny iyɛ́ dɛ́maábia. 6Ŋɛ́ɛ, gigúl dɛ́maábá kandɛ bugaga, Kilíse uwegú góbusió bú bafalafal agá gɛsɛgɛl gimáabá gidényígénény. 7Búnyɛ́ muyú ká mɔnd ádáb ká úgú góbusió bá mɔnd unyá osi. Ala mɔnd nyɛ wegukék ká ugú góbusió bá mɔnd walaná bese. 8Kilíse megú gás góbusió, nányé e dɛmáabá dɛmáanyɛ beli bɛfal. Nɛnama iniány gɔg Gɔdányá méedíyé ɛlɛ́ga yág gás góbusió. 9Nɛ́nuán, anyɛ́ manɔŋ má Yésu nyá gudióndi besi, cá cá cá Kilíse godisódi ká ilób yá Gɔdányá. 10Dɛ́gubá bambɛ́lɛmbɛ́l bá Gɔdányá, kányɛ dɛ́nyá gɔbɛ́dábɔ́n naga agá nŋili ya nigú ná mɔɔn waga, basuá babɛ́dábɔ́nán naga, nanyá udiábáná bágúdiáŋɔn agá nŋili ya gusɔd gá mɔɔn waga e? 11Saá búbuány gusúg! Diguɔ́bɔɔn bese ogóbúsió bá Gɔdányá agá gélem gá Yésu Kilíse Ɔgúnɔ́ wasɔ, uwɔ́ waád unyá gúdilád nɛ́nuán na Gɔdányá.

Na Ádama na Yésu Kilíse

12Buád buanda, gɛfal moólín aga mɔnd omoom ɔfɛ́n ká Ádama, gɛfal igílén nigú. Gudúm ány band méedúm gúguénén gágual ká bem mál gɛfal. 13Ká Gɔdányá sién wéŋín Moyíso bisele, gɛfal mabá gígány egegus. Gɔdányá dɛmɔgɔ́lɔɔn gɛsɛgɛl na bɛfal, anyɛ́ bisele máal bɛ́díbá. 14Nányé e guedúm gigúl gá Ádama gusiám agá gigúl gá Moyíso, nigú mediyé bugaga bá nɛ́, ta aga ebe bámáal bádíal gɛfal, buanda búmoom anyɛ Ádama umáal Gɔdányá idú. Ádama mabá mfuóny ya ewe umaábianan ká wúl. 15Gianta gá guádɔ́gan nyɛ gadágadá wa gɛnana gá Ádama na nubo ná Gɔdányá. Búnyɛ́ nɔ́, giod gá band meguénén góbusió bá gɛnana gá mɔnd uwaány omoom; ta nɔ́ gɛnɔ́g gá ɔdɛm gá Gɔdányá nyɛ duúmé, na bese ɔwɔ́ wéŋené ogó giod gá band nyɛ menyí duúmé egé gélem gá mɔnd omoom unyá ɔfɛ́n ká Yésu Kilíse. 16Bese ɔwɔ́ Gɔdányá éŋené guómo biínd bínyá sáŋal nɛ bá bɛfal bá mond táŋ omoom; nɛgál ɛnɛ́ gɛfal gusenyé góbusió bá mɔnd táŋ omoom, gusúgúdenyi gá nɛ́ nyá Gɔdányá éŋin nugényigény gá band, nánié bese ɔwɔ́ wéŋené gá band ta anyɛ́ bɛfal nyá giod, gusúgúdenyi gá wɔ́ nyá guán bɔ́ besi. 17Búnyɛ́ nɔ́, ká mɔnd omoom umáal gɛfal, nigú iniɔ́n band giod góbusió bá mɔnd uwaány omoom, anaány góbusió bá mɔnd omoom unyá ɔfɛ́n ká Yésu Kilíse, dɛgubianan gɛfɔn gɔdɔ́mb anaány. Band gidigid ɔbɔ́ Gɔdányá díyényé bɔ́ gianta gág gá bese, uguánan bɔ́ besi agág gá eŋís, bɔ́gɔsɔ́dɔn, bɛɛ́y befuŋ gobúsió bá Kilíse. 18Agá gusúgúdényi, gɛfal gá mɔnd táŋ omoom, Ádama, moólón nugényígény gá band gidigid; nɛnám niád, busi bá Yésu Kilíse uwɔ́ eŋényé buóndonyó band gidigid besi, buéŋen bɔ́ gusɔ́d. 19Gɔɔ́gɔ anɛ́ kandɛ nŋɔ́bɛ́nɔ wa mɔnd omoom máal ká band giod ɛ́y beli bɛfal; nɛnama niád, gá nŋɔ́bɛnɔ ya mɔnd omoom, Gɔdányá uwaán band giod besi agág gá eŋís. 20Bisele máal bímésibiéŋín, bɛfal ibiédeg, kanyɛ́ gúnyá ká, kɔɔ́m bɛfal degené, bese gudege gudúmbídenyi, 21nsua, anyɛ́ bɛ́fal máabiánán bugaga gidigid bɔ́guɔ́nɔnɛn, nɛnám niád nɛnuán, bese wá Gɔdányá nyá na bugaga bóguondonyi band besi. Igiány gigúl dɛnyɛ bágúdáŋáb gusɔ́d na Gɔdányá na bánamana aga Yésu Kilíse Ɔgúnɔ́ wasɔ.

Currently Selected:

Lomɛ́ŋ 5: MMU2

Highlight

Copy