Lomɛ́ŋ 4

Ábalaháma, eŋédéb

1Buam, dinyɛ bɔ́guɔyɛd gɔg giág góbusió bá Ábalaháma Sié ɔgúnɔ́ wasɔ e? Umádáŋáb giág na gual gág gá muát e? 2Ɔ́g Gɔdányá máan Ábalaháma osi wá mɔnd agág gá eŋís gá bielínyélínyé ɛbɛ́ umáalá, gesí Ábalaháma mɔbiɔ́yɔ́, uwɔ́ gɔg ta gual nɔ́ ogóbúsió bá Gɔdányá. 3Ɛsámb yá Mbɔbɔnɔ guɔ́yɔ gɔg ka giág e? Ábalaháma mondí ɔdɛm aga Gɔdányá, ány Gɔdányá máan wɔ́ osi wá mɔnd agág gá eŋís góbusió bá guádáb guág. 4Kanyɛ́ gúnyɛ ká, ewe walaná buol gúbianan bɛnama, bɛnama ibiány dɛbá gidésie, bínyɛ giíg gág gá nɔbɔl. 5Diɔ́yɛd ká, mɔnd diguála buol ká udidáŋab buanda, mɔnd wádábaná ewe wondonyó afalafal osi, Gɔdányá gúbanan guádáb gág, wondi wɔ́ osi. 6Anaány Défide ɔ́yɔnɔ́ agá asag, bese ná mɔnd uwɔ́ Gɔdányá ánaná wɔ́ osi agág gá eŋís, udiánd gulɛ́ŋɛ́d bielínyélínyé bág. Uguɔ́yɔ ká:

7Bese giod na ebe ɔbɔ́ Gɔdányá nyá gudɛ́nɛn bɔ́ bɛfal uwond uwéli bɛnaná bɔ́b,

8Bese giod na mɔnd uwɔ́ Ɔgúnɔ́ diánd gubanaan bɛfal biág.

9Bese uwaány nyɛ wa Beyúdɛn gusúg e? Ɔ́gɔɔ́ unyɛ sɔ́n wa ebe bádiábá Beyúdɛn e? Diguɔ́yɔ gɔg ká: Guádáb gá Ábalaháma gumáal ká Gɔdányá án wɔ́ osi. 10Niík gɔ́g bumáabiál e? Ábalaháma mabá umámán gubiáns e? Umába umaányɛ na gisud e? Ágó! Udemabá aŋansán, umabá umaányɛ na gisud! 11Anyɛ́ Ábalaháma máabá umányɛ na gisud, Gɔdányá uwondi wɔ́ osi agág gá eŋís gágual ká Ábalaháma máadáb wɔ́. Agá gélem ány, Gɔdányá uwɔyɛd gág ká úbiáns. Buensi mabá bulinsi búméedíyényi ká unyɛ osi agá eŋís yá Gɔdányá gág gá guádáb. Anaány Ábalaháma mɛ́ɛy sié wa ebe gidigid bányá na bisud bádábaná Gɔdányá, ká Gɔdányá óndi bɔ́ sɔ́n besi agág gá eŋís. 12Unyɛ sɔ́n sié wa band bansán, anaány gúnyá ká, ebe bányá bansában, bónd báládaan gɛbɔb gá sié wasɔ Ábalaháma umáabá umányɛ udɛbiáns gɛsɛgɛl umáadáb Gɔdányá.

13Kányɛ gúnyɛ ká, Gɔdányá méeŋín Ábalaháma na nɔgɔgɔ nág ndán ká ugéeŋin bɔ́ gus. Udiméeŋin Ábalaháma ndán iyaány gágual ká umofuógónyi bisele, búnyɛ́ gɔɔ́gɔ́ gágual ká, Gɔdányá máan wɔ́ osi wa mɔnd góbusió bá guádáb gág. 14Búmábá ká, ebe bófuógonyó bisele bɔ́bɔ́ eŋényé gusúg, bányá bágúdáŋáb mand má ndán, igiány gigúl guádáb nyɛ gilé, ta ndán ya Gɔdányá ɛdɛbá sɔ́n na mfí. 15Kandɛ gufuógonyi bisele guala ká Gɔdányá ɔ́bɔnɛn band ilób, bisele máal bɛ́dɛ́bá, gisɔsinɔ dɛbá. 16Ndán mebiéŋín agá gélem gá guádáb, ká ɛ́bá mfaán ya gilé, yónd ɛ́bá gá nɔgɔgɔ ná Ábalaháma gidigid, saá gɔɔ́gɔ gá ebe báládaná bisele gusúg, ta ebe bádábaná anyɛ Ábalaháma unyá sie wasɔ wa bem. 17Gɔɔ́gɔ anyɛ́ búnyá buɔ́ŋɔ́n agá Mbɔbɔnɔ ya Gɔdányá ká: Nguál ká ábá sié we egúl giod. Ábalaháma nyɛ sié wasɔ ogobúsió bá ewe uwɔ́ umáadáb. Gɔdányá waád wenyugenyé ebeguén, wond wala ká ubú búmabásaná búdiánɛ́g, buánɛ́g. 18Ábalaháma mág ɔdɛm, kɔɔ́m niágɛn ɔdɛm máal nídiánd gubá, uwádáb Gɔdányá, ubuál ká wɛɛ́y sié we egúl giod gɔɔ́gɔ anyɛ́ Gɔdányá mɔ́ɔyɛ́dɛ́n wɔ́ ká: Nɔgɔgɔ nɔ́w gedeg. 19Guádáb gág uguɔ́lɔb gugɔ́nɛ́nan, ta anyɛ́ umáabá uganyɛ na duɔŋ buanda bá duɔŋ nɔgɔn, ámálɛ́ŋa nuɔ́l nág númáabá núgányɛ nuɔl ná bulunu. Agany waga Sála mabá giwád. 20Udimeen guádáb ndán ya Gɔdányá. Guádáb gág ugúlénin wɔ́ magɛ́nda, uwɔ́ guéŋín Gɔdányá nugúm. 21Umalɛnsaan bese na bese ká ndán ɛyɛ́ Gɔdányá méeŋín, unyɛ na bugaga bágual yɛ́. 22Buád buanda, Gɔdányá máan wɔ́ osi wa mɔnd agág gá eŋís, gágual ká umáadáb. 23Kányɛ búnyá buɔ́ŋɔ́n agá mbɔbɔnɔ ká: Gɔdányá máan wɔ́ osi wa mɔnd agág gá eŋís. Moony amaány dɛbá góbusió bá Ábalaháma uwɔ́ eŋényé. 24Mágúdɛ́lɛ́ŋa basuá sɔ́n, ɔbɔ́ Gɔdányá ganúdián besi, basuá ɔbɔ́ diádábaná Gɔdányá uméenyúgí Ɔgúnɔ́ wasɔ Yésu aga ebeguén. 25Bɛnana bás bɛ́máal ká bédú wɔ́, kányɛ Gɔdányá méenyúgi wɔ́ aga ebeguén ká údióndi bindényé.

Currently Selected:

Lomɛ́ŋ 4: MMU2

Highlight

Copy