Lomɛ́ŋ 12

Gusɔ́d gá beédeb: Gubídága bɔsɔ́gɔ́

1Belimen bám bá guádáb, anyɛ́ Gɔdányá nyá gudídíye bese waga, ngúnuágaan makányá ká núbiéŋin banuá muát aga Gɔdányá anyɛ bɛbiág bídiábáná biguén, nubɛ́dɛɛ́g gág góbúsió, nuála ká wɔ́bɔɔn bese. Anaány nubiananá ká núbúlígenyi wɔ́ agaán gá ɛdɛm. 2Nudɛlád bielínyélínyé bá band bá gus egue, ánɔtɛɛ́n ká Gɔdányá núgún nɛnama naán ná ɛmbɛ́dágɛ́dɛn, ány nugalɛns buanda ubílénené. Igiány gigul gɔ́g nuganúsɔ́ŋɔ́ná ubú búnyá bese, ubú úbílénené, ubú búnyá mbanda. 3Anyɛ́ Gɔdányá nyá gundíye bese waga, ngúnuɔ́yɔɔn banuá bem ká: Nudibíbúlígényi, ánulɛ́nsɛ agá meliŋítas ubú nunyá, nulɛ́ŋa idény sá giodiɔdɛ́mɔ́ ɛgɛ́ Gɔdányá meénuéŋén ká núsɔ́ŋɔ́n kɔɔ́m ɔgɔ́ nunyá. 4Búnyɛ́ ká, dɛnyɛ na maláŋ giod agá nuɔ́l númoom, na nɔ́ sɔ́n, sig buláŋ nyɛ na ubág buol saáŋal, 5basuá sɔ́n anaány dɛnyá, dɛnyɛ giod, basuá bem dɛnyɛ anyɛ nuɔ́l númoom agá Kilíse. Dɛnyɛ baladán basuá bem anyɛ maláŋ má nuɔ́l númoom. 6Basuá gɔg, Gɔdányá mediéŋín bugaga báguala manda, sig mɔnd a gá uwág edeny na ugág gual. Mɔnd mábianan gɔg edeny wá gúgála anɛ ibús, nsɛ́ úgála agá edeny wá guádáb ugú únyá na gú. 7Ewe unyá ná edény wágual ká údúgúne bɔsɔ́gɔ́, nsɛ́ údúgúne, ewe unyá na edeny wá gufúnyifunyi, nsɛ́ úfúnyifunyi. 8Sɔ́gɔ́ ondodió mábia edeny wáguágaan bɔsɔ́gɔ́ makányá, nsɛ́ wáganɛn makányá; ewe walaná nubo, nsɛ́ wála nú anyɛ́ buófonó; ewe wendenyé, nsɛ́ wéndenyi bese; ewe udúgúnené ebe bɔ́bígɔnɔ́, nsɛ́ wála bú na bɛdɔdɛn.

9Nsɛ́ ɛlɛ́ga yán bá meliŋítas. Ánusáŋɔ́n bɔbɛ, núbɛ́gɔ́dɛn bese. 10Énubílénénín banuá na banuá anɛ belimen báguádáb, nubá bóbúsió báguánan bɔsɔ́gɔ́ gianta gá buanda. 11Ánualá buol na bugaga bán gidigid, nudiál na bunɔn, ánualá buol bá Ɔgúnɔ́ na ɔdɛ́m wán gidigid. 12Ɔ́nuɔ́bɔɔ́n bese gágual ká nugúbianan giág ɔdɛ́mɔ́. Ánubá na guéhíhenyi agá guɔ́bɛ́g ugú nuɔ́bɛ́gɔnɔ́, ánubaán nobusió na gubísógólony agá nɔládád nagadá. 13Énudúgúné belimen bán bá guádáb bádiábiánáná buanda, nuond nugɛ́ndɛ́gaan ebe bólonó aganuá bese. 14Ɔ́nuɔyɔɔn Gɔdányá ká waál ebe bénúgényígenyé bese, ónuófoón gɔ́b góbúsió bese, saá bɔbɛ. 15Ánuyayábá na ebe bányá agá ɛyayɔ, nubaŋa na ebe bábáŋaná. 16Ɔ́nuɔ́bɔ́nɛ́n banuá na banuá, nudibiɔ́yɔ́. Ánubɛ́gɔ́dɛ́n manda mádiáláná ká núbiɔ́yɔ, nudɛbɛgɔ́lɔɔ́n anɛ bensiŋísiŋ. 17Nudiondónyínyí bɔbɛ gá bɔbɛ, ánuambá nŋili yá guala manda ɔmɔ́ band gidigid ɔ́bɔnɔ́ bese na mɔ́. 18Nsɛ́ sig mɔnd biág makánya gá igág giáy ká úsɔ́dɔn agá bumben na mɔnd gidigid. 19Begúl bám, nudiálá gibiondio, ánɔtɛɛ́n Gɔdányá úbiondonyi gán góbusió, gágual ká Ɔgúnɔ́ guɔ́yɔ agá Musamb má Imbɔbɔnɔ ká: Yaŋuá inyá na gibiondio, yaŋuá nŋenuéŋin sig mɔnd a bɛnama bɛ́sɛ́gɛmananá naga. 20Umánd guɔyɛd ká: Nsana mánúma ɔmbɛlɛmbɛl wɔ́w, afɛ́n wɔ́, nɛɛ́da mánúma wɔ́, fá wɔ́ madɛ́ga. Ámaál anaány, búnyɛ anyɛ amaág wɔ́ bɛkána bɛ́lɔ́laná agá ɔduɔ́. 21Nudɛbɛ́nɛɛ́n ká gɛfal númányɛ́gɛnɛn, ánualá manda má bese ká númányɛ́gɛnɛn gɛfal.

Currently Selected:

Lomɛ́ŋ 12: MMU2

Highlight

Copy