Lomɛ́ŋ 11

Gɔdányá dɛmabɛ́yɛ́bɛd Ísalayɛl

1Kanɛ yófonó ká: Gɔdányá agubɛ́yɛ́bɛd Ísalayɛ́l nigúl nág e? Ágó! Yaŋuá muát, inyɛ wa Ísalayɛ́l agá mfɔŋ ya band yá Ábalaháma, agá niíd ná gians ná Bɛnsamɛ́ŋa. 2Gɔdányá dɛɛ́gɔbɛ́yɛ́bɛd nigúl nág ɛnɛ́ umɔ́ɔdɔ́bɔɔ́n nsua na nsua. Saá nugúlɛnsaan anyɛ́ búnyá buɔ́ŋɔ́n agá Musamb má Mbɔbɔnɔ aga kɔɔ́m ɔgɔ́ Eli bɛ́dádaná Ísalayɛ́l aga Gɔdányá wɔyɔ ká: 3Ɔgúnɔ́, bɔ́guɔ́nɔ mubús mɔ́w, abagada bɛdál bá bɛ́biág bɔ́w, iyɔlɔb yaŋuá eŋényé, báguámba guŋɔ́n yaŋuá sɔ́n. 4Gɔdányá mondínyí wɔ́ gɔg ká giág e? Umondínyí ká: Ngulɔbɔn band dɔns dútɛ́ndád nomo bányá guen gugunsɛ́n Gɔdányá wa Bál enú. 5Anaány sɔ́n agá gigúl gá ínen, gidam gá band nyɛ gisiénen ɛgɛ́ Gɔdányá agág gá bese méeyíd. 6Umeyíd bɔ́ gág gá gubíléne, saá gá bɛnɔg bɔ́b bá bielínyé línyé. Wéyíd bɔ́ gɔ́b gá bɛnɔg bá bielínyélínyé, gesí bese waga dɛ́ba mbanda bese. 7Gusúgudenyi nyá giág e? Gúnyá, nigúl ná Ísalayɛ́l dɛmabia ubú nímáambá; ebe ɔbɔ́ Gɔdányá meéyíd, bɔ́bɔ́ gusúg bamaábia, bɔsɔ́gɔ́ bóndodi dɛmamba gusɔ́ŋɔ́n, 8anaány búnyá buɔ́ŋɔ́n agá Musamb má Mbɔbɔnɔ ká: Gɔdányá máag bɔ́ masɛɛ́nɛn; uweleg eŋís yɔ́b ká yádian, idú sɔ́b ká sídiɔ́b gutɔ gusiám ínen. 9Ofuŋ Défide guɔ́yɔ sɔ́n ká: Nsɛ́ ɔnyɔ́ wɔ́b bá bɔ́ kɔɔ́m bɔ́gɔ́línɔnɔ́, ɔmbɛ́l uwɔ́ báguanɛná kɔ́, bádáŋáb nugényigeny nusɛ́gɛmananá nɔbɔ. 10Nsɛ́ Gɔdányá ál ká eŋís yɔ́b ól mbíne, bond bebúdebude, wóbígi bɔ́ na gɛnɔ́ gá muyú mɔ́b. 11Kányɛ yófonó ká: Anɛ́ Beyúdɛn méebúbén, abágua, bɔ́gɔlɔbɔnɛn kɔ́ e? Ágó! Ɔduɔ́ gulal wɔ́b gɔ́g umáal ká, ebe bádiábá Beyúdɛn dáŋáb gisódio. Beyúdɛn muát áb gágúbísésenyi bɔ́. 12Anɛ́ búnyá ká gɛnana gá Beyúdɛn máal ká band bá gus bia bianta bá manda má bese, gɛgua gág igiál ká egúl ondodió bia bianta bá manda má bese, gigul Beyúdɛn gonuónd aga Gɔdányá, bianta bá manda má bese gabá gudúmbídenyi.

Gisódio gá ebe bádiábá Beyúdɛn

13Nɛnuán, banuá nudiábá Beyúdɛn ngálaná gán. Inyɛ edúmeb aga ebe bádiábá Beyúdɛn, agá edény uwaány, ngúgúmenyi Gɔdányá na buol ubuány umáamfá. 14Nguála bú ká ɔ́gɔ búnyɛ́ báguánɛ́g ká belimen bám bísésidenyi, yónd yaál ká gɛdám ɔgɔ́b gá ɔlɔŋ bia gisódio. 15Anyɛ́ Gɔdányá máag bɔ́ agá buáy, uwaal ká band bá gus biáyɛŋan naga, anyɛ́ uganuánd gubígɔ́gɛ́dɛn bɔ́, búgabá nanyá e? Búgabá mbanda guadɔ́g agá ebeguén gá gúsiondo agá gusɔ́d. 16Béméŋin giéns góbusió gá gɛnyɔka gá Gɔdányá, gɛnyɔga gidigid gísiénené nyɛ sɔ́n gág. Béméŋin aŋaŋa gá Gɔdányá, bɛgas nyɛ sɔ́n bág. 17Ísalayɛ́l nyɛ anɛ bɔdɛ́d bábɛ́laná ká olifié ubú Gɔdányá maásɔ́mbá gɛdám gá bɛgas; aŋuá gɔg adiábá Yúdɛn, amabá anyɛ gɛgas gá bɔdɛ́d bá ɛyɔ́m, uwaguládɛ́gɛn agá gisúmbié gá gɛ́, nɛnuán aŋuá sɔ́n agúdáŋába ɔlɔŋ na bɛgas ibiány madaádá ɔmɔ́ ɛŋaŋa búlígenyé agá bɔdɛ́d. 18Buád buanda, adiábiánáná ká éfénen bɛgas ɛbɛ́ bámáasɔ́mbá. Adibá wɔ́gubiɔ́yɔ! Saá aŋuá éŋené aŋaŋa madaáda, aŋaŋa úguéŋené madaáda. 19Anyɛ wágual gám ká, bámagɛnsá bɛgas ibiány ká bángɔ́n yaŋuá kɔ́. 20Búnyɛ́ nɔ́, bámagɛnsá bɛ́ gágual ká, bɛ́dɛmabianan guádáb, kányɛ aŋuá ányá ány góbusió bá guádáb gɔ́w. Ɔdibiɔ́yɔ́ gɔg, bínyáŋányáŋ. 21Gágual ká, ɔ́g Gɔdányá masɔ́mb Beyúdɛn bányá mbanda bɛgas, gɔ́l gɛsɛgɛl ká ɔdɛgusɔ́mb aŋuá sɔ́n. 22Bisónyí nanyá Gɔdányá díyenyé na ɔdɛm wá bese na ɔdɛm wá gulal. Unyɛ na ɔdɛm gulal gá ebe bálaná bɛfal, na ɔdɛm bese gɔ́w góbusió. Kánɛ́ buófonó gɔg ká ábaan nobusió na guondonyi ɔdɛm agagá gág gá ɔdɛm wá bese. Kandɛ nɔ́, bagagusɔ́mb anɛ gɛgas. 23Beyúdɛn mádáb Gɔdányá, ugaládɛ́gɛn bɔ́ kɔɔ́m bámáabá nsua, gágual ká unyɛ na bugaga báguand guládɛ́gɛn bɔ́. 24Aŋuá anyɛ gɛgas gá bɔdɛ́d bábɛ́laná ká olifié wa ɛyɔ́m ɔwɔ́ Gɔdányá máasɔ́mb gɛgas uwaládɛ́gɛn agá bɔdɛ́d búmodió bámáagɔ́n. Adɛbá anɛ mbanda bɔdɛ́d bumɔɔ́bɛ́sɔ́gɛ́n. Beyúdɛn bɔ́bɔ́ bányɛ bɛgas muát muatia bá olifié uwaány ɔwɔ́ bámáagɔn. Búdɛ́bá muyú gág ká wánd guondi bɔ́ agá bɔdɛ́d bɔ́b ubú bámáabá gá bɔ́ nsua.

Gisódio gá Ísalayɛl

25Belimen bám bá guádáb, ndɛguámba ká núlɔ́bɛn agá kandɛ gulɛns niɔs ná Gɔdányá, ká nudɛbɛ́gɔ́lɔɔ́n anɛ bensiŋísiŋ: Gɛdám gá baan bá Ísalayɛ́l gabianan ɛdɛm sɛlɔ́ndan gɔb guám anyɛ́ ebe gidigid ɔbɔ́ Gɔdányá méeyíd agá egúl óndodi ganúbia gisódio. 26Ány baan bá Ísalayɛ́l gidigid ganúbia gisódio, gɔɔ́gɔ́ anyɛ́ Musámb má Imbɔbɔnɔ ɔ́yɔnɔ́ ká: Odúgúny band gamɛ́n Síyon, ugeéli bɛfal bá nigúl ná Yákɔba. 27Nɛnama enie nɛlad nám nɔbɔ ganúbá, gigúl ngenuéli befal bɔ́b. 28Anɛ́ Beyúdɛn méen Ndág ya Nsɔ́m, ány bámɛ́ɛy bambɛ́lɛmbɛ́l bá Gɔdányá, banuá unuadáŋáb bese. Nánié umeyíd bɔ́ ká bábá nigúl nág. Ugúbíléne bɔ́ góbusió bá besié bɔ́b. 29Gágual ká Gɔdányá dɛguánd gugɔ́lɔɔn buanda ubú useéguéŋin mɔnd, udigúkɔ́ŋa mɔnd usaáguman gɔbɛ́lɛ́gɛn. 30Búnyɛ ká, nsua nudɛmala Gɔdányá nŋɔ́bɛnɔ, nɛ́nuán gɔg, úgunuán gɔsɔ́g gágual ká Beyúdɛn dɛmala wɔ́ nŋɔ́bɛnɔ. 31Búnyɛ buanda búmoom na Beyúdɛn, nɛ́nuán bádɛɛ́guala Gɔdányá nŋɔ́bɛnɔ, buád buanda Gɔdányá ganúnuán gɔsɔ́g, ta bɔ́bɔ́ sɔ́n wán bɔ́ gɔsɔ́g. 32Umáal ká band gidigid bá anyɛ biɔ́l gágual ká bádɛmal wɔ́ nŋɔ́bɛnɔ. Umáal bú ká údíyé ká uguánan mɔnd gidigid gɔsɔ́g giod.

Gɔdányá gɔ́dɔ́mban buand gidigid

33Gɔdányá nyɛ meliŋítas gianta! Nsiŋi ság na ɛmbɛ́dágɛ́dɛ́n ság nyɛ́ guyuum. Mɔnd dɛbá bágúlɛns ɔ́g ká gusɔ́ŋɔ́n ubú úgedenyé agág gá ɔdɛm! 34Ányá ulɛnsaná ɛmbɛ́dágɛ́dɛn sá Ɔgúnɔ́ e? Ányá unyá weguéŋin wɔ́ ɛsɔ́m e? 35Ányá umáakɛ́n gufá wɔ́ buanda ká uwɔ́ Gɔdányá wóndinyi wɔ́ e? 36Buanda gidigid guúlenin agagá, uwaal ká buanda gidigid bá buónd buɔ́bɔnɛn wɔ́. Nugúm bá naga, na baánamana! Anaány.

Currently Selected:

Lomɛ́ŋ 11: MMU2

Highlight

Copy