Lomɛ́ŋ 13

Bisúŋígin bɛ́lɛ́ŋaná band béndenyé gɛdɔŋ

1Mɔnd gidigid gúbianan ká wɔ́bɔnɛn ngɔ́mɔnɔ, gágual ká band abaány gidigid, Gɔdányá uméeŋín bɔ́ bugaga uwond uwadágá bɔ́. 2Kány gúnyá ká, mɔnd unusenyé ngɔ́mɔnɔ, ugúnusenyi nŋɔyɔ ya Gɔdányá. Ebe bálaná anaány gúbígɔ́gɔn gifudie. 3Búnyɛ́ ká, ebe bálaná bese digúdíne band béndenyé gɛdɔŋ, ebe bálaná bɔbɛ bɔ́bɔ́ bédínené. Ɔ́g adɛguámba gudíne ngɔ́mɔnɔ, alá manda manyá bese, bégegufínenyi. 4Gágual ká, ngɔ́mɔnɔ guálan Gɔdányá buol búgúdúgúnené ká ála manda manyá bese. Ámála gɔg bɔbɛ, agúbianan ká édíne wɔ́, gágual ká, bugaga béguéŋen band nugényigeny ubú Gɔdányá éŋené bɔ́ dɛbá bégilé, bányɛ bél buol bá Gɔdányá bédíyenyé ilób yág gigúl béŋené nugényigény gá band bálaná bɔbɛ. 5Buád buanda nubiananá nuála ngɔ́mɔnɔ nŋɔ́bɛnɔ, saá gá gúbísándɔ́n ilób yá Gɔdányá gusúg, ánualá wɔ́ nŋɔ́bɛnɔ sɔ́n gágual ká, nugúlɛnsaan agán gá ɛdɛm ká búnyɛ́ nŋili yá bese. 6Buád buanda núnamaná sɔ́n tás, gágual ká Gɔdányá madágá band bɔ́gɔlɔnɔ tás ká bála buol ubuány bese. 7Énuéŋén sig mɔnd a buanda buófono ká nuéŋen wɔ́. Ɔ́g búnyɛ tás o, ánunamaán, ɔ́g búnyɛ tíkét o, ánunama. Ɔ́g búnyɛ nŋɔ́bɛnɔ o, ánualá nŋɔ́bɛnɔ, ɔ́g búnyɛ gibúligie o, énubúlígenyi bese.

Nsɛ́ díbílénenin basuá na basuá

8Nudɛgúbianan ká núbianɛn mɔnd buanda búmáal búdɛ́bá ɛlɛ́ga. Gágual ká, ewe ulɛ́ganá bɔsɔ́gɔ́ gufuógonyi bisele gidigid. 9Búnyɛ́ nɔ́, bisele guɔyɔ ká: Adiánd ɛsɔm, ɔdiɔ́n mɔnd, ediéb, edibísésídényi buanda bá mɔnd. Bisele ibiány gidigid na bíndodio, bɛ́bɛ́ gidigid bínyɛ́ agá gisele gímoom egie gínyá ká: Lɛ́gá sɔ́g mɔnda anyɛ́ ábɛ́lɛ́ganá aŋuá muát#13.9 Eso 20.13-17; Det 5.17-21; Lef 19.18; Mat 19.18-19; Gal 5.14.. 10Ewe ulɛ́ganá sɔ́g mɔnd a dɛguála wɔ́ manda má bɔbɛ. Kanyɛ́ gunyá ká, ámálɛ́ganɛn ogúfuógonyi bisele bese na bese.

Bá abídábɔ́nán, anyɛ́ Kilíse genuúl

11Anyɛ́ núlɛnsaná gɛsɛgɛl ɛgɛ́ dɛnyá gá gɛ́, gɛsɛgɛl gá guanyɔg saman gusiám, ánuányɔ́g gá dunɔ́; búnyɛ́ ká gisódio nyɛ menyí égúy nasɔ nɛ́nuan, gɔdɔ́mb gɛsɛgɛl ɛgɛ́ dɛ́maábanyɛ́g guádábaan. 12Kɔɔ́m ganyɛ gágúbál, gɔb uguány imbíné dɔ́mb. Kányɛ gúnyá ká dɛ́diánd guala biád bá bielínyélínyé bíbiálaná agá imbíné. Nsɛ́ dɛgɔ́l menuís ɔmɔ́ dɛ́genúnuenesi na mɔ́ agá gise. 13Nsɛ́ dɛ́bɛ́gɔ́lɔɔn anyɛ́ buófonó niaŋ ná band bándaná agá gise. Dɛbɛ́sandɔ́na ɔnyɔ́ wá giod na nɛfuá ɛnɛgɔn, gubídɔ́bɔ́, mand má mɔnyɔ́gɔl, nsáŋ na yaág. 14Ánubɛ́fuág Ɔgúnɔ́ Yésu Kilíse, nudɛbɛ́nɛ́nɛ́n bɛsɛmɛ́dɛ́n bá nuɔ́l ká bídídígen ká diála bɔbɛ.

Currently Selected:

Lomɛ́ŋ 13: MMU2

Highlight

Copy