Lomɛ́ŋ 10

Na Beyúdɛn na Ebe bádiábá Beyúdɛn, bem nyɛ́ na Ɔgúnɔ́ omoom

1Belimen bám báguádáb, ngúbíléné na ɔdɛm wám gidigid, yond mbísógólonyi Gɔdányá ká Beyúdɛn bia gisódio. 2Gágual ká, inyɛ eŋél gɛ́laluá wɔbɔ ká bégúbiéŋen giod aga Gɔdányá, gubiéŋen gɔ́b uguány nyɛ agá kandɛ gɔlɛnsa. 3Bádimasɔ́ŋɔ́n nanyá Gɔdányá óndonyó band besi agág góbúsió, abámbɛd yɔ́b nŋili ya gual ká bábá besi agá eŋís yá Gɔdányá, anaány béméen gulád nŋili yá Gɔdányá yalaná ká band bá besi agág gá eŋís. 4Gáguál ká Kilíse mofuógídónyí bisele bá Moyíso ká ebe gidigid bádábaná wɔ́, Gɔdányá án bɔ́ besi agág gá eŋís. 5Ana Moyíso mɔ́ɔyɛ́d gá ewe wambaná ká úfuógonyi bisele ká úbá osi agá eŋís yá Gɔdányá. Umɔyɛ́d ká: Ewe ufuógonyó bisele gidigid gabia gusɔ́d. 6Nɛnamá enie umɔɔ́yɛ́d agá giáy gá busi búleniné agá guádáb. Umɔyɛ́d ká: Ɔdibiɔ́yɛ́dɛ́n ɔgɔ́w gá ɔdɛm ká: Ányá uganɔ́b ugumuaná e? Anɛ aguámba ká Kilíse sɛdɛ́fuɔ́g aya egegus. 7Ta ká ɔyɛ́d sɔ́n ká: Ányá ugenúdúnúg agá gɛdɔŋ gá ebeguén, anɛ aguámba guenyugi Kilíse agá ebeguén. 8Mbɔbɔnɔ yá Gɔdányá guɔ́yɔ gɔg ká: Gugál uguány nyɛ egúy nɔw, ɔgɔ́w gá niíd ná ɔgɔ́w gá ɔdɛm. Gugál uguány nyɛ nsɔ́m yá guádáb iyɛ́ didúmbenyé. 9Ɔ́mɔ́yɔ ogóbúsió bá band gidigid ká, Yésu nyɛ Ɔgúnɔ́, ond ádában ɔgɔ́w gá ɔdɛm ká Gɔdányá menyúgi wɔ́ agá ebeguén, agabá osódóny. 10Búnyɛ́ ká, agág gá ɔdɛm mɔnd ádábaná, Gɔdányá ád gual ká mɔnd uwaány bá osi agá eŋís yág, na niíd mɔnd élúményé guádáb gág, Gɔdányá ád gúsódonyi wɔ́. 11Gágual ká, Mbɔbɔnɔ ya Gɔdányá guɔyɔ ká: Ewe gɔg wuŋádabaná ndiínúsémbi wɔ́. 12Beyúdɛn na ebe bádiábá Beyúdɛn ganyɛ buanda búmoom. Bɔ́bɔ́ bem bányɛ na Ɔgúnɔ́ omoom ufɔnaná ebe gidigid bábɛ́laná wɔ́. 13Búnyɛ́ buɔ́ŋɔ́n ká: Ewe gidigid uganɔ́bɛ́lɛ́gɛn Ɔgúnɔ́, gɔsɔ́d. 14Nanyá gɔg bányá bágúbɛ́laan wɔ́, bɔ́bɔ́ ta guádáb wɔ́ e? Nanyá bányá báguádáb wɔ́, bámáal bɔ́diɔ́b bɔ́yɔ wɔ e? Nanyá bányá bɔ́guɔ́b bɔ́yɔ wɔ, mɔnd máal udiɔ́yɛ́dɛ́n bɔ́ buóny bág e? 15Nanyá band nyá bégúdúmbenyi buóny bág, bámaál bádɛ́dɔ́m bɔ́ e? Gɔɔ́gɔ́ anyɛ́ búnyá buɔ́ŋɔ́n sɔ́n ká: Ɛyayɔ nyɛ giod, gigúl ebe bɔ́yɔnɔ́ Ndág ya Nsɔ́m ólonó. 16Bɔ́bɔ́ bem bédimeluminyi Ndág ya Nsɔ́m, buád buanda Isayí ɔ́yɔnɔ́ ká: Ɔgúnɔ́, ányá umáadáb gugál ugú diméedúmbényí e? 17Giondiɔdɛ́mɔ́ gúleen agá gugál dibídɔ́lɛ́gɔnɔ́, gugál guád gúnyá Ndág ya Nsɔ́m ya Kilíse. 18Nŋuófoon gɔg ká: Beyúdɛn bád ebe, bɔ́dimɔ́ɔb yɛ́ e? Bɔ́mɔ́ɔb! Ikelu sɔ́b mɔ́ɔbɛ́gɔ́bɛ́g agá gus gidigid, gugál gɔ́b uguénege agá nsúgie ya gus. 19Nŋuófoon sɔ́n ká: Nigúl na Ísalayɛ́l dimasɔ́ŋɔ́n e? Gɔdányá mɔyɛ́d agá niíd ná Moyíso ká: Nŋaal ká nuála yaág gá ebe bádiábá mbanda nigul, nŋeligidenyi ilób yán gá ebe bádiábáná na nsiŋi. 20Gɔdányá guɔ́yɔ agá niíd na ibús Isayí muát ká: Ebe bányá gubá bádɛ́ŋambá, bɔ́gumfuɔg, ebe bányá gubá bɔ́dígɔ́lɔɔ́n gɛsɛgɛl nam, iyebídíye gɔ́b. 21Agá ubú búlɛ́ŋaná nigúl na Ísalayɛ́l, ugany ká: Mɔɔs anɛ mɔɔs, nŋuamba ká dɛ́bɛ́dábɔ́n na band abaány, bɔ́bɔ́ ta guŋɔ́bɛ́n, báŋala ɔduɔ́ gulal.

Currently Selected:

Lomɛ́ŋ 10: MMU2

Highlight

Copy