Zlən ataa həji ta zlən aagi 22

1«Zlina mama aagi abə baba aagi, huni teh ma ndə sa kamay a zlap anawatsə aska la ha naka bəza,» iy. 2Ɗekɗek aa ndza ta ka, aa kateh Pul a kazlap abə ma hayak ta Ibəraniŋku. 3Azha, iŋgaya: «Sa ndə Yahuda, sa mbəw a Tarsus ma ndza a hayak Silikiya, ama, a ɗi a Wərusalima abə sa gəl. Gamaliyel ana ala ma sərəkaka njin ma ma garagar ataa jiji takwa aagi. Sa ɗa ala ma kaŋcah a ɗalanə zlən a Bizlaf, andza ndə, huni kaŋcah akacihwa watsə. 4Sa tasatana yaka a gwar andza yaka mci a həji ma kasəbar təf Yesu aagi. Sa tambəla wali abə mawəl aagi, sa takwiyata a jak yaka. 5Madagal maɗal kwakus abə ladzam həji ma gulakwakw aagi, aa kula a ghal səkən ndə aa gəra abə ndə aa zlima ŋter. Ara ndə a ɗa, təmta ma vəlaka ɗerewal ta pəl təf ta nda a hayak Damas. Zlən ma jaɓaka ci, dzaw həji ma ji ma Yesu aagi abə sheshili, zhana daata a Wərusalima aska aagi agəzlata.

6Sa kanda ata təf, sa huk abəra Damas. A tsutsa a tsutsa, a ɗal bəza pish ɗawarwar, weɗ la minja taa tə a wəzəm a wəzlaf, vərləm a dəpaka bəza, dəba a aɓal abəra sa. 7Ndəv sa ndəv naka ata hayak, zhana sa zlima ma minja a kazlapaka, iŋgaya: “Sul, Sul, hwa saka yaka ava?” 8Dəba sa azhinazə: “Hwa vaye sa Bay Madagal?” siy. Zlap watsa a zhinaka, iŋgaya: “Sa Yesu ndə Nasaratu, a ɗa a sa abə ha naka ana ndə hwa kasanə yaka watsə.” 9Həji ma ndza abəra sa aagi kagəra weɗ la watsa, ama, aa kazlima ma ma kazlapaka a mən səku. 10Dəba sa aɗiwzə: “Sa ɗalzə avaŋga sa Bay Madagal?” Zhin Bay Madagal a zhinaka, iŋgaya: “Gar kwa a wəzəm, nda a Damas, a tsutsa, aa kaaŋgəɗahu a ŋtaɗ ŋtaɗ ana zlən ndə hwa kaaɗalə,” iy. 11Ama, sa tabəw naka ana ala wələf ara ndə a kaɓal dəy ana la. Azha, həji ma ndza abəra sa ma kalahaka aagi, kaw aa mbəlaka ata ra a gwar a Damas.

12A tsutsa, ala minja aka, zləm tə Ananiyas. Ala ma kanjin ma Bizlaf abə ꞌunəf ŋtaguleŋ abə ma ma garagar ataa Musa. Yahuda ma ndza a hayak Damas aagi kahəmənə tiwtiw, ma ma təwah ana ndə aa kazlap a heɗe. 13Tsaw a ndaha ara sa, azha dəba a azlapaka, iŋgaya: “Sul, zlina, nja kwa madəɗ tə!” iy. A tsutsa a tsutsa mpaŋ nja naka a dəɗ tə, dəba sa agəra Ananiyas. 14Zhana zlap a zlapaka, iŋgaya: “Bizlaf ataa jiji takwa aagi, tajihu a sən may tə, a gəra ala ma dəlili ŋtaɗ tə, zhana a hwa zlima ma tə. 15Ara ndə a ɗa, hwa aɗa ala ma kaghal zlən tə ndə hwa gəra, hwa sənə atama manahayak tiwtiw, hwa aghal səkən ndə hwa gərata abə ndə hwa zlimata aagi. 16Mbara azha, hwa teh veme? Kiyzamə! Lamzə batem abə pəl ataa mpət kwa aagi abə ya zləm tə.”

17Ndə sa zhina naka a Wərusalima, vah pal sa katarha a jak kwakus, Bay Madagal ghal a ghalaka ha tə. 18Sa tagəra Bay Madagal zhana tazlapaka, iŋgaya: “Hwa həzək səku, ndaa kwa a bəza kahkah a Wərusalima, ara ndə a ɗa, aa kaalamzə səkən ndə hwa ghal ata sa akas.” 19Zhin sa zhinazə: “Ama, Bay Madagal, həji aagi kasən katkadək, sa nda a jak ta tarha Yahuda a gasəha həji ma kaɗal awa aska ma kwa aagi. Sa takwiyata ka a jak yaka, sa tarəgaɗata. 20Azha, ndə aa dza Etiyen aka a mci, ndə ampəs ataa Etiyen ala ma kaghal zlən kwa ndə a gərazə abə nja tə a zah tə, sa a tsutsa ana sa tə yəm. A ɗalaka təwah ana zlən ataa həji ma kadzə ka watsa aagi, sa ala ma kambəla rəkuts ta aagi.” 21Ama, Bay Madagal a zlapaka iŋgaya: “Nda, sa zlənahu gədək ara həji ma ŋkula ɗa Yahuda aagi.”»

22Yahuda aagi tazlima ma ataa Pul tiɗa ndə a kazlap ma watsə aagi, ama azha, dəba aagi adza wəla, aagi iŋgaya: «Huni daaha miɗ bəza ana ala watsa! Madza ka a mci, tazhiva a zhin a nəp səku!» 23Aa kadza wəla, aa kafak rəkuts ta a wəzlaf, zhana aa kwiy hayak a wəzlaf, la ma ndza a wəzlaf bərdibərdi tiwtiw. 24Azha madagal ma ndza aha suji Ruma aagi zlap a zlap, aska aagi ajaɓ Pul aka ata la ma ɓərɓər, aska aagi agəzlə abə lakwatəy, aska həji azlima ma ma həɗəw həji watsə aagi, aa dza wəla a heɗe. 25Ama ndə aa dzaw Pul aka, aska aagi agəzlə, azha, zlap a zlapanə a suji ma ndza a tsutsa, iŋgaya: «Təf ara huni a gəzl ala ndə hayak Ruma, ndə huni awli kwagwa a zla guma tə vəw?» 26Ndə a zlima ana suji watsa, tsaw a nda a ghalazanə ka a madagal ma ndza aha suji aagi, iŋgaya: «Hwa ɗalzə avaŋga? Ala watsa ndə Ruma!» 27Mbara azha, tsaw a ndaha ana madagal ma ndza aha suji aagi ara Pul, dəba a aɗiwzə, iŋgaya: «Ghalaka, ŋter hwa ala ndə Ruma vəw?» iy. Pul zhin a zhinanə, iŋgaya: «Ayəw,» iy. 28Madagal ma ndza aha suji aagi zlap a zlapanə, iŋgaya: «Ataa anaka, dala dagala ana ndə sa gəy abə sa lima təf ana ndə hayak Ruma,» iy. Pul zhin a zhinanə, iŋgaya: «Ataa anaka, mbəwha naka a dəməs mana,» iy. 29Həji ma kaɗiw a gəzl aska, a zlap nana aagi, a tsutsa a tsutsa, mbasl aa mbasl ka. Ndə madagal ma ndza aha suji aagi a zlima, ala ndə hayak Ruma ana ndə a dzaw ka abə sheshili ya, ŋzliŋ tadzə bəza.

Pul atama həji ma gulakwakw ma dzaw ma aagi

30A kwaf tə, dəba madagal ma ndza aha suji aagi agas, a sən ŋter ara veme abə Yahuda aagi tək ma ata Pul? Pəl a pəlanə sheshili ndə aa dzawə abə sha watsa bəza. A diwzha, ya a yaha la dzam ataa magulakwakw maɗal kwakus aagi abə magulakwakw ma zla guma aagi, leŋ a daaha Pul, gar a gar ka atama ta.

Currently Selected:

Zlən ataa həji ta zlən aagi 22: GOU

Highlight

Copy