Zlən ataa həji ta zlən aagi 21

Taf Pul a Wərusalima

1A diwzha ndə, ni ndaa cini bəza abəra həji ma gulakwakw ma ndza a hayak Efesus aagi, ni ndaha ata gəlmbə, peteŋ ni a ma bay mtil a hayak Kus. A kwaf tə, peteŋ ni a bay mtil Rudus azha, a tsutsa, ni tsaa kanda cini a hayak ma dzamadzam Patara. 2Ndə ni gəra gəlmbə ma kanda a hayak Finikiya, takaf ni taf a mən, ni tsaa kanda cini. 3Ndə ni ɗa peteŋ abəra Kipərus, ni tagəra bay mtil watsa abə nja. Ni pew gwara ata nduŋ bay mtil watsa, ni pew gwara a hayak Siriya. Dəba ni atadukha a hayak ma dzamadzam Tirus, ata la ndə həji kaza səkən ma ndza a gəlmbə aagi. 4Ni tandza cini ka a tsutsa vah ŋshiliɗ, ara ndə, a tsutsa ni tagəra magəli Yesu aagi, ndə Miɗ ma ghwaɗeɗe, aa kazlapanə a Pul, aska ŋkula taf a nda a Wərusalima. 5Ndə wan cini ma ŋshiliɗ watsa a kəɗaŋ tə, ni zhin cini, aa nda ciwir atama, wali abə wəzhi tə aagi, aa talahazani a pewha hayak ma dzamadzam watsa. A mazləm mtil, ni tagəliɓ cini ka azha, ni katarha. 6A diwzha ndə ni ɓizh cini, takaf ni taf cini a gəlmbə, magəli Yesu aagi tsaw aa zhin ta a wata ta aagi. 7Ndə ni kəɗaŋ ciwir cini bəza ata yəm abə gəlmbə, dəba ni anda a tsutsa a hayak ma dzamadzam Tirus, peteŋ ni a hayak ma dzamadzam Putulemayis azha, a tsutsa dəba ni azlapzatana a həji ma ji ma Yesu aagi, ka ni ndzazə kusəm abə təmta vah ŋtaɗ.

8A kwaf tə, ni tsaa kanda, peteŋ ni a hayak ma dzamadzam Kaysariya. Azha ni tsaa nda a wata ataa Filip ndə aa kayə: «Matəf ma ghal Ma wiyə ma təwah.» Ni tandza cini ka a wata tə. Filip a ɗa ŋtaguleŋ a taba həji ma ŋshiliɗ ma dəm aka a Wərusalima a ɓizh wəda aagi. 9Abə hildimi ŋfaɗ, aa tanaka ji mawəl səku, aa kaghal zlap Bizlaf. 10Ni taɗal wan a tsutsa kajik, peteŋ taa tə ana ala ma ɗaf ma ndə a zlimazə ara Bizlaf minja, zləm tə Agabus, a ndaa a bəza a hayak Yahudiya. 11Tsaw a ndaha a sarzani. Leŋ a ji kanda ataa Pul, dzaw a dzaw ra tə ka abə ŋgas tə, dəba a azlap, iŋgaya: «Tsakwa ana ma ndə a ghalə ana Miɗ ma ghwaɗeɗe, iŋgaya: “A Wərusalima, magulakwakw Yahuda aagi adzaw cina kanda watsə ikwa. Aagi avəlanə ka a ra a həji ma ŋkula ɗa Yahuda aagi.”» 12Ndə ni zlima ma watsə, ni abə həji ma ndza a hayak Kaysariya aagi, dəba ni atar Pul aska a ŋkal a taf nda a Wərusalima. 13Azha, zhin a zhinani, iŋgaya: «Səkən ndə huni kaahan aska a zlaka ꞌunəf ka veme? Sa, mavəy zləm ataa Bay Madagal Yesu, sa tavəla ha naka kwa a dzaw gagagha səku, kwa sa mca naka a Wərusalima,» iy. 14Andza ndə a kaji ma cini səku, ni tazhin a kərəɗ ma tə atama aka zhana səku. Dəba ni azlap: «Bay Madagal Yesu maɗal səkən ndə a deŋ ka a ɗalə,» niy.

15A diwzha, wan kajik, dəba ni asla kusəm, ni tsaa kataf cini a Wərusalima. 16Magəli Yesu ma ndza a hayak ma dzamadzam Kaysariya aagi, dəba aagi alahzani, jaɓ aa jaɓani a wata ataa Manasun ala ndə bay mtil Kipərus, ma ɗa magəla Yesu wan aka, a wata tə abə ni wan.

Lima tiw Pul abə Yakuba a Wərusalima

17Ndə ni ɗa gwar a Wərusalima ya, həji ma ji ma Yesu aagi vərəm ana ma lamzani abə ɓas. 18Azha a kwaf tə, tsaw ni ndaha abə tiw Pul ara Yakubu. Ata la ndə magulakwakw ma ndza aha ladzam həji Kərist aagi kadzam. 19Ndə Pul a zlapzatana bəza, azha dəba a aghalatana səkən ndə Bizlaf a ɗalatana a həji ma ŋkula ɗa Yahuda aagi gwara ara, taŋgəɗata tiwtiw. 20Ndə aa zlima, dəba aagi aya dərəf ta həmən Bizlaf, azha aagi iŋgaya: «Zlina, hwa kagəra, həji bəluk dagala ana bəw ta a həji ma njin təf Yesu aagi zhana tiwtiw, aa njin ma ma garagar abə ŋkwaɓ. 21Tsakwa ana ma ndə aa kaghalatana ata hwa: Sərək ma kwa, a kaghut Yahuda ma ndza a taba həji ma ŋkula ɗa Yahuda aagi, mba ma ma garagar ataa Musa ka. Hwa kazlap aska aagi a ŋkalzə zla mazhemter wəzhi zhana aska aagi a mbasl kwakus ataa Yahuda aagi ka. 22Səkən ma zhiva a ɗal azha veme? Ara ndə a ɗa, aagi azlima kwa avaŋgəy hwa a ɗi. 23Ɗal səkən ndə ni kazlapahu azha. Ni abə həji a ɗi ŋfaɗ ana ma ghala səkən aka a Bizlaf. 24Yata aara abəra hwa, huni ɗal gwaygwaya ta ban dadawər, azha ŋtəratana səkən ta ndə aa gəy aagi. Azha, aska aagi a fəɗ ha bəza. Aska kwa vaye a sənata ci: Səkən ndə aa kaghal ata hwa aagi, a ɗa səkən ma ɓəlaakaka. Ama hwa yəm, hwa kasən njin ma ma garagar a heɗe a heɗe. 25Ataa həji ma ŋkula ɗa Yahuda ma bəw ta a həji Kərist aagi, ni taŋtiratana səkən ndə ni gar ka aagi: “Huni ɗiw a ji a zəm zli takun ataa həji ma ŋkula sən Bizlaf səku. Huni ɗiw a zəm ampəs səku, huni ɗiw a zəm zli ndə ampəs a mən səku. Huni ɗiw a ɗal mazheref səku.”» 26A kwaf tə, azha leŋ Pul a daaha həji ma ŋfaɗ watsa aagi abəra, dəba aagi adiw gwaygwaya ta ban dadawər abə təmta, a diwzha tə, tsaw aa nda a jak kwakus, aska a nda ghal vah ta kəɗaŋ gwaygwaya ta ban dadawər, abə ma vah ndə kwa vaye a kaavəla səkən.

Mbəla Pul a jak kwakus

27Wan ma ŋshiliɗ ataa gwaygwaya ta ban dadawər watsa slaɓ a kəɗaŋ, Yahuda ma ndza a hayak Asiya aagi, aa kagəra Pul a jak kwakus. Dəba aagi ahəɗəw ŋgaɓa həji aagi tiwtiw, azha kaw aa mbələ. 28Dəba aagi adza wəla: «Həji Isərayila aagi, huni shaha a lamzani! Tsakwa, ala ma kasərək ma ma ŋkula saɓ abə sərək ataa həji takwa aagi kwa vatəy a həji aagi tiwtiw, zhana parpar abəra ma ma garagar ataa Musa abə ataa jak kwakus watsə! Tazlapatana a həji ma ŋkula ɗa Yahuda aagi aska a ndaha a ɗi, tabəw la ma ghwaɗeɗe watsə ka a la dadawər.» 29Ara ndə a ɗa, a Wərusalima, Yahuda aagi tagəra Turufimus ndə hayak Efesus, a kalah Pul, aa deŋ ka ci, Pul tava a daazə a jak kwakus. 30Həji aagi kahəɗəw ha a hayak ma dzamadzam, azha həji aagi a taha vərəm. Kaw aa mbəla Pul, njiw aa njiwazə a bəza a jak kwakus. A tsutsa a tsutsa, tsak aa tsak majak kwakus watsa ka. 31Həji aagi kagas Pul a dzə ka a mci, ama madagal ma ndza aha suji ma ndza a hayak Ruma aagi, tazlima ma watsa: «Taɓizh tə a Wərusalima tiwtiw.» 32A tsutsa a tsutsa, ya a ya suji aagi abə madagal ma ndza aha suji ma teemeri aagi, dəba aagi ashi ara ŋgaɓa həji watsa aagi. Ndə həji aagi gəra madagal ma ndza aha suji aagi abə suji, mbasl aa mbasl Pul aka a dza. 33Azha, madagal ma ndza aha suji aagi kərəɗ a kərəɗha, kaw a mbəla Pul azha, zlap a zlapatana aska aagi dzaw ka abə sheshili gbak. A diwzha, ɗiw a ɗiwzə, iŋgaya: «Ala watsə vaya? Səkən ndə a ɗal veme?» iy. 34Ama, a taba ŋgaɓa həji watsa aagi, kwa vaye a dzaɓa wəla tə parpar parpar. Mbara azha, madagal ma ndza aha suji aagi tazlima ma ɗa ŋter kwa aka səku, ara ndə həji aagi kaɓam ma dəy, zlap a zlap aska aagi jaɓ Pul ata la ma ɓərɓər. 35Ndə Pul a ɗa gwar ata dibibir ma ndza aska majak ya, səy suji aagi, aa tiwi ara ndə a ɗa, ŋgaɓa həji aagi kagas a dzə ka. 36Ara ndə, manahayak tiwtiw, a diwzha tə, aa kasəbarə abə dza wəla: «Madza ka a mci!» aagiy.

Lamha Pul atama Yahuda aagi

37Tiɗa ndə aa kagas a jaɓ Pul ata la ma ɓərɓər, zlap a zlapanə a madagal ma ndza aha suji aagi, iŋgaya: «Təf aka a sa a zlapzə ma ŋtaguleŋ vəw?» iy. Madagal ma ndza aha suji iŋgaya: «Hwa kasən ma hayak ataa Gərek vəw?» iy. 38Həna hwa ana ala ndə hayak Misəra ndə ma həɗəw həji aagi a wan watsə aɓa wəra? Zhana, həji maskwalay aagi bəluk ŋfaɗ hwa jaɓata ka a damə ata dərzləm wəra? 39Pul a zlap iŋgaya: «Anaka, sa ndə Yahuda, ma ndza a hayak ma dzamadzam Tarsus, ma ndza a hayak Silikiya, hayak ndə kwa vaye a kasən zləm tə, tuh, sa kadzahu ra, vəlaka təf aska sa zlapzə ma naka a həji aagi,» iy. 40Pa madagal ma ndza aha suji aagi a vəlanə təf a zlap. Takaw a gar a wəzəm ata la gar, dəba a azlapatana abə ra a həji aagi. Azha, ɗekɗek aa ndza ta ka, kwa zlap akas, azha Pul dəba a azlapatana abə ma hayak tə, ma ataa hayak Yahuda aagi.

Currently Selected:

Zlən ataa həji ta zlən aagi 21: GOU

Highlight

Copy