Zlən ataa həji ta zlən aagi 23

1Azha Pul a tsatana nja ka a nja həji ma gulakwakw ma zla ma aagi, iŋgaya: «Zlina aagi, abə ŋkwaɓ, kwa gulak akas abə sa ndzaha atama Bizlaf a gwar akacihwa səku.» 2Ama, madagal maɗal kwakus Ananiyas dəba a azlapatana a həji ma huk abəra Pul aagi aska aagi a dzə a ma. 3Pul zlap a zlapanə, azha iŋgaya: «Hwa ana ndə Bizlaf a kaadzə, hwa ala mbəɗku! Hwa ndza a ɗi a zla guma ma ndza ata sa andza ndə a gar ka ana ma ma garagar, səkən ma ŋkula saɓ andza ma ma garagar ya, hwa ana ma kazlap aska aagi adzaka səkwa?» 4Həji ma huk abəra Pul aagi, iŋgaya: «Hwa ra madagal maɗal kwakus Bizlaf!» 5«Sa kasənə a ɗa madagal maɗal kwakus səku zlina aagi, ana Pul abə a zhinatana. Ara ndə taŋtiraya: Hwa aɗiw a ra bay ataa həji kwa aagi səku.»

6Ndə Pul a kasənə a taba həji watsa aagi, ndiɓi aagi Saduki aagi, ndiɓi aagi zhana Farisa aagi, dəba Pul a adza wəla a taba magulakwakw ma zla ma aagi, iŋgaya: «Zlina aagi, sa, sa ndə Farisa, mbə ataa həji Farisa aagi. Sa abə deŋ ŋkwaɓ ya, həji ma bazl ta aagi agara ta a wəzəm a jiɓ, dawna sha abə aa daaka ata guma.» 7Tiɗa ndə Pul a kazlap ma watsa, Farisa aagi abə Saduki aagi tahəɗəw ta, həji ma dzam aka aagi, aa taɓizh ta. 8Ara ndə a ɗa, Saduki aagi aa kazlap, aagi iŋgaya: Kwa həji ma bazl ta aagi kagara a wəzəm a jiɓ akas, matəf Bizlaf akas, miɗ kwa akas, aagiy. Ama, Farisa aagi ana ataa aŋta, deŋ ta tasaɓ abə ataa həji watsa aagi səku. 9Manahayak tiwtiw, aa kadza wəla. Masərək ma ma garagar ndiɓi aagi a taba Farisa aagi takaw aa gar a wəzəm, dəba aagi azlap abə ɓərɓər tə, aagi iŋgaya: «Ni tagəra ya, kwa səkən ma gamak ndə ala watsə a ɗalə akas. Matəf Bizlaf aka səku kata miɗ minja ma ghalanə ma watsa kavəw?» aagiy. 10Ndə aa kavas a həɗəw ta a guɗaŋ ya, madagal ma ndza aha suji taɗal ŋzliŋ aka ara ndə aa kabəl Pul aka dep dep. Dəba a azlapatana azha, a suji aagi aska a nda daaha Pul bəza a taba həji watsa aagi, a jaɓ ka ata la ma ɓərɓər.

11Apat tə abə zaɗə, peteŋ Bay Madagal taa tə ara Pul, zlap a zlapanə, iŋgaya: «Ŋcah kwa dagala! Hwa ana ala ma ghal zlən naka ndə hwa kasənə zhana ndə hwa gəra a ɗi, a Wərusalima. A kaɗiw zhana, hwa ɗa ala ma ghal zlən naka a hayak Ruma yəm.»

Ma tazəvaya ara Yahuda aagi aska Pul

12Ndə la kwaf tə, Yahuda ndiɓi aagi dzəv aa dzəv ma ta ka abə ŋhil. Dəba aagi ameɗ, kwa aa kazəm səkən akas, kwa yəm aa kasə aka səku abə aagi anda a dza Pul ka. 13Həji aagi dəy aha raŋfaɗ ana ma deŋ shiŋ ma watsa. 14Tsaw aa nda ara magulakwakw maɗal kwakus aagi abə magulakwakw ma ndza a hayak aagi, azha dəba aagi azlapatana: «Ni, ni tameɗ aka atama Bizlaf, ni kazəm səkən kwagwa akas, səy ni madza Pul bəza. 15Azha, ata guva kuni abə may ataa magulakwakw ma ndza aha hayak aagi, huni zlapanə a madagal ma ndza aha suji aagi, aska a daahuni Pul, həna huni ɗal, andza laɗiwzə ata səkən ndə a ɗalə ma ɗa ŋter, ataa aŋcini, ni tagar bəza tiw, səy madza ka, tiɗa awli a gwarha a ɗi.» 16Ama, mbə ataa həla mana Pul tazlima dzəv ma watsa bəza, tsaw a nda ata la ma ɓərɓər watsa, ghal a ghalanə ka a Pul. 17Azha, Pul daŋ a yaha suji minja ŋtaguleŋ a taba suji aagi, zlap a zlapanə, iŋgaya: «Lahzə mbə watsə atama madagal ma ndza aha suji aagi: Ma aka ara a ghalanə,» iy. 18Suji watsa lah a lahzə mbə watsa ara madagal ma ndza aha suji aagi, azha iŋgaya: «Ala ma ndza a jak yaka Pul ma yaaka, aska a sa lahazə mbə watsə ara hwa, ma ara aka a ghalahu,» iy. 19Madagal ma ndza aha suji aagi kaw a mbəla mbə watsa ata ra, tsaw aa nda ta a bəza abəra həji aagi, dəba a aɗiwzə, iŋgaya: «Ma ndə hwa kamay a ghalaka veme?» iy. 20Mbə watsa zhin a zhinanə, iŋgaya: «Yahuda ndiɓi aagi tagar bəza aska a ɗiwzahu a daatana Pul a kwaf ara magulakwakw ma zla ma aagi. Həna ci, aa may a tehzə ma tə watsa ŋter, 21ama, hwa ɗiw a ji ma ta səku. Ara ndə a ɗa, həji aagi dəy aha raŋfaɗ ana ma ŋtəv ma bəza aska Pul. Aa tameɗ a bəza atama Bizlaf, kwa aa kazəm səkən akas, kwa yəm aa kasə kwagwa akas, səy aa madza Pul ka. Anawatsə, aa tasla ha bəza tiw, aa teh ma ndə hwa kazlapatana.» 22Azha, madagal ma ndza aha suji aagi, zlap a zlapanə a mbə watsa, iŋgaya: «Ara hwa ghalanə ma watsə ana ala minja,» iy. Azha zlap a zlapanə a nda tə.

Kaɗ Pul a hayak Kaysariya

23Azha, madagal ma ndza aha suji aagi daŋ a yaha suji ndə a tsata ka aha suji ndiɓi aagi gbak, zlap a zlapatana, iŋgaya: «Huni slaha ka aska huni a nda a hayak Kaysariya akaca abə ŋtsəɓahw ata ler dzaŋfaɗ, abə suji aagi teemeri gbak, magəli ma kambir ata dakw aagi raŋshiliɗ, həji ma ndza abə karatas aagi teemeri gbak. 24Huni gasanə dakw a Pul aska lahə abə təwah atama ala ma ndza aha hayak Filikus.» 25Ŋtir a ŋtir ɗerewal, tsakwa ana ma ndza a mən: 26«Kaludiyus Lisiyas, a kazlapzanə a Filikus madagal ma ndza aha hayak. 27Yahuda aagi tambəla ala ndə sa zlənahu watsə bəza, aa may a dzə ka a mci. Azha tsaw sa nda abə suji naka azha sa tapəlaazə bəza, ara ndə, sa zlima a ɗa ndə hayak Ruma. 28Azha dəba sa agas a sənə ara veme abə Yahuda ndiɓi aagi katək ma a heɗe, sa tadaazə ara magulakwakw ma zla ma aagi, atama ta. 29Sa gəra ya, aa kadza səbakw abə tiw Pul ata ma ma garagar ta aagi. Ama, kwa həji tagəra ma ndə a gəy aska dza ka a mci, aka səku a fak ka a jak yaka akas. 30Aa taghalaka ya, həji watsa aagi may a sleŋanə kilŋga. Mavəy sha abə sa zlənahu ala watsə kahkah anawatsə. Sa tazlapatana a həji ma katək ma a heɗe aagi, aska aagi aŋtir han ta atama kwa.»

31Dəba suji aagi aɗal səkən ndə madagal ta a ghalatana. Jaɓ aa jaɓ Pul abə zaɗə, tsalah a Aŋtipatiris. 32Apat tə, suji aagi tsa kazhina ta ata la ma ɓərɓər, mbasl aa mbaslata ka a nda abə həji ma ndza ata dakw aagi. 33Ndə aa ɗa peteŋ a hayak ma dzamadzam Kaysariya, həji ma kambir ata dakw watsa aagi, pa aa vəlanə ɗerewal ma ŋtirha watsa ana ala ma ndza aha hayak, azha leŋ aa daanə Pul. 34Ala ma ndza aha hayak dəba a aya ɗerewal, ɗiw a ɗiwzə hayak ndə Pul a ndaa a bəza a mən, a zlima ya, ndə hayak Silikiya. 35Ala ma ndza aha hayak zlap a zlapanə, iŋgaya: «Sa aɗiwzahu tiɗa ndə həji ma katək ma ata hwa aagi kaɗa a ɗi.» Zlap aska aagi jaɓ Pul aka ata la ndza ataa bay ma dagal Haridus.

Currently Selected:

Zlən ataa həji ta zlən aagi 23: GOU

Highlight

Copy