1 Pédro̱ 4
4
1Numuu rí Krísto̱ nimínu̱u̱ꞌ ná xuyuu ga̱jma̱á numalóꞌ.#4.1 Ríga̱ mbá tikhu i̱yi̱i̱ꞌ griégo̱ rí wayuu ná tsíꞌkha̱ ajngáa ríge̱ꞌ: «ga̱jma̱á numalóꞌ». Ikhaa jngó, ga̱juwa-na̱ma̱ñalaꞌ rí mu̱míni̱í mangáanꞌlaꞌ xómá rí nimínu̱u̱ꞌ Krísto̱. Numuu rí xa̱bo̱ tsí namínu̱u̱ꞌ, niniñuu̱ máꞌ janíí aꞌkhán mangaa. 2Kajngó náxáꞌnii̱ rí nandoo xuyuu̱ awúun mbiꞌi rí xóó xtáa̱ ná tsu̱du̱u̱ numbaa, xómá rí nune̱ jayu xa̱bo̱, rí ma̱ꞌnii̱ i̱ndo̱ó máꞌ rí nandoo Ana̱ꞌlóꞌ. 3Numuu rí mbájndi máꞌ mbiꞌi rí ninújngoo rí ne̱ne̱laꞌ rí nandúún xa̱bo̱ tsí tsíne̱-nuwiin Ana̱ꞌlóꞌ. Ne̱ne̱laꞌ rí xkawe̱ꞌ nu̱ndxa̱ꞌwa̱-mijnálaꞌ, rí xkawe̱ꞌ na̱ni̱gu̱u̱ꞌ xuyalaꞌ. Nijngáanꞌlaꞌ, ninújngo-rámuu ne̱ne̱laꞌ rí nandoo xuyalaꞌ, ninújngo-rámuu nijngáanꞌlaꞌ ná ndxa̱a̱, jamí ne̱ne̱-mbi̱inlaꞌ tsí ra̱ꞌkháa Ana̱ꞌlóꞌ ñajúún. 4Ikhaa jngó, namakúún xa̱bo̱ tsí tsíne̱-nuwiin Ana̱ꞌlóꞌ e̱ne̱laꞌ rí xúge̱ꞌ, numuu rí nánguá máꞌ e̱ne̱laꞌ rí xkawe̱ꞌ xómá rí nuni̱i̱ ikhii̱n, jamí nuthan-xkawia̱ꞌlaꞌ. 5Xómáꞌ ikhii̱n mu̱riꞌñee̱ ga̱jma̱á numuu rí nini̱i̱ ná inuu tsí xtáa na̱ma̱ñuu rí ma̱ꞌne-mbánuu numúú xa̱bo̱ tsí nduya jamí tsí nijáñúú máꞌ. 6Numuu rí ikhaa máꞌ numuu rúꞌkhue̱n waꞌthán-rúꞌúún ajngáa máján xa̱bo̱ tsí nijáñúú máꞌ xúge̱ꞌ, kajngó mbuyee̱ ga̱jma̱á majñu̱u̱ Xu̱u̱ꞌ Ana̱ꞌlóꞌ, maske máꞌ xa̱bo̱ ná numbaa ríge̱ꞌ ni̱ra̱jwe̱e̱ꞌ rí gíꞌmii̱ aꞌkhán.
Ga̱jmalaꞌ rí nixnálaꞌ Ana̱ꞌlóꞌ rí mu̱ne̱-mba̱ꞌwu̱unlaꞌ xa̱bo̱
7Inu máꞌ ma̱ga̱nú mbiꞌi rí ma̱mbá mbá xúgíí rí ríga̱ ná inuu numbaa. Ikhaa jngó, gu̱ndxa̱ꞌwa̱-mijná májánlaꞌ rí mu̱ne̱laꞌ, kajngó mu̱xúni̱ꞌñáálaꞌ rí nu̱tha̱n-jáñíílaꞌ Ana̱ꞌlóꞌ. 8Phú i̱tha̱án máꞌ gíꞌdoo numuu rí ma̱galaꞌ ju̱ya̱-mijnálaꞌ. Numuu rí phú mbaꞌa aꞌkhán najúgoo xí nandalóꞌ juꞌya-mijnálóꞌ. 9Gagi a̱kia̱nꞌlaꞌ gúdrígú-mijnálaꞌ ná guꞌwálaꞌ. 10Mbámbáa gáꞌne-mba̱ꞌwu̱un i̱ꞌwíin xa̱bo̱ ga̱jma̱á majñu̱u̱ rí nijanáá neꞌne Ana̱ꞌlóꞌ. Xkuaꞌnii kajngó ma̱nindxa̱ꞌlaꞌ xa̱bo̱ tsí najmúú mújúún jamí nu̱ña̱wa̱án mbaꞌa inii rí naxná Ana̱ꞌlóꞌ. 11Xí mbáa nijanáá rí maꞌthán, gaꞌthée̱n xómá rí nijanáa̱ maꞌthée̱n neꞌne Ana̱ꞌlóꞌ. Xí mbáa naꞌne-mba̱ꞌwu̱un xa̱bo̱, ga̱ꞌne-mba̱ꞌwii̱n ga̱jma̱á tsiakhe̱ rí naxná Ana̱ꞌlóꞌ, kajngó mbá xúgíí rí na̱gu̱ma ma̱ꞌne-mba̱a̱ Ana̱ꞌlóꞌ ga̱jma̱á majñu̱u̱ Jesukrísto̱. Ikhaa̱ jaꞌyoo rí ma̱gu̱ma-mba̱a̱ jamí maꞌthán-ñájwii̱n jámuu mbiꞌi. Xkuaꞌnii gáꞌne.
Ga̱ꞌdxu a̱kia̱nꞌlaꞌ numuu rí nu̱míni̱ílaꞌ ga̱jma̱á nindxu̱u̱ Krísto̱
12A̱ngui̱nꞌ, ma̱xámakualaꞌ gáꞌne gaꞌkho̱ rí na̱ꞌkha̱ inalaꞌ kajngó ma̱kujma xí ma̱ꞌnga̱ꞌlaꞌ, numuu rí ra̱ꞌkhá máꞌ i̱ndo̱ó ikháanꞌlaꞌ nu̱gíꞌníílaꞌ rúꞌkhue̱n. 13A̱ꞌkhue̱n gakon, ga̱ꞌdxu a̱kia̱nꞌlaꞌ numuu rí nu̱míni̱ílaꞌ ga̱jma̱á nindxu̱u̱ Krísto̱, kajngó phú ma̱ꞌdxu a̱kia̱nꞌlaꞌ mangáanꞌlaꞌ ído̱ rí ma̱ꞌkhaa̱ ga̱jma̱á mbá xúgíí ski̱yu̱u̱ꞌ ná numbaa. 14Phú gagi juwalaꞌ xí nuthan-xkawia̱ꞌlaꞌ xa̱bo̱ ga̱jma̱á numuu Krísto̱, numuu rí Xu̱u̱ꞌ Ana̱ꞌlóꞌ tsí phú wáá xtáa̱ ná awúun a̱kia̱nꞌlaꞌ. Gakon máꞌ rí ikhii̱n nuthan-xkawíi̱ꞌ Ana̱ꞌlóꞌ, xómáꞌ ikháanꞌlaꞌ ndu̱ya̱-makuíi̱laꞌ.#4.14 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Gakon máꞌ rí ikhii̱n nuthan-xkawíi̱ꞌ Ana̱ꞌlóꞌ, xómáꞌ ikháanꞌlaꞌ ndu̱ya̱makuíi̱laꞌ». 15Ikhaa jngó, nimbáa tsí ikháanꞌlaꞌ ra̱jáꞌyoo rí mamínu̱u̱ꞌ ga̱jma̱á numuu rí nixíya̱a̱ xa̱bo̱, o neꞌne-kúwa̱ꞌ, o naꞌne rí ra̱máján, o numuu rí naxúda-mina̱ꞌ ná na̱nguá jaꞌyoo mbo̱ꞌ. 16I̱ndo̱ó máꞌ numuu rí, xí mbáa namínu̱u̱ꞌ ga̱jma̱á numuu rí ninindxu̱u̱ꞌ tsí na̱ka̱ tsu̱du̱u̱ Krísto̱ rá, ma̱xáti̱yu̱u̱ꞌ, rí ga̱ꞌne-mba̱a̱ Ana̱ꞌlóꞌ numuu rí jayée̱ mbiꞌyuu Krísto̱. 17Numuu rí ni̱ga̱nú máꞌ mbiꞌi rí magíꞌdu̱u̱n ma̱ra̱jwa̱ꞌ Ana̱ꞌlóꞌ ga̱jma̱á numúú tsí ñajúún xa̱bii̱. Jamí xí xkuaꞌnii nagíꞌdu̱u̱n na̱ra̱jwe̱e̱ꞌ ga̱jma̱á numalóꞌ ikháánꞌlóꞌ ginii jayu, dí lá gágíꞌníí xa̱bo̱ tsí tsíñúú gánimbu̱únꞌ ajngáa máján drígo̱o̱ Ana̱ꞌlóꞌ rá. 18Xúꞌkhue̱n máꞌ mangaa,
«Xí ga̱jma̱á kháan najríya̱a̱ꞌ xa̱bo̱ tsí naꞌne rí máján,
dí lá gágíꞌnuu xa̱bo̱ tsí na̱nguá eꞌne-mba̱a̱ Ana̱ꞌlóꞌ jamí xa̱bo̱ aꞌkhán rá».
19Ikhaa jngó, tsí nu̱míni̱í ga̱jma̱á numuu rí xkuaꞌnii nandoo Ana̱ꞌlóꞌ, guni̱i̱ rí máján, jamí gu̱ni̱ꞌñá-mijnée̱ ná ñawúun Ana̱ꞌlóꞌ tsí neꞌne-ku̱mii̱, numuu rí ikhaa̱ phú jmbii̱.
Currently Selected:
1 Pédro̱ 4: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
